الكشه...لازم تكون حريف في الجري والمحاوره

أحمد دوكه ..جاي السعوديه عمره ربنا وفقو في مدينة صغيره اشتغل مع باكستان في مجال البناء العملية مشت معاهو لملم ليهو قروش كثيرة قال إطور اعمالو
مشي جدة بواسطة واحد قريبو شارك ليهو سعودي في محل مقاولات صغير الامور برضو مشت معاهو تمام في التمام لدرجة تلقاهو قاعد بره المحل في كرسي وخالف كراعو
جمبهم مطعم يوم سمع ليك شكله مدوره في المطعم لفح العمه وقال إتاوق اشوف الحاصل لقاهم سودانيين بشاكلو الراجل قعد احجز فيهم
لسؤ حظ السودانيين دوريات الشرطه قريبه من المحل كبسو عليهم وصاحبنا في نصهم شغال حجازه ((يا جماعه باركوها .... يا جماعه باركوها... يا جماااااااعه باركوهاااااااااا))
ناس الشرطه شافو الزول اتخمخم بالعمه واقابض في الناس اول زول سألوأحمد دوكه : إنت يا باركوها فين الاقامة ؟؟؟؟
عينك ماتشوف الي النور باركوها حسي ببيع ليمون في سوق مدني !!!

زول لينا من اهلنا ناس الجزيرة جابو اخوهو بي فيزا تربية مواشي شغال عال العال إحمد سيدو إلقط في الريالات عايز اشتري ليهو بوكس وارجع
لمو فيهو اولادالحـــرام ساقوهو الاسواق اتفرج في الجكس.
شاف ليهو واحده لابسه عباية فاكاها من قدام تتجدع بالنطلون والشعر اطاير بي مشاغلة ناس الجزيرة ضمه كفة يدو ودقه بيها سدرو وقال ليها ((أحي انا منك)) ع
ليك امان الله يدو ما فكاها كان في بورتسودان.
الزولة طلعت صاحبة سمو !!!!!!

واحد شغال في الصناعيه تحت العربية ما جايب خبر ، الكشه كبست الجماعه كلهم فكو البيرق قامو جاريين هو جري اخر واحد ناس الشرطه اعتبروهو الصيده السمينه جرو وراهو
الراجل مسي بتاع الارجنتين زواغ زواغه وكرعينو ختاها ليك في رقبتو لما حير ليك ناس الشرطه
انطلقت وراهو الدوريات كابس ليك الشوارع الضيقه ناس الشرطه جاهزين بالمواتر برضو جاريين وراهو شاف ليك جبل عالي قال : ساوي الى جبل يعصمني.
بالله عربات الجيب اتشعلقت قبل ما اطلع وإتحاوطو ليك الراجل لبسوهو الاساور ((ال######شات)).
عاين ليهم بي مغسه وحرقه قال ليهم ..... خلاس مسكتو بن لادن فرحانيين كده !!!

Quote: بالله عربات الجيب اتشعلقت قبل ما اطلع وإتحاوطو ليك الراجل لبسوهو الاساور ((ال######شات)). عاين ليهم بي مغسه وحرقه قال ليهم ..... خلاس مسكتو بن لادن فرحانيين كده !!!

ههههههههههههههههه ههههههههههههههههههههه مبالغة يا الدسيس ان قابلتك كشة فى البوست دى ما تقيف

هههههههههههههههههههههههههههههه

حرام عليك ياخى
ديل ناس مساكين دعوهم يعيشوا
الله ينعل الانقاذ واليوم الاسود الجابن السودان

أهدروا كرامة الزول السوداني

Quote: ههههههههههههههههه ههههههههههههههههههههه مبالغة يا الدسيس ان قابلتك كشة فى البوست دى ما تقيف

سامي يا حبيبنا سلام وتحية
عجبتك .....
اصبر لي شوية اكون فاضي واقول ليك حكاية الهندي بتاع المكتبة
تحياتي وتقديري

Quote: هههههههههههههههههههههههههههههه حرام عليك ياخى ديل ناس مساكين دعوهم يعيشوا الله ينعل الانقاذ واليوم الاسود الجابن السودان أهدروا كرامة الزول السوداني

سلام يا دكتورة
لو قلته ليك ما بتصدقي في ناس هنا من جيت حكومة البشير تاني ما رجعو والغريبه عمرة واحد قلت ليهو ما عايز ترجع تعمل ليك بيت و ل اي حاجة للزمن؟؟؟
قال لي: يا زول بيت شنو مع الناس ديل تبني ليك اوضين اشيلو منك ضرائب وعوايد اكثر من سعر البناء وفي النهاية كان الله طيرم ورجعته تلقي البيت وقع و ل شالو السيل احنا خلاس البلد دي ما بنفوتا تب كان موتنا الشبر بيابو لينا بيهو ؟؟؟
قلته ليهو لا..... قال لي خلاس احنا ناس شبر بس ، الاراضي خليناها لي ناس نافع بعد اموتو الاشيلوها معاهم.
شوفتي حالات الياس بقت كيف.

يا عبس .. سلام ..

نحمد الله كشتنا كشة وطنية ,,
إلزامية
ناس المحلية
انت واقف في الصف ومؤدب !
ياخي خشيت اقول سلام ولقيتا شويه قلت النزيدها

حبيبنا الما منظور ينسانا عبس وييييييييييييين يا حبيب كل سنة وانت والاسرة بالف خير ياخ .. اها قلت لي الكشة دي كيف معاكم غايتو لو جاتكم اطلع في المسجد الجنبكم ده الحبه ما بتجيك ,, لكن نحن لو جاتنا نطلع وييييين نحن هسة اقرب لينا السما من الارض غايتو ربك يهون بس ,,
غايتو يا عبس انا الاسبوع الفات جيت من السودان لكن شكلي خلاص حا اعمل خروج نهائي منو لانو الحال بطال شديد والناس عايشة بي قدرت قادر والله ,, الله يكون في عونهم ,,,
على العموم واصل من غير فواصل ونحن منتظرين نعاين ولا خبر ولا بريدو باين ,,,, لغاية ما نتلاقى ,,


تحياتي : ياسر العيلفون

Quote: يا عبس .. سلام ..

محمد مجيدو
سلام يا حبيبنا
بكون مره عليك الفيديو بتاع الهنود

Quote: نحمد الله كشتنا كشة وطنية ,, إلزامية ناس المحلية انت واقف في الصف ومؤدب ! ياخي خشيت اقول سلام ولقيتا شويه قلت النزيدها

ود ابوسن سلام يا حبيبنا
ما بتقصر والله
كشات بره العذاء فيها ما بتزعلك لانو عارف البلد هنا ما بلدك
اما كشات السودان بتحرق قلبك مع الاستفزازات
ياخ انا لي حسي حكاية الصالح العام ما طلعت مني
تحياتي وتقديري

الهندي بتاع المكتبة:
قبل ما نقول حكاية الهندي امس اتصلت علي واحد أكلمو بي زول صاحبنا رقد المستشفي وتعبان.
السلام عليكم ياخ فلان راقد مستشفي ما كلموك بمرك بعدين نمشي ليهو...
رد علي: يا زول لا تمرني لا حاجة انت صاحبك ده المرة الفاتت وقت الكشات رقد مستشفي مشينا نتلبت ليهو زي الحرامية حسي برضو رقد موقت مع الكشات و ل شنو ، والله لو لحق امات طه وقالو مودنو المقابر ما عندي بيهو شغله !!!
الزول حالف قبل ما اموت اجيب اجلنا خلي اتكل علي الله وافرتق....
_______________________________________________________
مكتبة هندي جارنا مكره الاولاد بي المشاكل.
لو اشتريت منو حاجة ومشيت وجيت ما برجعها ولو الزول بفتش ليهو في حاجة في المكتبه إنهرو ...يلا سديق بي سرعة ايش هذا انت نوم... المشكله هي المكتبه الوحيده القريبه لينا والاولاد طلباتهم كثيرة كل يوم عندي بروجكت ما عارف قالو لينا جيبو شنو أها لو شديت معاهو في الشكله طوالي اجري لي التلفون .... سديق انت يبقي جنجال ((شكله)) أنا الهين ((الحين)) جيب شرطه الراجل كبسور الهنود كلمتين والثانية اهدد بالشرطه الناس تجر واطي.
الكشات الاولي قبل المهلة الولد مشي المكتبه لقاها قافلة سال قالو ليهو الهندي من سمع بي الكشات قفل ومشي...
امس المغرب مشيت مع الولد اشتري حاجات بالزجاج لقيت ليك الهندي منطط عيونو ومن القلق اتوطح بي الكرسي جاء علي بالي مشاكلو والقطماة بتاعتو البعمل فيها مع الاولاد وقفت علي بعد مترين من الباب وقلته بصوت عالي ... شرطه شرطه شرطة.
الهندي من الارتباك وبطوطح بي الكرسي وقع علي ضهرو في الواطه ااتنفض زي الكديس قام علي حيلو وكابس باب الزجاج قلته راسو اتكسر جاء جاري بره المكتبه عاين يمين شمال مافي حاجة الشارع هادي عاين لي وقال:
سديق انت ليش سوي كده هذا هرام ((حرام)) والله أنا دوعاء انت لي الله بعدين مافي كويس.
ود ام زقده ما عامل بتهددنا بي الشرطه زمان !!!!!!!!!

عمك كافل ليهو خمسة سودانيين طالقوم يلقطو رزقهم
قبال يومين مشو ليهو يشوف ليهم حل

عندو مزرعة وهو مرضان كوتشينه جاب ليهو جوز نضيف
وقاليهم يلا نشتغل حريق لامن ربنا يفرجها

عليكم الفول والعدس وماتشيلو هم الخبز

حكاية مولانا الامام:
النصيحه لي الله قالوها لي:
مولانا شغال في معارض السيارات والسكن مع العذابه قريب من محل الشغل.
مولانا من تحت مقصر الجلابيه ومن فوق مطول الدقن ، معارض السيارات الناس بتصلي في محلها مجموعه اقيمت الصلاة والجماعه يلا يا مولانه ارح صلي بينا اتقدم الجماعه وكبر.
في السجود وراسو ماشي علي الواطه مولانا كحل بي طرف عينو جيب الشرطه براحه طبق المركوب بتاعو وشتت خلي ليك الجماعه مكابسين الواطه وبالباب الوراء جري للشقه بحزر في العذابة قال ليهم الكشه جات كنا بنصلي مرقنا منهم الله سجدته بي الجماعه ربك رب الخير قوي بصيرتي شوفتهم طوالي جيت جاري!!!
سألوهوك والجماعه المعاك عملو شنو خليتهم ساجدين وزغته ؟؟؟
قال ليهم: انشاءالله لي السنة الجاية ما اقومو منها شغلتي بيهم شنو....

Quote: حبيبنا الما منظور ينسانا عبس وييييييييييييين يا حبيب كل سنة وانت والاسرة بالف خير ياخ .. اها قلت لي الكشة دي كيف معاكم غايتو لو جاتكم اطلع في المسجد الجنبكم ده الحبه ما بتجيك ,, لكن نحن لو جاتنا نطلع وييييين نحن هسة اقرب لينا السما من الارض غايتو ربك يهون بس ,, غايتو يا عبس انا الاسبوع الفات جيت من السودان لكن شكلي خلاص حا اعمل خروج نهائي منو لانو الحال بطال شديد والناس عايشة بي قدرت قادر والله ,, الله يكون في عونهم ,,, على العموم واصل من غير فواصل ونحن منتظرين نعاين ولا خبر ولا بريدو باين ,,,, لغاية ما نتلاقى ,, تحياتي : ياسر العيلفون

حبيبنا الفنان ياسر اخبارك يا صديق
تحياتي ليك وللاسرة الكريمة
يا زول مساجد شنو احنا ناس من دخل بيت ابي سفيان فهو أمن تذكر العقيد جارنا بتاع المشاكل بقي صاحبنا المسجد ما مضمون
حكاية السودان من اول قلنا ليك الحب طريقو صعب رقبة ما عندنا ليها شعر وشيلنا الفاتح من زمان
البت يا الحبيب الي ان يفعل الله امرا كان مقدرا
تحياتي وتقديري

في ايام المحن العامة في بلاد الغربة لو دقشته بيوت العذابه بتلقي الكوميديا ختفته رجلى ومشيت لي اهلنا ناس الجزيرة العذابة.
محمد ود طه جاب ود اختو معاهو بي فيزا تربية مواشي وهو راجل ما بتاع شدايد ولا بتاع مشاكل جنو وجن شرطه أو لخبته وكلام في السياسة
ليهو حادثه قديمة خلتو اتوب توبه نصوحه ،
يحكي ليهو ود اخو تاني في الجامعه مع الشييوعين زمن نميري والوقت داك كان هو مزهو بي شبابو امن نميري يوم كابسو الحلة افتشو لي ود اخو وهجمو البيت النسوان ضربن الكواريك
ختف عكازو وجاء جاري وقت لقي الناس شايلين كلاشات وبنادق اخذ ليهو وقفه بعيد وقعد اورور بي عكازو .... ها ناس شنو الحكاية انتو قايلين البلد ما فيها رجال...
كسرو ليهو عكازو ورفعوهو في البوكس ما فكوهو الي بعد اربعة شهور من ديك الراجل خشمو عليهو ، لو اتكلمت في الحكومة خلاس خسرتو عندو جملة واحدة ماسك فيها ((الحالة في السودان كعبه طب اخير منها الزول اخمج الطين)).
كان يوم راكب معاي العربية وواحد سعودي دخل في الشارع غلط ضايقتو بالعربية واتكلم لوحدي والله الليلة لو كتبوها ليك ما تمشي....
عاين لي وقال: ها الشريف بدور تضايق الناس في بلدي الكلام ده عيب ما تجيب لينا المشاكل بعد فوتنا من الراجل دخلنا بي شارع ضيق قلت ليهو الشارع زفت كلو حفر بالله دي طريقه .
رد لي ...ها زول الشارع الليلك و ل حق جدك مالك وحفر الناس إن ما داير تمشي فيهو خليهو بدور تجيب لنا كلام سياسة في صمة خشمونا بلد شواعا زي المرايا تقول حفر ....
من ديك قال انا بتاع مشاكل بتكلم في السياسة ((الحفر)) وبشاكل ناس البلد.
دخلت عليهم في بيت العذابه لقيت ليك الشباب جايطين في كورة المريخ ونيل الحصاحيصا ... والله نحشكم حش... يا زول تحشو شنو النيل الليلة فرمالتكم... متزعم النقاش ود اخوهو وهو راقد خالف كراعو....
أول فتحت خشمو... يا الشريف بالله شوف الناس في شنو والحسانيه في شنو البلد قايمة وقاعده بالكشات والجنا ده ((إقصد ود اخوهو)) إلعلع اتقول عندو التابعية ((الجنسية))
التفت لي ود اخوهو :ها جنا هه هوستنا المريخ النيل الصباح والضحوية نيل اطلع منو تمساح ياكل راسك المدوقس ده ، الإسمع صوتك تكورك اقول فالحا زي الرجال اقامتك ليها خمسة سنوات ما مجدده وكفيلك ما معروف حي و ل في الترب.
الولد زعل سكت من الكلام وقال ليهم خلاس شغلو لينا التلفزيون عشان نشوف لينا فلم أو مسلسل.
محمد ود طه : ها جنا اهدوك من الدواحه تبيت بره اعصابنا تلفانه من الكشات ما تصن لينا اضانا واك واك واك من الكورة للتلفزيون إتا والله من ما جبناك وحرسته التلفزيون تتابع ليك في مسلسل مكسيكي وقت انتهي لقينا اقامتك انتهت قلته الجنا ما نجيض صم خشيمك الزي طاحونة الحجر خلي الواطه تروق كان هي اصلا معكره.
وقت شوفتا الجو مكهرب قلتها امشي منهم ..يلا يا جماعه مع السلامة....
محمد وطه : تتضرع ساااااكت ما طابق اقامتك مجدده وشغال مع شركتك.... نطه ود اختو يا خال امشي اجيب ليكم معاهو فول للعشاء.
محمد ود طه: ها جنا العشا الإلقوك مكنكش في سريك كان نرتاح منك بدور تمرق كان قبضوك تجيبهم لينا وتجي اصلك مسنوح وحاسد ما بترجع براك كان ما خميتنا معاك نوم انوم فيك قندراني شايل سيخ

الحبيب الحبيب عباس الدسيس ..
والله اشتقنا لي جدعاتك الحلوة وقصصك الما بتنمل ..
الواحد بقى يتمنى يشوفك يا حبيب والله ويقعد معاك ويتسامر ..
ربنا يمتعك بالصحة والعافية وتحياتي للأسرة الكريمة ..

ربنا يجيبنا ليكم عمرة ياخي ..

عباس ...ود مدني ....الحكاي
كل سنة وانت طيب ياخي
قطعت قلب الهندي بتاع المكتبة ....بااااااااااااااالغت فيها غايتو
هاك دي:
قالو في جدة الدورية مسكت مصري وسوداني العساكر اتعاطفو مع السوداني
وحبو يفكوهو والمصري ياخدوهو
قامو مشو بيهم جمب محل فوال سوداني وقالو ليهو:
يا زول جيبلنا فول وتميس وادوهو عشراية
وبعد دا اتقدمو بالدورية شوية عشان يدوهو فرصه (ينحاش)
وشوية شوية بعدو من محل الفول عشان يكملو التمثيلية على المصري
بعد ما بقو بعيدين مسافة زي الف متر يلقوا ليك الزول جاي شايل الفول
وجاري ...وبقول ليهم ما لقيت تميس جبت عيش مفرود !!!
قام العسكري قاليهو:
مفرود !!!!؟؟؟؟ ايييييييييه ...طيب اطلع ...اركب اركب بس
طبعاً انت اوراقك ظابطة بس بقول ليك زي ما قال حسن عثمان رزق للتلفزيون لما
كان وزير الشباب والرياضة وعندنا المباراة مع نيجيريا لو اتعادلنا معاها نمشي كاس العالم
(الناس الفي البيوت يساعدونا بي ياسين)
طبعاً اتغلبنا اربعة صفر
ادي الناس يس بالله بس ما تكون (إصلاحية) يا عبس

الزول دقس

الصورة المعبرة اسمها الزول دقس جاتني في الفيس بوك لافه في الاسافير ، رغم عن الراجل لابس البشت والعقال السعودي الجماعه قبضو
غايتو الشافو اناحي في الضبان بميناء سواكن ما كضب

Quote: الحبيب الحبيب عباس الدسيس .. والله اشتقنا لي جدعاتك الحلوة وقصصك الما بتنمل .. الواحد بقى يتمنى يشوفك يا حبيب والله ويقعد معاك ويتسامر .. ربنا يمتعك بالصحة والعافية وتحياتي للأسرة الكريمة .. ربنا يجيبنا ليكم عمرة ياخي ..

حبينا هشام كمال عبادي
سلام وتحية .... اخبارك
والله احنا امنيتنا نلاقيك ونسولف معاك
عليك الله لو جيت زيارة او عمره تمرنا في الرياض
قول لي عوك وبجدع ليك الجوال اصل انت اطراف الرياض وانا بصلك
اصلو ما تخاف المدام زولة بتاعت ضيفان عندها كل ارقام هواتف ناس اتصل ونحن نصل
تحياتي وتقديري

Quote: عباس ...ود مدني ....الحكاي كل سنة وانت طيب ياخي قطعت قلب الهندي بتاع المكتبة ....بااااااااااااااالغت فيها غايتو هاك دي: قالو في جدة الدورية مسكت مصري وسوداني العساكر اتعاطفو مع السوداني وحبو يفكوهو والمصري ياخدوهو قامو مشو بيهم جمب محل فوال سوداني وقالو ليهو: يا زول جيبلنا فول وتميس وادوهو عشراية وبعد دا اتقدمو بالدورية شوية عشان يدوهو فرصه (ينحاش) وشوية شوية بعدو من محل الفول عشان يكملو التمثيلية على المصري بعد ما بقو بعيدين مسافة زي الف متر يلقوا ليك الزول جاي شايل الفول وجاري ...وبقول ليهم ما لقيت تميس جبت عيش مفرود !!! قام العسكري قاليهو: مفرود !!!!؟؟؟؟ ايييييييييه ...طيب اطلع ...اركب اركب بس طبعاً انت اوراقك ظابطة بس بقول ليك زي ما قال حسن عثمان رزق للتلفزيون لما كان وزير الشباب والرياضة وعندنا المباراة مع نيجيريا لو اتعادلنا معاها نمشي كاس العالم (الناس الفي البيوت يساعدونا بي ياسين) طبعاً اتغلبنا اربعة صفر ادي الناس يس بالله بس ما تكون (إصلاحية) يا عبس

أوووووووو حبيبنا الطاهر بدر
سلام وتحية وكيف احوال الاسرة الكريمة
قدر ما نقول نلاقيك في زقاقات سودانيز شركنا ما اقبض
احوالك واخبارك يا زول يا راقي
زولك والله بالغ اكون متخيل اشغلو معاهم رجع ليهم بي صحن الفول
بمناسبة ((يسن )) واحد في المحلات التحت عمارتنا بتكلم معاي امورو مطينة وشغال بتاع كاشير رجل بسيط
سالتو الاحوال كيف يا زول اعمل حسابك وفتح عينينك زي الريال ابوعشرة
قال لي : غايتو خليها علي الله لكن امس في واحد قال لي عندو زول بكتب حجاب للكشات
قلته ليهو يا زول خليك في كشاتك وابعد من الحجبات وقطع الرقبة ...
غايتو الله احفظ الناس واكون في عونها

Quote: Jalal M Jad · الأكثر تعليقا · Jeddah, Saudi Arabia قطعت مصارينا بالضحك

شاكر ومنون للمتابعة يا حبيبنا
مع تحياتي وتقديري

هههههههههههههههههه والله بالغتى لكن يا الدسيس

خليتنى اضحك زى المجنونة


بوست لذيذ مبالغة

Quote: هههههههههههههههههه والله بالغتى لكن يا الدسيس خليتنى اضحك زى المجنونة بوست لذيذ مبالغة

سلام يا دكتورة
سعيد جدا بمتابعتك وامنياتي طوال تكوني مبسوطه

انتو ناس قطر مرتاحين قالو تعدادكم كلو ما يفوت 700 الف مواطن قطري .
المصريين من النكات البقولها عن قطر:

أمير قطر زار الصين
سأله الرئيس الصينى : ماعدد سكان قطر؟
قاله :700 ألف
رد عليه الرئيس الصينى: قاله يارااااااااااااااااااااااجل
طب ماجبتهمش يتعشوا معاك ليه

Quote: السعودية تعتزم ابعاد 300 الف سودانى فشلوا فى توفيق اوضاعهم فشل نحو (300) ألف سوداني بالمملكة العربية السعودية في توفيق أوضاعهم للعمل بالمملكة خلال المهلة التي منحتها السلطات السعودية للعمالة الأجنبية لتصحيح أوضاعهم بالعمل لدى كفلائهم الأصليين أو الانتقال لكفالة مؤسسات أخرى. ووصل الى ميناء بورتسودان نحو (900) سوداني. بينما لم تعر الحكومة اهتماماً بالأمر حسبما نقلت صحيفة (الخرطوم) الصادرة بالخرطوم الثلاثاء نقلا عن مصادر حكومية مطلعة، وقالت أن الدولة منصرفة الى همومها الاقتصادية ولا يوجد اتجاه في الوقت الراهن لتوفيق أوضاع هؤلاء العائدين. واستبعدت استيعابهم في أي وظائف بالدولة، ولاسيما أن غالبية العائدين كانوا يعملون في وظائف يدوية ـ تأشيرات حرة ـ وليس لديهم خبرات في مجالات متخصصة. إلا أن ذات المصادر توقعت أن يتم استيعابهم في مجال الزراعة أو الرعي خصوصاً أن غالبية العاملين بهاتين الحرفتين هجروهما الى التعدين العشوائي. وتسعي السلطات السعودية بشكل جاد إلى ترحيل المخالفين بعد أن أخطرت كافة القنصليات بضرورة الإسراع في ترحيل رعاياها المخالفين ومنحتهم مكاتب خاصة لاستخراج تأشيرات اضطرارية.

محاولة مخالفين الهرب بمنفذ الطوال دون تبصيم

هروب جماعي لعمالة مخالفة في شوارع الرياض

د كاملي، عمر عريبي- سبق- جازان: حصلت "سبق"، اليوم الثلاثاء، على مقطعي فيديو يظهران هروب المئات من مخالفي نظامي الإقامة والعمل من مركز حرس الحدود بمحافظة الطوال الحدودية، جنوب منطقة جازان.

وتسبّب المخالفون في فوضى عارمة، صباح اليوم، بمنفذ "الطوال" في "جازان" لرغبتهم في الخروج بطريقةٍ غير نظاميةٍ دون التقيُّد بإجراءات البصمة.

وأكدت قيادة حرس الحدود بجازان أنها تمكنت من القبض على أكثر من "8000" مخالف لنظام الإقامة والعمل خلال الأربع والعشرين ساعة التي تلت فترة انتهاء مهلة تصحيح الأوضاع للعمالة بالمملكة.

وأوضح الناطق الإعلامي بقيادة حرس الحدود بمنطقة جازان العميد عبدالله بن محمد بن محفوظ أنه تم تسجيل توافد عدد كبير من جنسيات مختلفة على الحدود محاولين استغلال الظرف والمكان للخروج بطريقة غير شرعية إلا أن رجال حرس الحدود كانوا لهم بالمرصاد للقبض عليهم.

وبين أنه تبين بعد أخذ بصماتهم أن بينهم من لا يقيمون بطريقة رسمية ومخالفين لنظام الإقامة والعمل، ومنهم من يحمل إقامات ويرغب في الخروج ومطلوبون للجهات الرسمية إثر قضايا عليهم، مشدداً على أنه يتم تقديم جميع الخدمات التي يحتاجونها من إعاشة ورعاية صحية طيلة فترة بقائهم لإنهاء إجراءات خروجهم.

وأشار الى أنه في صباح اليوم وأثناء إنهاء إجراءات مجموعة كبيرة منهم لترحيلهم حاول عدد كبير الإفلات والخروج عنوة هروباً من البصمة بتسلق أحد أسوار قطاع حرس الحدود بمحافظة الطوال المجاور للمنفذ، وبناءً على ذلك قام قائد حرس الحدود بالمنطقة اللواء عبدالعزيز بن محمد الصبحي بمتابعة الموضوع وتقديم الدعم الكافي من الدوريات من قيادة المنطقة والقطاعات المجاورة لمواجهة هذا التدفق ومنعهم من الوصول للمنطقة الحدودية ومنفذ الطوال وقد أعيدوا في وقت وجيز داخل القطاع وفُرضت السيطرة الأمنية وإنهاء الإجراءات الأمنية بحقهم ومن ثم ترحيلهم.

وأكد أنه بعد تطبيق نظام البصمة تم اكتشاف الكثير من المخالفين من جنسيات مختلفة، يرغبون في المغادرة وهم مطلوبون في قضايا متنوعة، مفيداً أن من بينهم من كان يحمل إقامة لكنه مطلوب للجهات الرسمية إثر مخالفات أوقعها ويرغب الإفلات منها وهؤلاء سيحالون قريباً للجهات المعنية لاتخاذ اللازم حيالهم بعد تطبيق نظام أمن الحدود عليهم ولن يكون في ذلك أي تهاون.

واختتم الناطق الإعلامي بحرس الحدود بجازان تصريحه، مفيداً أنه تم ترحيل ما يقارب 3000 شخص خلال الأربع والعشرين ساعة الماضية، فيما لايزال هناك قرابة 5000 شخص يقوم حرس الحدود بإجراء البصمة لهم وإنهاء إجراءات مغادرتهم والعمل على ترحيلهم على مدار الساعة.

Quote: ياسر منصور عثمان

حبيبنا ياسر سلام وتحية
مشكور علي المساهمة والاضافة
مع خالص التقدير

عباس الدسيس ...يا اخي ربي يديك الصحة والعافية

ضحكتنا اضحك الله سنك دوما