Post: #1
Title: والله الواحد بقى ما بخاف من ناس الأمن !
Author: أيمن محمود
Date: 10-13-2013, 09:25 AM
شوف أقول ليك حاجة: يوم الاتنين لما الشغلانة دي بدت؛ زول من بيتنا والا حلتنا طلع الشارع مافي ! وأصلاً الشارع ما كان فيهو حاجة عشان تطلع تشوفها ... سمعنا بي ناس أمبدات والكلاكلات طلعوا ... بس عندنا مافي حاجة !
يوم التلاتاء بعد المغرب واحنا طالعين من الصلاة وأنا أصلاً الموضوع طلع من بالي خالص .. بعض الشباب اتلموا وكأنها لمة مقصودة .. والحقيقة غالب الأمر انو الناس عايزة تعرف شمارات المظاهرات من بعض .. ما أكتر!
السلامات جرت مجراها ..
- أها .. قالو الكلاكلات ولعت أمس وليعة شديدة ؟!!
- يازول والله قال ليك لحدي هسا مولعة ... ناس الحاج يوسف ذاتم طلعوا
- يا أخي والله زي كل مرة الناس تقوم يوم يومين وتهمد الحكاية
- صحبي في ....
- دقيقة ... دقيقة .... سامع ؟!
- في شنو ؟
- في صوت ذخيرة ...
- الضرب د شكلو في بري !
- أمك ! ... صحي والله ... الشغلانة دي شكلها ولعت بالجد
ـــــــــــــــــــ
هو ناس الأمن الواحد يأمن ليهم والا يخاف منهم؟!
|
Post: #2
Title: Re: والله الواحد بقى ما بخاف من ناس الأمن !
Author: بله محمد الفاضل
Date: 10-13-2013, 09:47 AM
Parent: #1
لو كانوا يعملون حسب ما تقتضيه وظيفتهم الأساسية
فإنهم يكونون صمام أمان للـ (مواطن)
ولكن...
تحياتي واحترامي
|
Post: #3
Title: Re: والله الواحد بقى ما بخاف من ناس الأمن !
Author: أيمن محمود
Date: 10-13-2013, 05:20 PM
Parent: #2
الفضول كان سبب طلوع عدد زيادة من الناس للشارع ؛ اطفال نسوان وشباب، والونسة بقت جماعية؛ نسوان على رجال شيب وشباب نصف ساعة تقريباً والمسألة ما اتعدت حب استطلاع جماعي !
العويل الطالع من بيت ناس فقيري كان زي السكين في زبدة الونسة الجماعية، صمت تام اوسع المجال لبكاء وعويل مر شق عنان السماء، النسوان جرن بعفوية شديدة لبيت ناس عواطف، الحقيقة نص الحلة الكان طالع برة اتجه صوب البكى، حتى الاطفال
لاحول ولا قوة الا بالله، لاحول ولا قوة الا بالله
|
|