Post: #1
Title: النضال العادل والمعارضه النضيفه والتنسيق المستقبلى المدروس
Author: ملهم كردفان
Date: 10-27-2013, 02:47 PM
انا ماسياسى منظم أو كادر حزبى مع الأسف
لكن بحب بلدى
وبنتقد الوضع الحاصل
ومع الحراك السياسى الذى يصب فى مصلحة الوطن أينما وجد
....
طيب عايز تقول شنو ياملهم..؟؟؟
عايز أقول انو لو .... بس ....
بس شنو ياخ ماتتكلم ؟؟؟
طيب...!!!
ياجماعه تفتكروا ... نحنا كيف نقدر نفعل
مفاهيم وسطيه متفرده تجمعنا وماتنتقص من قيمتنا كمعارضين للنظام الحالى
وكتابات
ولغة حوار قويه ومحترمه
وذات عناوين تتميز بالنزاهه والمصداقيه
ومقالات أو كتابات تبعد تماماً عن الإسفاف اللغوى ودونية المحتوى..
نحنا محتاجين لى ميثاق شرف يجمعنا فى المرحله دى ويكون إنطلاقه وبدايه جديده
لى تواصل فكرى يودينا لى نتائج نحنا كلنا عايزنها...
منو البوافق على الطرح ده ...؟؟؟
|
Post: #2
Title: Re: النضال العادل والمعارضه النضيفه والتنسيق المستقبلى المدروس
Author: عبدالحفيظ ابوسن
Date: 10-27-2013, 03:00 PM
Parent: #1
قول
واحد
وبجي اضقل معاك
|
Post: #3
Title: Re: النضال العادل والمعارضه النضيفه والتنسيق المستقبلى المدروس
Author: ملهم كردفان
Date: 10-27-2013, 03:08 PM
Parent: #2
Quote: قول
واحد
وبجي اضقل معاك |
أووووو مرحب ياحفيظ ...
تفتكر ممكن تشرق شمس حزب سياسى جديد
يدفعنا من خلال طرحوا القوى
لى إننا نكون أعضاء لينا قيمتنا الوطنيه المحترمه
وبيقدر يعبر عننا بى طريقه واضحه
وذمتو مابتتباع تحت أى ظرف من الظروف ؟؟؟
واهم حاجه نقدر من خلالو نقول العندنا ونغير حالنا كلنا للأحسن؟؟؟
..!!!
|
Post: #4
Title: Re: النضال العادل والمعارضه النضيفه والتنسيق المستقبلى المدروس
Author: عبدالحفيظ ابوسن
Date: 10-27-2013, 05:13 PM
Parent: #3
حبابك ملهم
كدي النبدأ
العنوان حقك ده كبير شوية , ونمشي خطوة ,, خطوة
وموضع حزب جديد نرخيهو هسه ,, واصلها ما ناقصة كل حزب انقسم وكل حركة انقسمت ,, انقسامات متتالية
فخلينا نتعلم نحترم بعضنا
ونقبل بالآخر
ونترك الصراعات الشخصية والقتل المعنوي
نرتقي بالحوار ,, لغة ومعنا
ولانزايد علي وطنية
ولانرمي الآخرين بالتهم جزافا
دي وجهة نظري الشخصية
|
Post: #7
Title: Re: النضال العادل والمعارضه النضيفه والتنسيق المستقبلى المدروس
Author: ملهم كردفان
Date: 10-27-2013, 09:54 PM
Parent: #4
Quote: حبابك ملهم
كدي النبدأ
العنوان حقك ده كبير شوية , ونمشي خطوة ,, خطوة
|
ماتخليهو يكبر كمان بى اضافاتك الطيبه دى ياخ ...وياريت يبقى أكبر وفى قامة وطن
نحنا والبنكتبو ده والله والله
مايسوى زرة تراب فى رجل طفل ضغيرونى
بيحلم بى مدرسه فيها كل الهو عايزو
ومواطن تعب من الهم الهو فيهو لمن إحتار يعمل شنو
ياريت عنوانى يكون مكتوب بى دم قلبى ياخ
Quote: وموضع حزب جديد نرخيهو هسه ,,
واصلها ما ناقصة كل حزب انقسم وكل حركة انقسمت ,, انقسامات متتالية
|
نحنا بنفتش لى حزب لابنقسم ولابيتقسم بى فعل فاعل
حزب يكون غايتو الفى بدايتو زى غايتو الفى نهايتو واحده بس
اننا نكون متحدين ومتحابين ومامتنافرين ومتقدرمين ومرتاحين زى الناس ياخ
والله المآسى البتمر علينا دى حرقت دمنا والحرقو دمنا ربك بيحرق دمهم بينا
مابى غيرنا ...
لمن كلمتنا تتوحد جد جد
Quote: فخلينا نتعلم نحترم بعضنا
ونقبل بالآخر..ونترك الصراعات الشخصية والقتل المعنوي
|
انت محترم نفسك وزول صاحب كلمه وراى
وفى ناس كتار بتعجبنى سلوكياتهم المافيها شق ولافيها عيب
الله يقدرنا نوصل رسالتنا للبخلونا نتألم من حبايبنا ياخ
Quote:
نرتقي بالحوار ,, لغة ومعنا
ولانزايد علي وطنية
ولانرمي الآخرين بالتهم جزافا
دي وجهة نظري الشخصية |
كلامك ده ماذاتو الكلام الحلو الخلانى أفتح البوست ده ياحفيظ ياخ
|
Post: #5
Title: Re: النضال العادل والمعارضه النضيفه والتنسيق المستقبلى المدروس
Author: عبدالحفيظ ابوسن
Date: 10-27-2013, 05:44 PM
Parent: #3
نحترم بعض ونضع سقف للخلاف
يعني ماممكن اي اتنين بتناقشو ,, يصلو البيوت جوه والاهل ,, او الاساءات الشخصيه البتحول النقاش لمشاجرة
ياخ نقاش سياسي ماعندو علاقة بالنشاط الجنسي مالم تجيب اثبات علمي بعلاقة النشاط الجنسي والسياسي
او فساد اخوك ولا بتك بيعني فسادك
وبالجد ده بحول المتناقشين لأعداء وبيوغر الصدور ,, ويخلي اي واحد مترصد للتاني في اي بوست حتي لو كان عن لعب البلي
|
Post: #6
Title: Re: النضال العادل والمعارضه النضيفه والتنسيق المستقبلى المدروس
Author: سيف اليزل سعد عمر
Date: 10-27-2013, 06:28 PM
Parent: #5
قول اتنين يا فنان
وأضيف صوتى لمداخلة عبد الحفيظ أبوسن
تحياتى
|
Post: #9
Title: Re: النضال العادل والمعارضه النضيفه والتنسيق المستقبلى المدروس
Author: ملهم كردفان
Date: 10-27-2013, 10:12 PM
Parent: #6
Quote: قول اتنين يا فنان
وأضيف صوتى لمداخلة عبد الحفيظ أبوسن
تحياتى |
وانا بضيف صوتى ليكم يا
سيف اليزل سعد عمر
عشان نبدأ نجهز لى كوكتيل من القيم السمحه
البترفع شان البلد وبالتالى نحنا ذاتنا نشم هوا نضيف
مافيهو ريحة عذاب أو ظلم
مع أطيب التحايا لشخصكم الكريم والمقدر
|
Post: #8
Title: Re: النضال العادل والمعارضه النضيفه والتنسيق المستقبلى المدروس
Author: ملهم كردفان
Date: 10-27-2013, 10:06 PM
Parent: #5
Quote: نحترم بعض ونضع سقف للخلاف
يعني ماممكن اي اتنين بتناقشو ,, يصلو البيوت جوه والاهل ,, او الاساءات الشخصيه البتحول النقاش لمشاجرة
ياخ نقاش سياسي ماعندو علاقة بالنشاط الجنسي مالم تجيب اثبات علمي بعلاقة النشاط الجنسي والسياسي
او فساد اخوك ولا بتك بيعني فسادك
وبالجد ده بحول المتناقشين لأعداء وبيوغر الصدور ,, ويخلي اي واحد مترصد للتاني في اي بوست حتي لو كان عن لعب البلي |
سقف الخلاف فعلاً لمن يتعدى المعقول للامعقول والمقبول للامقبول
بنقرأ بين سطور الشمات حاجات بتوجع القلب ياخ ...وبتنفر جدا جدا
وبتخلينا نزعل من الناس المن المفترض انهم قادة مجتمع ورموز تغيير
ومكانتهم من المفترض ان يعول عليها اليوم وبكره وبعدو
....
الخلافات المنبريه الغير سويه دى براها مهدد حقيقى لى مستقبل السودان
والكتابات المريضه والغير موثوقه والتى تمتلىء بالشتائم
مضره على الصعيد الشخصى لمن إرتكبها ياحفيظ
ومضره لينا كلنا والله ....
|
Post: #10
Title: Re: النضال العادل والمعارضه النضيفه والتنسيق المستقبلى المدروس
Author: cantona_1
Date: 10-27-2013, 10:16 PM
Parent: #8
الشرفاء من أبناء الوطن والماجدات من بنات السودان .. إليكم عنوان البنك في فرنسا وكذلك ال PayPal لتلقي مساهماتكم الكريمة للمشروع الحيوي الذي اتفق عليه الجميع.
بارك الله لكم في مالكم وعيالكم وفرّج كربة الوطن مما هو فيه... آدر يا كريم.
وبهذا نستأذن صاحب كل بوست أن نلصق هذه التذكرة عسى ولعل فالذكرى تنفع المؤمن.
هذا هو رقم الحساب وعنوان البنك في فرنسا للتحويل والشكر للجميع وبالله التوفيق
Bank name : societe general
Acc holder : accociation de la democratie et la liberte
Acc iban : fr76 3000 3021 8500 0501 3127 964
Banc id (bic) : sogefrpp
هنا تجد صفحة ال PayPal للتبرع الكريم من سيادتكم
www.facebook.com/dollarforfreedom
تحياتي.
كبـّاشي الصـّـافي
|
Post: #11
Title: Re: النضال العادل والمعارضه النضيفه والتنسيق المستقبلى المدروس
Author: محمد حمزة الحسين
Date: 10-28-2013, 05:37 PM
Parent: #8
ملهم كردفان
ويا ودابوسن وثالثهما سيف اليزل سعد عمر
من الاخر كدا انتو عايزين تكونوا رماديين لكن للاسف الرمادييين زيمسلفس
منكرين هذا التصنيف لذا اثني مبادرة اخونا ودابوسن نحن الاعضاء الجُدد
وكان فهمي ليها انو نقيف مع بعض نغزر بعض نرد علي بعض نرفع بوستات بعض
نتشاكل مع بعض ونرسي ونثبت مفهوم الاختلاف النظيف حينها سيعترف بكم الجميع
وسيكون لكم شرف البورد وشرف اللعبة النظيفة اتمني ان لا ينفلت الزمام من بعض الاعضاء الجُدد
عندما يحاصرهم السناير بالشتايم والتقريظ والاستفزاز المقصود والغير مقصود
أما من ناحية الرأي والراي الاخر فلاحجر علي رجل يقول ما يعتقد ويظهر ميولة لما يؤمن به من خط سياسي
يري فيه الاهليه لاصلاح الوطن والمواطن بغض النظر عمن يصنفك كوز شيوعي رمادي شيعي قل ما تعتقد وتؤمن به ولا تنتظر
صك براءة او غفران او تجريم من احد كائن من كان
:
:
:
:
:
:
:
مع التحيات لله الزاكيات
|
Post: #12
Title: Re: النضال العادل والمعارضه النضيفه والتنسيق المستقبلى المدروس
Author: عبدالحفيظ ابوسن
Date: 10-28-2013, 06:44 PM
Parent: #11
شنو يا دفعة
لا يا محمد حمزة ياخ
ما تقوم فيني علالة وتجيب لي الهوا
ما كدة
في اضانك كده وبالسر
طيب ليه ما قاعد ترفع بوستاتي
ولا
قول
ان شاء الله حق الاعضاء الجدد
كامل الود لكل اولاد حجتي
|
|