Post: #1
Title: ميثولوجيا الورطة
Author: Emad Abdulla
Date: 10-07-2013, 07:14 AM
إستلهاماً من الميثولوجيا الإغريقية ....... قالوا: فلما ارتاح زيوس بعد اليوم السابع للدينونة؛ صعد إلي مخدع هيرا علي قمة الأوليمبوس؛ و هو بيقفل الباب اتلفت على بقية الآلهة الإقريقية المبارينو، و قال ليهم: هووووي يا فارات، ما داير أي شخشخة بعد ده.. تعبان أنا و داير الجمومة بس، النونو. الكلام ده واضح؟ كواريك و غنا و و و و .. ما داير. قالوا ليهو: واضح يا معلم، استكين إنت. قاموا بقية الآلهة، يلقطوا في التفاح ود الحرام من الشدرة الكبيرة التي على سفح الأوليمبوس. شويتين و يسمعوا ليك كواريك و حركات ما كويسه من طرف الحتة بتاعت سزيف البيطلع و ينزل منها زي الماكوك ليهو مليون سنة ديك. قاموا مسكتهم الشمارات. ديونيسيوس كان لططططط، قال للباقين: الفارات البره الجك ديل منو و عاملين غاغة؟ ح امشي أجهجه ليك حنان أمهم زاتو.. ما صدقنا الليلة الخميس. بووووو مشوا كل الآلهة بسلامتهم. لقو ليك أمة أوووله كده مخرخرين و عرق و كتاحة و قفف و شنط صفيح و بقج بقج. و شغالين نقنقنقنقنقنقنقنقنقنقنق. هيرميس قال ليهم: هووووي يا هوووووي، يا وهم إنتو.. في شنو جاضين كده؟ إنتو منو زاتو؟ واحد منهم لابس عراقي و تشطيبه أصلي و جضومو معضمه و سافي، و لازي ليهو درداقة فيها قصب سكر و فول و تسالي و ترمس و حاجات بالشكل ده، طوالي فتح ليك نار في هيرميس: - إنت مش البتاع بتاع السفر؟ سفرونا ياخ.. مليون سنه واقفين ليكم هنا؛ حقارة دي ؟؟ الورانا و القدامنا ياخ تخارجوهم و نحنا لا!! لا دايرين تودونا فوق لا تنزلونا تحت لا جنباوي؟ .. العالم كلها شتت و نحنا لأ؟ .. خريانين في بيت أبو واحد فيكم نحنا؟ حقارتكم دي ما دايرين تخلوها؟ أبولو قال ليهو: يا زول هوووي.. إتكلم زي الناس بلا لماضه معاك!.. إنتو منو زاتكم و جيتو نابلين من وين في الحراية دي؟ الجابكم هنا شنو؟ دخلتو هنا كيف زاتو؟ ايه الفوضى بتاعتكم دي؟ التشطيبة و جضمو معضم و سافي قال ليهو: بللاي؟؟ ده حنكك؟ .. نحنا السودانيين يا حبه!!. شفتَ كيف؟ .. السودانيين عديل كده.. أها! إتلفتو الآلهة علي بعض!!! : الشنو ؟ .. كيف يعني سودانيين دي؟ .. سجمنا؟. ديونيسيوس طنطن تِحِت تِحِت: أبو العرقي الكعب لأبو يومنا زاتو. و إتلفت لهيذر : شفتَ.. شفتَ ، تاني يا مغشم إنت قول لي موية اصلية و عرقي زفت.. أهو جابت ليها هلاويس و كلام فاضي. قامت أثينا قالت ليهم: يخواننا كدي باركوها.. الناس ديل نشوف ليهم حل طالما نسيناهم. محسوبين برضهم علينا، يا ندخلهم الجنة.. يا نوديهم الدفاع الشعبي. أريس قال ليهم: نسأل أبّو كبير يا شباب هووووي، ما يجي باكر بعد باكر كمان يسل لينا ضنبو. ديونيسيوس اتلفت علي السودانيين: أوعكم تتحركوا من هنا.. خليكم قبلكم . الراجا فيكم كدي يعتب خطوه قدام عشان احرق ليك صوفتو.. و لا حركة، و لا نفس، مفهوم ؟؟ قاموا كلهم بسلامتهم إتخمخموا مشوا أوضة زيوس و كوكوكوكوكو خبطوا الباب. زيوس من جوه كورك ليهم: في شنو يااااا، في شنو تاني يا بيض إنتو ؟.. إنتو بجم؟ .. مش قلت ليكم ما داير اي غلاغل؟ حجة هيرا شغالة بي جوه تنقنق ساكت : الله لا كسبكم، الراجل يادابو داير ينجمّ. قالوا ليهو: يا زيوس ياخ دقيقة بس؛ في ناس قالوا ما اتحاكموا لسه و عاملين لينا غاغة في الجنينة يامعلم.. نوديهم وين ديل و الدنيا خميس؟ زيوس فتح الباب لابس قرقاب كاروهات و بيقرم طعمية و شايل صحن مزه و العيون حمراااااا: ناس كيف يعني ناس؟ .. قالوا ليهو: قالوا هم حاجة كده اسمها سونيين.. سوندونيين.. سودانيين .. حاجة بالشكل ده. وديل قاعدين وين ديل كمان ؟ آآآآآ.. كدي جيبو الخريطة كدي. فتحوا الخريطة و أعمامك آلهة الإغريق كلهم إتلموا حوالين زيوس و هم واقفين في الباب.. و يعاينو في خريطة الدنيا و المخلوقات الفاتحها زيوس.. عاينو عاينو عاينو .. جككككك هيرميس خت يدو في افريقيا: اهو ده .. لقيتو . زيوس شال نضاره القراية و عاين كدددددده لقي حتة مكتوب فيها: (هنا السودان، هنا ده). قام اتلفت محمبك و رررررررررري قطع ليك في هيذر كف صاموطي لما داك اتترتح و جاتو صنه، زيوس هرشو ليك كواريك جددددد: أنا مش قلت ليك الواطة دي ما تعمل فيها أي شي و تخليها فاضية ؟؟) .
|
Post: #2
Title: Re: ميثولوجيا الورطة
Author: عمران حسن صالح
Date: 10-07-2013, 07:16 AM
Parent: #1
|
Post: #3
Title: Re: ميثولوجيا الورطة
Author: Emad Abdulla
Date: 10-07-2013, 07:24 AM
Parent: #2
تصفق شنو ؟؟ يا متورط :)
|
Post: #4
Title: Re: ميثولوجيا الورطة
Author: سيف الدين محجوب
Date: 10-07-2013, 07:31 AM
Parent: #3
إبداااااااااع يا أبو تسنيم تحياتي
|
Post: #5
Title: Re: ميثولوجيا الورطة
Author: محمد البشرى الخضر
Date: 10-07-2013, 07:34 AM
Parent: #4
أيواااااا ... عايزين تليسوها في هيذر مش كدا :)
|
Post: #7
Title: Re: ميثولوجيا الورطة
Author: Emad Abdulla
Date: 10-07-2013, 07:43 AM
Parent: #5
نختها في منو يا ود البشرى ؟؟ هسه نحنا الساس و نحنا الراس و نحنا الشافو خلوه وللا لأ ؟؟ و تيييب !!
|
Post: #6
Title: Re: ميثولوجيا الورطة
Author: Emad Abdulla
Date: 10-07-2013, 07:42 AM
Parent: #4
سيف الدين يا ابن خالتي .. تحياتي يا اصلي .
إبداع بتاع شنو ياخ ؟ .. في زول ورطان بيبدع ؟
|
Post: #8
Title: Re: ميثولوجيا الورطة
Author: حمد عبد الغفار عمر
Date: 10-07-2013, 07:57 AM
Parent: #6
Quote: أنا مش قلت ليك الواطة دي ما تعمل فيها أي شي و تخليها فاضية ؟؟) . |
وهسة ما خلاها فاضية فضل فيها منو؟
انت حليب السعودية دا قام بيك ولا شنو؟
مرحب بيك
|
Post: #9
Title: Re: ميثولوجيا الورطة
Author: محمد عبد الماجد الصايم
Date: 10-07-2013, 07:57 AM
Parent: #6
.. بل ورطة الميثولوجيا!
|
Post: #10
Title: Re: ميثولوجيا الورطة
Author: سيف الدين محجوب
Date: 10-07-2013, 09:22 AM
Parent: #9
عمدة يا أصلي في ناس كلما إتورطو كلما إزدادوا إبداعاً مزيداً من التورُط ،،، لمزيد من الإبداع ( منتهى الأنانية ،،،، مُش ؟؟؟!!! )
|
Post: #11
Title: Re: ميثولوجيا الورطة
Author: بدرالدين الطائف
Date: 10-07-2013, 09:32 AM
Parent: #10
ورطة الالهة أم ورطة الشعب السودانى ينعل ابليسك يا عماد . كلامك جميل يا زول..
|
Post: #12
Title: Re: ميثولوجيا الورطة
Author: خالد عبد الله محمود
Date: 10-07-2013, 09:49 AM
Parent: #11
أها و عمكـ زيوس أتصرف مع السودانيين كيف يا عمدة؟
|
Post: #13
Title: Re: ميثولوجيا الورطة
Author: Mahmoud Mustafa Mahmoud
Date: 10-07-2013, 10:55 AM
Parent: #12
الميثولوجيا التقوم ليك في أباطك آآعماد..
فقُر..
هذا مع محبتي الحالة دي..
..
.
|
Post: #14
Title: Re: ميثولوجيا الورطة
Author: Tagelsir Elmelik
Date: 10-07-2013, 03:18 PM
Parent: #13
يا عمدة ياخ في الصف الورا ديمتريس قال سمع تحت تحت (العرب ناكرينهم والافارقة قالو اولاد حرام) أنا كنت لاحم مع اب سفة الوشو معضم :) إسمو ود الفادني
|
Post: #15
Title: Re: ميثولوجيا الورطة
Author: بله محمد الفاضل
Date: 10-09-2013, 10:55 AM
Parent: #14
يا جِن إت متوكد إنك في السعودية بنون دي
شديدة جدددددددددددد يا
وأبقى أظهر....
|
|