Post: #1
Title: الحلم القديم اللولانى
Author: أبوذر بابكر
Date: 10-31-2013, 08:48 AM
فى الحلم القديم اللولانى
شفت مِرق العرِش انشقّ
وقيف الليل واقع محفّر
وحالو يغنى عن السؤال
سمعنا الخبر الطقّ
قالو النيل برك
ياهو داك قاعد بعيد
يبكى وينوح ويعانى
وهناك وقف
سعف الغنيوات المضفّر
فرتق ضفايرو فى الهوا
فى عتمة الحلم النزف
لفاها فى راس النويح
سواها شال
ومرابع الليل الفسيح
مليانه بصنوف المحال
وغنوة النجم الفصيح
عبّت حقيقته بالخيال
والوجعة فى القلب الكسيح
ماسكه فى الطرف اليمين
ساكنه فى الجنبه الشمال
وفى الحلم الجديد التانى
بين انتظار جية الخريف
ورعشة الشوق والأمانى
بخل الغمام
بالتباشير والأغانى
وبالمطر
وفسالة الأيام
بالمحنة والمودة وبالوصال
جود المسافات بالسفر
كرم الليالى بالخصام
بالغباين والسهر
ما بين خجلة العيشة الحرام
وفرحة الموت الحلال
شفت فى الحلم الكبير
وش الغنا
طيب المنى
ونغم الهنا
حس الطنابير
والمسادير
حلم البنيات الأخير
ضى الفوانيس فى وشوشن
نورة الرتاين ماشه قدامن تعاين
تفج السكه شان يبدا المسير
يمشى ويجيب فرح المداين
ينجبر خاطره الكسير
حلم البنيات الأخير
لا فى حسرة ولا غباين
مافى غير نشوة صباهن
جمال مساهن
رونق صباحن
والمسرة الفى وشوشن
دعوات صلاتن
فوق بروشن
|
Post: #2
Title: Re: الحلم القديم اللولانى
Author: بله محمد الفاضل
Date: 10-31-2013, 09:15 AM
Parent: #1
يا ليت الغناء كله
والواقع كله
والمآل كله
كما جاء هنا:
"حلم البنيات الأخير
ضى الفوانيس فى وشوشن
نورة الرتاين ماشه قدامن تعاين
تفج السكه شان يبدا المسير
يمشى ويجيب فرح المداين
ينجبر خاطره الكسير
حلم البنيات الأخير
لا فى حسرة ولا غباين
مافى غير نشوة صباهن
جمال مساهن
رونق صباحن
والمسرة الفى وشوشن
دعوات صلاتن
فوق بروشن"
معطوفاً علينا وعليهن
وعلى البلاد...
صباحك خير يا أيه...
تحياتي ومحبتي واحترامي
|
Post: #3
Title: Re: الحلم القديم اللولانى
Author: أبوذر بابكر
Date: 11-02-2013, 12:02 PM
Parent: #2
بله
طعم الناس
بلال اليباس
ياها الأمنيات
شى فى الحلم بالنهار
وشى فى التمنى بالليل
وفى كله راجين المطره
والعشم دائما اخدر
ليك السلام
وكل العطر الفى التحايا
والأريج الفى المودة
|
Post: #4
Title: Re: الحلم القديم اللولانى
Author: علي دفع الله
Date: 11-02-2013, 01:33 PM
Parent: #3
| Quote: فى الحلم القديم اللولانى |
يا سلام على كلمة ( اللولاني ) كلمة ملانة عبق وتعتيق وحنية بتذكرني الحبوبات والاهازيج عند قيام الحبوبة لملولات احفادها ،،
يا اخي والله حتى الكلمات دي بقت تخلي الواحد يشهق من التداعي للزمن الجميل والحنية المن غير مقابل
تعبير جميل يوحي بالتعب من السير ،، وفيه برضو صورة ابداعية متناهية للوصف
الجمل شيال تقيلة كما النيل وحين يصل مرحلة البركان (بفتح جميع الحروف) يكون التعب اخد منو
والنيل برك والارض بركت كما السماء والبشر في حالة بركان
---------------
شكرا استاذ ابو ذر لهذا الجمال
مودتي واحترامي
|
Post: #5
Title: Re: الحلم القديم اللولانى
Author: أبوذر بابكر
Date: 11-03-2013, 10:14 AM
Parent: #4
حباب ومراحب يا على
ده نضمى ناسنا واهلنا
وحتى إسمك يا على
يفيض بى سودانيتو
وطعمه السمح
دفع الله
بداية بى دفع الله العركى المصوبن
راجل اب حراز
لحدى عندك
المسافة بيناتكن مليانه معانى وطيب وطيبة
وخت ايدك مع الخلوق
نرفع النيل شان يقوم
من تالا الجنوب
لغاية الخرتوم
عز الزول اهل
وعز السعيه علوق
|
|