محمد المرتضى حامد: نورت استراليا

أجمل ما في الأيام الجميلة التي قضيتها في مدينتنا البعيدة ان الحوار بيننا لم يبدأ من جديد وإنما اتصل فقط من حيث انقطع عبر الإنترنت والهاتف. سعدنا بحضورك البهي بيننا! في حضرتكم انشرحنا وشعرنا بالفخر واستمتعنا بالأنس اللطيف والحكايات الجميلة والتجارب الباذخة. حين يرى المرء سودانياً بمثل هذا البهاء والثقة والنجاح، يستعيد الأمل في أن بلادنا ستكون بخير ان شاء الله.
شكراً على الفترات التي اقتنصناها هناك وهناك ضمن أيام مؤتمركم العامر. كان بودنا أن تبقى بيننا لأيام أخرى ولكن ارتباطك برحلة أخرى قبل العودة الى حيث الأهل، لم يترك لنا فرصة.
شكراً على الأصدقاء الكثر الذين تعرفنا عليهم من خلالكم



صورة أولى أمام متحف القانون بمدينة بيرث

حفظ الله محمد المرتضى في حلّه وترحاله
تحياتي محمد عثمانهم

مع الكانغارو :(

يا ود الصايم تقبل الله دعواتك
جينا على سيرتك الطيبة وذكرناك بالخير كما ينبغي..
تحياتي

ازيك يا ادروب ووين الحي بيك

التحية لمولانا محمد المرتضى

حمداً لله على السلامة مولانا محمد المرتضى زيارة كريمة وحفظك الله في حلك وترحالك

أحمد الشايقي

أتفسح وأدينا خبرك يا محمد الموتضي يا أخوي
يا محمد الموتضي خوفتنا يازول . تلفونك مقفول ومافي منك خبر والأيام كانت أيام مظاهرات وسجن وكتل .
وكنا فاكرنك في السودان .. تلفون كندا ما شغال .
ياخ الحمد لله .
وبارك الله فيك أخي محمد عثمان
وألف شكر بعد التحية

يا محمد ابراهيم
وينك يا راجل.. طولنا منك .. غايتو زهجنا من الجرايد واليومين دي خليك معانا بجاي..
مع التحايا

يا عثمان موسى
كيفك
شكلو التلفون حيكون مقفول يومين تاني..
اسبوع واحد في تلاتة ولا أربعة تايم زونز..تنوم الساعة ستة تصحى تلقى لسة الساعة ستة..
غايتو نقول ليه معاك حمداً لله على السلامة..

صورة أولى أمام متحف القانون بمدينة بيرث

+++++++++++++++++++++++++++++++++++++++++++++

ياريت يامحمد عثمان سطرين تلاتة عن المتحف ده ونكون لكم من الشاكرين ، صراحة أول مرة اسمع بمتحف للقانون
مع تحياتي وتقديري لكم ولمولانا محمد المرتضي حامد

Quote: اريت يامحمد عثمان سطرين تلاتة عن المتحف ده

يا عمر عثمان اكذب عليك؟
أنا اصلاُ ما سمعت بالمتحف دة ولا قايلو عندنا ذاتو.. مولانا محمد المرتضى هو الوداني ليه ووداني المحكمة الفيدرالية ومجموعة من المحاكم كدة ما حصل جيت بالشارع بتاعها قبل كدة..

يا زول محمد المرتضى ينور سبعة قارات ... خليه قارتكم المجدوعة في آخر الدنيا دي !!
من ناحية تانية... يا محمد إبراهيم ياخي الجفاء ده ما كويس ... لا بتضرب ... لا بترد ...ولا شغال بينا شغلة ... يعني نركب نجي آخر الدنيا دي ولا كيف ؟!

محمد عثمان يا بروف .. فمحمد ابراهيم بالجوار :)

أما من حيث كونو مرتضى بينور سبع قارات فذلك ما لا شك فيه.

هسي يا حسين في زول قاعد يناديك بحسين إبراهيم ولا في زول بيناديني بأمين محمد ؟!!
لكن ده ما بمنع الاعتراف إنو الصاح محمد إبراهيم

الشايقي
شكراً لمرورك
مع التحايا

Quote: محمد عثمان يا بروف .. فمحمد ابراهيم بالجوار :)

يا ملاسي بالله هو البروف دة معاي أنا.. أنا برضو افتكرتو مع محمد ابراهيم علي..
يا بروف والله مشتاقين.. البركة غايتو في شوفتك هنا بسبب محمد المرتضى..
تحياتي

ودابراهيم ومرتضى
سلامات
سعدت جدا باتصالك وسماع صوتك يا مرتضى
مش كان احسن ليك تجينا هنا محل الطيارة بتقوم والرئيس بنوم
ادروب غشاك وداك عشوائي استراليا .. لانو بيرث دي سنكات احسن منها !!
في العاصمة كان اقلو زرت البرلمان القديم لانو متحف في غاية الروعة
والمتحف الحربي النادر المحتويات بصورة تدعو للدهشة الذي يضم 2 من جبب انصار المهدي
غنمها جنود استراليا ايام الحرب في السودان
على اي حال خيره في غيره .. وبينا الاتصال

يا خالد العبيد وينك
أنا قلت ليه ما ممكن تجي القارة الأسترالية دي وترجع في أربعة أيام.. غايتو الزيارة القادمة حيجينا اجازة وحنجيبو ليكم ان شاء الله..
تحياتي لك وللعيال ولقريبي أونور

سلام محمد عثمان وكل عام وانتم بخير, فعلا أربعة ايام ابدا ما كفاية في صحبة الزول الجميل مولانا ود المرتضى
سلامات مولانا وحمدا لله ع السلامة ولا زلنا في انتظار زيارة العين :)

محمد عثمان ما عندك زيارة تانية لينا وتحياتى لكل من بطرفك
ياخ استراليا دى الواحد لو لفا فيها عشرين سنة
كل يوم يكتشف حاجة جديدة وتحياتى الى ضيوفك

رغم أن كتابات محمد عثمان في الصحف السودانية وفي هذه المساحة كال MRI scan توضح لك بدقة موضع الإنحراف
والعلل وبالتالي تترك لك الخيار العلاجي - وهو خيار متوفر لكل ذي بصيرة ولكل من من ألقى السمع وهو شهيد -
رغم ذلك تجد لكتاباته نكهة مائزة ينفرد بها نفر قليل في هذه الأيام ، نكهة تتيح للقارئ سياحة خاصة مع
هذا الأدروبي إبن سنكات البار تجبرك على احترام إنسان يعرف ماذا يقول وينتخب من التعبير ما يجعل القراءة
بحد ذاتها ممارسة تجاور النشوة أثرا ، ولا أنكر أني أختلف مع بعض رؤاه وأخاطبه مباشرة بما يتاح من وسائل
بغيرما انتظار لرد من جانبه فأنا قارئ عادي أعبر عن أثر ما يبثه الكاتب في إرساله على موجاتي لاغير.. لكن
محمدا لايكتفي بذلك فهو يرد ويقول للقراء أنه يحتفي بمشاركاتي وهذا فضل منه وتواضع يتماهى تماما مع ما رأيته
في محمد الإنسان وأنا معه في مهجره (بيرث) بغرب استراليا في زيارتي القصيرة لتلك القارة الجزيرة ..



من اليمين محمد عثمان والمهندس فيصل محمد إبراهيم والأخ الصديق د. مكاوي عوض المكاوي (المحامي)

يا ود الصايم،
من أفضال بكري أبوبكر علينا أنه قيَّض لنا محط روح وموطئ قدم في كافة أنحاء الدنيا ، فحين تفكر في السفر إلى أي بقعة في أطلس الجغرافيا تعرف أنك حتما موضع
ترحيب من أحد أعضاء قبيلة سودانيز ولايقل ذلك الترحيب بسبب خلاف سياسي بينك وبين أحدهم وهذا ما لمسته في تجاربي السابقة ، فيقيل عنك ذلك وعثاء السفر قبل
أن تبدأ رحلتك ويجنبك كآبة المنظر ( رغم صعوبة ذلك نسبيا لسبب خارج الإرادة) وفوق هذا وذاك تفادي الإحساس بالغربة لأني ممن عبَّر عنهم محمود درويش بمقولته
( أخشى المطارات التي يودعني فيها أحد وتلك التي لايستقبلني فيها أحد) فالشكر موصول للناظر بكري أن كفل لنا – بعد الله وهو الصاحب في السفر – وثيقة تأمين
ضد أحد مواجع السفر سواء كانت الدابة بعير بن معديكرب أو كانت Cathy Pacific



لم نتغشى المحل الظاهر خلف الصورة بسبب أن مرتاديه من حلفاء الخدر التايهين في نعيمهم أما نحن فمن المعنيين بشطر ( حظي زي لون هضليمك يا .. نعيم الدنيا)

يا ود البشرى اهلاً بك وكل عام وانت بخير
القلوب شواهد فقد حدثني عنك مولانا محمد المرتضى بكثير من الصدق والمودة..
تحياتي

يا بجاوي
المرة الفاتت جيت بلدكم لكني لم أخرج من المطار.. جيت داخل وقضيت زي عشرة ساعات في فندق المطار وعدت .. القبلها ما لمينا فيك وتلفونك ما بيرد.. ياخي ليك وحشة كبيرة والله وآمل ان نراكم قريباً..
تحياتي للعمدة والأصدقاء

يا مولانا والله كاتب بغير قراء يتضايرون من الكتابة بمشاغل المهن الأخرى مثلكم، لا يسوى كثيراً.. انا ممتن للكتابة أن جعلت لي وصلاً بأصدقاء عظام . سودانيز اونلاين منبر راقٍ ومكان تأتلف فيه النفوس. عبر هذا المكان تعرفت على أصدقاء وتعلمت اشياء لم تكن تخطر لي على بال .. بكري أبوبكر يستحق تحية كبيرة وتقدير هو أهل له.سعدت أيضاُ بلقاء الدكتور مكاوي عوض المكاوي، الإسم المذكور والإنسان الودود. هو نموذج من الساسة النادرين في بلادنا الذين يؤدون دورهم في حياتنا العامة عن زهد. يقومون على خدمة الناس لا على خدمة ذواتهم. لو شاء الرجل الإنغماس في السياسة لسعدت كل الأحزاب والجماعات والحكومات في السودان بضمه الى صفوفها ولكنه انتقل بسهولة ويسر الى فضاء آخر حقق فيه نجاح كبير بفضل الله. سعدت ان علمت أنه أحد اعضاء مجلس ادارة مؤسسة قلوبال لاو المرموقة. بلادنا تكبر بمثل هؤلاء اضعافاً مضاعفة رغم أن آخرين ما انفكوا يدحرجونها للوراء دون نجاح.
أرجو أن تساعدني في تحريضه على العودة لحياتنا العامة كاتباً وناصحاً ومرشداً وحكماً كبيراً.
صديقي المهندس فيصل رجل راقٍ اسعد دائماً بالأنس الجميل معه وتبادل الحكايات وهو أحد اعمدتنا الكبار في استراليا.

Quote: والأخ الصديق د. مكاوي عوض المكاوي (المحامي)

براك بقيت هناك ولا شالتك شيمة



ياخ كان سألت لينا مكاوي عن صديقنا المهندس / محمد دفع الله الفضل

بيرث ليلاً محمد المرتضى حامد ودكتور مكاوي
بالمناسبة الصور بتاعتي كل مرة شايل لي كاميرا تكشف أن السائح كان أنا لا أنتم! لأول مرة أكتشف فندق متروبول الشديد الفخامة وأول مرة أزور هذا المكان الشاهق العلو.. شكراً على النزهة الجميلة في بلدنا.. الآن استطيع أن افاجيء العيال وأمهم بنزهة غير منظور مثيلها لكني سأدخر هذه الأماكن للمناسبات الهامة جداً..

Quote: يا بجاوي المرة الفاتت جيت بلدكم لكني لم أخرج من المطار.. جيت داخل وقضيت زي عشرة ساعات في فندق المطار وعدت .. القبلها ما لمينا فيك وتلفونك ما بيرد.. ياخي ليك وحشة كبيرة والله وآمل ان نراكم قريباً.. تحياتي للعمدة والأصدقاء

ومن داخلية سواكن سلام
ومحمد بلص
ومحمد طاهر سنوكا
وابو حمامة
تحياتك بالتأكيد ستصل لكل الاخوان هنا
كل احترامى

تفريعا على ما ذكرت أعلاه ، لم أتردد لحظة في الإتصال بمحمد عثمان وخالد العبيد
لأعرف منهما مكان تواجدهما في قارة (جون) وفقا لما درسناه في الأولية عن سبل كسب
العيش في العالم ، أيام سانشو في الأرجنتين وفرانك في إنجلترا وهري في الولايات
وآفو أيام ماوتسيتونغ.. عرفت من خالد أنه في (كانبيرا) التي بينها وبين (بيرث)
حيث المؤتمر ما بين أمانينا وحكامنا من مسافة ، سبعة أيام لاتكفي للقاء العزيزين
في مدينتيهما ، لم يكن لي خيار في الإتصال بمحمد على أمل مهاتفة مع خالد ودالعبيد ،
فمحمد إنتقل حديثا إلى (بيرث) كمل لو أنه على اتفاق مع مجلس إدارة
Globalaw أو أن القدر انحاز إلي بصورة مكشوفة.
قلت لمحمد عن مقر إقامتي فما كان منه إلا أن شرفني بزيارة هو وحرمه السيدة خديجة
والجميلين هادي ونورسين (وتعني ضوء القمر في الفارسية ) وأمير ،
حين يعرفك إنسان إلى أفراد أسرته في أول لقاء لك به فهذا يعني كل شئ..
باختصار يقول لك : هاأنذا كامل بهيئة أركان حربي وأركان حبي.




أمام منزل الرجل العديل المهندس فيصل إبراهيم السيد وللرجل قصة أخرى..
إيماني لايرقى إليه شك بأنه لاتوجد (صدفة) في هذا الكون.

التحية للاستاذ محمد عثمان و اهل استراليا ...

سعادة المستشار ...

مشتاقين كتير يا رجل ...

طيارتك مالها ضلت الطريق يا حبيبنا ...

Quote: ازيك يا ادروب ووين الحي بيك التحية لمولانا محمد المرتضى

ود ابراهيم سلام،

كنت أحار لغياب صاحبكم عن المنتديات لكن يبدو أن حيرتي لم تكن في محلها ،
محمد في بلد - رغم سماحتا ونضافتا وطقسها الخرافي - لكنها تقطع النفس وشغاله بقانون catch up so you're not left out وهو
عرف تلك اللغة فأمن شر أهلها.. لكن ، كجل السودانيين ، خرج من الوطن ولم يخرج منه الوطن ،..



هسه يا باشمهندس دا جو يضيعوهو مع ناس شيقوق

Quote: حمداً لله على السلامة مولانا محمد المرتضى زيارة كريمة وحفظك الله في حلك وترحالك أحمد الشايقي

مولانا أحمد،
سلامات يا عزيز،
أتمنى لو نتحادث في الهاتف عن موضوع الزيارة باعتبار أن المسائل المتصلة بذلك الموضوع مما يهمكم ، وعلى الرغم من أن
أعمال المؤتمر أسفرت عن فوائد لاتحصى في اتجاهات عدة إلا أنني حزنت أن تكون أفريقيا بكاملها غائبة رغم أن هناك أعضاء
من جنوب أفريقيا ومصر والجابون (لم يحضر ممثل عن أي منهم أعمال المؤتمر ) وربما توضح خارطة العضوية
في موقع قلوبالو http://www.globalaw.net/ حجم الغياب الإفريقي عن قطاع خدمي عالمي له دور مؤثر في الإقتصاد
والصناعة ومناح حياتية أخرى لايمكن تجاهلها ، وأنتهز هذه الفرصة لدعوة الزملاء المحامين في إلقاء نظرة على الموقع
والسعي نحو التواجد في هذا التجمع لما فيه من فوائد مهنية عسى ولعل ينضم بعضهم ويفيدوا من تواجدهم فيه وربما نلتقي في المؤتمر
القادم في ريودي جانيرو..




خالد العبيد ، قلت لي سنكات ؟ ياخ - زي ما بقولوا - من خشمك لباب السما نعيش ونرى سنكات كبيرث..

غايتو يا ود المرتضي
لو خليت الجو السمح ده ورجعت تاني لي مكانات ناس ود شيقوق وناس ود المنسي .
ياخ حقوا يقطعوا منك مرتب شهرين .
جو ناس ود شيقوق يخليك قايم من النوم زي الكنت البارح معتليك شحنة لوري بصل .
عاشت الشقيقة أستراليا بلد الهمبريب .
أتفسح ياخ .
ومع الفسحة خت صور لاعبات التنس الطوال العجيبات .
كب صور تقيلة من سيدة المدن سدني .
..
وأرجو أن تبلغ تحياتي للجميع

سلام مطبوق محمد عثمان وبورداب استراليا الحلوين وكل عام وانتم بالف خير

ود المرتضي كل سنه وانت طيب وفي أنتظار زيارتك لي دار زيد

Quote: لو خليت الجو السمح ده ورجعت تاني لي مكانات ناس ود شيقوق وناس ود المنسي . ياخ حقوا يقطعوا منك مرتب شهرين .

إنتو مجانين ؟ والله إنجداعة على هباب ، في صقيع الدندر ، وعينك لمعمل الطلحو ثيريبي شغال ، احلى من كانبرا كووووولها

لكم محبتي وامنياتي المزهرة
وتسلموا في مشرق الدنيا
واستمتعنا معكم بالمشاهدة لعالمكم البرئ
وبلادكم الجميلة
سلام ومحبة لكل الحلوين

Quote: لكم محبتي وامنياتي المزهرة وتسلموا في مشرق الدنيا واستمتعنا معكم بالمشاهدة لعالمكم البرئ وبلادكم الجميلة سلام ومحبة لكل الحلوين

لك الشكر يا أبا السهروردي..
والله بلادهم جميلة ..
حاجه كده تخدِّر الروح والأماني..

Quote: ود المرتضي كل سنه وانت طيب وفي أنتظار زيارتك لي دار زيد

شكرا يا سيداحمد،
دار زايد الخير لا ننقطع عنها لشهرين متتاليين بسبب العمل وزيارة الأحباب
سيما أنها لا تكلف سوى 3 ساعات خلف المقود..
مودتي يا شامي

Quote: عاشت الشقيقة أستراليا بلد الهمبريب .

أبوعفان كيفك..
سألنا ناس البلد عن سر الجو السمح قالوا لينا ما دايمن همبريب ، مرات نار الله الموقدة ، وثمة أجزاء
في أستراليا صحراء بيوضه بالنسبه ليها جنة عدن.. لكن يا عثمان الناس لامن تكون بتشتغل جد وبتحترم
نفسها وبتحترم القانون والوقت والنظام (الهمبريب بفتح شبابيك الحبيب) ..
عاين .. إفتتح المؤتمر رئيس وزراء غرب أستراليا مرحبا بالحضور ، وقف في كامل أناقته وتحدث ل 15 دقيقة بلغة عالية
وقدم أرقاما دقيقة مفاخرا بأن ولايته حصدت 6 من جوائز نوبل وتساهم ب 40% من الدخل القومي لأستراليا
ولم يتلجلج ولم يكرر عبارة وأوضح ماذا يريد من بقية العالم وما هي خطتهم للعشرين القادمة.. الشئ
الوحيد الذي أحبطني أنه بعد انتهاء كلمته عرفت إنو ما جايب فرقة حسب الله تغني وكنت جاهز لعرضه وصقريه...
لإحباطي كدت أهتف في وجهه : لا للسلطه ولا للجاه ..

محمد عثمان صاحب القلم الانيق سلام

Quote: وقف في كامل أناقته

شكرا ليك يا المرتضى فقد قفزت الى الذاكرة قصة رئيس وزراء هندى الذى قدم الدعوة لجميع وكالات الانباء العالمية لحضور المؤتمر الصحفي الذى سيعقده للحديث عن الوضع السياسي الراهن وقتذاك .

كان من ضمن الاعلاميين الذين حضروا هذه المناسبة الاخ البوردابي الزاكي عبد الحميد - ربنا يطراهو بالخير - وكان وقتئذ يعمل اعلاميا بوكالة السودان للانباء التي ابتعثته ليشارك في هذا المؤتمر الصحفى الهام.

حكي لي الاخ الزاكي - والعهدة للراوي - ان عدد الاعلاميين الذين حضروا هذا المؤتمر مئة ونيف وقد فتح لهم المجال لطرح اسئلتهم للسيد رئيس الوزراء الهندي بعد الانتهاء من مقدمته الاعلامية . كانت اغلب الاسئلة التي يطرحها الاعلاميون في اتجاه معدل النمو الاقتصادي ارتفع ليش؟ ونزاع كشمير الى اين؟ وموقفكم من القضية الفلسطينية كيف؟

وفي النهاية نطت اعلامية من الاكوادور وتقدمت بسؤال لا علاقة له بالسياسة وانما بشخص الوزير نفسه الذى تجاوز عمره التسعين وما زال حاضر البديهة .

سألته ( يا معاليك انا ملاحظة عمرك متقدم جدا ولكنك ما زلت ممتلئ بالنشاط والحيوية والحضور الذهني فما هي وصفتك الغذائية التي تعتمد عليها ؟

انقروا قال ليها شنو ؟

قال ليها - انا يا بتي معتاد على تعاطي جغيمة صباحية من اليورن كل صباح .

قال العنكوليب قال .

يحيى قباني
سيد احمد شامي
أهلاً بكما وشكراًُعلى اللطف والتحايا
مع المودة

Quote: لكم محبتي وامنياتي المزهرة وتسلموا في مشرق الدنيا واستمتعنا معكم بالمشاهدة لعالمكم البرئ وبلادكم الجميلة سلام ومحبة لكل الحلوين

الأستاذ الكبير
محمد سني دفع الله
شكراُ على الأمنيات والكرم
انت منورنا حيثما كنت وكنا بابداعك الراقي وهذا اللطف..

Quote: إنتو مجانين ؟ والله إنجداعة على هباب ، في صقيع الدندر ، وعينك لمعمل الطلحو ثيريبي شغال ، احلى من كانبرا كووووولها

يا مولانا شيقوق
حظنا ما كويس.. كنا دايرنك مع الراجل دة لكن الجايات اكتر من الرايحات.. انت شفت الفيديو طبعاً.. اها زي المناظر الفيهو ديك عندكم في الدندر؟
لو محمد المرتضى دة قعد شوية كان وديناهو محل الكانغارو الحي مش الجلد ساكت.. عموماً صاحبك طلع من انصار حماية البيئة ورفض ياخد جلد الكانغارو معاه

مجلس ادارة مؤسسة قلوبال لو ويظهر في الصورة الدكتور مكاوي عوض المكاوي رافعاً اسم السودان..

مرحبا محمد عثمان ومرحباً محمد المرتضى..لكم التحية ومن معكم.

جنابو سلامات..
متحف القانون يحكي عن تاريخ القانون في غرب أستراليا وتطور المحاكم فيها وهم يشجعون
الجمهور والناشئة على زيارته رفدا للوعي القانوني بين أهل الغرب الأسترالي ، المتحف
في المبنى الظاهر في الصورة وبجانبه المبنى الأقدم في غرب أستراليا وهو أول مبنى
اقامه الإنجليز في غرب أستراليا وكان يستغل لكل عمل حكومي تقريباوقد أنشئ في 1836
بواسطة مهندس إنجليزي ويقبع جوار نهر البجع الجميل الساحر..
الناس ديل قانونم ما بهظروا فيهو يا جنابو .. ما بهظروا كلو كلو ، يطبقونه
رأسيا وأفقيا كما لو أنه منزل من السماء، يعني لو المراجع العام قال في اختلاس دولار
أو واحد باع خط هيثرو أو بناية انهارت الحكومه كلها تروح فيها .. لن يجد الجاني من يحميه
أو يدافع عنه حتى لو كان دفاع بالنظر..

صور جميلة جداً على الرغم من أنها ستستعمل
ضدكما في أول خلاف لكما في هذا البورد :)

نوته،
السلام يا روح البدن،
ربما لاتصدق أن كل الذين تداخلوا في هذا البوست كانوا بعضا من حديثنا – طريناهم بالخير - وهذا نهج كثير من
أعضاء المنبر كلما التقوا، هؤلاء الأعزاء رغم اختلاف توجهاتهم لم تتغير حقيقة أنهم جميعهم تجمعهم مساحات أكبر
بكثير من تلك التي يُظَن أنها تفرقهم أو أنها بقع خلاف في خارطتهم أو تضاريسا في كنتورهم الجغرافي. قلت لمحمد
عثمان أن أمين محمد سليمان صديق وزميل لشقيقي الوليد والرشيد في جامعة الخرطوم ولكني نسيت أن أقول له أن
أمين ، وبعد غياب، إلتقى الوليد والرشيد في سرادق عزاء عمنا الراحل منصور يونس ( والد تمبس) دون سابق موعد، هذا
يذكرني بالرجل الذي يظهر يسار الصورة أدناه (المهندس فيصل) فقد جاء ليلتقينا كسوداني دون سابق معرفة
وماهي إلا دقائق حتى عرف أنه تجمعه قرابة دم بالدكتور مكاوي ومصاهرة بشخصي الضعيف ، عشان كدا لامن تكون
في أي تجمع سوداني بين الكرمك والجنينه وحلفا وأبيي لا تذكر أحدا إلا بخير فهو حتما قريبك..




محمد ، مكاوي ، فيصل غير بعيد عن متحف القانون رغم أن الشجرة الظاهرة في الخلف كانت سببا للصورة.

حسين..
بالطبع قصة الإنارة والإضاءة لسبع قارات التي ( لاشك) فيها دي أضحكتني كثيرا
لكن برضو شهادتك مسحوله عديل كده وليست مجروحه وحسب.. أما قولك:

Quote: صور جميلة جداً على الرغم من أنها ستستعمل ضدكما في أول خلاف لكما في هذا البورد :)

فالإختلاف في بعض المسائل موجود قبل الصور وسيظل بعدها لأن ذلك أحد نواميس الكون
لكن لن يأتي اليوم الذي ينهض فيه خلاف يجعل من أي من الصور المعروضة هنا أداة
لطرف ثالث تدعم حجته أو تخدم غرضه.. يعني يجيك واحد يقول : تتصور!! بالله ديل إتصوروا أمام
ال Swan River ؟ أقول قولي هذا وأدرك أنك لاتعني ظاهر القول وتحفز الغير على تبني أدب الإختلاف.
لكن الظروف ما معروفه ، كان يوم زنقني شديد بقول إنو بيضرب شية الكانغرو زي الماحصل شي..

شكرا يا العزيز..

هسع يا ود شيقوق الزول ده بحكي عن الناس
العندهم نوبل في مدينة وأحدة .
تقوم تقوللي الهمبريب عندكم والطلحون ؟
ياخ عليك الله أسال ود عم ود المنسي القاعد في أستراليا
عشان يقصلك حكاوي الطلحون الاسترالي طويل التيلة .
يا ود شيقوق .. فنان بربر المشهور ود السافل عليه الرحمة
ما سمعتو بغني عن الطلحة الاسترالية ؟
وبقول :
بتشرب صافي ما بتشرب عكر . وا ناري أنا يا السادة وحشتنا .
ياخ قالوا الطلحون هناك كاتم للدخان وبي نكهة الحرجل والمحريب يا فردة .

Quote: مش كان احسن ليك تجينا هنا محل الطيارة بتقوم والرئيس بنوم ادروب غشاك وداك عشوائي استراليا .. لانو بيرث دي سنكات احسن منها !! في العاصمة كان اقلو زرت البرلمان القديم لانو متحف في غاية الروعة والمتحف الحربي النادر المحتويات بصورة تدعو للدهشة الذي يضم 2 من جبب انصار المهدي غنمها جنود استراليا ايام الحرب في السودان

يا ود العبيد،
يعلم الله كم كنت أحرص على شوفتن تبل الشوق وردن يطمن لكن كمان ياخ بلدكم المسافه
بين مدينه ومدينه كالمسافة بين لندن والخرطوم ، ياخ دا بزار ما بعدو ، ونحن تقدمنا في السن
واللهاة كمان، ياخ ضلنا زاتو تعب مننا زي ما قال ودفضل الله ودرويش والقدال وشكا من طول الطريق..
لكن عندي قناعه صامده إننا حانتلاقى في مراتع الطفوله وملاعب الصبا جوار بيت السمحات ممن زيَّن الوجدان
وجملن الفؤاد وشحنَّه طاقة وألقا بتبسمهن الأصيل الخالي من الدهون المشبعة والغرض كما نشاهد في الزمن الملوث..
ياخ أكتب لينا عن متاحف كانبرا وجبب الأنصار المرقعه البقت موضة عند ناس فيرساتشي ..

بنتلاقى يا بركه وكان غبت (وغاب رشدي أهديني في ملتقى النيلين اتغني أشديني)




من طرف السوان ريفر يا خالد، بالله مش زي منظر توتي من شاطئ المورده؟

(يا جنه فتيني هل بعد هذا رجوع ؟ يا حظي أفتيني
ان رمت ترويني مروى العطيش في اب روف. بجرعه داويني
في جوفي كاويني حب الفريد في أم در من قبل تكويني)

حبيبنا ود البشرى،

كما ذكر محمد عثمان ، كان هناك حديثا شائقا عن بعض أعلام المنبر ودور المنبر في طي المسافات بين
الأعضاء أيا كانت إحداثيات تموضعهم وما زالت في ذاكرتي لحظة تقدمت إلي وأنا أدخل إلى الصالة مشاركا
الفقري الغائب دكين فرحته بزواجه ضمن عدد من الزملاء من قبيلة سودانيز..

عارف يا محمد ، أجمل مافي هذا المنبر أنك حين تلتقي أيا من أعضائه فإنك لاتبدأ من الصفر ، تلتقيه
وكأنكما التقيتما منذ سنوات لتكملا حديثا كما قال محمد عثمان ، وهذه ميزة لاتتوفر في وسائل التواصل
الأخرى لذا لدي شعور بأن الناس هنا يمتون لبعضهم بصلة تفوق أحيانا صلة القرابة والمصاهرة والجوار إلا من أبى..

تسلم يا أبا المجتبى على الدعوة لزيارة العين وقريبا سنلتقي إن شاء الله ..

Quote: Quote: Quote: والأخ الصديق د. مكاوي عوض المكاوي (المحامي) براك بقيت هناك ولا شالتك شيمة

إنت قايل براك المسافر؟
الشيمه يا العزيز بتودي لا تحت..
لامن تتفرج في فيلم عن الكون ، زي أستراليا دي بتكون في خاطرك فركة كعب ،
يا المسافر ، الخواجات ديل سهَّلوا علينا المشاوير بالحيل ولو توفرت الرفقه السمحه كمان
خلاص ، ياهو المراد ، ولامن يكون عندك ناس زي محمد في نقطة الوصول تكتمل إذابة المجهول،
الإيربص والجمبو جيت وذوات الأجنحة الأخطر من النفاثات في العقد ديل ما الشيمه زاتا ..

سألت د. مكاوي عن زولك وقال لي الذاكره صدئة خؤون....

Quote: طيارتك مالها ضلت الطريق يا حبيبنا ...

عذرا صديقي،
المعايش يا يحيى،
لكن قريبا بطرفك رغم غياب الشمس التي تغير طعم فاكهة الشتاء كما أفاد جويده..

Quote: إنجداعة على هباب ، في صقيع الدندر ، وعينك لمعمل الطلحو ثيريبي شغال ، احلى من كانبرا كووووولها

شيقوق،
صدقت ، نحن لاننبسط 24 قيراط إلا في بوادينا ، هبابي في خريف كردفان مع شاي بودياني ينسيك كراون متروبول وكل ما حواه ،
منذ فارقنا تلك الديار فارقنا (النومه العميقه) ، أصبحنا نعمل وتتلاحق أنفاسنا ونحن نيام ، تقوم من نومك زي الكنت في ماراثون،
أحلامنا أصبحت مرهقة ، مرهقة جد وصدق من قال ( قتلنا الرغيف)....
(الطلحوثيرابي) في بلاد الخواجات يا شيقا ، بسبب التقنية ، أصبح مجلبة للإنذار واستدعاء الدفاع المدني بشكل تلقائي..
ياخ شوفوا ليكم بدائل تحافظ على البيئة وتحول دون تدخل ناس المطافئ عند الأصيل....

Quote: مجلس ادارة مؤسسة قلوبال لو ويظهر في الصورة الدكتور مكاوي عوض المكاوي رافعاً اسم السودان..

نعم يا محمد ، د. مكاوي عضو مجلس إدارة هذا التجمع الضخم وهو عضو فاعل وقديم ونافذ ويعرف الجميع في القارات الخمس
ويجد الإحترام من الجميع لأنه يقوم بعمل يتطلب عمل مؤسسة بحالها مع فريق سكرتارية عالية المهارة ، فالعمل مع الدهاقنة
والعماليق لايقدر عليه إلا نفر قليل حباهم المولى بمهارات معروفة من إنضباط وقبول وإلتزام صارم لايقبل التسويات،
وهو من ألحقني أو بالأحرى ألحق مكتبي بهذا التجمع وقدمني إلى أعضائه وأشكر له ذلك متمنيا أن
أكون عند حسن ظنه دائما..


د. مكاوي بين الأمريكي والهندي..


وإذا بحثت في صور Globalaw في قوقل ستجد محمد الصايم كمان

عليك الله REMEMBER يا ود شيقوق .
والله لو ما خايف من
أصحاب ود المرتضي جماعة القانون المتكلين علي حيطة متحف القانون ديل يشتكوني ويرموني في
خور بكري .. الأ كنت أجيبليك كل النضمي القالوا في الطلحون الاسترالي ! FROM START TO FINISH .
ولو ما مصدقني اسأل عمك الدغور عن علاقة الط .. الاسترالي بي مكافحة الشلل ههههههها .

Quote: مرحبا محمد عثمان ومرحباً محمد المرتضى..لكم التحية ومن معكم.

أهلا شيخنا اسماعيل..
أريت حالك زين وشكرا على التحية..
والله يا اسماعيل الأيام القليلة ( 6 فقط) في أربع منها التقيت محمد (خربت) طبعنا عديل..
غايتو (أكعب) حاجه عملها محـمد أنه ودعني في مطار بيرث.. نحن - كما قال أبعاج - قلبنا آبري..
تسلم..

http://www.youtube.com/watch?feature=player_detailpageandv=lUbiDYhGpHQ#t=0







تتابع برنامج الصوت الاسترالي يمسخ عليك الأمريكي .. حولا

اسماعيل عباس
أهلاً بك هنا وشكراً لتحياتك..
يا عثمان موسى
أنحنا قراب بس تقطع المحيط الهادي وتجي تسمع الصوت وتشوف اصحاب الصوت ذاتهم..صدقني ستكون اجازة مختلفة.. الشهر الماضي زارنا من كندا السباح العالمي كيجاب واستمتعت الجالية في سيدني وبيرث بلطف الرجل وحكاياته البديعة..
تحياتي