المحبطــــــــِــــــون!!

يمشُون بين الناس مُشككين خائِفين مرجفين .

فهم أعداء التغيير والنجاح فاحذروهم.

والخطير والغريب فى الامر أن بعضهم أو أكثرهم لاهم بكيزان ولا منتفعين النظام.
ويرددون بغباء مُتقن ما يبثه أهل النظام من إدعاءات كاذبة وإشاعات مغرضة.
الغرض منها تثبيط الهمم.
مثل
أن المتظاهرين هم مجموعة مخربين .
الخ .

أحد الاصدقاء المضافين عندى فى الفيس بوك لا يعلم عن أمر دينة إلا اليسير جاء مكابراً ليحدثنى عن حرمة الخروج على الحاكم.
وهو الذى ينطبق علية قول الزمخشري: "....... هو الذي لا يفرق بين الكوع والكرسوع"
فسالتة هل أنت راضى عن ما يحدث فى السودان من فسا د وإستبداد وغلاء .
فأجاب بلا.

كلمات يطلقها البعض بلا وعى وبعجرفة شديدة مثل (ديل ماعندهم اهل .ديل بنات مطاليق .ديل مخربين .عاوزين يصلوا لشنو يعنى).
والادهى والامرً أن هذه الكلمات يمكن أن تصدر من شخص جالس فى بنبر فى لمة شاي ولا يملك من قوت يومة حق ربطة جرجير.
والمصيبة أن تجد هذه الكلمات الإستحسان من البعض.

اديك قلتها ياسيد بدر

لاهم بكيزان ولا منتفعين النظام


ناس الثورة بالنص

وهم الغالبية من الشعب السوداني

وعلي لسانهم اقول لك


ضل حكومه ولا ضلمه

الناس ان مابقت حمل عشره جنيه في جالون بنزين
بالتالي ماهم حمل بهدلة وملطشة وفوضي وانعدام امن
وخبز ونرجع من تاني نتوصل بالكارو

لا وفي النهاية نجيب لينا عسكري من تاني


وياعالم

اقنعو ناس الثورة بالنص وورنا خارطة طريق لسودان افضل

وورونا اتو جايبين لينا منو؟؟؟

تحالف امس (امام مولانا سيدي)؟؟

للوكت داك ماسكين في عراقي البشير ال######ان ده

وأما عن المحبطون عبر السايبر فحدث ولا حرج.

الجداد الاكتروني سنتجاوزهم لانهم يمارسون مهنتهم التى يعيشون منها..

Quote: لاهم بكيزان ولا منتفعين النظام ناس الثورة بالنص وهم الغالبية من الشعب السوداني وعلي لسانهم اقول لك ضل حكومه ولا ضلمه

Quote: ضل حكومه ولا ضلمه

أهو زي عمر ده عينة من محبطين السايبر ساقه الله الينا.

ويا عمر خلى بالك أنا بتكلم عن المحبطون المحبطون فقط .
وهم فئة صغيرة من الشعب السودانى وليس كل الشعب.
وهم فئات مختلفة
منهم القاعدين يمارسوا عملهم ده بوعى زيك كدة لاهداف شخصية .
ومنهم القاعدين يمارسوا تحبيط الاخرين بدون وعي .

اذا قلت المحبطون من الشعب السوداني قله اذن انت تتحدث
عن سودان اخر اخي الكريم0

بعدين بطل اسلوب التخوين ده مع كل من يتداخل معك

ملقحين وممرطين زيك كده ياللخو

يعني الحال من بعضو

شايفك ملقح بالطائف لغاية مااسمها لصق فيك

مرقتني جدادة؟؟؟؟؟؟؟؟؟


والله ياولدي لمن اعاين لي روحي القاها فعلا جداده


جداده ناهزت الستين من عمرها واكثر ولي يوم الليله
حاجة اسمها صناديق اقتراع وانتخابات لاشفتها لابعرفه الا في
التلفزيون0 ومثلي كثر0

وامسك واضبح

يعني جداد بالكوم والردوم

بس المصيبة انت تكون معانا

يا بدر الدين ... سلام

المشكلة .. انو ...
معظم الشعب السوداني .. محبط
والمعارضه محبطه ..
والحكومه زاتها .. محبطه .. وماكله هواء ..
ومعارفين الخلاص وين ...

تحياتي ,,,,

كلمو بالله يامجيدو



تعجبني ضحكتك ولفة عمتك





لك ودي

Quote: اذا قلت المحبطون من الشعب السوداني قله اذن انت تتحدث عن سودان اخر اخي الكريم0 بعدين بطل اسلوب التخوين ده مع كل من يتداخل معك ملقحين وممرطين زيك كده ياللخو يعني الحال من بعضو شايفك ملقح بالطائف لغاية مااسمها لصق فيك

ياعم عمر شايفك اتحسستة من حتة مصلحة شخصة.
والمصلحة الشخصية ما بالضرورة تكون منفعة مالية وخلافة.
مجرد رغبتك فى بقاء النظام وقولك (ضل الانقاذ ولا ضلمة ) بيعنى ضمنياً تاييدك للنظام.
تاييدك للنظام ودعوتك لبقائه دى رغبتك (مصلحتك) الشخصية الانت عاوز الناس تايدك فيها بتبرريك ليها بعدم وجود البديل.
ورينى انا خونتك وين فى الكلام الفوق ده.

Quote: اذا قلت المحبطون من الشعب السوداني قله اذن انت تتحدث عن سودان اخر اخي الكريم0

المحبِطون بكسر الباء هم الناس الذين يسعون لزرع الخوف والشك وعدم جدوى اى يعمل يقوم به الاخرين ليجبروهم على تركة.
راجع افتتاحية البوست.
شكلك إنت ومجيدو القاعد تحت ده مافهمتو المعنى المقصود للكلمة.

Quote: يا بدر الدين ... سلام المشكلة .. انو ... معظم الشعب السوداني .. محبط والمعارضه محبطه .. والحكومه زاتها .. محبطه .. وماكله هواء .. ومعارفين الخلاص وين ... تحياتي ,,,,

يمكن أن نكون مًحبطون من كل ما يحدث حولنا ولكننا ليس مُحبطين لهمم الأخرين.
من نعم الله عليك يا مجيدو إنة هنا مافى كوريك
مرحب يا مجيدو ومشتاقون.

الآخ \ بدر الدين تحياتي لك ولي ضيوفك الكرام ..

(( أحد الاصدقاء المضافين عندى فى الفيس بوك لا يعلم عن أمر دينة إلا اليسير جاء مكابراً ليحدثنى عن حرمة الخروج على الحاكم.))

ده ليست من المحبطون ده من (( الجاهلون )) وديل بمثلوا نسبة برضو لا يستهان بيها كما قادتهم .

والله مصيبتنا مصيبة

فيقولوا ما يقولون فشعب ماضي دون ان يلتفت والعز علي قدم وساق وحتماً الشعب سينتصر
يا أبو العروس يا صحبي يا مجيدي :-
لم يدخل الإحباط عتباتنا بعد صدقني منتصرون وأن أتت كل زخيرة النظام سندك النظام بهذه الأرض التي مازالت تشرب دم الشعب عبر بندقية النظام

الاخ عادل \ تحياتي ,, وثقتي التامة بك

ادعو لك من جوة قلبي وانا لا اعرف غير انت علي الحق وقولك الحق .

Quote: لم يدخل الإحباط عتباتنا بعد صدقني منتصرون وأن أتت كل زخيرة النظام سندك النظام بهذه الأرض التي مازالت تشرب دم الشعب عبر بندقية النظام

وسوف ننتصر وننتصر وننتصر

وغدآ لناظره قريب .

لما هذا التسرع لاحباط ولاشي
الشعب قال كلمته ويكفي الجميع توحدو بعد سنوات من
الضنك والفشل وموت الاحلام الشعب قا ل كلمته ياريس
واهو كل يوم في بلد والهبة الشعبية كسرت وكشفت كتير من
الكان متخبي للعيااان والثورة في طريقها للميس

Quote: ده ليست من المحبطون ده من (( الجاهلون )) وديل بمثلوا نسبة برضو لا يستهان بيها كما قادتهم . والله مصيبتنا مصيبة

وينطبق عليهم القول (عدو عاقل خير من صديق جاهل).
يمشون بيينا ويجلسون معنا وياكلون طعامنا ويريدون أن يزرعوا فينا الخوف والشك بجهلهم.
مرحب مني عمسيب وتحياتى لكي.

Quote: فيقولوا ما يقولون فشعب ماضي دون ان يلتفت والعز علي قدم وساق وحتماً الشعب سينتصر

نعم الشعب سينتصر .
وواجب أن نكون حذرين من أمثال هؤلاء المحبطين .

هناك نوعية تانية وهى المحبطون المتلبطون

ودي نوعية بتكون مع الثورة وضد الثورة فى ان واحد...

Quote: لما هذا التسرع لاحباط ولاشي الشعب قال كلمته ويكفي الجميع توحدو بعد سنوات من الضنك والفشل وموت الاحلام الشعب قا ل كلمته ياريس واهو كل يوم في بلد والهبة الشعبية كسرت وكشفت كتير من الكان متخبي للعيااان والثورة في طريقها للميس

فى هذه الزاوية نسلط الضوء على فئة المندسين محبطين الهمم .

الثورة مستمرة يا ود المكي.

من ما زالوا يخوفوننا من البديل البديل هو شباب يصنع مستقبله بحكمة شيوخ شرفاء

لا يمكن ان نرهن امرنا لحفنة طقاة بدعوي عدم وجود البديل والشباب تجاوز الكثير من المحنطين والمحبطين والثورة ليست نزهة بل طريق شاق طويل ومهما ليل الطلم الداجي طول فالنور في الآخر يسطل الدار

Quote: هناك نوعية تانية وهى المحبطون المتلبطون ودي نوعية بتكون مع الثورة وضد الثورة فى ان واحد...

سلام سيف سعد وعساك طيب.
مع وضد ده اخطر نوع من المحبطون لانه تاثيره بيكون اكبر على من حوله .
يتحدثون حديث العارف وهم اجهل من الجهل بكل ما يحيط بهم.

Quote: من ما زالوا يخوفوننا من البديل البديل هو شباب يصنع مستقبله بحكمة شيوخ شرفاء لا يمكن ان نرهن امرنا لحفنة طقاة بدعوي عدم وجود البديل والشباب تجاوز الكثير من المحنطين والمحبطين والثورة ليست نزهة بل طريق شاق طويل ومهما ليل الطلم الداجي طول فالنور في الآخر يسطل الدار

سلمت يا عمر الفاروق يجب تجاوز كل المحبطين وكنسهم الى مزبلة التاريخ.

نشاط ملحوظ لهم على كل الاصعدة.
الحذر الحذر.

Quote: يجب تجاوز كل المحبطين وكنسهم الى مزبلة التاريخ.

غايتو يا بدر حسب متابعتي لي سودانيز أون لاين أنا شايف إنو 90% من الشعب السوداني وديتيهو مزبلة التاريخ بتاعتكم دي