Post: #1
Title: رسالة لأم الشهيد..
Author: Muna Khugali
Date: 10-08-2013, 08:48 AM
............
............
أرفعي رأسك وزغردي يا أم الشهيد فإبنك نال الشهادة علشان كل الوطن ينعم بالإستقرار ويعيش أخوانه بكرامة...زغردي وما تخافي ترصدهم ولا محاكماتهم ولا تهديداتهم..
أرفعي رأسك يا أم الشهيد وأهتفي للوطن وزغردي لتمن الحرية الغالي...الحرية من القتله السلبونا حياتنا ..حرقوا البلد ودمروها بالحروب شردوا الوطنيين من اعمالهم وسرقوا ثرواتنا علشان يعيشوا هم
وأولاده في قصور ومتعة..بلدنا الغنية صارت افقر البلاد بسبب سرقاتهم وجشعهم الما بينتهي..
حصيلة حكمهم حروب أهليه متزايدة في جبال النوبة وإبادة في دارفور..كل يوم بيقتلوا اولادنا ..مستهدفينهم في الجامعات والمدارس..ونحنا مانسينا أولادالعيلفون وكيف قتلوهم بالمئات...السجون وبيوت الاشباح مليانه دايما بأبناء وبنات الشعب السوداني..والباقي شردوهم في بلاد العالم..وبناتنا يا أم الشهيد إتهانت كرامتهم وهم بيجلدوهم في محاكم الأفترا والظلم..ربنا ينتقم منهم تجار الدين..
يا أم الشهيد ويا أم الشهيدة..
القاتل البشير ومجلسه قتلوا قبل 23 سنة أولادنا شهداء ابريل رمضان..أنا والكثير غيري مرينا بالمريتو بيه ولسه باقي الناس بيمروا بيه لو البشير وطغمته إستمروا في حكم..البشير ومجلسه اعدموا أولادنا دون محاكمة ..قتلوهم ودفنوهم و بعضهم لسه حي.. قتلوهم يوم 28رمضان والناس صايمة وبتستعد للعيد ..للآن ما ورونا قبورهم وين ولا سلمونا جثامينهم رغم مطالبتنا المستمرة بكل الوسائل السلمية..
البشير ومجموعته عصابة لا تعرف الله ولا تعرف الإسلام..ارفعي يدك في كل الأوقات للخالق سبحانه وتعالي يوريك إنتقامه منهم في الدنيا قبل الأخره..
ديل طغمة عايشة علي دم الأبرياء وعلي السرقة وعلي تشريد أبناء الوطن..
يا أم الشهيد ما تسكتي.إحنا 23 سنة ما سكتنا وما بنسكت...
إتظاهرنا وخرجنا في الشوارع..ما خفنا منهم وهم المدججين بالسلاح..ضربونا وإحنا في أعمار أمهاتهم..وبرضو ما سكتنا..
سجنونا إحنا النساء امهات وزوجات وأخوات الشهداء ورمونا في زنزانات ضيقة عذبونا وهددونا بالقتل وبرضو ما سكتنا..
إحنا خوفنا الجلاد بقوتنا وتجمع أسرنا..28 أسرة بقوا متحدين واقفين ضد ظلمهم المستمر..
أفرحي يا أم الشهيد فإبنك نال شرف الشهادة..
أنتو عددكم أضعافنا..إتجمعوا وما تنكسروا وما تخافوا ..إنتو الأقوي بإيمانكم وبإستشهاد أولادكم..أكشفوهم في كل مكان وإكشفوا كذبهم وخداعهم ..
يا أم الشهيد ويا أم الشهيدة..
ليل الخلاص قرب..ومسيرة أولادكم البدوها لازم تستمر..إتعارفوا علي بعض ونظموا صفوفكم وكونوا أسرة واحدة..وكونوا مع باقي الأشراف قوة تقيف في وجه الظالم ولا تسكت عن حقها أبدا..
قومي يا أم الشهيد وأفخري باستشهاد إبنك وواصلي النضال..وواصلي كفاح المرأة السودانية صانعة الانتفاضة ومحققة الثورات..تأكدي أن مصير البشير وعصابته الي الهلاك..وتأكدي أنه الشعب
بياخد حقو منو ومن عصابته قبل الجنائية الدولية..
وأخيرا بقوليك لا إنتي ولا أنا ولا كل الوطن بنعيش بكرامة لوما إتحرر الوطن من عصابة الجبهجي الكضاب و أخدنا تارنا من القتلو أولادنا..
المجد والخلود لشهداء الوطن..`
والنصر لحرية الوطن..
جارة عثمان الحسين
والدة الشهيد نقيب طيار مصطفي عوض خوجلي..
|
Post: #2
Title: Re: رسالة لأم الشهيد..
Author: Muna Khugali
Date: 10-08-2013, 09:26 AM
Parent: #1
|
Post: #3
Title: Re: رسالة لأم الشهيد..
Author: Muna Khugali
Date: 10-08-2013, 07:18 PM
Parent: #2
.
تسكنون في القلوب وفي جنة الله الخالدة
....
|
Post: #4
Title: Re: رسالة لأم الشهيد..
Author: مهيرة
Date: 10-09-2013, 11:52 AM
Parent: #3
تسلمى ياجارة يا أم الشهيد
وتسلمى يا منى ياأخت الشهيد
وسيظل الشهداء الأبرار نبراسا يضيئون لنلاجيال طريق الحرية
المجد والخلودلشهداء الوطن
تحياتى
|
Post: #5
Title: Re: رسالة لأم الشهيد..
Author: الرفاعي عبدالعاطي حجر
Date: 10-09-2013, 12:07 PM
Parent: #4
تسلمي امي وماضاع حق وراءه مطالب
تسلم ام مصطفى وتسلم كل امهات السودان
......................................................حجر.
|
Post: #6
Title: Re: رسالة لأم الشهيد..
Author: Muna Khugali
Date: 10-17-2013, 11:21 AM
Parent: #1
.............................
.............................
ولا يفرق كثيرا يا أمي إن كان العيد المنتظر وفرحه..
عيد نستعد له بالكعك والحلويات أو عيد نستعد له بالذبيحة..
فكلاهما يمران علينا وأبنائنا يذبحون والكعك صار سكره الأبيض أحمر اللون والقلوب تنزف
كثيرا ألما ولا تشفي أبدا!
فخورة بك أمي وبالشهيد أخي ...
.........................
.........................
|
Post: #7
Title: Re: رسالة لأم الشهيد..
Author: عمر نملة
Date: 10-17-2013, 11:48 AM
Parent: #6
سلام منى سلام لكل من بذل روحه فداء الوطن
وربنا يربط على قلوب اهل الشهداء وينتقم من
الظلمه وتباعهم
Quote: البشير ومجموعته عصابة لا تعرف
الله ولا تعرف الإسلام..ارفعي يدك في كل الأوقات
للخالق سبحانه وتعالي يوريك إنتقامه منهم في الدنيا
قبل الأخره.. |
في كل لحظه دعواتنا بان يذقوا الالم في فلذات اكباهم
آمين
|
Post: #8
Title: Re: رسالة لأم الشهيد..
Author: Muna Khugali
Date: 10-24-2013, 03:25 PM
Parent: #7
|
|