Post: #1
Title: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-17-2013, 01:06 PM
Parent: #0
لنك ملف الMP3 والتنزيل والإستماع المباشرمن ساوند كلاود
كل الدنيا بتضحك لمن تضحك يارا ...
يوماتي بتحلم يارا..
بتحلم ليهم ولينا وليها..
بي سودان واحد شامخ ..
حبها ليهو مأجج نارا
بتحلم يارا..
بتحلم بى سودان يبعد كل الاحزان
ويشفى القلب الغارق فى الغربه..
يكفيهم شر العوزه وشر الداير فى مدارا
بتحلم يارا
بى سودان فيهو الاطفال هم عشاقو
وكل أحلامم فيهوتكون العيشه
ستره حــال سمحه ومختاره
وانو سلاح الموت المرعب ,
مايفزع قلب الآمن فى بيتو
ولايعذب أماً فقدت حق لجناها
فى لحظة ضلمه وباتت محتاره
يارا يارا ..
يارا بتحلم بى سودان مافيهو.. أزيز جبخانه
ولافيهو دبابه هديرا يزمجر فى شارع ..
ويهدد بى صوتو أمن قلوبنا الطيبه الجباره
بتحلم بيهو وطن إنسانو كريـم وعزيز
وطن رائع بى قيمتوالفيهو
شرف أيثاروكفاح ونضاره
زى ضحكة يارا وطن زى ضحكة يارا.
كلمات وألحان وأداء ملهم كردفان
|
Post: #2
Title: Re: وطن زى ضحكة يـارا..أهزوجة ثوريه جديده..!!!
Author: مني عمسيب
Date: 10-17-2013, 01:25 PM
الأخ العزيز \ ملهمنا وملهم كردفانا الجميلة .
كل عام وانت والاسرة والوطن والشعب بالف صحة وعافية ورخاء .
Quote:
وطن زى ضحكة يـارا..أهزوجة ثوريه جديده. |
كلام ارد الروح البقت مافي .
|
Post: #3
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-17-2013, 01:34 PM
Parent: #2
الأخت العزيزه منى عمسيب
وكل سنه وكل امنياتك متحققه ناتى وكل أهلك واحبابك الكرام
اها
سمعتى الغنيه يا منى عمسيب ؟؟؟
أحترامى
|
Post: #4
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-18-2013, 10:58 AM
Parent: #3
يارا إحساسها بالوطن عالى جدا رغم انها لسه حتة بنوته ...
...
كتب والدها قائلاً...
للمرة الكم حضرناها .. وجدها وحبوبتها ..
يارا كانت ساكتة واول ما خلصنا
قالت كلمة واحده: انا فرحانه !!
...........................................................................
تحليه
فرحت يارا..
ماأروع ان أدخل الفرحه فى قلب طفله لم أشاهدها إلا بعينى والدها.
|
Post: #5
Title: Re: وطن زى ضحكة يـارا..أهزوجة ثوريه جديده..!!!
Author: محمد حيدر المشرف
Date: 10-18-2013, 12:03 PM
Parent: #4
لابد من الرجوع للبداية يا ملهم ..
لابد من الرجوع الي البداية والتي كانت أول ايام العيد ..
ارتدت يارا ملابسها .. واقبلت تهنئني بالعيد
التقطت لها صورة وكتبت عليها تعليقا عفو الخاطر المسكون ونشرتها على حسابي في الفيسبوك ..
Mohd Haider Elmusharaf
October 15 · Edited
.
عارفين يارا لمن تضحك..
كل الدنيا الفيني بتضحك...
يوماتي بنحلم ليهم بي وطن شامخ .. وطن عاتي .. وطن أحلى و.. خيٍر و .. ديمقراطي .. وطن يقيهم من الغربة و تفاصيل اللا انتماء المرهقة .. وطن يطيرون اليه عشاقا فيلقوا عشاقا .. وطن لا يقايض أحلامهم البسيطة بالنزيف .. أو يبادل وداعتهم بالرصاص .. وطن نضيف و.. انساني جدا .. وطن بالفيهو يتساوو .. يحلمو يقرو يداوو .. وطن قد لا يشبه تلك الاغنيات تماما و لاكن .. قريب .. قريب منها .. )
الذي لم أقدره قدره الجميل يا صاحبي آنذاك .. كان القدر الكبير للانتشار الوجداني للكلمة/الصورة لما تكون الكلمة بسيطه ومباشره وصادقة جدا .. بالتأكيد ذلك يتطلب حس انساني كالذي في البال يا صاح .. ناس صاح .. ودونما مقدمات يدخلوك لمن يكاد يكتظ وجدانك بالتفاصيل الجميلة وما تعرف تعمل شنو ذاتو .. ثم ويكون من بينهم ذلك النوع النادر من البشر من ذوي وذوات الطين الاخدر الأكثر رحمة من كل الاشياء .. الطين الرحيم يا ملهم .. وكأن قسمتو من الروح الالهي كانت أكثر قليلا .. هؤلاء هم بالتحديد الذين باستطاعتهم أن يصنعوا من هذا الوجود كيانا جميلا جدا ..
شكرا يا عزيزي ..
شكرا كثيرا وشكرا جميلا آ زول يا فنان ..
|
Post: #6
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-18-2013, 01:22 PM
Parent: #5
يا أبو يارا ..ياخ انا إستعجلت ...وفى سلم أحلى وشغال فيهو بروفات ..
ومصر إنى أوصلها لى الحته الفيها نور يارا يعانق كل أطفال الوطن
وحأنزل كل بروفه هنا من السلم الحلو الصاح ...الفيهو النجيضه ذاتا ...
أما بخصوص ماكتبته هناك فى الفيس بوك وأشركت فيهو الكل هاهنا
فقد لمس القلب بحروف من رحمة الله ..
وما أصبح العيد موحشاً ولا مؤلما بذات القدر بعد ذلك
ومازلت
منشغل لغاية الآن بتطوير اللحن وتجويد الأهزوجه ...
علها ترقى لمستوى هذا الوطن الكريم العزيز الكلو نضاره
....
سعيد بأن أهدت يارا قلبها للوطن ولنا كلنا
احترامى
تحليه
جهز لى صورهم هى واحمد وعمار الإنت خاتيها فى الإسكاى هناى كلاود
|
Post: #7
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-19-2013, 01:06 PM
Parent: #6
...
الجاى دايما حيكون أحلى مادامت الروح بتنبض بمافيها
|
Post: #8
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-20-2013, 09:11 AM
Parent: #7
وطن رائع بى قيمتوالفيهو
شرف أيثاروكفاح ونضاره
|
Post: #9
Title: Re: وطن زى ضحكة يـارا..أهزوجة ثوريه جديده..!!!
Author: ملهم كردفان
Date: 10-22-2013, 08:08 PM
Parent: #8
كل الدنيا بتضحك لمن تضحك يارا ...
يوماتي بتحلم يارا..
بتحلم ليهم ولينا وليها..
بي سودان واحد شامخ ..
حبها ليهو مأجج نارا
|
|