Post: #1
Title: حرية .... حرية ---- قصيدة
Author: عبدالله وداعه الامين
Date: 10-03-2013, 01:39 AM
Parent: #0
حرية حرية
ثورتنا سلمية
مد البصر و الشوف بي عرقنا محمية
بنجيبها لو بي الحق او حتى زندية
حقك تشيلو براك .. رافع جبينك فوق
ما بجيكا بي النية
مهر الخلاص الروح تمن المحبة جروح
و الروح تروح احسن بي عزة مرضية
علي الهتاف ارفع نبرة غناكا و فوق
يا نعيش كمان احرار يا موتة دغرية
واصلو التمن غالي حق الوطن اكبر
من عسكري و والي و شلة حرامية
و الارض هي الميراث
و العزة لو تنداس الموت بكون احسن
من عيشة مخزية
شن فايدة الحراس يا يما ديل اشرار
اولادك الفراس ماهم سماسرية
ما ساموا عرضك يوم
لا داهنوا التجار لا خالفوا المعلوم
فتحوا الصدور لي الموت
و الموتة عيدية
لو تبقى في الاوطان
لو تبقى شان عرضك
ارضك كما عرضك تحميها جندية
يا يما باعوا الناس
قسموا الوطن نصين
نهبوا البلد و خلاص
خلوها مرمية
واجب النضال اول
فرض الوطن واجب
يا نموت كمان واقفين
يا نعيش و نرضى الذل
و رسينا متكية
واسوا الصفوف احسن
و نشد سواعد الخوف
حد السماء الممدود و ايدينا ما شويية
عايزاني اسكت ليه؟
يا يما اسكت ليه؟
نسكن كمان لي متين و البيعة مشرية؟
و اصلو التمن مدفوع بنجيبها بنجيبها
حرية السودان
غصبا عن الحاصل .. عن المرابيّة
ما شفتي يا يما زورا باسم الله
سرقونا دقونا كتلونا كيدية؟
و طلعنا مطلوبين
شذاذ و افكاين
و كمان باسم الدين نهبونا بالمية
بالالف و المليون
ندفع عشان جيبهم
رسم الجباية غصب
و يخصمو ماهية
و الحال كما هو الحال
و الظلم نفس الظلم
ويكرروا الموال و الحالة بس هيا
قايلين حنفضل يوت
مالين جيوبنا الخوف
و عيونا مطفية؟
ابدا ورب الكون بنجيبها حرية
كل الحقوق ترجع
و حلفنا ما بنرجع لا نوطي لا نركع
لي سلطة فردية
بي همة ثورية
شمس الخلاص تشرق
و ارجع بلدنا جميل
و الضحكة لي الخرطوم ترجع كمان اجمل
و البسمة وردية
لا فينا ديكتاتور
لا فينا رجعية
الجنس سوداني
و الامر الناهي فينا الضمير الحر
و السلطة شرعية
نتساوى في القانون
و الحق يبقى الحق
و الفوضى منهية
و نعمر السودان
و نكون كمان اخوان
و نبيض النية
و علوا الهتاف اكتر
حرية حرية
دم الشهيد ما بروح
و الوهبوا ما شوية
حرية السودان بي دمانا مروية
علوا الهتاف اكتر
بنجيبها حرية
لي اليرضى و اليابا
حوتنا جيابا
و ايدينا ما شوية
حرية حرية
عبدالله وداعه الامين
2909.2013
|
Post: #2
Title: Re: حرية .... حرية ---- قصيدة
Author: عبدالله وداعه الامين
Date: 10-03-2013, 09:14 AM
يا نعيش كمان احرار يا موتة دغرية
|
Post: #3
Title: Re: حرية .... حرية ---- قصيدة
Author: garjah
Date: 10-03-2013, 09:18 AM
Parent: #2
معليش اخي عبد الله وداعة الامين
خت لي دي معاك
حرية
طلبك قاسي
ماشين لصفوفنا نواسي
لمتين الصمت الراسي
لمتين الصلف القاسي
وانتي بعيدة علينا
شايلنك جوا ف عنينا
شايلنك جوا الخاطر
كاسرين قلوبنا نخاطر
عشمنا نتمو طريقنا
شان الصبح الماطر
يهل ويطوف وادينا
يرش البسمة يثابر
نكويهو نبعدو الكاكي
لا يعود للقبلو يحاكي
ويرجع بوليسنا النقطة
ينصف ويدي الشاكي
ويعود العدل يسطر
كتاب الدولة الحرة
وتعود الغيمة تمطّر
في سمانا ترقص حرة
قرجة
|
Post: #4
Title: Re: حرية .... حرية ---- قصيدة
Author: بله محمد الفاضل
Date: 10-03-2013, 09:40 AM
Parent: #3
"ابدا ورب الكون بنجيبها حرية
كل الحقوق ترجع
و حلفنا ما بنرجع لا نوطي لا نركع
لي سلطة فردية"
تسلم يا عبد الله
وأنت تفرد مساحات شاسعة من الكلام المعبأ بوسامة الثائر
وروحه البضة
...
هذا نشيد ثورة بلحنه وموسيقاه
منه فيه
فمن يأخذه إلى حنجرته؟
تحياتي واحترامي
|
|