BBM 7740890b9

يا عمر عملت بي بي؟؟
خلعتني بي سؤالها الجرئ لحد الكبكبة والرجفي من جانبي..
قلتي شنو؟؟؟
عملت بي بي يا عمر؟؟؟
يعني انا سمعتها صاح..بي بي اذن!!!
ايوااا نظام البت عايزة تتصعلق علي وتعمل شفتة..!!
قلت ليها لا لسة ما عملت لكن ماشي اعملو اسة..انتي عملتي بي بي ؟؟( قلتوانا زاتي اتشفتن واتصعلق)..
خلعتني بجرأتها وقووة عينها وهي بتقول لي ااااي عملت!! ياخ موباااالغة..رييحني في كنكوجي بعد عملتو!!
اجابتها خلتني اجر شريط الذكريات واول ما تبادر لذهني رودا مردة..!!!
وده عملتيهو كيف ؟؟؟ سألتها مواصلا شفتنتي؟؟
والله يا عمر عملتو لكن بصعوبة شديدة !!حاولت اكتر من مرة ما كان بيجي لكن بعد حراق رووح حتى عملتو!!
وعملتيو كيييف يا إنتي؟؟ قاعدة ولا علي الوقفة ؟؟ مواصلا صعلقتي باغتها بسؤال..
اقووول ليك بعد حراق روووح تقول لي علي الوقفة..؟؟ اكييد قعدت بمزاااج حتى قدرت اعملو..
اها وبعد عملتيو ارتحتي؟؟ سؤال جديد لتأكيد شفتنتي؟؟
والله يا عمر النصيييحةوارتحت..ياخ انا كنت تعبانة تعب ما اعتيادي في قصة الاتصال دي!!!
هجمتني اجابتها وخلعتني للدرجة اللي طييرت الشفتنة من كنكوجي فكسرت عيني وخفضت صوتي وطأطأت راسي.. وقررت ايقاف الاسئلة وموادعتها.. ههوووي يا زولة ودعتك الله..وادرت ظهري لها مغادرا..
دقيقة يا عمر هاك..!
زادت دقات قلبي وتجمد الدم في عروقي ..استدرت متوكلا ويديني على عيوني بس النصييحة بعاين بي الرقراق بين الاصابع..
فاجأتني وهي تخرج ورقة صغيرة من الشنطة وبتقول لي :
هاك يا عمر ده البي بي بتاعي اضيفني عليك الله!!


تخريمة :
الله يلعنكم يا المصريين ليي فهمتونا انو البي بي معناها البوول؟؟؟

يا عمر ازيك
من رقم البي بي البرا وقبل ما ادخل البوست قعدت اضحك
قلت اشوف عمر دا جاب لي ياتو مصيبة

يا الامين..
ده كلللو هيين..
انا كتبت الموضوع ده لاني شايل هم ناس الايفون يعملو ليهم ابلكيشن يسموهو
KKA..
و تقووم واحدة تسألني عمر عملت ككا؟؟

والله اتطورت يا العريبي بقيت تنضم بالبي بي والايفون ما فاضل ليك الا الانجليزي :)

احكي ليك قصة لذيذة وممتعة تموت من الضحك هههههههههههههههه
واحد من اهلنا راكب في ال " بوكسي " ولو مابتعرف البوكسي هو اللوري لكن بعد مايعملولو سقف ويختو فيهو كنبتين ..المهم بت الحلة مشت الجامعة في البندر وجات تنضم عن حقوق المراة والمساواة وهلمجرا
سمعها تنضم جوة البوكسي قام قالها..
هيي يا مرة انتن كان دايرات تتساوون معانا تعالي نفكو سواء بشباك البوكسي دا ..


احيي يا مصاريني



اجيبلك واحدة بتاعت ككا ؟؟ :)

حيدر قينان..:)
البوكسي ده يعني ما البرينسة؟؟:):):
طيب ياخ ما تراكا ظريف مالك؟؟
بعدين ككا اكتر من قصتك دي الغ الحححييا:):)

إتنين من أطفال الخواجات ديل واقفين قدام قبر من قبور الفراعنة في مصر ومكتوب تحت في القبر 1220BC .. قام داك سألو قال ليهو ده شنو؟؟
داك رد ليهو : ده بيكون ال BBM حقو ..

بتصرف من قوقل للترجمة :)

شاحد الله تجيك سمارت تشنّف ليك البي بي وتطلّعه أي كلام وتفطّس لسك البوست عشان تعرف الشناف دا زعّأط كيف ههههههههه

ما عاش اللى يرد لى ود البشرى طلب.....

BBM ....يا عمر الفاروق !!!!!
و ان شاء الله بعد ده نزلتوا ??? وبس ما يكون عندك اصحاب فيه!!!
دى بالمناسبة سمعة ما كويسة انك تكون فى BBM اوGoogle plus
اتخارج سريع قبل ما تعمل لى روحك سمعة بانك ما عندك اصحاب و قاعد تتلفت براك هناك.

و تعال هنا كمان....ال بى بى ده "ظاهرة طبيعية" متين بقى الكلام عنه شفتنة ??
طبعا عمر الفاروق ما ح يفوت النقطة دى. و ح يجى يذرذرنى فى حكاية انه عيب و ما صاح زول يقول انه ماشي الحمام قدام الناس!!!!
كنت شغالة فى شركة بترولية كبرى. وكعادة الشركات دى فى السودان (زمان) كانت فى البيوت. و كان الحمام امام مكتب المدير. لما تجى مواعيد صلاة الظهر انا و صحبتى بنمشي الحمام و نتوضى عشان الصلاة. جاء المدير قال لينا لو معاى ضيوف ما تدخلوا الحمام!!! بكل ظرافة قلت ليه:Sorry .....لكن اذا محتاجة اخش الحمام فى اى وقت ح ادخل الحمام. و ضيوفك ديل ما عارفين ان الناس بتدخل الحمام??.
الراجل حمر لى, و طلع من المكتب بيطنطن...بالله عاين البنات ديل طفشوا الاولاد من المكتب وقعدوا لى*
________________________________
* كل الاولاد كانوا فى الموقع...فى هجليج.

عمر ...نسيت اقول ليك كل سنة وانت و الاولاد و امهم طيبين....و القابلة -ان شاء الله- عندك بتين تومات يادبوك تماااام.

ود البشرى...كل سنة وانت و ام الاولاد و الاولاد طيبين.
شكله موسم الهجرة لبلاد الاعراب قد هل علينا. انتظرونا.

وإنت والأسرة بألف خير يا سمارت يعود عليكم بالصحة و العافية إن شاء الله
الف مرحب بيك في بلاد الأعراب
نصيحة غايتو اخديها, بلاد الأعراب نواحي المملكة ما بتنفع معاكم اي نعم السكن رخيص و الحياة عموما لكن فقريين و سينمات ما عندهم :)
تعالولنا الإمارات الوضع انسب بكتير و اقرب للحياة عندكم, دبي لولا الحر و الرطوبة و الهنود الكتار ما بتفرق من واشنطن كتير هههههه
ومع برنامج إكسبو 2020 دا في بوومنج جديد متوقع و مشاريع كمية وفرص رهيبة ح تتوفر للمهندسين
الدوحة بيض و سكنها نار مولعة رغم الفرص الممتازة بسبب كاس العالم

سلامات يا ود البشرى....
ح نخرب لعمر الفاروق البوست لو واصلنا ونسة ...(:

اقول ليك حاجة ? اتوكلنا على الله .....و ادى خربة للبوست. الله يا عوضك يا عمر.

تعرف يا و ود البشرى انا بمشي محل ما الخواجة بيقول لى امشي. احنا ناس محمولين وكده :) . الخواجة الان قال فى شغل فى السعودية, لكن ما ممكن ارميكم الرمية دى {ما تزعلوا يا ناس السعودية ^_^ }. عشان كده الشغل فى السعودية و السكن دبى. دبى دى فعلا بمولاتها و رطوبتها -و سودانيين الكتار ديل- عاملة ذى واشنطون. غايتو الموضوع لسه عاوز تكتكة و يمكن الخواجة يغير رايه و يقول خليهم فى
The Land of the free home of the grave
المشكلة جلدى بقى حلو...و واشنطون دى ذاتها بثلجها و رطوبتها دى ما بقدر عليها. انا فى حتة الجو جميل السنة كلها. و الناس ذاتهم جميلين. :)
وغير انى كبرتا على انى امشي بلد جديد و اعرف الناس و السستم و السواقة فيه.

إكسبو 2020 ده شنو ?

تحياتي وسلامات سمارت يا هندسة
كل عام وأنت وأسرتك وأحبابك بألف خير

Quote: جاء المدير قال لينا لو معاى ضيوف ما تدخلوا الحمام!!!

غايتو لو المدير دا طلع صاحبي شهاب عبدالقادر أمانة ما تعب معاى ...

ثم

دبى ح تنور بيكم


___________

فاروقنا

ح تقول علينا حقارين .. موش ؟؟

ود البشرى يا حبوب..
ما لا تعرفه إنو أخوك بيشجع اللعبة الحلوة كان لي كان علي المهم شي يفرح القلب ويدخل البهجة .. طبعا عااارفك ح تقول لي بالله يا عر انت لمن تشنف الناس بتستمتع؟؟:):):)
ود البشرى لازم تحاول تكتشف الشعرة ما بين الشناف والحقائق .. :) :)

تخريمة :
أمبارح شوفت أقوان الهلال في أهلي مدني؟؟ مع الفارق لكن والله يا ود البشرى الهلال ده ككورة كده بعيييد من باقي فرق الممتاز دي ..عندو نكهة براااها كده ياخ بتشبه كورة برة مرااات كده

Quote: و تعال هنا كمان....ال بى بى ده "ظاهرة طبيعية" متين بقى الكلام عنه شفتنة ?? طبعا عمر الفاروق ما ح يفوت النقطة دى. و ح يجى يذرذرنى فى حكاية انه عيب و ما صاح زول يقول انه ماشي الحمام قدام الناس!!!!

غايتو يا إسمارت ذكرتيني النكتة المعدلة الحايمة الأيامات دي بتاعت الراجل الأشتر وما بيعرف يتكلم ..قالوا أول مرة يمشي لي نسابتو قامت نسيبتو خشت الحمام وجات طالعة ..
حب يتظارف قام قال ليها :
بول شديد..
:)..

أها يلا يا إسمارت الكلام عن الحمام ما شفتنة ولا عييب لكن اتحداك يوم تكوني قلتي لي زميلكم في الشغل دقيقة امشي ابول واجيك نواصل شغل ..
أو تقولي لي مديرك الجمبو الحمام ده شنو يا سعادة المدير اتأخرت كده مالك في الحمام ده كلللو بتبول؟؟
النصيييحة يا إسمارت وانا اسة بكتب ليك في المداخلة دي خجلان من إنو أكتبا ليك لكن بس كان لازم عشان أوريك الحتة البتمنعنا نضم عن الحمام ما عشان الحمام عيب لكن عشان في مفردات مع إننا بنسعملا لكن ما بنقولا كنوع من الحياء أو خلينا نقول حسب تربيتنا السودانية إنها مربوطة بي الأدب.. والدليل على كده إنتي بييي طولة لسانك دي الفي المداخلة اصصصلو ما جبتي سيرة شي غير بنمشي الحمام وبنتوضا ..
بالمناسبة الجنس ظاهرة طبيعية لكن برضو لمن تجي تتكلم عنها ممكن تتشفتن وتقل أدربك يا كمان تتكلم عنها بي نظرية باب التكاثر بتاع سنة تالتة وتتمها حبوب اللقاح والبرعم واليرقة وذوات الثدي ..

نرجع لي موضوعنا الأساسي ..هو صحي كان شنو ؟ :)
ثم ياخ كل سنة وإنتي وكل من تحبين بخير وصحة وعافية ..
وعلييكم الله ما تجونا في السعودية ما فاضين لي تنظيراتك كل يوم تجي تكتبي تشنفي لينا السعودية وتعولقيها لينا ..عاجبااانا

عاطف يا عمر..
إسمارت دي النوع الشكلها حاجة حريييصة وحسسسااابا اها لمن تجيكم دبي وتقوم تقرر تجي السعودية عمرة وتكتشف فرق الاسعار في الهدوم والايجارات بتبقا عمرة وزوغة ويا مريم ياخ ما تشوفي لي جمبكم شقة .. وياخ هدوم الاطفال هنا رخيييصة موبااالغة ..و و و
فصدقني ما أن تقطع إسمارت المحيط للخليج فالعرجا لي مراااحا ..
غايتو انا من عندي هدية عباية سودا مخصرة مشغولة بالكريستال الاسود لي إسمارت لمن تجي..

OEM عمر , إسمارت , وود البشرى ولا اجدع ماسنجر :)

بوست لذيذ ويغري بالتداخل و الانبهال
تحية عمر وضيوفه
ختيتو اول مره شايفو كلو ارقام قلت بكون بتاع للاذكيا داك
اضف البي بي دي زاتو شنو نفرو
غايتو الخواجات الكوفار ديل لامين يخسرو في ناس شركات الاتصال جنس خساير

ود البشرى واسمارت يعنى لازم توصلوا لينا طرف الصوت عشان تهبشوا بيه عمر الفاروق , فعمر الفاروق لديحا لا خوف عليه ولكن ما بال المستضعفين نواحى السعودية
عايزنهم يحدردوها بعد ان عرفوا كيفية مجازفة الحياة بها دون سينمات ودون قيادة للمراة ودون اختلاط لمحبى البهجة
بس كمان يا ود البشرى دبى ذاتها بتكون زى اللعوتة لزول جاى من اثينا خليك يكون جاى من واشنطون , هسة بالله شارع شيخ زائد فرمالة دبى لو مشينا ورا واجهة الشارع
ما صحراء بيوضة بس , ودة مبرر كافى فى حد ذاته للقروش البيلهفها الرجل الابيض حينما ياتى الى دبى متنازلا عن عالمه الاول الى عالم هجين من المتناقضات

هذا ومع تحياتى للجميع وكل عام وانتم جميعكم بخير

سلامات يا بشمهندس عاطف. كل سنة و انت و الاسرة بألف خير. ربنا يخلي ليك الأولاد و أمهم و يفرحكم بنجاحهم، يا رب.
أبداً و الله. ده ما البشمهندش شهاب. شهاب ده من أحسن المهندسين اللي انا اشتغلتا معاهم علي الإطلاق. بمافيهم الفرنجة. زول هادي و رائق و شاطر. و النصيحة لله - الزمن داك انا و صحبتي كنا المهندستين و الوحيدات في المكتب، ما قصر معانا كلو كلو و اول ما اشتغلنا كان بينزلنا في طريقه للبيت. و كنا أصلا متدربات في الشركة و هو اللي عينا رسمي. ربنا يطراه بالخير و يديه الصحة و العافية.

عمر الفاروق،غ
عرفتك يا عمر ح تجي تقول كلامك الفوق بتاع التربية و العيب و كده.
طيب انا حتي في البيت مع أولادي بقول ( نمشي الحمام). ده المصطلح اللي بستعمله.
و صدقني كم مرة كنت شغالة مع زول ( زميل) و قلتا ليه بالحرف :
I have to run to the restroom
الأمريكان بيقولوا للحمام restroom
كنت مرة مسافرة لشغل مع واحد عمك كبير. أولاده قدرنا. السفرة كانت حوالي 5 ساعات بالعربية. قبل ما نتحرك مشينا الحمامات و اتحركنا. بعد 3 ساعات في الطريق قلتا ليه:ممكن تقيف في اقرب rest area عشان انا عاوزة امشي الحمام. قال لي حاضر. و قف في ماكدونالد في الطريق( ماكدونالد معروفة انها عندها أنظف حمامات في الطرق السريعة هنا) اشتري لروحه عصير و اشتري لي ايسكريم. لما ركبنا العربية قعد ينقنق. قال انا لما أسافر ( وين كده) عشان أزور أهلي لوحدي بصل في 9 ساعات. لما زوجتي تمشي معاي بصل في 11 ساعة. ما عارف أنتو مالكم جنكم حمامات. عشان كده اشتريت ليك ايسكريم. :(


كلو كوم يا عمر و العبايات السوداء كوم. الراجل ح يرجعني لامي لو لبستا عباية سواء.
عندي اصحاب رجعوا الخليج العربي من أمريكا. لكن لحدي الان بيرجعوا يعملوا shopping لهدم الأطفال من أمريكا. قالوا المنتجات في الاسواق الامريكية ما في ذيها بالأسعار الرخيصة في العالم. يعني لو عاوز حجات بنفس الجودة بتلاقيها في دبي( مثلا) بس بثلاثة أضعاف السعر اللي في أمريكا. ما ناوية اعمل كده، لكن بقول ليك الحاصل. انا نظريتي من زمان لو ساكنة في الخرطوم بلبس من سوق الاخوان ( بتعرف سوق الاخوان؟ ما الاخوان المسلمين طبعا) لو في بحري البس من سعد قشرة. لو دبي البس من ( ستي سنتر :) او سوق نايف ( ما فارق).
تعرف يا عمر انا كان ممكن أجي الخليج من زمان، لكن ما عاوزة أجي براي. عاوزة أجي مع شركة أمريكية. عشان لو غلبني ابكي ليهم يرجعوني بلدي. و ايوه، قصدي بلدي أمريكا :)

سلامات يا بشمهندس احمد التجاني. كل سنة و انت و أسرتك طيبين. أعفوا لينا الشناف. لكن عمر الفروق ده يستاهل اكتر من كده.
و بلدكم دي -النصيحة لله- ما بتنقعد. حتي الخواجة عارف أني -انا اللي جاية من قعر افريقيا -مع ح اقدر عليها.
حتي دبي دي انا ح اقعد انقنق اقول انها زحمة و السواقة فيها ح تتعبني. و المدارس الامريكية غالية نار. و السكن مباااالغة. معقول السكن 5 الف دولار في الشهر؟ نفس السكن ده ممكن ألقاه في أمريكا ب الف و نص!!!!

هسى يا عمر ..
البى بى الفوق ده بتاعك ؟؟

والله يا عمر أنا نزلت البي بي في الايفون لكن غايتو إلا اتونس فيهو مع رقبتي، لو ما أضفت زميلنا في المكتب كان لحدي هسع ما عرفت بيستعلموا كيف. طبعا أساسا البلاك بيري شكلو إطلاقا ما بيعجب، لكن كون الشركة تنزل الأبلكيشن مجانا أحسن ليها من تطلع من سوق الإتصالات. وأعتقد لو فكروا في طريقة بربط البرنامج أوتوماتيكيا بالفيسبوك والتويتر لإضافة الأصدقاء بيكون أحسن ليهم. بدل ما الزول يكون في جزيرة معزولة بال بي بي بتاعو.

تحياتي لضيوفك خفيفي الدم.

ويا سمارت ما كتبتي لينا عن ال IOS7 وال iPhone 5 s

وبالمناسبة لو ما عندك مانع ممكن نعمل بوستيك ده لمشاركة البي بيهات
وكل زول يجي ويجيب البي بي بتاعو هنا