النوبيون يطالبون بالانفصال.........

مهددون دائما بالزوال ومناطقنا مهددة بالاغراق وتراثنا مهدد بالانقراض والكوارث تحيط بنا من حدب وصوب ......وباقي السودان لا يهتم بنا
ولا يشعر بنا......


وعليه أليس من حقنا ان نطالب بدولة مستقلة لنحمي حقوقنا بأنفسناولا نكون في وضع الاحتياج للآخرين؟

التجاهل ليس وليد اليوم فعمره الآن قد تخطي عامه الخمسون

منذ كارثة وادي حلفا

قضايانا.....كوارثنا......اوجاعنا......آلامنا......


لا يحس بها غيرنا ولا نجد اي عزاء او مشاركة او مواساة من بني جلدتنا من السودانيين وكأننا من كوكب آخر

اين المشكلة؟

فيكم ام فينا؟

نعم هناك شللية في سودانيزاونلاين


ولكن هل حتي في القضايا القومية؟

تقولون اننا عنصريون

نقول نعم!!!!

ولكن بأي مفهوم؟
نحن عنصريون بحبنا لبعضنا البعض وبتكافلنا وتعاضدنا ونقف مع الحق حتي لو كان علينا
ولكن كاذب من ادعي بأننا نلفظ الآخر او نتجني عليه او نظلمه

إذن فما المشكلة في هذا؟

الما عاجبكم شنو فينا يا ناس سودانيزاولاين وبقية السودانيين؟


كل ما نجده منكم التريقة علينا لعدم إجادتنا للغة العربية؟ وحبك النكات عنا في هذا الشأن؟

رفيقة النضال الكنداكة فريدة. نعم اتفق معك ولكن جزئيا .

وهذا السؤال سبق وان طرح هنا في هذا المنتدي .

أما فيما يخص قضية السدود
وقضية آثار سد مروي المدمرة
والخطر الذي يهدد المنطقة النوبية بل والولاية الشمالية بأكملها والذي طرح علي انه يهدد آثار حضارة كرمة وكوش متمثلة في آثار الدفوفة غربها وشرقها فانا اجزم أنها مشكلة وخطر يجب ان يهم ويحرك كل سوداني مخلص وليس النوبيين فقط

ومن واجبنا نحن ان نطرح هذه القضايا باعتبارها قضايا تهم ويجب ان تكون كذلك كل السودانيين وليس النوبيين فقط إذن علينا ان نطرحها وفق هذا الفهم ،

شكرا اخي الجميل مميد

نعم اتفق معك ووالله بعد كتابة مداخلتي للاخ بتغيير العنوان وتوجيه النداء لكل السودانيين علق النت بتاعي ولم تر المداخلة بتاعتي النور
وقلت اكتبها مرة اخري


إذا طرح الموضوع قبل كدا .....ماذا كانت اجابة السودانيين؟

اتمني ان تمدني بتلفون الاخ صلاح في السودان ولك مني كل الشكر


كن بعافية

سلام يا فريدة
اهلنا النوبة من انقى واجمل الناس
هم بوابتي التي دخلت منها الحزب في قصة كتبتها هنا ذات مرة
المشكلة البلد لقت كلها نوبة في حجم الكوارث التي احاطت بشعبنا




----------------
واحد من اهلك في حلفا امام جامع
عمرو كلو بصلي بالناس بي سورة واااااااحدة
في اي صلاة يقرا ليهم الهاكم التكاثر
لمن اتوفى ودفنوه ولدو بقى الخليفة .. يصلي بالجماعة
اول سورة قراها التين والزيتون
حلفاوي من الصفوف الخلفية قطع الصلاة وقال ليه:
ايوه كده يا تامر ابوك شابكنا السنة كلها : هاكم التذاكر روحو المقابر
لمن راح

هههههههههههههه

نكتة ظريفة جدا اشكرك عليها

وشكرا كتير وممنونين علي الكلام الجميل في حقنا ونسأل الله العون في شأن الوطن

ولكن استميحك عذرا واوجه السؤال لك مباشرة.....ما سبب هذا التجاهل في رأيك؟

يا ريت القي الرابط لقصتك لأقرأها فأنا احب ان اقرأ عن كل ما يتعلق بأهلي وناسي


فتك بعافية يا سيدي

قالوا السكوت من علامات الرضا ...
للأســف كل الحكومات المتعاقبة إستحلت أراضي النوبيين ...
وإستقلت طيبتهم وعدم الإعتراض على تهميشهم ...
وكانت البداية دمار تاريخ السودان في حلفا لـ صالح المصريين..
مروراً بتهجير سكان المنطقة ليس داخل السودان فحسب بل بالخارج أيضاً...
أول السودانيين الذين عرفوا الاغتراب في الخليج والهجرة لاوربا ومريكا قسراً ...
بسبب عدم وجود أبسط مقومات الحياة في منطقتهم من خدمات وحتي الموجودة الآن هي
بفعل الجمعيات النوبية في الخليج واوربا فهي التي أنشئت المدراس والمراكز الصحية
حتي رواتب العاملين الشهرية من صندوق التبرعات !!!
وطريق التحدي الذي تفتخر به الحكومة هو الآخــر من عرق جبين النوبيين ...
الراحل أروك طون أروك عندما زار الشمال ووجدهُ من بؤس وعدم تنمية
قال : " أنتو ما عندكم غابة"
والآن الحكومـة تواصل المسير بخطي ثابتة وممنهجة لـ دمار ما تبقي من التاريخ
النوبي ببناء السدود لاغراق ما تبقي من مدن ومعالم نوبية ...
أنا في حيرة من أمري لم تجد مصر على طول نيلها مكان سوي إغراق حلفا
ولم أجد ما يبرر موافقة حكومة السودان على هذا الدمار سوي التأكيد على
إزالة هذه الحضارة من خارطة السودان فهي الأخري لم تجد من النيل او النيل
الازرق والابيض مكاناً سوي هذه المنطقة لـ بناء السدود...
مثلما دمرت أشجار النخيل التي كانت رمزاً لـ إنسان هذه المنطقة ...
لاتعجبي أختي الفاضلة من عدم تجاوب وتعاطف الآخــرين مع هذه القضايا ...
هي سياسة دولة لـ مسح هذه المنطقة بالكامل بما فيها من تاريخ وحضارة
وقبول النوبيين دائماً بهذا الواقع وصوتهم لم يصل بعد إلي آذان إلي قبيلة
سودانيز أون لاين وقبائل أخــري طرفية ...

لك أجمل تحية أيتها الفريدة فريدة على هذا السفر الجميل

الأخت / فريده
لك اجمل التحايا ...
اولاً .. اود أن أشكرك على هذا البوست ..
ثانيا ... التجاهل يافريده ليس هنا فقط ... !!!! التجاهل بدأ منذ أن تم توقيع اتفاقيه مياه النيل بين حكومة السودان ومصر ... الاتفاقيه التى منحت الأخيره الحق فى بناء السد العالى
اهلنا النوبيون عارضوا ... ولكن .. كانوا لوحدهم .. !!! لم تقف معهم اى حكومه ... !!! وخلينا من الحكومات ..... لا يوجد أى حزب من الأحزاب تبنى قضية النوبه .. !!!

والآن .. !!! السدود ستقضى على الأخضر واليابس .. !!!

النوبه لها رب يحميها ..

شكرا فريده

Quote: تقولون اننا عنصريون نقول نعم!!!! ولكن بأي مفهوم؟ نحن عنصريون بحبنا لبعضنا البعض وبتكافلنا وتعاضدنا ونقف مع الحق حتي لو كان علينا ولكن كاذب من ادعي بأننا نلفظ الآخر او نتجني عليه او نظلمه إذن فما المشكلة في هذا؟

تسلمي يا بنت العم

فلوشة يا بت عمي الناطقة بغيرها
السودان كله عايش في كوارث
فعلينا ان نتناسى ولو لحين النعرة الجهوية
ولنوحد جهودنا لانقاذ ما تبقى من السودان
عشان كل كوارث السودان تتحلى ويسير الفردا منا آمنا من حلفا الى نمولي
( مازلت اطع في الوحدة الطوعية)

الحل الوحيد استفتاء تقرير المصير لقيام الدولة النوبية

مش كده يا ناصر .......طوالي ....اتفق معك تماما



تسلم يا سيدي ولك التحية والتقدير

up

back sooooooooooon

صالح سلمان ود عمي السمح الزين
يا صالح كوارث السودان جديدة لنج مقارنة بكوارثنا ومع ذلك صبرنا صبر ايوب وادرنا دفة حياتنا بمفردنا وتحملنا تبعات هذه الكوارث التي تسبب
فيها حكام السودان ممن لا ضمائر ولا اخلاق لهم وبمساندة قلة قليلة من النوبيين ولكنا نجد ان الكيل قد طفح ولم يعد بمقدورنا تحمل المزيد والنوبة
تضيع من ايدينا فكان لزاما علينا ان نتحرك وننقذها .......سؤال آخير يا صالح

ألا تنطبق علينا نفس المعايير والاسباب التي ادت الي انفصال الجنوب؟

وتسلم انت يا ابن عمي العزيز ترهاقا


ومعا وسويا لرد حقوقنا وإقامة دولتنا





آفيلوقو

الاعزاء السر جميل وصابر

السلام عليكم

اتفق معكم في كل ما ذهبتم اليه وهو صحيح مئة بالمئة وبالتالي هو ادعي للمناداة بالانفصال

أليس كذلك؟؟؟

السودان كلو نوبيين
من حلفا لاخر محل في السودان
معاً سوياً لاعادة التاهيل

مسكاقرو وو فيسل هليلكو

Quote: السودان كلو نوبيين من حلفا لاخر محل في السودان

وون تلا منا؟ اين هؤلاء؟ وما دورهم فيما حدث ويحدث لنا؟




شكرا يا امير علي المرور

الاستاذة فريدة تحية واحترام

ما اظن ما تبقى من الوطن عندو المقدرة على تحمل اي انفصال وحتى ما تبقى من اقاليم ليس بها مقومات الدولة ،،
نحن الان في حوجة لأعادة اللحمة ومعالجة الغبن لكل اقاليم الوطن وهي تعرضت جميعها للغبن والكساد
في الشمال في الوسط في دارفور في النيل الازرق وجبال النوبة كما في الشرق ،
-------------------------
الان مفروض التفكير الجمعي يكون في ازالة مسبب الشقاق والفرقة وظهور النزعات الجهوية والاثنية المسبب هو المؤتمر اللاوطني
وبعد ان ينزاح هذا الكابوس يمكن الناس ترجع لايام زمان
----------
مودتي

Quote: ما اظن ما تبقى من الوطن عندو المقدرة على تحمل اي انفصال وحتى ما تبقى من اقاليم ليس بها مقومات الدولة ،،

ياخ علي يعني انت شايف انو السودان عندها مقومات دولة

والله أحسن نعيش في الجبال والوديان ونأكل من ثمرة الأشجار من العيش

جنة ونحن نشعر بالظلم ومحاولة طمس الهوية والتهجير القسري

الاخت فريدة ... سلام و لعلك بخير ...
موضوعك ده كبير و متشعب ... و يا إما في خلل بائن في طرحك للموضوع أو أنا ما فهمت مقصودك ... لانو ربط الانفصال ب-(( تجاهل قبيلة سودانيزاونلاين وبقية السودانيين الا من قلة كوارث النوبيين ولا تجد بوستاتهم صدي)) فيهو إبتذال شديد للموضوع !!
من ناحية تانية ... البلد دي ناسها كلهم موجوعين و حاسين بالتهميش و بتجاهل الباقيين لقضاياهم ... و إن شئتي التأكد فاسئلي ناس الشرق و الغرب !!
و لو كان الانفصال حل أو خطوة في سبيل حياة أفضل للمواطنين فمرحبا به ... لكن الواقع يكذب هذا الكلام ...و رغم إنو التهميش و الظلم الواقع على الناس و المناطق خشم بيوت، إلا إنو حاصل و واقع لكل الناس و كل المناطق ...
يبقى أول بند في سكة إصلاح البلد دي بيبدأ باسقاط هذا النظام لانو سبب أساسي للتخلف الاحنا عايشين فيهو ده و بالتالي ما ممكن يكون سبب في الاصلاح ... و إسقاط النظام لعله اسهل جزء من سكة إصلاح حال البلاد و العباد .. في السكة دي ذاتها لازم تجي مرحلة بتاعة فهم قومي لمشاكلنا و مرقة من اللباس العنصري و الجهوي اللابسنو معظمنا ... و في نفس السكة لازم تجي حبة عماقة تمنع دعاوى لانفصال جزء عزيز من الوطن لانو أعضاء منتدى حوار إسفيري في مكان ما من الشبكة العنكبوتية .... ما متجاوبين بما فيه الكفاية مع بوستات و كوارث هذا الجزء العزيز من الوطن ... و كوني بخير

الاخ امين
السلام عليكم

كان موضوع البوست تجاهل قبيلة سودانيزاونلاين الي الخ ولكن علمت من الاخ محمد ان الموضوع نوقش في هذا المنبر من قبل ولذلك عدلت الموضوع وطرحت موضوع الانفصال لانه يرتبط ايضا بالتهميش من الانظمة التي حكمت وتحكم السودان ومن شعبه ونسيت ان اعدل ذلك في اول مداخلة لي فلكم العتبي......


حتي لا اكرر نفسي فقط اشير الي ان تهميشناوتجاهلنا وغيره من السياسات الاقصائية لنا سبقت كل جهات السودان مقارنة لما قدمناه كنوبيين لكل السودان ولعل ابرزها ان لنا القدح المعلي في التعليم وازالة الجهل من ربوع السودان المختلفة ولكن ماذا كانت النتيجة؟

الناس في باقي المناطق لم تحس بالتهميش والاهمال الا في ظل هذا النظام القمئ ولذلك بدأت تتفهم معني هذه الكلمات التي لم تكن ترد في حياتهم في السابق......المشكلة يا سيدي ان الشعب السوداني نفسه لا يحس ولا يتعاطف مع مشاكلنا وكوارثنا......يعني مش بس الانظمة.....وهذا ما يفاقم احساسنا بالظلم ومن هنا كانت مناداتنا بالانفصال....

لك مودتي وشكري

Quote: ياخ علي يعني انت شايف انو السودان عندها مقومات دولة والله أحسن نعيش في الجبال والوديان ونأكل من ثمرة الأشجار من العيش جنة ونحن نشعر بالظلم ومحاولة طمس الهوية والتهجير القسري

الاخ ناصر تحياتي

لا يا صديق السودان فيه مقومات دولة عظمة مش دولة هينة ،، ولكن هؤلاء الاقزام اختصروه في حزب وحاولوا يلبسوا الوطن في جلباب حزبهم المهتريء
ولكن تأكد بأفول نجمهم هؤلاء الافاكين ثق الوطن عندو المقدرة لجمع هذه الفسيفساء في تناغم تام من غير اي نشاز كما كنا قرونا
قمنا في مدينتنا و جيراننا من كل الوطن تداخلنا في الافراح والاتراح وتناسبنا دما ولحما ، ولكن الان هناك كره وتباغض وشعور بالجهوية طغى بصورة واضحة واحيانا فاضحة والسبب الاول والاخير هم هؤلاء اصحاب الاجندة الغير وطنية ،
كل ما تشعرون به كلنا نشعر به وكأنها حالة مرض معدي انتاب كل ارجاء الوطن ،
ومصيرنا نوصل لمرادنا اذا جعلنا الهدف الوطن الكبير
مودتي

الاخ الكريم علي دفع الله

السلام عليكم

لم اكن في يوم من الايام انفصالية او ادعو للإنفصال ولكن التهميش المتعمد والممتد بالاضافة الي تجاهل باقي السودانيين لقضايا وكوارثنا جعلنا نفكر في الانفصال فلربماانصلح الحال والمآل......مين عارف

نعم كل الاقاليم تعرضت للتهميش والاهمال ولكن هذا حديثا اما نحن فمنذ زمن طويل ونحن نعاني ونتحمل منذ الهجرة المشئومة الي خشم القربة والتي وقف فيها كل السودانيين مكتوفي الايدي ولم يحاولوا مساندتنا او الوقوف بجانبنا ووطننا الغالي يذبح في محراب الانبطاح لمصر واستمر المسلسل الي يومنا هذا

Quote: وبعد ان ينزاح هذا الكابوس يمكن الناس ترجع لايام زمان

نعم لابد ان نزيح هذا الكابوس مهما كان الثمن ولكن ايام زمان يا تا......نحن ما من زمااااااان بنعاني ولا حد سائل فينا!!!!!

كن بخير بارك الله فينا وفيكم

الاخت فريدة .. والمتداخلون... السلام عليكم ....

الحكومه الحالية لا تفاوض ولا تهتم الا لمن حمل السلاح ضدها ...
ونحنا لو ما اظهرنا قوتنا لهذه الحكومه .... حقنا برووح ...
وشوفوا كيف اهل الغرب .. لما حملوا السلاح ضدها..
بدأت الحكومه في النظر الى مطالبهم .. شيئاً... فشيئاً
وقسمت دارفور وكردفان الى عدة ولايات وصلت الى خمسه .. لمزيد من التنميه ...
والمنطقة الشمالية تعد اكبر مساحه من دارفور وكردفان ( كما قدرها )
ولكن وبالرغم من كده مازالت ولاية واحده ...
لماذا ..؟؟؟
لاننا ساكتين ... ومسالمين .. و لا نقول للحكومه انتي مقصره وغلطانه ....
لذلك لابد من المطالبة بحقوقنا كاملة دون خوف او تردد ...
وخير مثال .. اهلنا لما وقفوا وقفة رجل واحد ضد قيام سد كجبار
تراجعت الحكومه ....
الموضوع شيق وطويل ...

تحياتي ,,

محمد عبد المجيد

Quote: كل ما نجده منكم التريقة علينا لعدم إجادتنا للغة العربية؟

فريدة مسكاقمى

الحمدلله لسنا من العرب ولو كنا كذلك لازداد تريقة العرب العرب علينا كما
هو الحال على العرب المستعربة في السودان ..

بقوة مع الانفصال على ان يتم انشاء دولة كوش العظمى بالاتحاد مع دولة الجنوب

بسم الله الرحمن الرحيم
الاخت / فريدة
تحية طيبة
عارفة لو كل اهل الهامش طالبوا بالانفصال لانو عندهم
مشاكل ومافى زول جايب خبرهم من اهل السودان .. ما
حا يكون فى باقى من دولة السودان الحالية الا الخرطوم ..
والدليل على ذلك ان التهميش وغياب التنمية يطال جميع
ولايات السودان ..
ولو عايزة تتاكدى اكتر شوفى حالنا فى شرق السودان
وصل لى وين .. هل تصدقى ان الناس هنا بتموت باعداد
كبيرة جداً مش بسبب الحروب والرصاص .. بل بسبب
والجوع والامراض المصاحبة لسوء التغذية ونسبة الوفيات
بين الاطفال تحتل المقدمة .. عندنا ناس عايشين خارج اطار
الحضارة .. لابعرفو كهرباء لا حنفيات مياه ولا الرغيف
الحاف ده حتى .. يعنى مقومات المطالبة بالانفصال مافى
زول بلحقنا فيها .. وتجاهل مشاكلنا لا يحتاج لدليل ..
اذاً هل المطالبة بالانفصال هى الحل ..
لآ اعتقد .. فالدولة الجديدة تحتاج لمقومات حتى تتكون وتنجح
ومن اهم هذه المقومات الموارد .. وهذا ما لا يتوفر فى معظم
اقاليم السودان بصورة تكفى لقيام دولة .. فالولاية الشمالية مثلاً
تممتلك موارد زراعية ( ارض وماء ) ولكن لتصبح مورد اقتصادى
تحتاج لكثير من الصرف لتطوير البنى التى تحتاجها الزراعة .. بالاضافة
للذهب .. ولكنها فى المقابل لا تملك منفذاً بحرياً تتواصل به مع العالم الخارجى
لتصدير منتجاتها واسيراد احتياجاتها وستكون تحت رحمة اما مصر او شرق
السودان والاقاليم التى تقع بينهما .. واذا جينا لشرق السودان فوضعه افضل
نسبياً من حيث الموارد ( ميناء + موارد بحرية بما فيها البترول والغاز + موارد
زراعية من كسلا وحتى الخيارى ) .. ولكنه ايضاً سيعانى فى حالة الانفصال من
المشاكل والنزاعات القبلية التى زرعتها هذه الحكومة بصورة كريهة ومنفرة وبذلك
سيفقد احد اهمم مقومات الدولة وهو الاستقرار ..
الخلاصة انو الانفصال ليس هو الحل فالسودان دولة تتمتع بموارد هائلة وخلاصها
فى ذهاب هذا النظام والعممل على ترسيخ نظام ديمقراطى يتيح الاستقرار للبلد ومن
ثم العمل على استغلال موارده المهدرة اما بسبب الفساد او سوء التخطيط والادارة
وتنمية بقاعه شتى بصورة متوازنة تضمن لسكانه حياة كريمة ..
لذلك اختى خيار الانفصال ليس خياراً ذكياً او منطقياً لكل مهمش والا لكنا الاولى به
فى شرق السودان ..


تقديرى

ارتيقا

السلام عليكم اخي مجيدو

طيب رأيك شنو؟

نشيل السلاح؟

ولا الانفصال ؟

ولا الاثنين معا؟

نوري النظام دا قوتنا كيف ونرد حقوقنا كيف؟


مع التحية والتقدير

مسكاقرو اختى الفاضلة فريدة
للنوبيين وللبجا وكل اهل الهامش قضايا عادلة يطالب بها منذ عشرات السنين ووالله العظيم رغم اظهارى للتهميش المتعمد لاهل الشرق عبر كل الانظمة لم انسى بتاتا قضايا اهلى النوبيين ( حلفاويين وسكوت ومحس ودناقلة ) ولم انسى شهدائهم فى كجبار ولم انسى قضية ( الاسبتس ) فى قرى حلفا الجديدة واشياء كثيرة جدا من الحين والاخر اطرحها لك كل الحق فيما قلتى وكما قال اخى ارتيقا لو طالب كل المهمشين بالانفصال لن يتبقى لهم سوى الخرطوم ليحكموها
كل احترامى

الاخت فريدة و ضيوفك الكرام

لا أحد يمكن أن ينسى الظلم الذي وقع على أهلنا النوبيين، لكن هل الحل هو انفصالهم
لا أعتقد، لانو حال السودان ما انعدل لمن تولوه سودانيين
و كذلك حال النوبيين لن ينصلح اذا تولوه نوبيين، ببساطة
لأنه حتى الظلم اللي وقع عليهم كان من رئيس نوبي
و نميري ايضا كان نوبي و لم ينصلح حال النوبيين في عهده كثيرا

اعتقد أن كلام محمد جلال محمد هاشم في الصميم و هو يقول
أن التهميش سلطوي و ليس جغرافي، يعني أنه اي زوول
بيصل الحكم بيظلم الناس، و كلام جون قرنق برضوا كان شبيه
حيث قال السؤال مش ننقذ السودان من منو بل ننقذو من شنو

لب المسألة أنه على الجميع العمل من الهامش و المركز في
خلق البديل الديمقراطي و الدفاع عنه حتى تصبح السلطة
تعبر عن الناس، لأنه المسألة مش بالاشخاص بل بنظام الحكم
و بعداك لو كان على رأس الحكومة شمالي أو جنوبي ما بفرق
زي الخواجات مثلا.

و الله يهون القواس
تحياتي
أخوك امجد

الأخت فريدة

أطيب التحايا ...

الإنفصال ليس هو الحل !!!

رغم عن الظلم الباين لكل النوبيين ...
من تهميش وعدم تنمية ودمار لـ تراثهم وحضارتهم...
والسد العالي خنجر مسموم في كبد أي نوبي ومازلت جراحه نازفه ...
إننا نقول كوش كانت تضم جيبوتي والصومال والحبشة واريتريا ومصر وفلسطين في الشام ...

وعلينا أن نتعظ بغيرنا من أخوتنا في الجنوب والذي أعتبره رغم الإنفصال جزء عزيز منا ونحن جزء غالي منه ...
أين وصلت بهم هذه الوحـدة فيما بينهم مزيد من التشرذم والتقسيم حتي داخل القبيلة هناك جماعات واحزاب إنفصالية ...
وعلينا التأمل في أخوتنا في دارفو بدأت حركاتهم النضالية بواحدة اليوم وصلت إلي العشرات إذا كان واقع الحال يقتضي
توحدهم ولو لـ حين حتي إسقاط هذا النظام ولكن قرائن الأحوال أقوي من هذه الإرادة فكل قبيلة ومنطقة لها شباب تثق بهم وليس سواهم ...

إننا نؤمــن لدينا قضايا مصيرية مشتركة في الشرق، والغرب، والوسط والشمال وجميعنا نكتوي بالتهميش والخراب والدمار
علينا ان نتشارك هذه الهموم مع أخوتنا أين ما كانوا ... وتكون قضية النوبيين تضمن هموم الآخرين مثلما قضاياهم هموم بالنسبة لنا...
والحضارة النوبية هي ليست ملك لهم بل لكل السودانيين وإذا كانت هناك جهود يجب أن تتوجه إلي إلي إيصال صوت النوبا إلي
أبعد مدي داخل وخارج السودان وليس من أجل الإنفصال

لان الانفصال يعني عجزنا وضعف إرادتنا والتنازل عن حقنا في السودان ومملكة كوش التي كانت أكبر من جغرافيتها الآن
الوطن يسع الجميع النوبيين ودارفور والشرق والوسط علينا البحث عن سبل جديدة للنضال والكفاح من أجل تنمية متوازنة وعدالة
إجتماعية دون تمييز لـ عوامل اللغة والقبيلة والدين ...

وإذا كانت هناك ضرورة يجب تكوين كيان نوبي يتولي زمام هذه القضايا وعلى رأسها قضية السدود وحماية التراث والحضارة
النوبية والتنمية ويمثل هذا الكيان أبناء المنطقة داخلياً في مؤسسات الدولة وتنظيمات دارفور والشرق المماثلة وخارجياً لدي كافة
المؤسسات والمحافل الدولية ...

وأعتقد النوبيين بما لديهم من تجارب ناجحة في الجميعات يمكن تنسيق الجهود حول قيام هذا الكيان الجامع بكل سهولة
ويمكن لـ تلك الجميعات ان تكون روافد دائمة للكيان وكذلك الجهود الكبيرة التي يبذلها السفير منان في النشرة النوبية
http://www.nubiaproject.org هي الأخــري صوت حق يصدح لكل غافل او به صمم

اختى العزيزة فريدة
تحياتى
النوبيون مهمشون مثل غيرهم من شعوب السودان وهناك منبر للهامش السودانى يمكنك الانضمام اليه لتوحيد شعوب الهامش لخلق دولة سودانية قوية قائمة على المواطنة والمساواة وحقوق الانسان.
وبالنسبة لتعريف من هو النوبى وبلاد النوبة وحدودها فهذا يحتاج لمجلدات ولا يمكن تحديد النوبة بأنها من حلفا الى دنقلا .. فالسودان كله نوبى كوشى بل ان كوش تمتد من آسيا (هندكوش حتى سواحل المحيط الأطلسى ) حيث يتحدث الأشانتى فى غانا والماساى واللوا فى كينيا ويوغندا باللغة النوبية وسلامهم " مسكاقنا" كما ان قبائل الميدوب والبرقد والأجانق فى جبال النوبة قبائل نوبية نزحت الى دارفور وكردفان قبل بضع مئات من السنين ولغاتهم نوبية... من ينفصل عمن؟ وإذا كانت النوبة هى الأصل فكيف ينفصل الأصل عن الفرع وما هى حدود الدولة النوبية المقترحة.
النوبيون بامكانهم ان يكونوا القاسم المشترك الأعظم لكل القبائل والمجموعات السودانية لخلق الدولة السودانية القوية وهناك منظمات تدعو لذل مثل حركة تحرير كوش ويمكنك العمل من خلالها او من خلال المنظمات الكوشية الأخرى التى تدعو لوحدة الشعوب الكوشية ومن بينها منبر الهامش السودانى ولكن ان تدعو لإنفصال النوبة دون تحديد الإطار الجغرافى والقانونى والسياسي والثقافى فهذا يعتبر نوعا من الونسة والترف الفكرى الذى يتبخر فى لحظات لعدم وجود مرجعية فكرية تسنده ويبقى الأمر مجرد أحلام وردية لا تتجاوز من يحلم بها..

الاستاذة العزيزة / فريدة ......
مسكاقرووو
للاهمية اجد نفسي ابداء من مداخلة الاستاذ/ خالد العبيد
( هم البوابة التي دخلت منها الحزب )
ولا انسي مقال الاستاذ/ شوقي البدري المشار اليه في احد بوستاتك
كذاكرة حيه لما يدور بخلدي الان .
وادلف الي اشارتك هنا عن معايير الانفصال والجنوب مثلا .
لكل هذا تجدني اقف في الركن العالي من هذا البوست مدافعا عن حق
اجدادي وابائي في كل السودان وليس مطالبا بالانفصال . فما قدمه النوبيين للسودان
من حضارة وارث ثقافي وتضحيات ،لا يختزل في الانفصال ويبعد عن جوهر معيار انفصال الجنوب
او اي منطقة اخرى تنوي الانقصال فيما بعد .
والحديث عن التهميش المتوارث للمنطقة وان كان اثره اكبر من كل المناطق في السودان بحكم الطليعة
في ما يقدمه انسان هذه المنطقة لكل السودان لا ينائ باي حال من حال عن حال انسان المنطقة الان الذي
يجب اعادة صياغته بما يخدم قضيته وقضية السودان باكمله .
.....................................................
وللحديث بقية ........

من هسّع دي ؛مبروكــ عليكم دولتكم...
وقشّة ما تعتّر ليكم..

Quote: النوبيون مهمشون مثل غيرهم من شعوب السودان وهناك منبر للهامش السودانى يمكنك الانضمام اليه لتوحيد شعوب الهامش لخلق دولة سودانية قوية قائمة على المواطنة والمساواة وحقوق الانسان. وبالنسبة لتعريف من هو النوبى وبلاد النوبة وحدودها فهذا يحتاج لمجلدات ولا يمكن تحديد النوبة بأنها من حلفا الى دنقلا .. فالسودان كله نوبى كوشى بل ان كوش تمتد من آسيا (هندكوش حتى سواحل المحيط الأطلسى ) حيث يتحدث الأشانتى فى غانا والماساى واللوا فى كينيا ويوغندا باللغة النوبية وسلامهم " مسكاقنا" كما ان قبائل الميدوب والبرقد والأجانق فى جبال النوبة قبائل نوبية نزحت الى دارفور وكردفان قبل بضع مئات من السنين ولغاتهم نوبية... من ينفصل عمن؟ وإذا كانت النوبة هى الأصل فكيف ينفصل الأصل عن الفرع وما هى حدود الدولة النوبية المقترحة. النوبيون بامكانهم ان يكونوا القاسم المشترك الأعظم لكل القبائل والمجموعات السودانية لخلق الدولة السودانية القوية وهناك منظمات تدعو لذل مثل حركة تحرير كوش ويمكنك العمل من خلالها او من خلال المنظمات الكوشية الأخرى التى تدعو لوحدة الشعوب الكوشية ومن بينها منبر الهامش السودانى ولكن ان تدعو لإنفصال النوبة دون تحديد الإطار الجغرافى والقانونى والسياسي والثقافى فهذا يعتبر نوعا من الونسة والترف الفكرى الذى يتبخر فى لحظات لعدم وجود مرجعية فكرية تسنده ويبقى الأمر مجرد أحلام وردية لا تتجاوز من يحلم بها..

ارونتود منان

يا كبير امنياتى لك بدوام الصحة والعافية ..

والنوبة عظمة وتاريخ وتراث يستوعِب ولا يُستوعب ...

عندما تُحل مشاكل الهوية لن يجد الوطن الا تراث وقيم النوبة واخوتنا البجا من عمق التاريخ يسند ذلك عقيدة صحيحة لايمان بنبى عظيم فى القلوب متحكر.....

بالله امثال بشير احمد الواحد يقعد معاهم في بلد واحد كيف؟؟!!

نفس كلامك قلتوهو للجنوبين وانفصلو والجعجعة حاصلة.

اصلا نحن و كغيرنا عايشين منفصلين و لو مشيتو مناطقنا حتلقوا ما في حكومة و الناس حياتهم ماشه ببركة ابناء المنطقة المقيمين والمغتربين.
تقرير المصير للشعوب الاصلية حاصلة حتي في دول غربية متقدمة مثل كندا.
و تقرير المصير لمنطقتنا حتكون بعد ان نزيل حكم الطاغية مع كل شعوب السودان المختلفة.
بداية صفحتنا في السودان الجديد حتكون بالمطالبة بالحكم الذاتي وتقرير المصير.
لانو المركز ما مضمون وممكن ان نعيش في انقلاب ثورة انقلاب ثورة لمدة مائة عام تاني .

والتحية للاخت فريدة وكل المشاركين.

Quote: وكانت البداية دمار تاريخ السودان في حلفا لـ صالح المصريين..

ذلك الحدث المأساوي!




لكن هذا لا يبرر أبداً دعاوي الانفصال!




وتحياتي واحترامي لراعية البوست وضيوفها الكرام!

الكنداكة أميرة

يا سلام صدقيني بعد المجهودك مع شالي بونيه
وجلبت لنا الخبر الجميل .. عن الدفوفة .. أنا معاكي في اي اقتراح او الطرح
نحن هنا في غاية السرور بخبر الاطمئنان على حضارة كوش
وقد بذلت مجهود مقدر من أجل أهلك ..
فريدة أنسي : مشكلتنا اليوم في الفراغ السكاني في المنطقة
وأكثر محلية فيها سكان هي البرقيق لأنها تشمل كرمة البلد والنزل وبدين وارتقاشا ومشروع البرقيق
وعدد سكانها حوالي تسعين الف أما باقي المناطق في خالية تقريباً بسبب التهميش الزائد
من دنقلا حتى الغابة ومن ابوفاطمة حتى تخوم حلفا ..
تخيل كل الشمالية حوالي سبعمائة الف نسمة
لكن بيني وبينك كلهم كده نخب ناس فاهمة جداً
حتى التربال عندما تتحدث اليه تجد أن لديه عمق وفهم واعمال للعقل والفكر حتى بعض الناس يعتبرون ذلك بعد عن الدين والعقيدة

بشكرك كثير على الخدمة التي قمت بها ..

Medhat Osman

Quote: بالله امثال بشير احمد الواحد يقعد معاهم في بلد واحد كيف؟؟!! نفس كلامك قلتوهو للجنوبين وانفصلو والجعجعة حاصلة.

يامدحت قلتوا عايزين إنفصال ...عايزني اقول ليكم شنو مثلا؟

نمسك ليكم في كرعيكم عشان تقعدوا في السودان الفضل ده ولاّ كيف؟

مداخله مهمة من الفيس بوك :
Zubeir Mohammed
افرضي قررنا الإنفصال يا أختي فريدة
نحدد حدودنا من وين لى وين ؟؟
من صعيد مصر إلي جبال تلوشي مثلاً !!!
........................
اقف مشددا على مداخلة الزميل فيصل محمد خليل
(السودان الفضل كله نوبه )

الاستاذة فريدة
الموضوع كبير لكن تناولك فيه شئ من عدم الالمام بكل خيوط المسألة
الانفصال ليس بالقرار السهل
الانفصال من منو ولي شنو ؟
نفرض انكم انفصلتو جيرانكم من جهة ابوحمد وبربر خلاص يعني عايشين رفاهية
ابدا .. البلد كلها اصبحت تعاني تهميش بي سبب سياسة وفساد الاخوان المسلمين
مثلا :

الفصل ده في الخرطوم
وانا كنت مدرس في الخرطوم وفي فصول اسوأ من ده
لذا الانفصال ليس الحل كما ذكر لك احد الاخوة
علينا واجب قلع حكومة الفساذ الحالية
بعد داك اي عديلة بتركب محلها
------------------------------------



كل ما نجده منكم التريقة علينا
----------------------
قلت لك انني دخلت الحزب عبر بوابة اهلي النوبة
وهي عائلة صديقي ومعلمي عباس وهبة
كنت يوم معهم كالعادة الى ساعة متاخرة من الليل
وصادف ان يكون في العشاء حبوبة لهم وصلت من حلفا لا تعرف ولا كلمة عربية
واثناء العشاء كانو يتحدثون بلغة النوبة جميعا وانا مسطح قاعد في علبي بي ادب
الحبوبة لاحظت سكوتي كل هذا الوقت وساتهم بالرطانة لماذا انا لا اشارك في الحديث
قال لها عباس ضاحكا : ده ما بيعرف رطانة
فاستغربت الحبوبة جدا وانتهرتهم جميعا بلهجة حادة :
مش حرام عليكم لحدي ما يكبر وعندو شنب ما تعلموه الكلام

---------------------------------------
الموضوع كبير يا فريدة يجب تناوله بي موضوعية وعلمية
وليكم كل الحق في المحافظة على تراثكم وحضارتكم ولغتكم وتطويرها لتكون اللغة الرسمية لكم

مصير النوبة الانفصال وإقامة الدولية النوبية

Quote: مش حرام عليكم لحدي ما يكبر وعندو شنب ما تعلموه الكلام

تحياتي لصاحبة البوست والمتداخلين


خالد العبيد أوع تكون لحد الآن ما إتعلمت الكلام !

بالمناسبة هم الما بيعرف يرطن بيقولوا عليه أطرش نفس الكلمة بالرطانة نيج

Quote: وعليه أليس من حقنا ان نطالب بدولة مستقلة لنحمي حقوقنا بأنفسناولا نكون في وضع الاحتياج للآخرين؟

عن من ننفصل ولماذا ؟؟؟
عن المركز وحكام المركز !!!
طيب هل حكام المركز من المركز ام من الشمال ؟؟؟
جل حكام السودان والقابضون على مفاصل الدولة من أبناء الشمال ( كوشلاند ) كما يسميه رواد الإنفصال .
بل القابضون على أنفاس الأحزاب السودانية كلهم كوشوين كما كتب الأخ بشاشا عن أمناء الحزب الشيوعي السوداني (مسميا إياه حزب الجلابة ) .
حزب الأمة أصول المهدي من جزيرة لبب .
وبعدين ، المهدي ، النميري ، عبود ، سوار الدهب ، الزبير ، البشير ، علي عثمان ، كلهم من مربع كوش !!!
فعلام ننفصل ؟؟؟
شمالنا يعاني من التهميش ولكننا لا ننادي بالإنفصال بل الدعوة للإصلاح هو الحل .
إذا فصلنا شمال السودان فهل نستطيع ان نحرم البشير وعلى عثمان وعبدالرحيم وصلاح كرار والنميري ونقد والتجاني من حق المواطنة ؟؟
إن قلنا نعم فعلى أي اساس ، أليسوا من أبناء المنطقة ؟؟
وإذا قلنا لا فهل يجوز لهم الترشح لرئاسة كوش ؟؟؟
لم نفعل ولن ....
إصلاح المركز لصلاح الهوامش وليس قص الهوامش ليتمزق الجميع .
تحياتي

بالله عمر البشير وصلاح كرار طلعو نوبة

مشو قلتو عمر البشير جدو صاحب اول مسجد في السودان هاجر سنة كم كدة من المغرب للسودان

Quote: المؤسف حتي مشاريعنا المستقبلية مبنية علي نفس الأسس الخأطئة الاتبني عليها السودان من 56. التقسيم لي نوبة و عرب وبجا وزنوج دي تقسيمات بتاعة مستعمر مركزية اوروبية. نحنا كسودانيين ظهرنا في التاريخ قبل الاف السنين من اوروبا خليك من تقسيماتا لينا. كل الآتي ذكرهم هم اشلا كوشيين: بديرية شوايقة جعليين مجموعة الجزيرة والبطانة. كلنا واحد : وهويتنا هي تاريخنا في وادي النيل من منبعو لي مصبو

رد من الفيسبوك يستحق الرفع وأضيف عليه ، يكفينا الإسلام هوية ومنهج ، عربا وعجم ، نوبة وأفارقة ، كلنا لآدم آدم من تراب ، دعوها فإنها منتنة .
فلنصلح أنفسنا وحكامنا ليصلح المركز والهامش .
تحياتي

اخوي محمد الزبير حكامك الفاسدين ديل هم سبب انفصال الجنوب وهم حيكون سبب انفصال النوبة ودار فور

وجبال النوبة