Post: #1 Title: الموسيقار بلال موسى ُمجدد الغناء السوداني Author: محمد عمر الفكي Date: 10-10-2013, 07:24 AM Parent: #0
حقيقة وصراحة هذا الفنان مبدع وقامة سامقة وباعث من جديد لروح الاغنية السودانية . بلال موسى يستحق ان يطلق عليه لقب مجدد الغناء السوداني فامثال الامبراطور والقيصر (اب عمة) وما ادراك من فنانين واشباههم بوجهة نظري المتواضعة لم يقدموا اي اضافة او نقلة كالتي احدثها بلال موسى بالاضافة الى انه شاعر عتيق ومن الطراز الاول ولعل كلمات مدحته (ازرع طيب تحصد الطيب) خير دليل على ذلك بما تحتويه من طباق وجناس ومحسنات لفظية وسارفقها هنا حتى تحكمو بانفسكم. (المدحة دي بتذكرني دائماً ببيت الشعر أزورُكم لا أُكافيكمُ بجَفْوتكم - إن المحبَّ إذا لم يُزَر زارا ) الفنان الذري والموسيقار بلال اصبح ضيفاً خفيفاً على كل قنواتنا الفضائية، فتجده في قناة المديح ساهور (بالمناسبة قفلت مالها؟ ظروف ياهندسة؟) الى قناة انغام مما يدل على مدى توسع شعبيته وجماهيريته وتنوعها ، بالاضافة الى انني وخلال وجودي في السودان الشهر قبل الماضي كلما ذهبت الى مكان الا وينساب الى صوت الموسيقار سواء من عربة فارهة او مرطبات او ركشة وهذه تدل على ان الموسيقار قد كسر الحواجز الطبيقة في المجتمع. له التحية ومزيداً من الانتشار الواسع استاذنا الموصلي والاستاذ لؤي شمت ما تتحسسو من وصفي للاستاذ بلال بالموسيقار ، وزي ما قال اخونا كباشي الصافي كانتونا (العوج راي والعديل راي).
Post: #2 Title: Re: الموسيقار بلال موسى ُمجدد الغناء السوداني Author: saidahmed shami Date: 10-10-2013, 07:47 AM Parent: #1
بلال موسي صاحب مدرسة واسلوب مميز في الغناء
النماذج الفوق من تسجيل أمسية أسبارك ستي الاخيرة
تحياتي محمد عمر
Post: #3 Title: Re: الموسيقار بلال موسى ُمجدد الغناء السوداني Author: tmbis Date: 10-10-2013, 08:10 AM Parent: #2
سلام يا محمد عمر .. خيرا فعلت .. وانت تحاول ترسم خطوط عريضة على بلال موسى .. بلال موسى انتظر .. وصبر ثابر ثم عاد ورجع من جديد .. ولو انت متابع لبلال موسى فهو انتشر في بداياتو بصورة واسعة في منطقة جغرافية محددة .. يجد فيها الغناء الشعبي حقه بالكامل حتى الالات المستخدمة هي ما تعبر عن انسان المنطقة .. واهم تلك الالات هي آلة المندولين .. صوت بلال موسى مع آلة المندولين مع الكورس المصاحب مع الصياغة الشعرية كانت وقتها كافية ان تجعل منه ظاهرة تنمو وتنتشر بشكل جغرافي سريع جدا .. زامله في ذلك الوقت ومن تلك الاقاليم .. سليمان محمود + جلال سنجة ثم مصطفى مضوي .. وديل تقريبا قامو معاهو في نفس المرحلة .. وربما شاركوهو في نفس التغني بنفس الالات .. انتشار هذه المجموعة كان جغرافي كما ذكرت .. غطوا كل تلكم المنطقة .. دون ان يكون لهم تاثير يذكر في منطقة الوسط . حيث انهم انتشروا في منطقة الجزيرة وسنار وسنجة والبطانة .. بلال موسى كان وقتها يمكن ان يقارن بينو وبين محمد وردي في الوسط او محمد الامين ولا ابالغ عن معايشة اجدهم يطربون لبلال موسى ويعبر عنهم اكثر من محمد الامين في وعد النوار او محمد وردي احبك احبك انا مجنونك .. ولو قلبنا المعادلة او عكسناها لنجد ان بلال موسى ليس له اي وجود وسطي بل بالعكس ربما تعرض وقتها لمقاطعة غنائية لو تجرا احدهم ان ياتي ببلال موسى عوضا عن الكثير من الفنانين الموجودين في الساحة حتى ولو كانوا في مراكز الشباب المختلفة .. وقتها كان على الاقل الفن والتنظيم الاوركسترالي كان في نهاية عهدة حيث بعدها مباشرة ظهرت آفة الغناء وهو الأورغ .. وظهر المديح المصاحب للاورغن واختفت ميزة ان تسمع فنان مصاحب لاوركسترا إلا ما ندر وهاجر من هاجر من العظماء ومن تبقى لم يستطع ان يقاوم الموجة الجديدة في الساحة .فنانات .. قونات .. إلخ إلخ . لفترة اختفى بلال موسى .. ربما ايضا هاجر مع المهاجرين او اغترب مع المغتربين .. ثم عاد من جديد .. عودة أخرى اكثر تركيز بفن ملتزم مفردة ولحن وتوزيع اكاديمي مع الابقاء على آلة الماندولين لكن بعد اعادة توظيفها لتتواكب مع الشكل الهارموني في الاوركسترا مثله مثل النور الجيلاني الذي له مدرسته القديمة جدا والخاصة به ..
Post: #4 Title: Re: الموسيقار بلال موسى ُمجدد الغناء السوداني Author: ياسر منصور عثمان Date: 10-10-2013, 08:28 AM
شكلو زول بسيط في كل حاجة ...حتى كلماته والحانه
يطربك بهذه البساطة
الحانه تذكرني بالحان الاناشيد المدرسية
غريبة مرة لقيت سعودي مشغل شريط له في عربيتو
Post: #5 Title: Re: الموسيقار بلال موسى ُمجدد الغناء السوداني Author: محمد عمر الفكي Date: 10-10-2013, 08:39 AM Parent: #4
يا سيد احمد والله بعد كوم الفيديوهات دا حقو اطالبك انت وياهو برسوم اعلانات يا تمبس وعليكم السلام براحة براحة عليك الله ، مالك داير تجضمني تجضيمة حمزة سليمان للفاروق؟
ياسر مشكور على المرور
Post: #6 Title: Re: الموسيقار بلال موسى ُمجدد الغناء السوداني Author: tmbis Date: 10-10-2013, 08:58 AM Parent: #5
Quote: يا تمبس وعليكم السلام براحة براحة عليك الله ، مالك داير تجضمني تجضيمة حمزة سليمان للفاروق؟
لا يا محمد عمر ياخ بالعكس .. ياخ انا بفتش لي فرقة من زمان عشان اقول عن الزول دا .. لانو بالجد اثبت انو لكل مجتهد نصيب عمل كل شئ في هدوء .. وطور نفسو ربما قرا المسالة دي او استمع شديد الكاشف عليه الرحمة والمغفرة .. عبقرية فذة .. وعلم درست اعمالو واتفاجأ بيهو علماء الموسيقى الكوريين في معهد الموسيقى والمسرح .. لما اتضح ليهم انو الكتابات والتوزيع الموسيقي دا كلو صدر من زول امي .. وعادي وبسيط معليش يا محمد عمر .. ربما ادخلت انا بعض العبارات في كتابتي الاولى او المصطلحات الموسيقية .. لكن دي طبعا للناس حقين الموسيقى عشان لما يجو يدونا رايهم برضو يصححوني لو كان كلامي فوقو حاجة ما عديلة .. بالمناسبة : اتضح لي مؤخرا ان الكثير جدا من الشباب اصبحوا يرددوا في اغنيات بلال موسى
Post: #7 Title: Re: الموسيقار بلال موسى ُمجدد الغناء السوداني Author: عمران حسن صالح Date: 10-10-2013, 09:01 AM Parent: #5
Quote: بالاضافة الى انه شاعر عتيق ومن الطراز الاول ولعل كلمات مدحته (ازرع طيب تحصد الطيب) خير دليل على ذلك بما تحتويه من طباق وجناس ومحسنات لفظية
ههههههههههههههههههه قوم لف
Post: #8 Title: Re: الموسيقار بلال موسى ُمجدد الغناء السوداني Author: saidahmed shami Date: 10-10-2013, 09:30 AM Parent: #7
Quote: يا سيد احمد والله بعد كوم الفيديوهات دا حقو اطالبك انت وياهو برسوم اعلانات
غايتوا لو أرتفعت مشاهدات الفديوهات ومعاها أشتراكات القناة حقك بصلك تب
