قص ليهو قصة !

وتظل اللعبة
ولكن
يتغير اللاعبون

القص ياهو القص
قص سياسي
قص عاطفي
قص تجاري
شاكوش يزحلقك ويضرب بيك الدلجة

اها ده بوست انصرافي
ماعندو اي علاقة بالقص السياسي ,, الليلة وزير بكرة غفير وبالعكس
ولا بالقص التجاري من دكان ضلفتين ورخصة استيراد وتصدير لي زول لافي ساي وبالعكس
من ساكن بيت حدادي مدادي يقصو ليك وبالقانون كمان يخلوك تفوت اولادك زاتهم
اها جنس الفوق ده مكانو ونسة الناس في بيوت البكيات والمناسبات ,, والناس كلها عارفه ,, وعارفه القص قبل ما يقع المقص
يقول ليك سيد فلان قاصي لسيد فرتكان
وسيد فرتكان عارف كدة , وهو زاتو قاصي قص دفوعي هجومي
والواصل يملا شبكتو
ويقعد التاني في علبو واللهي نفس علبهم كلها
ملحوظة
علبة هنا اناء من المعدن وليس ديك يا ناااااااس

اها ده عن القص العاطفي
زي ما قالو
تحب انت و يخش غيرك
رغما انو مرات في حتات كده يتماهي مع القص السياسي والتجاري
قالو العريس اخوهو ضابط

في قصص قص تاريخي , لكن بنجليها , بخلو القصة القاصة ويمسكو في اسم القاص او المقصوص والموضوع يجر , ونبقي في
دحشة ووالدة

والقص بجيك من اقرب الناس
صاحبك
اخوك
ومرات ابوك زاتو يقص ليك لامن راسك يلف
والقص ماعندو علاقة بالشاكوش
فالشاكوش عمل فردي
اما القص فهي مؤامرة

الابو مشي يخطب لولدو ,, الابو من اثري اثرياء القرية
مشي للناس وأكرموهو غاية الإكرام ,, قال ليهم
انا جيتكم كايس مخلط معاكم
قالو ليهو حبابك , لكن مخلطك لي منو وفي منو
قال ليهم
داير فلانة بت فلان لي ولدي
والناس نجاض ,, عينهم في الشدرة الكبيرة ,, يمسكو ليهم في فرع !
قال ليهو
نحن بندور مخلط معاك انت ده ,, وياكا النسيب البتشرف
عمك مشي خاطب وجا راجع طابق مرتو في اباطو

من الفيس
حبابك يوسف محمد
وشرفت حرم
ما تجيب لي الهوا الساخن ياخ ( وش غامز بالعين الشمال ! )
ده بوست انصرافي ساي
او كما قيل ( برضو وش لكن ساخر )

اها جنس قصة الابو دي حارة
ابوك ,, وربنا بسألك منو ,, وما بسألو منك ,,, وينط ليك واحد قرأ قليلا من الدين وكثيرا من الجدل يقول ليك
انت ومالك لأبيك
فتاكلا في حنانك والقلب موجوع