عود المرحوم

قالوا
المرة راجلها مات , وكان عامل ليها كشاشة قدام البيت ,
اها عرست واحد غيرو
قدر ماتجي مطرة بي زيفة ولا كتاحة ,, تقوم المرة تقول لي راجلها
والله أكان ما عود المرحوم البيت ده كان وقع من فوق لي راسنا
وطوالي ناقراهو بجنس الكلام ده
يوم قام هوا شديد ,, ونزلت معاهو زيفة
اها زولنا قام علي عود المرحوم

قام علي عود المرحوم , يجرجر فيهو ,, والبروق شالعة فوق ,, والهوا يسوي فووو
يجرجر في عود المرحوم ,, ومرتو
لا لا يا راجل البيت بقع فينا
ولا شغال بيها الشغلة , لامن تج قلعو وجدعو غادي
وقال ليها
اها النشوف البيت ده بقع ولا ما بقع

كدي آ ناس النجر عود المرحوم المتوهمين فيهو ده ,, نجرو ونشوف يا ربي البيت ده بقع ولا بظل راكز

يعني المرحوم ده ميت وبرضو مجنن سيد البيت ومعكر مزاجو
آي صاح يطلع عود المرحوم ,, ويركب ليهو عود جديد ,, وممكن برضو عود المرحوم ده يكون قاعد تمومة جرتق ساي , وحكاية ماسك البيت ده وهم ساي
قال حميد
اصابعين الرجال رصاص
شعر راس البنية سقف
سلام عليك حميد اينما تكون
الرصاص هو عبارة عن قنا متراصا فوق راس السقف ويأتي بعده الحصير والتراب ويكون ما يسمي بالعرش البلدي
خشوت ان يختلط معني الرصاص للقلة من القراء

اها في ناس كتار غازين ليهم عود مرحوم ,, وبترعبوا من فكرة قلعو ,, متوهمين انه زي ( لمينة ) اوضة الجالوص ,, حتي الليمنة زاتها لو انكسرت البيت لو مبني سمح ما بقع طوالي ,, بديك الفرصة تجيب غيرها
ياخي جرب اقلع عود المرحوم وحتتكشف ليك الحقيقة ناصعة ومبهرة ,, انو ده عود ناخرهو السوس وقاعد ساي

مرحبا شمس يا صاحب
شاكر ليك دعمك وتشجيعك لي
وللقصة أكثر من زاوية للشوف !
ولكن
ألا تتفق معي ان العلاقة الزوجية لها ما يخصها من مشاعر لا تخضع للقانون العام ?
فذكر الزوج المتوفي او الزوجة امام الزوج/ة الجديد/ة يؤذي ,, ويدعو للغيرة رغم الوفاة ? ولو كانت وفية لذكراه لظلت عازبة , ولكن ذكره هكذا فيه إدانة مبطنة وتعريض بالزوج
ولكني أخذت زاوية أخري للشوف فمرات بحوص
يقول المثل
حذراك من ام الدرفون ولو كان مدفون
وهذا مثل لن ادافع عنه ابدا
ويقولون
العزبا لو راجلها ميت لو خشت المقابر تعتر
وبرضو ما مسؤول منو
لكن كدي خلينا في عود العشر ده
كثير من الامتنان والود

وما أكثر اعواد المراحيم الاحياء في تاريخنا الحديث
تاريخنا السياسي المعاصر
ماتوا وطنيا وانسانيا ويظن بعض الناس بهم خيرا