جمعــــــــــــــــــــــــــــــــــــــــــة الكفن

Quote: أبها الثوار ... أيها الأحرار موعدنا الجمعة ان شاء الله للخروج في أكبر تظاهرة لاسترداد جميع الحقوق ودفع الظلم ودك حصون هذا النظام الذي بات لا يبالي بحرمة اعراض او دماء او دين وهاهو ###### النظام المدعو نافع يخرج ليصرح بان اسعار البنزين سترتفع مرة أخرى والماعاجبو يشيل كفنو وينزل الشارع في تحدي آخر اكثر وقاحة من سابقين ونحن نقول لنافع بتنا لا نملك حتى ثمن الكفن لنحمله معنا ولكنا سنخرج يوم الجمعة القادم لنثبت لجميع العال باننا لم نعد نهاب الموت بل مرحبا بالموت فقد بات غايتنا وشعارنا فاما حياة تسر الشهيد واما ممات يكيد العدا انشر ...احشد ... ادعو جميع معارفك شييييير ياجماعة دايرنها تصل للجميع

Quote: جمعة_الكفن نافع يدعوكم للعودة الى ثورتكم .هل ؟ انتم جاهزون دعاء ###### النظام المسعور جماهير الشعب السودانى الى تحدى من نوع جديد ..كما نصح ###### النظام القاتل الراغبين فى التظاهر والاحتجاج ان لا ينسوا شراء وتفصيل .وحمل اكفانهم .معهم رد الناشطين :: فى جميع انحاء الوطن رد عاجل ...ودعوا الى احتشادات ومظاهرات لكل شعب السودان يوم الجمعة القادمة نساء اطفال شيوخ شباب كنداكات الكل بدون فرز الجمعة يانافع أليس الجمعة بقريبه

Quote: سنخرج الجمعة في كل انحاء السودان نساءنا قبل رجالنا واطفالنا قبل كبارنا سنخرج سوف نملاء الشوارع ضجيج باصواتنا التي اقوي من رصاصهم باصواتنا التي تخيفهم وترعبهم لابد من الخروج من هذا الصمت لابد من الخروج من اجل الدين الذي ضاع لابد من الخروج من الاجل الوطن الذي ضاع لابد من الخروج من اجل الشهداء الذين قتلو برصاص الامن من اجلنا لابد من الخروج من اجل المعتقلين الذيت اعتقلو من اجلنا لابد من الخروج ضد نظام الجوع نظام الفقر نظام الفساد نظام القتل لا للخوف مكان بيننا سنخرج وسنظل في الشوارع ولو استمرت الثورة 100عام ولو سقط منا 10000شهيد سنبقي في الشوارع امالشهادة اما النصر ماشين في السكة نمد #كــــــــــفايـــــــة

فوووووووووووووووووووووووووووووووووووق

سلامات يامواطن

المؤسف انو حتى المبادرة بقت يدهم وخلّوا لينا رد الفعل
حتى تسمية الجمعات تعتمد على تصريحات نافع!!

Quote: متضامنون مع بهرام عبدالمنعم‏ دعوة للتظاهر السلمي يوم الجمعة 8 نوفمبر من الجامع الكبير الخرطوم عقب صلاة الجمعة وبدء التظاهرات الليلية بارجاء البلاد . الثورة عشاني وعشانك وعشان الشهداء عشان الطالب الما لاقي حق الفطور عشان امي وامك وابوي وابوك المشرورين وراجين المواصلات من اجل ان نؤكد للكيزان والعالم انو الدم السوداني ما رخيص عشان الدواء الغالي عشان العيشة البقت ما بتشبع شافع عشان التعليم الاصبح تجارة عشان الكيزان الاصبحوا مواطنين درجة اولي وباقي الشعب خدم ليهم الثورة من اجل دماء الشهداء السالت من اجل اهلنا الفي دارفور التمت ابادتهم وعشان المناصير الدمهم روي ارض السودان عشان جنوبنا الحبيب الطلع من حضن الوطن عشان حلايب وعشان الفشقة ، حنثور عشان نعيش حياة افضل لينا ولي اجيالنا ونحافظ علي وطن يعي معني كلمة مواطن ويحافظ علي دم اولادو حنثور لانو في تاريخ السودان الحديث ما حصلت عمليات نهب وفساد منظم مثل الحاصل الان ، حنثور لانو نحن ما رضعنا لبن الخوف رضعتنا مهيرة الرجولة والبطولة حنثور لاننا احفاد رجال في حضرة جلالهم ترك الشموس ، الدعوة لكنداكات السودان في كل بقاع الوطن الحبيب ما يفوتكم شرف الثورة والدعوة لكل ثوار وطني علمو الكيزان معني كلمة سودان قولو ليهم نحن دمنا ما رخيص ودم هزاع وصلاح سنهوري وكل الشهداء دا دمنا والدم ما ببقي موية نظموا الصفوف وسدوا الفرقة واكيد النصر للاحرار دعوة لكل الاجهزة الامنية والشرطية والجيش نحن اخوانك ويانا اولاد جيرانكم واهلكم ما تلوثوا ايديكم بدماء الابرياء عشان الناس الفوق يسفوا ويسرقوا قروش البلد لو ما بتقدر تخالف التعليمات اعمل هروب من الخدمة او شيل اورنيك والجمرة الواطيها الشعب هي نفس الجمرة الواطنها انتو الدعوة لكل الضباط الاحرار والشرفاء علي امتداد الوطن الحبيب احموا ثورة الشعب وارادة الامة السودانية التي اختارت التغيير ،و ندعوا كل الصفحات الثورية علي الانترنت المشاركة بالدعوة للتظاهر السلمي يوم الجمعة القادم 8 نوفمبر من الجامع الكبير الخرطوم وتنظيم مظاهرات ليلية بالاحياء واعملو شير لصورة البروفايل انا مشروع شهيد ، نتقدم بالدعوة لكل التنظيمات السياسية والاحزاب السودانية الثورة دي حقتنا كلنا كسودانيين من اجل ان نبني وطن ديمقراطي حر خالي من الحرامية والمنتفعين ثورتنا من اجل سودان افضل وطن يسع الجميع موحد سودان مثل صحن الصيني لافيهو شق ولا طق كما قال الزعيم الازهري ابو الوطنية . حنثور عشان عيون اطفالنا ما تضوق الهزيمة .

سلام الاخ أسامة , سوف تنخفض أسعار قماش الكفن وذلك تضامن تجار أقمشة الكفن مع الثوار.
ناس نافع ديل بجيبوهم من وين ؟
طوالي بشيلوا أصابعهم وبتبظوا بيها عيونهم..

الاخ اسامه
لك التحيه ولكل شرفاء بلادى
لنمضى قدما لاكمال ما خطه الشهداء
ولنردد مع صلاح احمد ابراهيم

اخر العمر قصير ام طويل
كفن من طرف السوق
وشبر فى المقابر
فهلمى يا منايانا جحافل
تجدينا لك انداد المحافل
القرى منا وفينا لك
والديوان حافل

وليعلم نافع انه بقوله هذا قد حفر قبره واعد كفنه

لك التحيه

Quote: اخر العمر قصير ام طويل كفن من طرف السوق وشبر فى المقابر فهلمى يا منايانا جحافل تجدينا لك انداد المحافل القرى منا وفينا لك والديوان حافل

سلامات اسامة بابكر.
الدعوة للخروج للشارع عبر الانترنت فقط وبدون تنسيق اثبتت فشلها الذريع. الخرطوم وباقى مدن السودان الكبيرة استخدام النت مقصور للقلة فقط.
فى مصر لا تخلو عمارة من سلك لتوصيل الانترنت (عبر المشاركة فى راوتر واحد) مما يجعل سعر الاشتراك فى النت زهيدا. رغم ذلك لم يكتفى المصريون بالانترنت فقط للدعوة لجمعة الغضب ولم تكن الدعوة فى لحظات حرجة. بل قبل ايام وايام صار حديث الشارع والمقاهى والجامعات أن جمعة الغضب هى الحاسمة. الاعلام الشفوى هو الانجع (دة يكلم دة ودة يكلم دة) وفعال جدا فى مجتمع السودان المترابط. ومن شرطه المهلة الزمنية الكافية يعنى ممكن شهر. ومن المهم جدا التنسيق فلا يكفى الدعوة لخروج الناس من شخص واحد أو جهة حزبية أو سياسية واحدة.
رغم ذلك انا من دعاة انتظار الفرصة القادمة والتى ستكون القاصمة (الزيادة القادمة للوقود)..

Quote: المؤسف انو حتى المبادرة بقت يدهم وخلّوا لينا رد الفعل حتى تسمية الجمعات تعتمد على تصريحات نافع!!

عزيزي البشري لا يهم من أي أتت المبادرة و لا التسميات إنما فعاليتها والمآلات والنتائج
الثورات ليست لها طريقة او نهج محدد
فالثورة السورية -مثلا- بغض النظر عن مآلاتها بدت عندما بدأ اطفال مدرسة ابتدائية نائية بمجرد محاكاة لثورات الربيع
والثورة الليبية انطلاقتها كانت عندما اعتقلت نظام القذافي محامي شهداء بوسليم (1250 سجين قتلوا عام 1996)


تحياتي لك ولاسامة وللحضور

تحياتي هيثم
يبدو خانني التعبير ولم أوصل فكرتي كما يجب, المؤسف في رأيي أن كل الظروف الموضوعية للثورة على النظام متوفرة من غبن ناتج عن الظلم و القهر و القتل و ظروف اقتصادية سيئة ناتجة ايضا عن اسباب للنظام القدح المعلى فيها من فساد وسوء إدارة وانعدام تخطيط و علاقات دولية تمر بأسوأ محطاتها على مر تاريخنا
فبرغم توفر كل هذه الأسباب نحتاج لأحد تصريحات نافع المستفزة لنوقد جذوة الثورة المفروض متقدة أصلا

________________________________________________________
طبعا دا كلام من يده في الماء وقاعد برة ما عارف ظروف الناس شنو ولا عاش الإرهاب و الضرب بغرض القتل الشافوه وعاشوه الشباب في الخرطوم, وما مفروض نقوله, لكن قهرنا من عجزنا عن فعل شيئ إيجابي

سلام أسامة

ياخ عنوانك الممطوط دا لخبط علينا الشاشات