هيثم محنة وفرج الله جلكسات وحلق الحواجبين

Post: #1
Title: هيثم محنة وفرج الله جلكسات وحلق الحواجبين
Author: طارق جبريل
Date: 10-06-2013, 09:12 PM

هيثم محنة وفرج الله جلكسات قاعدين يتونسوا عن القرمبوز...
هيثم: تعرف يا فرج سحر بتأكلني بي يدينها
فرج: تأكلك يا فردة
هيثم: آي ياخ وبتنضف لي السمك من الشوك لو ما لقينا (بياض)
فرج: ايوااا الشوك قلت لي
هيثم: آي ياخ حنينة.. وبتريدني ومرات بتحميني ياخ
فرج: انت بتستحمى يوميا يعني
هيثم: ياخي من شدة ما بتريدني بتقرب توضيني كان ما حرام ياخي
فرج: هو الوضو بقى حرام الايام دي.. لكن بتوضيك وين
هيثم: ياخي نقرب نتمضمض سوا
فرج: تتضمضموا سوا.. إنت يا هيثم ركبت فيل قبل كدة
هيثم: فيل شنو ياخ.. والله الزولة دي عسل... إنت (كلكتة) موش بتدلعك
فرج: جابت ليها (كلكتة).. دي منو كمان
هيثم: ياخي إنت موش بتدلع كلتوم كدة
فرج: (كلكتة) بتدلعني ياخ... بتجيب (السخينة) لببببب تختها قدام وهي بتقش
في نخرتها وتقول هيع هيع هيع اكل يا حبة ولم الصينية معاك.. ولم تزيد في الدلع
بتخت لي شطة (دنقابة) في آخر الصحن عشان اقدر ادخل (المستراح) وانا مستريح
حتى بتجيب المقشاشة تكتل الضبان الاخدر البنوني فوقي وانا بنزل في الخرسانة
الاكلتها... ومن شدة ما سريعة ياخي بتخت لي صينية الشاي قدام باب المستراح
وتتاوق تشوفني عامل كيف مع (هراري) وتقسم لي كيس الصعوط حقها ياخ
وتقول لي: ماشة اعمل لي لخوخة يا حنانا..
هيثم: يا سلام ياخ زييي صدق.. سحر مرات بتقول لي حواجبينك سمحة نفسي اشيلها ليك
فرج: لا انا حواجبيني ما بتتشال زي ياي الشرك..
هيثم: والله يا فروج أول أيامنا في العرس تدلكني ليك ورجليني ديل يبقوا ملللللللللللللللس.. انت (كلكتة) ما عملت ليك دلك «مساج»
فرج: قلت لي مللللس.. ما بتشيل فيني ياخي الدلكة دي.. أنا عندي «قِحِف» ما كرعين..
بعدين صعبات في الدلكة لأنهن مكلوجات زي اللستك ابو كركاسة حتى في المشي انا بنقز زي البعرض مع «قيقم»
هيثم: لكن يا فروج انت كدة ما ضعت من الحنان.. معقول ما عملت ليك «مساج»
فرج: لا ياخ قاعدة تجازفني.. مرة قلت ليها عندي قطيعة في كتفي.. جابت ليها موس حلاقة وبرطمان
هجرتني ليك تحت أوراكها وفصدت ليك كتفي دة قالت دة دم فاسد..
هيثم (منطط عيونه): معقول يا فروج أووه نووووو
فرج: ايوة ياخ دة «مساج (كلكوتي) وقامت ولعت ليها ورق كراس في البرطمان وغمتت بيهو الجرح وأنا تحتها بقنت
هيثم: بتبالغ ياخ (كلكتة) قلبها قوي ياخ الحنان دي
فرج: أقول ليك أقنت تحت أوراكها ويمكن أكون «فكيت آخري» من تحت تقول لي الحنان.. المهم يا زول النار دي ولعت في البرطمان
وتشتشتني ليك تماااااااااام والبرطمان قام كبس مع اللحم
هيثم: فيلم رعب موش يا فروج... حضرتوا فيلم رعب صاح
فرج: لا ما تخاف يا فردة دة الرعب ذاته ما الفيلم.. المهم ختت ليك رجلينا الاتنين في كتفي بعدين بتكون ما قطعت ضفورها ليها سنتين وبقت تجرررر..
والضفور دي تعمل ليك خرايط عجيبة في رقبتي وضهري زي المجلود في عرس جعليين..
لامن البرطمان فكة معاها وقعت علي قفاها في باقي جسمي وانا شاكي إنه في حاجة اتفقشت من اليوم داك.. لأنه ما قادرين نلد
هيثم: والله لكن قوية لو جاكم حرامي ممكن تساعدك
فرج: لا يا فردة الحرامية معلمين بيتنا: بيت ملاكم وراجلها
هيثم: سحورتي قبل أسبوعين قالت جاها طمام ونفسها في مكسرات
فرج: أيوا جُروم وتسالي يعني
هيثم: لا ياخ لوز وجوز وفسدق
فرج: جوز حمام قصدك
هيثم: حمام شنو يا فروج.. نحن ما بناكلو الحمام دة مسكين وحنين ياخ
لفرج: الحمام مسكين... لكن يا هيثومي ما قلت لي
هيثم: نعم يا فروج
فرج: فروج... انت لمن مشيت عقدت عليها المأذون كتب منو فيكم الراجل

Post: #2
Title: Re: هيثم محنة وفرج الله جلكسات وحلق الحواجبين
Author: معاوية المدير
Date: 10-06-2013, 09:19 PM
Parent: #1

ماك نصيح شي.

يا اخي والله مشتاقين...

Post: #3
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-06-2013, 09:29 PM
Parent: #2

Quote: ماك نصيح شي.

يا اخي والله مشتاقين...

اوووووووه حبيبنا ود المدير
ياخي كيفنك

Post: #4
Title: Re: هيثم محنة وفرج الله جلكسات وحلق الحواجبين
Author: الامين موسى البشاري
Date: 10-06-2013, 09:42 PM
Parent: #3

دي بكم كرت يا عمكـ؟

عارفك عايز تصرف الثوار عن ثورتهم

Post: #5
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-06-2013, 09:45 PM
Parent: #4

Quote: دي بكم كرت يا عمكـ؟

عارفك عايز تصرف الثوار عن ثورتهم

يا عمك دة تحريض لي فرج الله عشان يقوم بالثورة الصاح

Post: #6
Title: Re: هيثم محنة وفرج الله جلكسات وحلق الحواجبين
Author: معاوية المدير
Date: 10-06-2013, 09:48 PM
Parent: #5

Quote: يا عمك دة تحريض لي فرج الله عشان يقوم بالثورة الصاح

هههههههههههههههههههههههههه،

دي مكنتك ؟؟؟.

رُش المرتزقة يا بشاري، ولا تأخذك به رحمة.
رُشو يا اخ ...

Post: #7
Title: Re: هيثم محنة وفرج الله جلكسات وحلق الحواجبين
Author: الامين موسى البشاري
Date: 10-06-2013, 10:11 PM
Parent: #6

ما تحرش يا ود المدير ياخ!

متعة شديدة يا عمك .. تسلم يمينك ياخ

Post: #8
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-07-2013, 08:11 AM
Parent: #6

Quote: هههههههههههههههههههههههههه،

دي مكنتك ؟؟؟.

رُش المرتزقة يا بشاري، ولا تأخذك به رحمة.
رُشو يا اخ ...

Post: #9
Title: Re: هيثم محنة وفرج الله جلكسات وحلق الحواجبين
Author: ست البنات
Date: 10-07-2013, 08:56 AM
Parent: #8

طارق مالك بتغرد خارج سرب الثورة؟؟؟؟؟؟؟؟؟؟؟؟؟؟؟

وثم تانيا :

ويين ثوار المغرب ؟؟؟؟؟؟؟؟؟؟؟؟

حليل الزين الماب يتقاعس !!!

ست البنات.

Post: #10
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-07-2013, 09:02 AM
Parent: #9

Quote: طارق مالك بتغرد خارج سرب الثورة؟؟؟؟؟؟؟؟؟؟؟؟؟؟؟

وثم تانيا :

ويين ثوار المغرب ؟؟؟؟؟؟؟؟؟؟؟؟

حليل الزين الماب يتقاعس !!!

ست البنات.

منو القاليك يا قريبتي
والله شغالين تش بي جاي
اذاعات وجرايد وكله

وثورة ثورة حتى النصر
عشان ناس «فرج الله جلكسات ديل»

Post: #11
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-07-2013, 07:56 PM
Parent: #10

Quote: Abd El Rahman Tawfig
والله شوف أنا ناس الامتداد ديل عارفهم بلفوها بي كرت و مرااات كرتين لكن بتاعتك دي حررررم فييييل و و بي اربعة كروت ,,,,, بطني وجعتني ماشي المستراح

الله يكتلك ياخ

Post: #12
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 10-08-2013, 06:27 PM
Parent: #11

غايتو كلكتة دي لو فروج ده جاهو اسهال ما بعيد تعمل ليه عرديب بي موية بطارية

Post: #13
Title: Re: هيثم محنة وفرج الله جلكسات وحلق الحواجبين
Author: باسط المكي
Date: 10-08-2013, 06:54 PM
Parent: #12

اله يجازي محنك حوار لذيذ
جدا

Post: #14
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 12-02-2013, 09:32 AM
Parent: #13

Quote: اله يجازي محنك حوار لذيذ
جدا

كيفنك يا حبيبنا

Post: #15
Title: Re: هيثم محنة وفرج الله جلكسات وحلق الحواجبين
Author: Yousuf Taha
Date: 12-02-2013, 02:10 PM
Parent: #14

هههههههههههههههههههههههههههههههههههههههههههههههههههههههههههههههه
يديك العافية يخ
تحياتي

Post: #16
Title: Re: هيثم محنة وفرج الله جلكسات وحلق الحواجبين
Author: طارق جبريل
Date: 12-03-2013, 10:11 AM
Parent: #15

Quote: هههههههههههههههههههههههههههههههههههههههههههههههههههههههههههههههه
يديك العافية يخ
تحياتي

كيفنك يا الحبيب