#الهترشة_ليلاً_ودون_إضاءة

محاضرة اليوم:

"تصنيف الشعب السوداني"
قال ليك البلد دي فيها الفئات الآتية:

فيها أسياد و أشراف و ناس وجاهات و مناصب
و ناس تشوفهم تقول الله غالب!!

و ناس عندهم ضهر و عايشين في سرور
و ناس ضايعين و ضهرم مكسور

و ناس بتآكل خمسة وجبات
و ناس بتآكل من النفايات

و ناس عايشة و ناس دايشة
و ناس مهمّشة و ناس مفنَّشة
و ناس معفشّة

و جماعة متدينين و عارفين أصول الدِين
و جماعة متدينين وما قادرين يكفّوا حق الدَين

و ناس بيتاجروا بالدقون
و ناس عايشين على الاغاشة و العون

و شباب واعي و عنده هدف
و شباب باع القضية و الفيهو اتعرف

و ناس طاشّة و ناس كاشّة
و ناس ما عارفة وين ماشّة

و ناس شطحوا و خربوا البلد
و ناس طفشوا و خلّوا ليهم البلد

و بنات همهن النضافة و الكريمات
و بنات ناضلن و ما خافن المعتقلات

و شباب عاطل و شباب ساطل
و شباب ما فاهم الحاصل

و شباب مفلّس و شباب مركلس

و مواطن مناضل و صالح
و مواطن أناني و بتاع مصالح

و مواطن مشغول في النهضة و التطوير
و مواطن فالح في التنظير

و نسوان في القهاوي و الجَبَنات
و أمهات بالشاي و القهوة صرفن على الوليدات..

انتهت محاضرة اليوم ,,
* الواجب المنزلي:
س سؤال: تعتقد أنك تنتمي لأي فئة من الفئات السابقة؟ مع التعليل