مسدار المركوب يلا ياشعراء جارو الشاعر ده مسدار كارب

مسدار المركوب : تسلم ضراعك ومركوب كراعك

مركوب أشرف الشرّف شباب سوداني
ماعرفناهو أصلي ده ولا عاد تايواني
قول لي نافع الشعب الجعلتو يعاني
قاللّك ردّي بي مركوبي قبلي لساني
**********************
أشرف تسلم يسلم ياحبيب مركوبك
وعزّيت الشباب الليله عاد يادوبك
قول لي بشّه أبشر جايه ليكا هبوبك
بعد الضاقو نافع إت كمان بحكوبك
*******************
هلالية الرجال هي المن قديم معروفه
كل سودانا يشهد ليها كم شاف شوفه
الخبر الأكيد الضربه خاتيه وصوفه
الا الفرده هسّع وين؟ دي مامعروفه
**********************
وإلا سؤالي ياأشرف هو تالت وعاشر
قولا" ليك عدييل دغري وصريح ومباشر
الخلّاني في شك من قريت الناشر
المركوب ده صح:أصله و أصولو الفاشر؟
************************
بعد الذلّه من البوشي جوّه الجامعه
وكل خلق الله شايفاك يانويفع وسامعه
ولندن ليك تشهد عينا ليكا متابعه
في هلالية اشرف فرده جاتك لااااااابعه
***********************
غايتو الليله فشّيت لينا ياخي غبينه
ومركوبك يمين الفرده تسوي مدينه
جضيمات نافع الليله الحقيقه حزينه
كف مركوبك آآآآآآآ ود الفوارس زييينه
*************************
الا بناشد القاضي ومحامي دفاعو
لي أشرف بدوركم ياقضائنا تراعو
استكتر يمد للمتلو ياخي ضراعو
رجّعوا ليهو مركوبو البزينا كراعو
********************

زرياب عبدالله محي الدين (السوداني)

اشرف يا بطل تسلم تعيش لى هلالا
درفونا نجيض مركبو ادى رسالـــه
فى الوجه الكريه السيدو لفظو زباله
بسراع انكشح بالخيبه تبرا علالـــه

انت يا كلوش
مسسعول من الخير
وينوا ود الباوقة والسيد ح وعلاء الدين يوسف البدافع عن الحرامية داك والاسموا دقداق
وميادة وفدواء ....
يعنى بختصار كده كيزان المنبر وينن ؟؟؟؟

وضاحة

يا حليل ود الباوقة وحليل ايامو كل من عليها فان

وعلاء الدين اسكتي ساكت

وميادة بقت مدفونة رمل وشايلها السيل وراحت بي الميل


ديل زمنهم فات وغنايهم مات

خلاص الانقاذ في نهايتها

جانى المركوب يتنخج ويبكى بكاء الشافع
قالى لى دايرك ضد ود عوج الدرب عنى تدافع
ما ذنبى ليه يشمت عشان ضربونى بى وش نافع؟
كان ما انصفتونى بمشى الجنائية وعن حالى برافع

سمعنالنا خبرا سمح من تالا الهلاليه
مركوب الصبى من الانقاذ يساوى الميه
ود عوج الدرب اعتذرللمركوب الضرب شيخ الحرامية
ليه يضربوبو نافع البرطوش لا غلطان لا مسويلو جنية

بت مسمار قالت:

غنى وشكري يا اختو يا ريا
تمساح الكوانى الضارب الليه
سمعنا لنا خبرا في الهلالية
خمستاشر جواد سكن سبعماية