أصـلـوا دا لآعِـب كُـوّرة، والـلآ قِـرِنـتِـيّـة كـرِيّـمـة ؟؟؟...

قالوا، والله يكفينا شر قلنا وقالوا
في كريمة ظهرت قرنتية محنت الناس محنة شديدة. كمّلت الجروف، وسدرت
لافوق كملت المزروع في الحيضان، وكان في جرايد نخل مهدلات أكلتن، قش
الواطة لحستو، البروس عدمتو نفااخة النار، التقاعدمتها أسم الحبة
الفي بطن المطآمير برضو لحقتو.
الناس حاولوا المستحيل للقبض عليها أو قتلها، كل المحآولآت بآءت
بالفشل... أعيان البلد عقدوا إجتماع طارئ وقرروا إرسال برقية لشـرطة
أتـبـرا

وصلت البرقية وردت عليها شرطة أتبرا بإرسال إثنين شاويشية لكريمة
نُحآف زي المساويك، قُدآم من زمن الأردية والعمم. كل وآحد دآرع في
كتفو بندقية أبوعشرة، كان علقها في كتفو اليمين يميل معاها يمين
وكان علقها في كتفو الشمال يميل معاها شمال. يآالله شايلين روحهم
وقالين البنادق..

وصلوا كريمة مواعيد الفطور. ناس البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة
حليل المضيفة. ( المضيفة عبارة عن غرفة كبيرة تُبنى في مكان
منعزل غير بعيد عن المنازل، وغالبا يبنيها ناس البلد عن طريق
النفير. وهي مأوى لكل عابر سبيل، يتفقدها ناس البلد في مواعيد
الطعام عسي أن يكون لجأ إليها عابر سبيل).

بعد فاصلوهم وأخدوا خبارهم، الفطور وصل. الجاي بملاح دمعة
بقراصة، والقراصتو مملحة بملاح ورق، والجاي بعمود، وواحد بصحن
كبير مغطي بكبديق، ووأحد كسرتو بايته مملحها بلسان طير. إنكسروا
فوقهم ناس البلد من كل صوب وحدب، بأصناف متعددة من الطعام. الجماعة
أكلوا تمام ومصمصوا أصابعينهم. بعد دآك وصل الشاى. كل وآحد
شرب تِسعي وحقبوا بنادقهم وبقو مندلين علي البحر.

الوقت منتصف النهار والسخآنة تقلي الحبة. النسوان قامن
علي(التكلة) شدّن الحِلل فوق النار. الحِلل يجقجقن، والبلد
صآآآنة. صوت الفنان الكاشف منبعث من راديو قديم حجارته قديمة
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة، والقراريص مردومة في
الطُبآقة. القرية صآآآنة, الدخآخين منبعثة من التكلة ورواكيب
العُوآسة. قطع هذا الصمت صوت حمار بدأ ينهق، أزعج قمريتين في
رأس التمرة، طارن وركّن فوق شُدرة سنط، قوقن لفترة بسيطة وسكتن،
ثمّ عاد الهدؤ يعم المكان، وبدأ صوت المذياع يظهر من جديد ضعيف
متقطع، والنعام آدم يردد (يقولوا لي يا مسكين عليك ظلم الحسن
وحسين، يا دآب قل نوم العين).
الجماعة مصنقرين فوق البحر والقرنتية ما منها خبر

حان موعد الغداء.
نادوهم للمضيفة، وناس البلد يعجبوك، ردموا قرآريص ومِلحآت
تكفي يأجوج ومأجوج. الجماعة دفسوا تمآآآم وشربوا الشاي، تآني
كل واحد شِرِب تسعى، وقاموا علي البحر.
الجو أصبح معتدل نوعا ما. لحظات العصاري جميلة. النيل هادئ
وساكن، لايعكر صفوه إلا مركب حوآتة تعبث بمجاديفها خالقة فوضي
في وسط السكون الممتد يين الضفتين.
الجماعة حاقبين بنادقهم وقاعدين، البيناوِلُن سيجارة
البيناوِلُن سفة، واحد يديهم تمرآت، ترمس، كبكبيق... الخ،
وكت الواطة بقت المِغيرِب نادوهم للشاى. شاي المُغرب طبعا
شئ أساسي في البلد، وبلبن طبيعي. البرآريد والكبابي وقُداحة
اللقيمآت ما تديك الدرب، وكل زول يحلف عليهم لآزم يضوقوا
شاهيهو وزلابيتو وهم طبعا أسكت كِب.
ضربوا تمآآآم وبقو مندلين علي البحر.

بدأت حالة الرباط من جديد تحت ضوء القمر الذي أطل في تلك
الساعة من خلف النخيل جاعلاً جزء من ظلالها ممتد علي الرمال البيضاء،
والجزء الآخر منعكس علي صفحة النهر. القمر متسلل للأمام والظلآل
متراجعة للخلف، والقرنتية لم تظهر بعد. حتي تناقصت الظلآل وإختفت
وأصبح القمر بلونه الفضي منعكس علي صفحة النهر،
حان موعد العشاء.
الجماعة حقبوا بنادقهم وبقوا سادرين. كمية غير عادية من الفطير
باللبن والقرآصة بالسمن والسكر، وقرآصة التمُر كانت في إنتظارهم
ضربوا تمآآآم، وكل وآحد كتحلوا كورية لبن، ورقدوا ناموا

الصباح عيونهم فتّحن فوق براريد الشاي وقُدآحة الزلآبية، لهطو تمآآآم
ما قصروا، وبقوا مندلين علي البحر.
ثلاثة أيام بالتمام والكمال وهم علي هذه الحالة، والقرنتية كأنها
ما وُجدت ولا خُلقت.

يوم في ساعة الغداء، البروش مفروشة وعليها كمية من صواني الأكل
لاتجد كميتها في أجعص دكان عَدة في البلد، والجماعة عرقانين وشغالين
لهط نضيييف.
وآحد من ظرفاء البلد علق قائلاً: والله يا جماعة، الأكل الأكلوهو
الجماعة ديل القرنتية زآآآتا ما أكلتو...
.
.
.
ود المدير...

المريخ العاصمي محتاج لطباخ
أو طباخة عشان يعمل ليهن
فطور وغدا وعشا.
والله صحي...

Quote: الأكل الأكلوهو الجماعة ديل القرنتية زآآآتا ما أكلتو...

هههههههههه......

بالله في قرنتية بشركو ليها نص النهار ؟
فرس النهر لا يخرج للأكل إلا في منتصف الليل يا عمكـ ...




* خبير في ناشيونال جيوغرافيكـ ....... ( يعني صلاح غريبة أحسن مني في شنو )

كل سنة و انت طيب
يا مبدع

و طيب

الشعب السوداني رسل برقية لي منو
عشان الجماعة ديل ياكلوا جنس الاكل ده

..
..
... ...
..
..
..ود المدير .... عيد سعيد و عيد اولاد الغرابه ....ألٍـسطه ..و انشاء الله دايما ألٍــسطه مع اللسته الدسمه دي ....ياخي دي لسته و الله ما ناقصاها اي حاجه ....من الدواب و الطيور البلديه ....إلا القرتنيه و اللا البعشوم بتاعك ده ...و الهوت ضك بتاع بشه ....و اكيد الزول ده ما سمع بيهم ...لانو لو سمع بيهم ....فقطع شك كان سردم في اللسته بتاعتو دي !!!!!ياخي ده بعد ماسرد الدواب دي فصلم ...ما خلا الجقاجق و الكمونيات ..حتن بعد داك عتب علي الافوال البالجبنه و الحلبه و الشايات الساده و الملبنه بالرز و العصاير الطازجه مع التركيز كمان ...و الباسطات البالسمنه ...و حكمت الله زمااااان صديقنا عثمان انس في بوفيه محطة عطبره بتاع عمنا المرحوم بابكر عطر الله ثراه .... يشييييييل و يلحن لصينية الباسطه بتاعتو (مااااا بالسمنه و كده ) عشان عمك بابكر ما يأكلو الراجع منها ..!!!!!! ..و مر زمن طوييييل .... وقلب اللحن لــ (ما منعونا و كده !!!!) بعد ما منعوهو اولاد الابالسه من الالحان !!!!شوف الزمن ده كووولو عدّ و الناس نست الموضوع ....و بقي في طي الذكريات البعيده و الاحلام المنسيه...هسع عمك ده جاب لينا الماضي من ديلو ...و قال (باسطه بالسمنه) ... غايتو بنقول ليهو دي قديمه ...لكن حقيقه الجديده ( مديدتة الجردقه دي ) ...دي كيف دي؟؟؟؟....
...
..
..انت عارف يا ود المدير الزول ده لو ماقال في نهاية كلامو ولاية شمال دارفور ...كنت طوالي حاعتبروا بتكلم من اتحاد كرة القدم بتاع شمال البرازيل ...البتكلم عربي!!!و رئيسو منعم كارلوس السوري
..
.
.
.
.
.ياخوي ....
عرفنا انو الناس ديل ما سمعو بالهوت ضوك !!!! علا حكاية رفع الدعم عن الطلح والمحروقات ده ما جاهم و اللاكيف ؟؟؟؟
..و اللا ياربي يكون السيسي بهلا ليهم من قطر؟؟؟
.
.
.
.
..الله فراجين
..

بوست متعة والله يا ودالمدير.
قصة القرنتية جميلة وطرفية والاجمل سردك لتفاصيل الحياة اليومية لاهل القرية .
شكرا ودالمدير على هذا الابداع.

ود المدير ... ربي يسعد أيامك ويديك الفي مرادك بركة من صلى وقال يا الله

وشكرا يا حبيب القسا ... نضميك سمح بالحيل... وتصاويرك بديعه ... ويا سلام ياااخ علي جمال قرانا السودانية وطبع أهلها الزين وكرمهم الفايت الحد

أشكرك بشده والله لأنك أشبعتني من خلال كلماتك بسرد تفاصيل التفاصيل لهذه القرية الوادعه تماما كما شبعت القرنتينه وعساكر الحله الضيوف من خيراتها وكرم سكانها الأصيل.

ملحوظه:

بالله شوف كرمنا دا كيف ؟؟ ..... حتى في أكل لعيبة كرة القدم وصولا للياقه المثالية ... ههههههههههه ردم صاح ... ما تعرفو لاعب كوره ولا مرا نفسا ؟؟

كل الود،،،،

يا ودالمدير سلامات
مرة عدينا لي ناس الفلاح ستة لعيبة من تيمهم الاساسي شغالين في الكوريــك .. يقوموا من الدغش يكشحو في الرملة والمونة لغاية الساعة اتنين الساعة تلاتة يتشطفوا ويلبسوا كداراتهم ويمشوا دار الرياضة
يلموا في ناس الجيــل او فريق الاهلي يملطشوهم تلاتة واربعة.. وعمك يقول انناس وباسطة بالسمنة..
لعيبة هسع مع الملايين البياخدوها دي مو ناقصهم اكل ناقصاهم حرة قلب ومروة..


ــــــــــــــــــ
ناس كريمة ديل ماعندهم قرنتية تاني دايرالها موت؟!

Quote: هههههههههه......

سلآمات يا نادر،
ومع الضحكة دي نديّك موية زير.



مشكور علي المرور...

Quote: بالله في قرنتية بشركو ليها نص النهار ؟ فرس النهر لا يخرج للأكل إلا في منتصف الليل يا عمكـ ... * خبير في ناشيونال جيوغرافيكـ ....... ( يعني صلاح غريبة أحسن مني في شنو )

عندو (ميم) كدا قاعد يعملآ قبل إسمو، أها دي ما بتقدر عليها.

أها، قول القرنتية دي مرقت بالنهار،
باقيلك الجماعة ديل فايقين ليها ؟؟؟.


تشكر يا ظريف...

أمانيي يا معاوية المدير جينس نضمك ليي كمين سنة منقريفالو !

وكمان جبت سير القراريص وملاح الورق والله بيطينتي كوركت حالتي أسع انعشيت !

ويا حيليل مضايفنا وتكولنا ولقداباتنا !

ويا حيليل الليبيني وريحة القنانة الميغيرب !

غايتو الليلي رجعتني للبلد اكان بي بنطون ولا بي قطر كريمي ! بس ويصل للبلد أساعيتي بي حديسك دا !

والقيرينتيي الله يباركلها في القشوش الاكلتا وكت بي سببها طرييتنا البلد كدي !

وسيي فوقك يا معاوية والله ياسع ايامك عليك الله ما تجي تنغدا معانا بي قراصة وسبروق دور السبت الجايي !

خجيجي قالت كمان جايبالها كداد ولسان طير .

ست البنات.

Quote: كل سنة و انت طيب يا مبدع و طيب الشعب السوداني رسل برقية لي منو عشان الجماعة ديل ياكلوا جنس الاكل ده

سلآمات يا حامد،
والعيد يتبارك عليك وعلي الوِليدآت.

الشعب السوداني تكالبت عليه القرنتيات.
الله يكون في عونه.

تحياتي يا بطل...

Quote: ,واحد من اتنين . صديق الا عندو مطعم وبيدلل ليه . او بيربي فريزين . ديل ما لعيبة . عاديين البيشربو موية زير .

يا أُم مؤيد،
أنسي موية الزير أنا عزلت ليك من المنيو بتاع صديق دا،
عصير طازج فُرش،
أكرر، عصير، طازج، فُرش،
تاخدي معاكِ عشان أنا حلفت بعد طلتك دي ما ترجعي
إيدك خلا.

مشكورة علي المرور...

.
..

Quote: . .. .. ..ناس كريمة ديل ماعندهم قرنتية تاني دايرالها موت؟!

..
.. ..
..
...الطريفي ..
.
.صاحبك ده اذا قال عندهم واحده تانيه دايرالا موت....بالله سوقني معاك كنفر البوليس التاني ..وكان لقيت ليك رفيق تاني غيري ..برضو ممكن امشي معاكم...انشاء الله مساعد نفر بوليس..
..
..اها قصرت معاكم يا مدير ؟؟؟؟
..

Quote: .إلا القرتنيه و اللا البعشوم بتاعك ده ...و الهوت ضك بتاع بشه

ههههههههههههههههههههههه،

يا هلولي الزول دا بيعرف بيض مركّب،
تقول لي قرنتية وبيتزا وهوت ضوق ؟؟؟.

البشير كان وراكم الهوت ضوق، صديق
جابلكم البيض المركّب، وأهو بقيتوا من
الدول المتقدمة...

ود المدير مع انك كرمتني من الناس الرديتلهم لكن تاني صديتلك!


فُريش يا شينو؟

ست البنات.

Quote: ود المدير مع انك كرمتني من الناس الرديتلهم لكن تاني صديتلك! فُريش يا شينو؟ ست البنات.

حباب سِتهن لي حدهِن.

يا ست البنات إنت دخلت في حِتة الحديث فيها يطول،
وعندي حديث كتييير كان الله مدّ في الليام بدور
اسويهو في بوست منفرد. دحين اصبري عشان بعدين
بدورك تجيبي مُلآح سبروقك وتجينا في الكرقة.

لك مني عاطر التحايا،
وشكراً...

نان يا ود المدير أخوي الكرقة ماكون شارين فيها التمر !
أكان لقيتلي حيبيبة ترمس ودفيقات ! ولا مدينيي !
ست البنات.

Quote: نان يا ود المدير أخوي الكرقة ماكون شارين فيها التمر ! أكان لقيتلي حيبيبة ترمس ودفيقات ! ولا مدينيي ! ست البنات.

كدي إصبري بجبنة بت أحمد دي، دوبني ما إنتهيت
من بوستاتي البقن بلا الموية المقرنة ديل.

Quote: جبنة بت أحمد... منتصف النهار, الصمت يلف المكان حتى لكأنك تسمع ضجيجه يأتيك من جميع أنحاء الباوقة, فأشجار النخيل ساهمة, والقماري مسترخية فوقها, والأغنام متفيئة ظلآلها تقصع جرتها من حين إلى آخر. بداء يشق هذا الصمت صوت فندك بت أحمد وقد بدأت في دق البن الذي ما زال بعض منه في القلاية فوق النار... بدأت بت أحمد جالسة فوق البنبر وقد تدلت محفضتها حتى لآمست الأرض, وأمامها المنقد, وعلى يمينها صفيحة ماء, وبجانبها الهبابة والشرغرغ على الأرض بجانب الصينية التي حوت الفناجين تتوسطهن القداية بألوانها الزآهية, وصحن ينضح بعجوة ود لقاي مع عروق جنزبيل. توقفت بت أحمد عن دق البن ليعود الصمت يلف المكان مرةً أخرى, وبدأت تحرك القلاية فوق النار, في هذه اللحظة طارت قمريّة مصفقة جناحيها في الهواء ثمّ أستقرت على صبيطة تمر قوقت لفترة من الزمن وصمتت. عاد الهدوء يعم المكان مرةً أخرى لتقطعه بت أحمد وقد بدات تحكي عن زمن جميل مضى وهي توزع لنا فناجين الجبنة. قطع حكي بت أحمد, صوت حمارة في الخارج, واتى صوت ود الأحمرمخترقاً الصمت: سلآم يا بت أحمد. كيف قيلتو؟. بت أحمد: مرحب حبابك ود الأحمر. أدخل أشرب لك فنجان جبنة. ود الأحمر: لا لا كتّر خيرك. سادر على الحواشات. ثم تواصل بت أحمد الحكي وقلي البن وقد بدات حبيبات العرق تسيل في مجاري شلوخها وهي تحكي وتبتسم بين الفينة والأُخرى, وتصب لنا الجبنة نحتسيها فيمازج طعمها حكاوي بت أحمد الجميلة لتصبح عابقة في مكنون ذاكرتنا دوماً تذكرنا بت أحمد بعد أن رحلت مع السمحين... الآ رحم الله خالتي عآشا كما يحلو لأهلنا نطق الإسم على هذا النحو, ورحم جميع من رحل من أهلنا الطيبين... مجرّد خاطرة... ود المدير...

ود المدير سلام,
والدوام لله , وربنا يلهمكم الصبر.

عارفاك موجوع والفراق صعب , عيللي صد لي الجبنة يبقي تفرقلك شويي,

الزول وكت يبقي وسط أخوانو الحزن بيخف وبنتشايلو معاك .

ست البنات.

Quote: بوست متعة والله يا ودالمدير. قصة القرنتية جميلة وطرفية والاجمل سردك لتفاصيل الحياة اليومية لاهل القرية . شكرا ودالمدير على هذا الابداع.

بدر الدين الطائف،
مشكور يا زول يا سمح علي كلآمك السمح.


نديك شوربة حمام،
ونلفلك باسطة بالسمنة وكدا...

Quote: ود المدير ... ربي يسعد أيامك ويديك الفي مرادك بركة من صلى وقال يا الله وشكرا يا حبيب القسا ... نضميك سمح بالحيل... وتصاويرك بديعه ... ويا سلام ياااخ علي جمال قرانا السودانية وطبع أهلها الزين وكرمهم الفايت الحد أشكرك بشده والله لأنك أشبعتني من خلال كلماتك بسرد تفاصيل التفاصيل لهذه القرية الوادعه تماما كما شبعت القرنتينه وعساكر الحله الضيوف من خيراتها وكرم سكانها الأصيل. ملحوظه: بالله شوف كرمنا دا كيف ؟؟ ..... حتى في أكل لعيبة كرة القدم وصولا للياقه المثالية ... ههههههههههه ردم صاح ... ما تعرفو لاعب كوره ولا مرا نفسا ؟؟ كل الود،،،،

آمين وربنا يتقبل منّك أخي عثمان.
القرية أخي عثمان تحمل في دواخلها العديد من المضامين الجميلة،
عشان كدي زمان كنت بقول لولآد البندر، الما عاش في القرية
تنقصه الكثير من القيم الجميلة وأهمها البساطة.
الحديث عن القرية بدورلوا جرّة نفس، دحين كدي النخليهو لمجال
آخر.

قلت لي لا تعرفوا لآعب كورة، لا نفسا؟!!.
هههههههههههههههه،
يجازي محنك.
اكتر حاجة محيراني، مديدة العطرون !!!.
والله صحي.

لك كامل مودتي...

ود المدير تحياتي....
شكراً على القصة الطريفة و جمال السرد واللغة.
ذكرتني القصة المشهورة للملك الظالم والفيلة. ولرمزيتها البديعة قنا نجادع بيها معاك...اقبلها مننا...قالوا عيب الزاد ولا عيب سيده...انت اكرمتنا بعصير طازج فوريش ياخ !

بلدة صغيرة و ملكا ظالم ظلم شديد يقطع الراس بلا سبب..قوم يا الملك على البتسوي في الناس ، اسعى ليك فيلة صغيرة واطلقها في البلد..ما خلت زرع ما اكلته ..وما خلت بنايا ما هدته...نجضت الناس نجاض... والحكاية بقت صعبة خلاس...وزول قادر يقول بغم مافي...
اها اشجع من فيهم لمن خلاس كتر عليه ، لم الناس و قال ليهم يا جماعة هوي ...الكلام دة ما ببقى نحن لازم نكلم الملك بالحاصل دة يشوف لينا صرفة ويمسك الفيلة دي عليه....نحن تعبنا خلاس...
قالوا ليه "يا زول انت ما نصيح ؟ ماعارف الملك ؟...بكتلنا كلنا"

قال ليهم "انا عندي ليكم راي كان سمعتوه امكن يجيب فايدة : بكرة الناس دي كلها ملمومة عند الملك ، نحنا نمشي كلنا....موت موت ...حياة حياة..انا بتقدمكم وبقول ليه يا الملك "الفيلة"...اول ما يقول لي مالها انتو كولكم بي فد خشم تقولوا ليه الحاصل ( اكلت لينا الزرع وهدت لينا البيوت وخوفت لينا الوليدات وحمتنا المرقة وأذتنا أذية شديدة خلاس) وكدة الملك ما بقدر اكتلنا كلنا "...

قالو ليه طيب اتفقنا...اها باكر اتلموا الناس وقام زولنا حسب الاتفاق: يا حضرة الملك "الفيلة" ، الملك اتلفت وعاين ليه " الفيلة ما لها ؟" والزول راجي جماعته يتموا الكلام...الجماعة دخلتم خوفة شديدة من الملك والحراس والسيوف ...فرد سكتة...زول قال حاجة مافي...اها الملك وكت شاف السكتة طولت قام نهر صاحبنا تاني " يا زول اتكلم الفيلة ما لها؟"...صاحبنا اتلفت جاي لقى الناس كولها عاملة رايحة...اتلفت جاي لقى السيوف دي تلمع...والملك يحمر ليه...

قام صاحبنا طوالي قال " يا حضرة الملك الفيلة متوحدة وزهجانة...كان جبت ليها فيلا معاها...يونسها ويفرق عليها وتلد ليها افيال صغار بدل حالتها دي !"

Quote: بوجلمبو الغطاس · الأكثر تعليقا خخخخخخ كل عام وانته بخير

أبو جلمبو يا غطاس،
يا أخي إنت غاتس وين ؟؟؟،
العيد يتبارك عليك، والأشواق
بحور ما ليها آخر.

مودتي...

Quote: Abu Muaz · الأكثر تعليقا · جامعة السودان للعلوم والتكنولوجيا سياحة بلوشي .. كتر خيركم

سعيد جداً بتواجدك في هذه المساحة يا أبو مُعِز،
وأسعدني أكثر إستمتاعك بها.


كتّر ألف خيرك
يا رجل...

Quote: يا ودالمدير سلامات مرة عدينا لي ناس الفلاح ستة لعيبة من تيمهم الاساسي شغالين في الكوريــك .. يقوموا من الدغش يكشحو في الرملة والمونة لغاية الساعة اتنين الساعة تلاتة يتشطفوا ويلبسوا كداراتهم ويمشوا دار الرياضة يلموا في ناس الجيــل او فريق الاهلي يملطشوهم تلاتة واربعة.. وعمك يقول انناس وباسطة بالسمنة.. لعيبة هسع مع الملايين البياخدوها دي مو ناقصهم اكل ناقصاهم حرة قلب ومروة.. ــــــــــــــــــ ناس كريمة ديل ماعندهم قرنتية تاني دايرالها موت؟!

سلآمات يا ود الزين.

تعرف مرّة هزمنا ناس الجيل شرّ هزيمة. أها، الصباح قمت مشيت سوق الدآخلة
أرقع عجلتي عِن آدم العجلاتي، طبعاً عمّك آدم من كبار مشجعي فريق الجيل.
مشيت لقيت ناس الجيل متلمين في دكان آدم، وعمّك آدم اوآت ما شافني قال
للجماعة، هسّع زي دا، وأشار ناحيتي بيده، يغلبكم ؟؟؟!!!، الليل كوووولو تاكلوا
في الباسطة وتشربوا في الحليب، ودا، مشيراً إلي بيده مرةً أُخرى ياكُلوا تلاتة
تمرات ويكشح فوقِن موية من الجدول ويجي يلطشكم !!!؟؟؟.

يا اخي ناس كريمة ديل أكان ظهرتلهُن قرنتية تاني
وحاتك أنا أوّل زول أخقب بُقجتي وابقى مِندلِي...