واشوقن ع بلدي شوق زولن ولوف بكاي
ياربي الوليدات شربوا الشاي
ياربي الغنيمات لقن مضغاتهن
ياربي النار ولعت في تكل حبوبة وعملت كسرة وملاح لوبة
يارب كيف صبح الصباح علي فاطنة وحلوم
وصحي ناس فاطنة يوم الجمعة لقن صابونة غسيل لهدماتهن
ياربي البلد صبحت كيف
وجالون البنزين بقي بعشرين
ورغيف العيش اصبح حلم غبش
وناس تانين خلهم ساي بطن ملانة سحت وشاي بترولي بدم شاب حلم بالوظيفة
وشعر البنوتة مالقي زيت
وعصفورة الجنة تفتش لبت الليون
وين بت الليون
ونحن بقينا كلنا بنات ليون في يدين وسـخانة
لامتوضية لا تعرف دين
يدين تكتل ساي
وفي قلب المكتول تنضف السكين
وتتكي واحد تاني بكراع اخوهو
وبت تانية تمرغ شرفها باسم الدين
ود حين وين الدين
وين الدين ونحن بنشرب طين
وناكل فتات الوسـخانين
ونحمد الله ونسجد ونركع ونقول آمين
قولوا آمين بلدي ترجع وراء كم وعشرين
وتعرف شنو يعني تجارة دين
وتلفظ كل ال######
وكل هم واربعين مليار دين
فوق ضهر الجايين
دحين دولا بجوا دحين
علي كل ضهر واحد منا مليون دولار دين
ياربي القروش دي مشت وين
نسكت ساي ونلبس طرحة
ولا نقول البغلة والله وين
بغم ... بغم البغلة وين زبغم تاني والبغلة وووين
وبكرة نصبح حلوين
ونفتش في قلوب الناس الطيبين
ويجينا زول ولووووف وحنين
وبعرف شعبوا وين
ويعرف مهيرتو كيف ووين
يعرف نحن شنو وليه ومتين
ياربي بركة جمعتنا دي
تغطي علي المارقين
وتغطي علي الداخلين
ويطيروا تجار الدين
لو نشتري اجانحين
ح يطيروا تجار الدين
وبكرة أكيد جاي
وين تمشوا وين ؟؟
وغير الويل والسعير دحين في بكان تاني دحين ؟؟
وبرضو اقول صباحك خير يا بلد الطيبين
وجمعتك مبروكة ومختومة بالبركة والفلاح
يا سمح يا زين