مواقف عصيبه ,.,.,

خطر فى بالى نحكى ليكم ونحاكيكم ونتحاكك كلنا عن المواقف المريت فى حياتنا وكانت عصييييييييييييبه
ممكن تكون عصيبه بفكاهه
وممكن تكون عصيبه بفظاعه
وممكن تكون عصيبه بعباطه
اكيد لاى موقف حكمه ودرس وعبره وسبب
ماهى الحياه ما خلقت بلا سبب ومغزى ومعنى
كل لحظه فى حياتنا ليها قيمه وربنا سبحانه وتعالى اكيد بينور بصيرتنا بالتجارب دى وبيصوبنا بالامتحانات وبيختبرنا بالابتلاءات
يبقى اكيد لو شاركناها بنفيد غيرنا ولو حتى بابتسامه
ولا رأيكم شنوووووووووووووووو






المدير كبس اجروااااااااااااااااااااااااااا

سقطت فى حياتى الدراسيه مرتين وجبت ملحق مره واااااااااااحده فى الجامعه
اول سقوط كان فى اولى ابتدائى كنت ما بقدر اقرا سمح
وتانى سقوط فى الثانويه العامه ودا كان افتراااااااااااااااااااااء من وزارة التعليم المصرى واضطهاد لجيناتى السودانيه النابغه فى اللغه الانجليزيه
:))))))))
غايتو اول مره الاحظ ان بدايتها واخرتها كانت سقوط
شوفتوا دى اكيد لحكمه لكن ما عارفه ليسه فحواها
المهم لمن قررنا نرجع وطنا الحبيب السودان بعد ما حكومتنا الرشيده قلبت سحنتها للحكومه المصريه النجيضه اللى بدورها رديت ليها القلبه وشاتتنا من رعيتها
كنت امتحنت الثانويه العامه ونظرا لان اخوانى القبالى بعد اتقبلوا فى الجامعات المصريه وما قدروا يستمروا فيها بسبب الشكله الحكوميه دى
قولت يعنى تاعبه روحى لشنووووووووووووووووو
كنت بدرس بدون نفس اصلا وقولت مش 50% بجيبها وبباصى
واصلا نفسى ادخل كلية التربيه الرياضيه
الرياضيه مش حقت الديناميكا والاستاتيكا
لكن حقت هوب هوب واحد اتنين
ودى بيدخلوها افشل الناس فى المجموعه
وفعليا وفيت بخطتى ونجحت فى المجموع وجبت حتى 51%
يعنى فى واحد كمان لحبايب
لكن الموشكل انهم سقطونى عنجليزىىىىىىىىىىىىىىىىىىىى
دى كيفين ما فهمت
هم اصلا ما بيعرفوا يتكلموا عنجليزى
انا لمن جيت من الخليج وكنت فى تانيه اعدادى كنت قفلت امتحان اللغه الانجليزيه
لانى كنت فطاهم بمرااااااااااااااااااااااااااحل
يبقى كيف يسقطونى اولاد بمبه ديل
غايتو كان يوم عصيب يوم النتيجه بنحكى فى عصوبه تانيه غير دى
لان دى متعلقه بعصبصب اخرى محرجه لطيش
,,,
ناخد بريك ونرجع

بوست تشويقي تثقيفي جميل عن التجارب التي مرت بك وبناواكيد لينا حكحي كتيييييييييييييييير يا رانية بس كدي واصلي الحكي علشان نحن نستحضر المواقف العصيبة المرت بينا في هذه الفانية ..

متابعين بعينينا الإثنين ..

تحياتي : ياسر العيلفون

تسلم اخى ياسر
برغم اول قصه دى عصبيه فكاهيه ساى
يعنى الحكم الفيها ما شديده
:))))))))))))
قولت ما ظريفه نبدى سخن طوالى

بدينا فى استخراج الشهادات حقتنا والاستعداد للعوده الى الوطن
وطن ما بتذكر انى شوفته لان اخر زياره كانت فيه عمرى كان 8 سنين
كنت متشوقه اشوف اهلى
احساس القرابه كنت محرومه منو شديد
يعنى مهما كونا معارف بالسنين والعمر ما بتبقى زى احساسك ان دا قريبك
ان فى اسم مشترك بينا
ان فى دم جارى فى عروقنا
ان فيه جزء منى وفينى جزء منه
كنت حمووووووووووووووت احس بالاحساس دا
انى وسط بنات اهلى
وانوم اليوم عند خالتى
وامرق اتفسح بكره مع ود اهلى
لصراحه الصوره دى ما اتحققت بالمعنى الكانت مشتقه منو
لان الصوره الفى بالى كانت خرافيه ومثاليه زياده عن اللزوم
والصوره الاكتشفتها فعلا كانت صوره واقعيه حقيقيه
ما بمعنى سيئه او حسنه
يكفى انها حقيقيه
دايما الاب والام العاشوا فى الوطن
بيعششوا فى ابنائهم حب غريب له بذكرياتهم الحسنه
وبيدسوا السيئه
ودا غلط كبير
لازم نكون واقعيين عشان ما نجى داخليين غلط
وفاكرين الحياه ورديه والناس بتشيل بعضيها من الواطه
الناس بتكون فيها المكفيها فيه
ما ناقصه مغتربين فاطين سطر يجوا يعذبوهم بفلسفتهم الافلاطونيه عن حقوق الانسان
امى الله يديها العافيه جريت جرى شديد كرمانا
من الكويت لمصر لسودان
كانت رحله شاقه ليها بالجد
وخصوصا ان ابويه الله يرحمه فارقها فى نص الطريق بالضبط
ميزة نساوينا انهم بالجد قويات فى المحن
ما بيتكسروا بالساهل
وبيصروا على الاستمرار
لو سئلتوا اى امراه شايله حفاظه وحايمه فى شارع النيل تبيع دردمه
حتلقاها ربة منزل عايزه تعيش اطفالها وتسترهم
ما عيب الشغل بما انه نظيف ومن اجل اطفال
ولا بيقلل من شأن اى انسان شى
ولا مفروض نعاين ليهم بشفقه
بالعكس
ديل يعتبروا اصلب منا وبيستحقوا الاحترام والتقدير والتكريم
انا دخلت فى خشروميت حاجه شكلى
دقيقه اتذكر وقفت وين وارجع

صاحبة البوست سلام عليك .....
كبسولة موقف جبرة .......

بعد جلسات وحبة تفكير ومباحثات مع النفس قلته النهبر من البلد عسى يكون خير على العموم
بعد إكتمال كل الإجراءات والجواز في يدي ولحظات الوداع الحاجة والحاج وكل أفراد الاسرة قت أرحل
في جيبي مائة الف قديم بالنسبة لموضوع التذكرة سعرها 350 الف بالقديم وأضف إلى ذلك رسوم عتبة مغادرة السوان الأخيرة
دي تقليعات المطار .............................
قافل على قريشات مع صديقاً لي اتوكلته على الله ودرب السفر طويل وصلته الخرطوم عربي عربي ركبتا الحافلة حفر في محطة لين
مشارف العربي حمدلله على السلامة ، صاحبي مدير وكالة قلت نصل نسلم عليه ونستفسر من أقرب حجز أنقرضته عليه سلام بالحضان
طبعاً أسئلة ؟؟؟ كتيرة . اسمعني شوف اقرب حجز متين؟ والسعركم ؟والحضور الساعة كم ؟ والاقلاع الساعة كم ؟ العبد لله ماقصر بصرنا بكل الامور
والصورة بقت واضحة قالت ليه : أحجز لي باكر خلي النقلع بيني ومع نفسي تنقلع وحق التذكرة ما معروف صاحبنا يقدر يوفر الملبغ اليوم أها والتصرف كيف ؟
لوما تم توفير المبلغ العمل شنو ؟ الحلة ما برجع ؟ بكري أنا بمشي وباكر الساعة تمانية بكون معاك ، من هنا بدأت رحلة البحث والتفتيش عن صاحبي من أجل كسب الزمن
وتدارك أي فشل يحدث الخطوة الأولى الإتصال الهاتفي لا يا شيخ لا يمكن الاتصال به حالين ، إلى موقع العمل لا يوجد رد واحد من الشباب الزول دأ طلع قبل نص ساعة
يا ستار الساعة عملت سته مساءً ، على فكرة مبارات هلال مريخ الساعة سبعه مساءً والراجل مريخابي سيف ، قلبي أكلني أمشي الحاج منفى يمكن يكون هناك محل الإقامة
فر إلى منفى أقابل وأحد من الشباب يقول لي الراجل ما جى البيت من الصباح ، النشوف ليك النادي عسى حضوراً برضو مافي يا فراج هدي قعده في الحاج منفى الين الساعة حداشر
الزول ما بان ولا قلع يا عمك قوم أمشي العربي قاعد فوق شنو الامور كلها مجوبكه لا تفصح بخير ، وصلته العربي الساعة اتناشر الأ عشرة دقائق من الموقف للمحل كبست أتناشر
شفته صاحبي قاعد والله فرحته قربته أزغرد لولولولولولولولولولو يا صحبي والله كملته فهمي وكسرته ركبي ياخي من أصبحت الواطه أنا من عربية لي عربية للجزيرة القطرية
بعد المطايبات وحبة نفخه بتاعة زعل دخلنا في السلم بتاع القريشات قال :هسي ما عندي باكر بدبرن ليك مظبوط ردي عليه خلاص خير.....................................
الساعة عملت وأحدة صباحاُ موصلات مافي أكيد سألته صاحبي أها موضوع النوم البيت مافي ليه طريقة طيب العمل نشوف فندق من فندق لي فندق مقفل مقفل مافي سرير فاضي يا النبي نوح
وشايل شنيطي معاي عالاني علة حتى بحر الغزال مافيه سرير فاضي حاليل لما القعاد كان في فندق السواحلي خمج صح ........
بقيت خطوطين ما قادر عليهن أسمع يافردة نشوف العسكري الفي الكبسولة بتاعة موقف جبرة مع عمارة السلام العسكري فاتح التلفيزيون وعلي أبراهيم اللحو شغال جنى الوزين وزين بتاع مين
مرحب ياشباب مالكم عايزين ننوم والفنادق كلها فل عندك مانع ننوم هنا جنب الكبسولة بجيبو لي هواء سياتو بجي يشقر علينا في المواقع ، مشينا بعيد من صوامع الحيكومة وافترشنا الأرض مع كم كرتونه بتاعة
لبن نيدو المدعم بكراتين حفاظات همي فى شنيطي ما تتلفح ومعاها أقابض الريح عين بتات تحرس في سبيل التخارج وعين تجسد الاسترخاء والفلايت ووجع النوايط ....
أذان الفجر ما الجديد عشان نحنا دأخل السوان القديم أذن الحمدلله توشك فندق بحر الغزال عارف فيه ورديتين قلته نتوضأ نصلي ونعرف بتاع الوردية ونطق حنك للشنطة المتلتلاني نوديها الأمانات والباقي هين
تم الموضوع بسلام وخفت الحمولة ، فرتقنا أنا والكاشف ضربنا لقيمات وشاي الكاشف مشى المحل بلملم في أطرافو الساعة عملت تمانية ونص نزل غبار على الخرطوم رهيب . وفق الكاشف صاحبي في جمع
القريشات يالوكالة جيتك أسدد حق التذكرة منها إلى الحلاق ثم الفندق حمام كارب واستلام الأمانة نزيل زمنو خلص فى البلد أمجاد للمطار صالة المغادرة ، هسي ممنوع تخش حرم المطار

نهون عليك يا سامى ما تجينا راجع تانى
:((((((((((
لكن شحتفت لى رويحتى وخوفت صاحبك يمسكك ماسوره
وصعبتها عليه فى مصطلحات كتيره لكن غايتو الخلاصه وصليتنى
وشكلك كده شتت السعوديه مممممممممممممممش؟!؟!؟
شاكره ليك مشاركتك وسردك الظريف
وبننتظر باقى الحواتيت

تلتلت الجهات الحكوميه فى اى مكان
تسل الروح
وعشان يتم توثيق الشهادات من كل جهه دايره ليها شهور
فى حته كده بنمرق منها شهادات بتثبت انتقالى من اولى ثانوى لثانيه ثانوى لثالثه ثانوى مع توضيح انها نجاح ولا رسوب
كانت مليان لفم عينها بشريه وجكس وكده
مشينا قدمنا الطلبات
وقالوا ننتظر ينادوا علينا للاستلام
بتذكر يوميتها مشيت مع امى محل بتاع شرايط كاسيت
عايزه اعمل لى كوكتيل من اغانى معينه لماجده رومى
كانت كلمات لحظتها من اكتر الاغانى مشتهر ليها
ايام الرومانسيه والاحلام المشرقه
اااااااااااااااااااااااخ انا
شتات بين هذا وذاك
بين الحلمت بيه وبين العشته والعايشته
بحس بروحى حسى غبيه
مافى شى اسمه احلام ورديه
ورساله ساميه وبشر ملايكه وحب افلاطونى
فى رسائل وهميه وبشر حنفيه وحب جنسى
فعلا البشر كفيل يغير فينا الاصل ويخلق جوانا مخلوق اخر معاكس للاساسى
بغدره وكضبه ونفاقه وشجعه وانانيته
باستخفافه وكره وعباطته
اكيد ما كل البشريه
لكن الطاغى حاليا يطمم البطن والرئه والبنكرياس
نرجع لساعة الصفر
وانتظار الاعلان عن استلام الورق
وجانا زول ناطى فى الطربيزه
والجماعه كلها جريت وقفت حواليه يدافروا
وبدا ينادى بالمايك
فلااااااااااااااااان الفلانى شهادة نجااااااااااااااااح
لحظتها عيونى نطتت
سجمى
الزول دا ماشى ينادى بنجاح وسقوط وبالاسم
قدام الامه دى كلها
وووووووووووب عليه
كيفين يقول رانيه محمد الشيخ شهادة رسووووووووووووووووووووب
امشى وين
واقبل فين
وبديت الكز فى امى
ما بمشى
خلى ينادى ساى
منظرى بيبقى مضحكه للصنفيه السفيه
فى نوع كده يعشق يتمسخر فى الناس لمجرد الفشل
ودا جكس
ومصرى
اولاد بمبه البعرفهم انا
بيجضمونى بالتريقه
ما ماااااااااااااشيه ما ماااااااااااااااااااااااشيه
وهو لزومو شنو يسيح لى كده
ما ينادى بالاسم وخلصنا
فى داعى لشيل الحال
وامى تهدى فينى
يابت روقى
يا بت اسكتى
ولمن نادوا الاسم
ابيت اتحتح صباع من مكانى
قامت امى براها قامت استلمتها
:(((((
لكن يوم العياده للاسف امى ما كانت معاى
لمن مشيت لدكتور نسا وولاده بسبب مرضى
وانحشرت وسط المتزوجين اسجل اسمى واملى الاستماره
ونهائىىىىىىىىى ما توقعت الراجل يحرجنى ويقول لى
اسم زوجك شنوووووووووووو
قولت له اسم زوج منو
وهو يشيل ويلعلعل لى اسم زووووووووووووووووووجك ياخى
رفعت راسى لقيت باقى الرجال منتظرينى اجاوب
غايتو ببحه وفرسه وغيظه قولت له ما معرسه
منها بدوا يضايروا براهم وحسوا بمدى الاحراج الختونى فيه
:(((((((((((((((((((((((((((((

العربيه




مش شكيت وبكيت
دى خلاص وصلت مرحله بديت تتفرتك بدون ما زول يهبشها
ما فهمت نظام تمرد
زعل
ضيق
لكن خليتنى أمنت انا والمعاى والبيعرفنى
المكانيكى زاتوووووووووووووو ما قصر طلع لى قائمة الاصابات الفيها صفحتين لمن حسيت ان العربيه بتحتضر
بدينا بالعجلات وغيرناها
جيه الاستارت قولنا ومالو
قلب حلزونى قولنا بتدلع
مروحة المكنه جابت هبوب قولنا السخانه والحبكانه
انفجرت الطرمبه قولنا من نفسها
اوكرت الباب قولنا من كتر العذاب
دخل فينى موتر فرتك حنان المرايا وطفق الرفرف والصدام قولنا اقدار واحلام
(تفاصيل الحادث بندى ليكم فى ملحق)
جات تكركر قالوا الكونات قولنا نغيرها عشان ما نبقى كريتات
يادابى لى 24 ساعه استلمتها من الورشه بعد سمكروها
وماشيه فى امنة الله
وفجئه تقيف
يا بتى اجى
خجلت زاتو ادق لمنو
واقول شنو
قفلتها براحه وكإن مافى زول شايفنى
وقفت اقرب امجاد وفرتلب سبتها
هى العربات من متين اتعلمت سقاله البشر
تجيها يمين تجيك شمال
تمشى عديل تقلب ورا
تطبطب عليها تنفخك عادم

ما بحكى الحتوته دى عشان اشنع بزول
ولا دايره ادى تفسيرات وتخمينات للكان حاصل شنو واظن فيهم الظنون التسد النفس
ولا عشان اقول ان بناتنا خلاص انحلوا
لان ليسه فى بنات محترمات بكميه كتيره ما بسيطه
لكن فى عينات من البنات بقيت بتتفنن فى الانحلال للاسف
فى مره جيت داخل حمام الفندق عشان اتوضى
وطبعا حمامات الفنادق استايلها معروف
من الباب بتلقى الاحواض والمرايات وبعد دا بتلقى الخنادق
مسمياها كده لانها فعلا خندق
الزول ما فى سكه حتى بفرد يدينه فيها من صغر حجمها
المهم واقفه بتوضى وبعد انتهيت قفلت الحنفيه وبلبس فى الطرحه
يقوم واحد من ابواب الخنادق يفتح
وجات ماره بت من ورا ظهرى
وفتحت الباب التانى عشان تمرق
الفاجعه ان تجى بت مارقه وراها من نفس الخندق لحقاها
طبعا فى مواقف لحظتها بتشك انك مستوعبها ولا انك بديت تخرف
عاينت لباب وعاينت لروحى فى مرايا ومنها عاينت لباب الخندق
ان فعلا مجريات الاحداث دى مضبوطه ولا انا هلوست
وعاينت لابواب الخنادق التانيه لقيت انها فاضيه
ومنها جاتنى ريحة دخاخين سجاير قاتله
ما دايره اقيف فى انهم كانوا بيسوا شنو وليه الاتنين محشورين فى واحد
لكن وقفت ان ليه انا صادفت الموقف دا
وشلت حاجاتى ومرقت وانا بفكر طول اليوم
انا حصل معاى الموقف دا ليه
وفى اخر اليوم جيت تانى الحمام وليسه داخله
فجعتا القى ولد داخل الحمام
وقفت متسمره وهو يبحت فى الاحواض ويقول لى نسيت مفتاحى
ما رديت لان مفتاح شنو البينساه فى حمام السيدات
ومنها لمن كترها قولت له امشى الرسبشن اسئل
وبعديها مرقت عدددددددددددددددددديل على مدير الفندق
وقولت له عندى اقتراح
ان يكون فى زوله حقت نظافه مصنقره فى الحمام طول اليوم
او ايام السيمينارات البتحصل فى صالات الفندق
عشان يكون فى نظام
حسى الولد دا لو جيه انحشر وفى نساء بتتوضى ولا بتعدل هدومها
حيكون الموقف كيف
هو زاتو الشلاقه العليه شنو

يوم تخريجى



كان من الايام المنحوته بعمق فى ذكرياتى
كان الاستعداد له انهك كل قواى الجسديه والعصبيه
عشان اوفر اكبر عدد من بطاقات الدخول لافراد اسرتى وعائلتى
اتمنيت كلللللللللللل الناس تشاركنى لحظتى
وكان المفروض ان لكل طالبه دعو لنفرين
انا كيف قدرت املى حافله فيها 24 نفر وادخلهم التخريج ما عارفه لحسى
لكن اتجننت حتى فى قاسم بدرى عشان الطش كروت
حسيته كانه يوم عرسى حيكون
مشيت الكوافير واصريت اسرح شعرى تسريحه واتمكيج
برغم انى ما كان حصل اصلا اتمكيجت فى حياتى
قوانين الاسره كان تمنع حركات البنات دى
بستغرب حسى فى الفول ميكب المتجدعين بيه دا
حلاوه الجامعه كانت فى نقائها وبساطتها
صحباتى كان بيشيلوا قلم تخطيط الشلاليف دا بالدس تقول جريمه
ولو فى مواعيد كده وكده تلاقى اقصى حدوده قلم التخطيط والكحل
ايام لها رونق
لبست فستان ماما كان مخيطاه لى بنفسها لمناسبه زواج لاحد بنات اهلى
كان عاجبنى شديد وقولت ليها حلبسه مع روب التخريج
واصريت انى اركب الحافله مع اهلى ويزفونى لجامعه كلهم
حسيت انى بتخرج فى اللحظه مليوووووووون مره مع زغريتهم
,.,
نزلونى فى الباب المخصص للخريجات ومشوا هم للباب المخصص للزوار والاهل
دخلت وكان مووووووووووووووولد
والناس جاريه تقول خلاص القيامه حتقوم حسىىىىىىى
قعدت افتش على ناسنا وكليتنا والقسم حقى
نحنا كنا بالحيل 23 فى القسم ما اكتر
حالته محاسبه لكن كانت نسبتنا بسيطه جدا لان دخولها غير انه بمجموع معين من السنين الفاتت انها كانت برضو صعبه فى نظر الاغلبيه
المهم لميت فيهم وكويس لحقت الصوره الجماعيه
النكته ان مافى زول عرفنى
لأساتذتى واستاذاتى
ما صدقوا دا انا
بعيد عنكم بمشى ليهم فى كل سنين جامعتى ببنطلون جينز اتهرى وقال وب الرووووووووووب
وبرطوشه جابت اخيرها الف مره
وقميص بتاع اولاد
فجئه يلقوا قدامهم بنت بلا مقدمات
هم اصلا كانوا شاكين انى عندى شعر فى راسى
لانى كنت يا لابسه طاقيه يا لافه الطرحه
كان احساس جميل من كل الاتجاهات وانا على اعتاب مفترق طرق مهم
اخيرا مافى مذاكره وزرزره حقت امتحانات وقلق حق النتيجه
اخيرا ححس انى كبرت وحشتغل وانطلق فى العالم الخارجى بشغف
حشوف الجنس الاخر اخيرا واتعامل معاه
لان جامعتنا كانت بنات فقط ومدرسه وكل مراحلى ما حصل اختلطت الا ايام الترينج النزلته
15 يوم فى البنك الفرنسى كان برناااااااااااااامج لذيذ
وتانى 15 يوم فى مكتب مراجعه
المهم نرجع للحظه التخريج
بدأت المسيره وتحرك الركب
على نغمات الموسيقى وتهليل الحاضرين وهتاف الاسر والمحبين
كنا بنمشى فى دروب مفروشه بالاحمر تحملنا لاعلى السماوات
رهبه ترتجف لها جفونى
فرحه تمتلىء بها عيونى
لحظه احسستنى انى سندريلا
ينظر الكل لها مبتسم
يتشوق لطلة من عينها
وجيت ماره بجانب اخوانى
ولمحت هذا الشعور الغريب
فبرغم انهم اخوانى
كانت نظرتهم تحمل عيون ابى
بسمته
فرحته
فخره
لكونى ابنته
وكونه ابى
تجسد فيهم بكل قواه وحبه
ليجعلنى اراه فيهم
تمنيت ان انتزع نفسى من الموكب
لارتمى فى احضانهم
اشكرهم على صبرهم
على تحملهم مسئوليتنى بعد فراق ابينا
ومنها وجدت نفسى بجانب امى وعائلتى
وسمعت اسمى يعلوا هتافا من ابناء اسرتى
تجمد الوجود هذه اللحظه
فى عين ست الكل امى
لا تفسر ولا تشرح ولا تحلل
انها امى
وانا ابنتها
واليوم تخرجى
هل لهذا اللحظه حديث
أشك فى ذلك
,.,.
لا اعلم كيف وصلت موقعى فى الجلوس بعد كل هذا
كأن الملائكه كانت تزفنا لنعلو بجمال هذه اللحظه
و كنت مرعوبه من لحظة حسماع اسمى فى المايك
وكيف حتمالك نفسى وتتماسك قدمى لتنزل امام هذه الملايين لاعتلى المنصه واستلم شهادتى
وجاءت اللحظه
وانتهيت
كيف مافى زول يسئلنى
:))))))))))))))))))))))))))))))))))))))))))))))))

لمن نزلت من العربيه وعيونى بيطاير منها الشرار
ولقيته هو التانى نزل من عربيته وعايز يبدى معاى المناطحه
بادرته بالهجووووووووووم
ما شايفنىىىىىىىىىىىىىىىىىىىىىىىىىىىىىىىىىىىىىىىىىىىىى ىىىىى بلللللللللللللللللللللللللف
بتزززززززززززنق العربيييييييييييييييييييييييييييييييييه ليييييييييييييييييييييييييييييييييييه
قام بالامووووووووووووشن البطىء
فتح خشمه للرد
وقال لى
يـــــــــــــــــــــــــــــــــــــــــــــــا خاله
باقى الحوار ما قدرت اسمعه من الدخاخين المرقت من اضانى

قعدت اتلفت يمين شمال
الخاله دى واقفه وين البيتكلم معاه جنبى وفى اتجاهى
وتانى رجعت عاينت له لتأكيد ان الحوار موجه لى
ومنها اتمنيت انى اثبته واقول له
شوف
موضوع العربيه الاطفجت دا خليه
وانك ما بتعرف تسوق انساه
وانك كنت مصر تنحشر عشان تفطتى ما موضوعنا
خاله دى منووووووووووووووووووووووووووو الانت قاصده
عمياااااااااااااااااان كمان
ولا ما بتعرف تميز المودموزيلات من المدامات من الخالات من الحبوبااااااااااااااااااااااااااااات
غايتو الناس كان بدل ضربت لمرور كان ضربوا لنجده والاسعاف

هههههههههههه

غايتو يارانية عندك طريقة في الحكي اصلو ماسبقك عليها زول

كدى تمي موضوع التخريج ده ... ماعارف لييه متخيلك وقعتي وانتي بتطلعي في المسرح :)

غايتو يا خالد
فى حاجات كده بيحصل لينا فيها اغماء مستيقظ
يعنى بنكون ماشيين ونحنا غمرانيين
بنعيشها بلا وعى
عشان كده ما بنتذكرها
يعنى لحسى حاولت اعصر الجمجمه واتذكر الحصل شنو لمن نادوا الاسم
وكيف نزلت من المدرج
ومشيت لحد قاسم بدرى
وسلمت عليه
ومسكت الشهاده
وجيت راجعه
البتذكره كواريك اولاد اهلى باسمى
وان الشهاده ما كانت باسمى لان حصل لخبطه وبقوا يمشوا فينا ساى
يدونا ليها من هنا ويلحفوها منا بهناك
ههههههههههههههههههههههههه
غايتو براميل البيزيانوس كانت عجيبه
اهلى شربوا لمن لونهم بقى دموى
كان تخريج فاخر وتانى يوم الحفله بسامى المغربى
اييييييييييييييييييييييييييييييييييييييييي هججنا لطيش
وفى ليله غابره بعد اسبوع من تخرجى صحانى اخويه الساعه 2 بليل
وقال لى الحقينى على الصالون
لفحت السفنجه وجريت وراه
لقيته مولع النجفه الفى نص الصالون وخاتى ورق فى الطاوله
قولت له خير فى شنو
قال لى بكره حتمشى تسوى كده وكده وكده
بقيت اعاين له وبستوعب
كنت ليسه ما فكرت اشتغل ولا انوم فى بيتنا
اخويه دفسنى معاهم فى الشغل من قولت تيت ولحسى انا داعسه التيت
:)))))))))))))))))

غايتو فى مره دقست دقسه
ودا كله بسبب الجهل الثقافى السودانى البعانى منو
وصلت شارع 61 ودخلت باتجاه السوق الشعبى
كان عندى شغله بهناك
وبعد قضيتها ومستعجله احصل تسليم عطاء باقى عليه ساعه
والمفروض فى الساعه دى ارجع المكتب واتمم باقى الورق ونلصقه بالشمع الاحمر عشان جرى اطير الصحافه اخته فى صندوق العطاءات
قوم ايه بقى
اتفالح واقول اختصر الشوارع عشان اصل سريع
وياها الاختصارات
من زقاق لزقاق
ومن شارع فرعى لفرعى
القى روحى فى خبر كان
وما عارفه زاتو الحته الفيها دى شنو
قومت اتصلت بزملاء العمل
بعد ما قعدوا يضحكوا فينى عشان تايه
قالوا لى حاولى اعرفى انتى وين
اها اول يافطه وقعت فى عينى وقريتها كانت محى الدين اركويت
قولت هيا دىىىىىىىىىىىى اكيد
اسم المنطقه
:)))
واتفاجىئ بالضحك بيزيد
وواحد فيهم قال لى يا فالحه اليافطه دى ملصقه فى اى مكان
بالمناتله وسك الركشات عشان اسئل
اكتشفت انى فى الصحافه حايمه
غايتو يمين فى شمال وصلت المينا البرى
ومنها قدرت اعرف دربى
لكن الضحكنى وانا قريب المكتب
لمحت يافطه فيها برضو
محى الدين اركويت
ولمن دققت لقيت كلمة فنان
حسيت بمنظرى قدام الموظفين كان قمة فى العباطه لمن قولت جملتى دى وانا فاكره روحى نبيه بإكتشافى لذره
غايتو يا محى الدين تانى اصلوا ما بنساك

رانيه ....

صباحاتك فرايحيه .....


كعهدنا بك كتابه بطعم السكر .... وما عايز اقول السفرجل تقوم وضاحه تنط لي في بطني ....السفرجل ده زاتو شنو ... وطعمو كيف ... يسألني الله ما عارفو ....



بصراحه سرد شيق للغايه ...فأنت نعرفين كيف تلملمين أطراف الحكي الطاعم فتجعلين قارئك يمضي معك حتى آخر حرف .....


إن شاء الله تسلمي ياخ .....


ومشتاقين كتييير يا خاله ..... ههههههههههه ......

ادريس
صباحك منقه يا روعه
بيسعدنى جدا انى احس لحروفى اهميه وتأثير وصدى حتى لو ضحكه
وردك حفزنى انى اسرد المزيد
نحنا مشتاقين بالاكتر يكن خاله دى ما تفكرنننننننننننننننيش بيها
لحسى بترن فى اضانى
:)))))))))))))))))))))))))))))))))))

دايما بنحرص نصور اللقطات السعيده
واللقطات الحزينه دايما بتكون منحوته فى القلب
منظر برغم كنت جزء منه كنت حاسه انى بعاين من بعيد وبتفرج فيه
وانى شايفه روحى فى نصه
صباح وفاة والدى وحضور حبوبتى لشقتنا ورجائها لامى ان البكى يكون فى بيتها
كان الجو باااااااااااااااااااااااااارد
ما عرفت عشان الشتا ولا عشان الرعب الحاسه بيه
ما كنت ليسه مستوعبه انى ابويه اتوفى وكان عمرى 16 سنه
ونزلنا من شقتنا وامى مسكانى بقوه شديده لمن مألمه يدى وما قادره اقول ليها براحه
الفيها كان مكفيها
وضامه اختى الكبيره عليها لانها كانت بترجف ومنهاره
اخوانى كانوا ورانا وساكتين سكوت صارخ
وحبوبتى وجيرانها محوطينا
كانهم زفينا لكن لوين ما عرفت
كنا ماشيين بخطوات حسيت بيها زى التصوير البطيىء
ماشيين لوين ولشنو ولمنو
من بعيد البيت مليان بشر بتبكى
ما بعرفهم
دخلنا وقعدنا فى السرير وامى بديت تعزىىىىىىىىىىىىىىىىىىىىىىىىىى بكل مافيها من حزن
واختى مرميه فى رجولها بتناغم فيها
اخوانى طلعوا مع الرجال لان عربة الاسعاف الجابت الجثمان من المستشفى منتظراهم يمشوا بيها المقابر
برغم النسوان طلعت تودعه
ما مرقت
امى ثبتتنا
وابيت تمرق هى ذاتها
كانت بتمسك فينا وتصرخ بكلام ما فهماه لان بالى كان مزحووووووووووووووم
افهم وافسر واحلل واقول متين حصحى من الكابوس المفزع دااااااااااااااااااااااااااا وارجع بيتنا وانوووووووم
كنت عايزه انوم
اتحشر فى بطانيتى وانووووووووووووووووووووووووووووووووووووووووووووووووووووم

ما كان اول فراق
لكن كان اخر فراق
لان لمن جينا من الكويت 1989
فارقنا روحه بهناك الذبحوها الخليجين بدون رحمه ولا شفقه
مسكوا بكل عزيمه فيهم وانتزعوا منه رووووووووووحه ورجعوا جسد بينازع المرض فى كل حته فيه
دهسوا بضغيانهم وجبروتهم وظلمهم عليه
لكن ربنا يُمٍهل ولا يُهٍمل
اظن دعوات امى فيهم جابت اخرتهم بعد سنه فى حرب الخليج
كان فاكرين انهم دايمين ومافى زول بيقدر عليهم
نسوا ان الله كبير وقادر على كل زول
وان دعوة المظلوم بتستجاب
لكن هو ما قدر يسترد روحه
كانت الطعنه اقوى من قوته وتحمله
شقى 25 سنه يضيع بجرة قلم
ويرجع للصفر
مع صحته الاتسلبت منه فى غربه عاشها كرمانا وعشان يوفر لينا فيها حياه كريمه
ما قدر
برك
ومهما حاولنا نرفع ما قدرنا
نظرته كانت بتفيض حزن
صوته كان بيإن ألم
خصوصا لمن الحواليك ما يحسوا بيك
ويشمتوا فيك
ويفرحوا انك وقعت
استحمل الشعور دا ست سنين وكان بيضخم يوم ورا يوم
لمن تعب وفارق الحياه
حياه اثبتت جدارتها معانا
ان اللى يعيش فيها يا يكون قدرها يا يرحل منها
حياه غلبتنا نعيشها بهدوء
حياه اصريت تربى لينا مخالب ننهش بيها
عشان نقدر نستمر فيها

سلام يا رانيه .........

Quote: فارقنا روحه بهناك الذبحوها الخليجين بدون رحمه ولا شفقه

له الرحمة والمغفرة ..

Quote: مصطلحات كتيره

عايزة شرح ...
الكلام السوداني المحكي يقال وقليل من يكتب به .
وبقول ليك ماتصبُونيٍ كما المطر ......

ليك التحية ...

تسلم يا سامى
ربنا يرحم جميع موتانا
وبالنسبه لمصطلحات بالجد قريت الكتبته اكتر من مرتين وبرضو ما قدرت افهمها
لكن زى ما قولت ليك عرفت الخلاصه
لغتنا مفروض يعملوا ليها معجم عدددددددديل
:)))

كنت لابسه البرباطوز الكوربرايت الاحمريكا
ورسلتنى امى اجيب العيش
واااااااااااااااخ انا من العيش ومشوار العيش وبرنامج العيش
كرمان المقوله حقت صغير القوم خادمه اتنجضته انا بالعيش دا وجيبه
وكنت بتفرس شديد انى الوحيده الاصحى ابدر من الفى البيت عشان العيش
نزلت السلالم نطيط كالعاده
كل خمس سلمات بنطه
وحالتى كنت ممتحنه شهاده لتانى مره بتفوق :)
وكان باقى لينا اسبوع نجى السودان لاول ممممممممممممره
قولت خلاص دى تبقى اخر مشوره للعيش
منطقتنا جميله اسمها المنتزه
من البلكونه بنشوف قصر المنتزه
لكن لمن تبدا تمشى فيها عكس
بتدخل بقى الحارات والاماكن الافضل من العشوائيه كده بدرجتين ونص وشرطه
والمخبز غاطس بجوا شديد وفى شارع كده زى الادغال
بيشبهنى بالملاحه
الحشائش اضخم من البشريه
برغم ان الحكايه فيها وساطات وتسهيلات لكن برضو كنت بتزمر وبتصرصر فى المشوار
كنت بمشى دكان فاتح فى المخبز تابع لزول صاحب ابويه الله يرحمه
وكان بيرسل هو الولد الفى الدكان يجيب لى العيش من المخبز وانا اقعد مصنقره فى الدكان انتظارا لرجوعه
جاب لى الكيسين المعتادين وشكرتهم وشتت
المشوار مفروض ربع ساعه الا روحه
وربع ساعه الا جيه
والانتظار لا يتعدى الدقايق يعنى مفروض كده نص ساعه ترجعنى البيت
لكن المره دى كانت فريده فى نوعها
وكنت خلاص بديت اشوف عمارتنا الفيها شقتنا
لأتفاجئ بيه واقف قدامى بجاكيت جلد اسووووووووووووووووووود بيلمع

كان نظيف وباين عليه ود ناس
الشعر مسبسبه وشاب عمره فى اواخر العشرينات
سئلنى عن مكان مخبز
شاورت له فى اتجاه المكان الجايه منو
قام قال لى دى زحمه مافى واحد تانى
قولت له فى الزلط واحد افرنجى بيكون فاضى
قال لى وين بالضبط
قولت له انا ماشيه الاتجاه دا تعال وحوريك له
ومع اول خطوتين وقف قدامى وطلع بطاقه لصقها لى قدام عيونى
وقال لى انا الضابط فلان الفلانى
طبعا ما شوفت شى لان عينى كان احولت من البطاقه
وقال لى فى المخبز الكنتى فيه حصلت عمليه سرقه
سلسله لطفله صغيره حقت زول مهم شديد
ونحنا بهدوء وسريه بنحاول نعرف الحصل
وانت باين عليكى بت ناس
لكن مجبورين نجيب اى زول كان بهناك
عشان تشوفوا الطفله وتقول دا هو ولا ما هو
فامشى معاى
ولمن بدى يتحرك انا كنت ما نطقت حتى بنفس
قطعت وصله وحركه ونفس واحساس ومخ
وبعد مسافه التفت لقانى متجمده وعيونى منططه
قال لى يالا ما تخافى هى بس حتشوفك وتقول ما انتى وترجعى
ما حيحصل شى
بديت اتحرك وما حاسه
وماشيه وراه
وفاصل بينا قريب حجم ركشه
وبدا يقول لى ما تفزعى وتصوتى تقولى انا ضابط
لان فى الحى دا مش بيحيوا الضباط
بديت لحظتها افكر
انا اصلا ما وقفت فى المخبز
واصلا اذا البنت اهلها مهمين كده شنو الجابها مخبز جعان كده
الحكايه ما راكبه عدلها
ويقول لى وانا فى لحظة تفاكرى دى وانسياقى الغبى وراه
حنطلع الشقه وتشوفك والموضوع بينتهى سريع
فى نطلع الشقه دى شعراتى وقفوا سيف
شقه
ونطلع
ياهو الواطاتى اصببببببببببببببببببببببحت

غايتو حردانه ما بكمل ليكم باقى الحتوته
:(((((((((((((((((

كرمااااااان تعليق دفع الله من الفيسبوك حنواصل برغم انى زعلانه منكم

Quote: كرمااااااان تعليق دفع الله من الفيسبوك حنواصل برغم انى زعلانه منكم

بالجد متابعين
والله وبمزاج
ما عاش اليزعل هذا القلم

سرد مندفع

ومفعم بالاكسجين

بيدخل جوا المسام ويدهشك

واصلى من غير زعل

______
ابوالشوش

رانية إزيك ياخي وكتابة لاشك بتاخد الزول من نقيض لي نقيض

لأنها من القلب بتصل للقلب

الله يرحم الوالد وينور قبرو....

ليت الحياة كما نتمنى ...

كملي ياخي وبطلي غتاتة... سودانيز ما بتاع الأعضاء وبس... في ناس من منازلهم :)

أبو الشوش ومصعب
تسلموا يا غاليين على ردودكم المحفزه
غايتو مودى طلع من القصص واتشبك فى الشكله الفى البوست التانى
وعشان ما اكروت ساى باقى الحتوته
بكره بعدل المود عليه وبجى من الصباح اكملها يا بالمسى كان استعدل المود بجى كاتحه طوالى فيها
:))))
لكن البوست مفتوووووووح لمشاركاتكم
معقول يعنى انا من البشريه كلها وسامى معاى المريت علينا اوقات عصيبه
:)))))))))))))))))))))))))))

بديت احاول استكشف انا فى ياتو شارع
لانه دخلنى بزقايق ما عرفاها
مسكت اكياس العيش سمح
وقولت لازم اقوى قلبى
الخوف حسى ما حينفعنى
وخيرا لنا المووووووووووووت ونحن نقاااااااااااااتل بدل اموت رعب فى روحى
وفجئه ظهرت لى مدرسه بعرف درب بيتنا منها
ووقفت قدامها متسمره
قام التفت لى وقال لى مالك وقفتى
قولت له او بالاصح بديت اكوووووووورك فيه واقول
شووووووووووووووووووووووف من هنا مش متحتحه انا
عندك بنت جيبهااااااااااااااا هنااااااااااااااااااااااااااااااااا تشوفنى
غير كده مش مااااااااااااااااااااااااااااااااااااااشيه خطوووووووووووووووووووووووووووووه
غايتو انا بكورك وقلبى داير يقيف ودموعى دايره تفط من الرعب
لمن لقانى بديت اجن فيه طوالى بدى يسكت فينى ويقول لى خلاص خلاااااص
باين عليكى بت ناااااااااااااااااااااااااس
ومشى وخلانى هوووووووووووووووو
بقيت ما مصدقه
وحيلى مات عديييييييييييييييييييييل
وقربت ابرك فى الواطه
لكن قولت انا اتاخرت شديد على البيت
امى بتكون اكيد واقفه لى فى بلكونه
واخدتها جرى باكياس العيش
ودموعى بتطاير زى ناس الكرتون
وفعلا لقيتها هى واخويه واقفين لى فى بلكونه
وعيونها دايره تنط تجينى
طلعت السلالم طايره وفى اول كرسى اتردمت
ابكى واحكى
واخويه وامى محنطين قدامى بالخلعه
ما قدروا حتى يعلقوا لى
ومن يومتها كان باقى على سفرنا اسبوع ونرجع السودان
ما طلعت من بيتنا براى بتاتا
وكل مره افكر
حسى لو كنت طلعت
كان حصل شنووووووووووووووو

Quote: كان نظيف وباين عليه ود ناس الشعر مسبسبه وشاب عمره فى اواخر العشرينات سئلنى عن مكان مخبز شاورت له فى اتجاه المكان الجايه منو قام قال لى دى زحمه مافى واحد تانى قولت له فى الزلط واحد افرنجى بيكون فاضى قال لى وين بالضبط قولت له انا ماشيه الاتجاه دا تعال وحوريك له ومع اول خطوتين وقف قدامى وطلع بطاقه لصقها لى قدام عيونى وقال لى انا الضابط فلان الفلانى طبعا ما شوفت شى لان عينى كان احولت من البطاقه وقال لى فى المخبز الكنتى فيه حصلت عمليه سرقه سلسله لطفله صغيره حقت زول مهم شديد ونحنا بهدوء وسريه بنحاول نعرف الحصل وانت باين عليكى بت ناس لكن مجبورين نجيب اى زول كان بهناك عشان تشوفوا الطفله وتقول دا هو ولا ما هو فامشى معاى

حكت لى زميلة عمل كانت وقتها فى مثل عمرك و أنتى برسلوك للعيش
و تقضى أجازة مع أسرتها فى القاهرة و نزلت من الشقة و وقفت أمام باب العمارة
تتفرج فى المارة و كانت تلبس 4 غوائش ذهب خالص فى يدها بنفس السيناريو
جاءها رجل و قال ليها الغوائش دى مش بتاعتك أنتى سارقاهم أنا ح أخذك لقسم
الشرطة و مسكها من يدها و بدت تبكى و أسرتها فى الطابق الثالث سبحان الله
قبل أن يخطو بها خطوات ظهر حارس العمارة كان عائد من مشوار صاح فيه
ما كان من اللص ألا أن تركها و هرب ...
قلت لها لو ما حارس العمارة كان انتى فى خبر كان
قالت لى كان زمانى رقاصه فى أكبر كباريه ...

ازيك يا على
كان فعلا فى فتره اشتهر فيها اختفاء البنات الفى المدرسه فى مصر
غايتو ربنا فعلا البيحرس وبيصون

الموضوعين شكلهم حكى فى حكى
نواصل فى دا ولا دا
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
دو يو بولوبيف على قول اللمبى :))))

امس اضطرتنى الظروف اقيل فى حوادث مستشفى أسيا
ام مرة اخويه تعبت وكنا مرافقين ليها
مرات بحتار اعرف الخلل وين فى حياتنا وممارساتنا
وهل فعلا فى مكان اخر حنلقى عنايه افضل ولا اسوء
ولا اصلا الحاصل صحيح ولا خطىء
صعب نحكم على شى ونحنا بدون درايه كافيه عنه
وهل الانسان بعد فتره طويله من التواجد فى مكان معين بيفقد همته وانسانيته وعاطفته والاحساس بوظيفته ليتعامل بيها على انها مجرد وظيفه واداء واجب
ممكن فى صلاتنا نبدأ نفقد احساسنا الداخلى بيها
ونصلى بركوع وسجود وتلاوه وما نحس باى شعور غير اداء الفريضه والواجب
وهل دا غلطتنا ولا غلط دواخلنا ولا غلط المحيط ولا غلط منو
هل الدكتور ملزم يتعامل بتعاطف مع المريض ليهون عليه ألمه وقلقه وخوفه ويطمنه
ولا مفروض يكون حازم وقاسى وغير قابل لتفاوض والاجابه
كتير نحنا بنتمنى المستحيل
وبقينا غير قادرين على تمييز المفروض يحصل والبنتمناه يحصل وبنظلم بكده الكتير ومرات بيظلمنا الكثير بكده
الحصل امس ما عارفه اوصفه كيف
لكن حاسه ان فيه اشياء ما صحيحه
وهو مجرد شعور نابع من امنيتى بالافضل المستحيل ولا فعلا الحصل كان ممكن يكون فى افضل منو
التلفزيونات برضو دمرت فهمنا شديد فى ان كتير بنتمنى البيحصل فيه على ارض الواقع
وبننسى ان دا تمثيل مكلف مبالغ خرافيه ليكون بهذه الجوده والروعه
,,,,
لنا عوده فمازال للحديث بقيه

فى احداث كتير مريت عليه حسيت ان القسوه فيها صح والتعاطف غلط
وخصوصا فى الشغل الخيرى فى مره كنا بنوزع ملبوسات هديه وطلب مدير المنظمه البتعامل معاه كل ام تحضر اطفالها معاها لاخذ المقاسات وتسليم الملبوسات
جات ام وقدامها عدد من الاطفال وبعد ادينا الموجودين قالت ولدها الكبير بيلعب بره وعايزه له لبسه
انا كنت بديت أمد يدى عشان اناولها وتفاجئة برفض المدير والتوضيح بصرامه انه نبهه على حضور الاطفال شخصيا وقام باخراج الاسره وقال لى انا فاهمهم كويس ما عندها ولد كبير بره
عيالها الجو قدامنا ديل
بالجد مرات المحتاجين بيستغلوا حوجتهم وتعاطف البعض لمصلحتهم بطريقه استفزازيه
حتى ان فى اطفال اتعلمت الحاجه دى وبقيت تخلينى مشوشه فى تعاملاتى ان تعاطفى حيكون صح ولا خطىء
فى رحله من الرحلات اخدنا بعض اطفال المايقوما لملاهى وكانت المشرفات بعيدين من مراقبة الاطفال وجلسوا فى ركن هادى
وبقيت انا وبنت اهلى بنتابع فيهم وبنركبهم وبنشرف عليهم
بعض الاطفال اوضحت ان الاشياء البتجى ليهم ما بيتم اعطائها ليهم
ولصراحه لا قدرت اصدق لا قدرت اكضب
هل فعلا دا بيحصل ولا ما بيحصل
بعض الاطفال بقوا بيتعمدوا استغلال تعاطف الشخص الجاى للمساعده وتصريحهم بان حقوقهم مهضومه بتخلى يقدم الكثير ليهم شخصيا وليس لمشرفين
وبعض المشرفين بيستغلوا الاشياء البيتم تقديمها للاطفال والاستحواز عليها شخصيا وانا دى لقيتنى فى بعض المشرفين فعليا ربنا يهديهم
ودا بيخلى التعامل مرهق فكريا اننا نعرف متين نبقى قاسيين ومتين عاطفيين ومتين دبلوماسيين
فى الرحله دى ونحنا راجعن خلاص اشترينا العاب ووزعناها ليهم وهم فى الهايس
المشرفات اعلنوا استنكارهم من التصرف وان مفروض نسلمها ليهم هم شخصيا وما فهمت ليه
هل فى اشياء خفيه نحنا بنجهلها وعشان كده ممكن يكون ليهم حق فى استنكارهم
ولا تصريح الاطفال صحيح وبيتم عدم اعطائهم الهدايا
دا كله جاط فى راسى مع احداث امس
لان حتى فى داخل بيوتنا بنعانى من الشى دا
لمن الام بتحتاح تكون قاسيه فى نقاط معينه وتشد على الاطفال بعنف وتجى الحبوبه تنهرها بانها متحامله واستغلال الاطفال لشى دا
مرات بتكون فعلا الام قاسيه ومرات الحبوبه عاطفيه زياده عن اللزوم وفى اطفال بيقدروا يستغلوا الاوضاع دى كويس وفى اطفال بتبقى مغلوبه على امرها

كيف نقدر نميز ان الشخص دا فعلا سلوكه صحيح والموقف بيستدعى الصرامه والحزم ولا كان مفروض يتعامل بعاطفه اكتر ومرونه اكتر

نسيبة اخويه بتعانى من الغضروف فى الرقبه
دا على حسب كلام الدكاتره السابقه
وعشان الوجع بقى لا يطاق جينا حوادث اسيا
انا لصراحه كنت فى مكتب ولمن اتصلوا عليه لحقتهم بهناك
مرة اخويه زوله واجب وحاره واصلا ما بتقصر
فما بنقدر نقصر وبرغم الانسان ما بيكون عارف هو ماشى يسوى شنو
لكن التواجد لدعم النفسى برضو مهم فى الظروف دى
واننا نكون جنب بعض
فكرة الزول يقول ماشى اسوى ليهم شنو
فكره معاقه ومشلوله ومرفوضه
الانسان يعمل العليه فى حدود المسموح والمقبول
كمان ما نبقى لصقه زى ناس بتعتبر دى ياها الحنيه والواجب
كتمت نفس لمن المريض يكره المرض
اول ما جينا السودان فكرة الناس البتجى هاجمه طوالى دى وبتلقاها فوق راسك وانت نايم ما كانت واقعه لى
وكانت بتزعلنى شدددددددددددددددديد
يعنى البيوت ليها حرمه وخصوصيه وقدسيه
والزيارات ليها مواعيد واستأذان
الالتزام بالصح ما معناه جفا وطغيان وتكبر
غايتو نرجع لمستشفى قبال نسرح فى النقطه دى
بتاع الباب كان رافض يدخلنى ولمن شافنى بعاين شرزا وبنهر فيه ياخى بقوليك امى جابوها الحوادث تقولى ما ادخل
غايتو خاف منى وبعد دخلنى جيه اشتكانى لجماعه انى ما اديته فرصه لتفاهم العقلانى
من الألم الدكتور كتب لينا روشته لحقنه
طلعوا يفتشوا عليها ومالقينها
وخالتو نجاة تعبانه ومتالمه
قالوا لى امشى لدكتور قولى له يكتب على حقنه تانيه متوفره بنفس المفعول
قام قال لى طيب شوفيها فوق وانا بتصل بيهم
طيب اذا هىىىىىىىىىىىىىىىى من الاول موجوده فوق محومينا ببره فى الشوارع لشنو
طلعت جبتها ونزلت
وجو ادوها ليها
وبعد دقايق عينا ما تشوف الا النور
خالتو نجاة ما قادره تتنفس وتشيل وتستفرغ
بقينا ننادى زول يسعفنا
مافى زول هببنا
لحظتها انا شخصيا ما كنت عارفه ان فى حاله تانيه حرجه ف نفس اللحظه
لمن اصواتنا عليت بالكواريك جانا الدكتور جارى وبدى يحاول يديها حقنه فى الوريد
لكن الجسم ورم والعروق طشيت والضغط انخفض
شكل الحقنه ما نفعت معاها وعندها حساسيه منها وقالوا فى العاده دى ما بتحصل ابدا
الحقنه دى عاديه مسكن للالم ودى حالة نادره فيها
ختوا ليها الاكسجين وبقينا بنتصبر الحاله تستقر
ونسينا اصلا موضوع الغضروف والالم وبقينا فى الحساسيه
وجبنا حبوب لان اصلا الحقنه مالقوا ليها وريد وادوها فى العضل
غايتو بعد ساعه كانت الحاله نحمدالله استقريت
لكن قبال الساعه وفى نفس التوقيت بعد روقنا حبه من خالتو نجاة
سمعت صوت بكا
جيت طالعه من الستاره
لقيت الجماعه التانيين زولتهم ماتت
والناس بين الدهشه والفزعه والخلعه
انا زاتو عيونى بقيت منططه ومخلوعه
جات بتها الرسلوها تجيب حاجه
ولمن لقيت البكى بديت تكورك لا ما تقولوا لى ما تقولوا لىىىىى
الله يصبرهم ويصبر جميع عباده ويرحم جميع موتانا
الموت حار والفراق صعب واللحظه دى قاسيه
وبتحس انك مشلول وفى نفس التوقيت عايز تنتفض
جرونى دخلونى بجوا عشان لقونى محنطه قدام الناس
الاستغربت فيه ردة فعل الدكاتره
وهل طبيعى بعد اى وفاة وعشان كتر الوفيات
بيعتبروا الشى دا عادى
وبيمارسوا الدقيقه البعديها بكل استرخاء
هل مفروض عليهم يحزنوا ويتأثروا
ولا مفروض يتخطوها بهذا القدر من الامبالاه
دا الشى الحيرنى
دا انا المالى فى التورولا الطحين
حسيت بروحى متحسسه ومتألمه وخجلانه من شنو ما عارفه
اى هم ماليهم ذنب فى وفاتها
والموت علينا حق
لكن تأثرنا بالمواقف دى هل بيكون بالجمود دا
؟؟؟؟؟؟؟؟؟؟

مع الاغنيه دى نفوستى مبرطشه شديد ولو بديت احكى بالمود دا بفجر الشاشه
لانها قلبت عليه مووووووووووووووووواجع بركانيه كتيره
الغريبه فى الاوجاع
فى اوجاع قدريه ما بتألم
لكنها بتحزن
وفى فرق كبير بين الحزن والألم
بعتقد انى بتألم لمن بتسبب بنفسى فى الجرح لانى سمحت لانسان يجرحنى
لكن الحزن بيكون على احداث قدريه ربنا قسمها لينا ولجهلنا بخيرها بنحزن لفشلنا فيها او لحدوثها
اخ انااااااااااااااااااااااااااااااااااااااااا
غايتو حسى كان شلت كلاشنكوف بمشى ارصص لى كميه بشريه خرافيه عشان افشى ألمى دا
مرات بحاول افكر هل فعلا هم مساكين وليه الحصل حصل
كتير بحاول استشف الفائده من الجرح والقسوه
وكترتها كده ليه
يعنى ما مره ولا اتنين ولا خمسين ولا مليون ولا بليون
شى فعلا عجيب
هل ممكن نكون نحنا زيهم وما حاسيين عشان كده حاصل معانا كده
اكيد فى خلل ما قادره اكتشفه
عمر التعامل بمصداقيه ووضوح غلط
وعمر الشعور بالحب والثقه غلط
وعمر السعى للبنتمناه غلط
يبقى ليه النتيجه دايما طعنه فى الصميم
اللهم لا نسئلك رد القضاء ولكن نسئلك اللطف فيه

غير مسموح بأن أعترض بقضاء الله وقدره
وغير مسموح بأن انسحب من حياه أنعم بيها الله عليه
وحين يمتلىء الكأس لا أجد منفذ غير ربى
فهو الرحيم والرحمن
فى لقائه والرجوع إليه نهاية الاحزان
وحين لا يأتى هذا الأوان نستمر فى الهوان
فى حياه فقدت كل ما فيها من احلام
حتى الصغير اصبحت ارى فى عينه اليأس والإستسلام
......
المدهش فى الحياه حين تأتى لحظة سعيده نحاول ان نطيل زمانها بكل الطرق
لثقتنا ان ما يليها سوف يسحقنا
لم اتوقع ان نسحق ومازالت اثار البسمه على الشفاه
كنا مازلنا نرى فى مخيلتنا لقطات هذه السعاده التى جمعتنا فى عيد الام
بما تبقوا لنا فى عائلتنا من امهات لنشعر بأن حوائطنا مازالت تسترنا وتدفئنا وتحمينها وتسندنا
كان تجمع يفوق الخيال وخصوصا لحظة اطفاء الشمعه حين قرر جميع المتواجدين الغناء لهم
امى يا اعظم كلمه بقوله
يا احلى نشيد يانغمه جميله
امى جناح من رحمه ونور
امى حنان وامل وشعور
امى حنينه وامى كريمه
حنانه علينا ونور عينينا
بتربينا وبتراعينا وتحلم بينا
تخلى حياتنا تملى جميله
واحلى نشيد نقولو نرددو يوم عيد الام

يتبع

سارعت الساعات على الزوال برغم كل محاولاتنا لتثبيتها
وحان اوان الذهاب لجميع
وكل خطوه نخطوها فى الابتعاد لم تكن فى حسباننا انها الوداع
ومع ركوب الجميع العربات ناديتنى خالتى رحمها الله
واقتربت منها واحتضنتها لاستطيع سماع كلامها
وطلبت منى احضار امى غدا ليها لقضاء سهرة الخميس سويا كعادتنا
فهى دائما الملاذ لامى حين تضيق نفسها بالألم والانزعاج
لم تكن اختها بقدر ما كانت ام لها
لم نكن نغيب ابدا عن التواجد معاها فى اى مكان واى مناسبه
بخلاف باقى العائله
كانت بئر الصبر الذى نرتوى منو لمجرد رؤياها
كانت مصدر القوه التى نستمد منه الطاقه لصمود
كانت امى وامها وام العائله كلها
الكل كان يسارع لرضاها واسعادها وسماعها والحديث اليها
الله يرحمك يا غاليه
فلقد كسرتى بفارقك ساسنا وراسنا

اكيد جهلنا بالغيب رحمه
فلو كنا نعلم ما فيه لمتنا حزنا قبل تلاقيه
لمن قررت امى الخروج لمشاوير معينه كنت ما متحمسه شديد ومصابه بحاله من الانهاك الغريب وعدم الرغبه لاى شى
لكن ارضاء ليها لملمت احاسيسى وبديت افتش على اى شى البسه
ولمن طلعنا ووصلنا سوق قريب من بيت خالتى لشراء احتياجات البيت الاسبوعيه
رن تليفونى وانا قاعده فى العربيه راجيه امى الله يديها العافيه ويصبرها
كان المتصل زوجة خالى قالت لى مباشرتا امك جنبك
قولت ليها لا انا قاعده براى فى العربيه خير فى شنو
قالت لى عايزين نمرة الاسعاف سريع خالتك ليلى وقعت ولو فى طريقه الحقوهم
لحظتها بديت مرحله فى حياتنا غريبه لحد الوقت الحالى ما قادره استوعبها فعليا
نزلت من العربيه وما كنت حاسه بروحى وانا بكورك عايزه نمرة الاسعاف عايزه نمرة الاسعاف
وبديت اتصل باخويه واقول له الحق ناس خالتى عايزين الاسعاف سريع
التليفونات بديت تطاقش شرق وغرب واحساس ربنا لا يروى لا لعدو ولا لحبيب
وسريع بديت ادفر فى امى للعربيه وهى ما فاهما حاجه واقول ليها نمشى بيت خالتى قالوا عايزينا ضرورى
الزول فى التوقيت دا بيكون بيعمل فى حاجات لا اراديا
سوقت العربيه كيف
وكنت طايره بيها كيف
وامى تقول لى انت كده حتقتلينا قبال نعرف الحاصل شنو
ووصلنا
ودخلنا
واول ما لقيت بتها تقول لى ارح نوديها المستشفى امى غمرانه ومسكتنى وجريتنى ليها
وقفت قدامها فعليا انا ما شايفه وشايفه
هى نايمه ولا غمرانه ولا انا اصلا وين
والحاصل دا شنو
قام ود خالتى جرانى وقال لى الموضوع انتهى
وبنت خالتى مصر تقول لى نوديها الدكتور ارح نشيلها
قومت جريت لامى وجريتها لخالتى تشوفها
احتمال تصحى ليها
وبديت الناس تجرى وتكتر والصوره تزدحم اكتر واكتر
والاصوات تعلى وتعلى
ولمن مرق جثمانها قدامى كنت حاسه فى نار قااااااااااااااااااااااااايده جواى بتحرقنى
كنت بكووووووووووووووووووورك وبستغيث بربنا
لان الوجع كان فوق طاقتنا وفات استيعابنا
كانت بتجينى لحظات وانا بكون بضيف المويه يا الشاى يا بشيل الصينيه
بسئل روحى دا معقول عزى خالتى ليلى
وبيجى زول يشدنى لشى معين يمرقنى من اللحظه اللى تانى بتجينى وبسئل روحى
لا ما ممكن تكون خالتى ليلى اتوفيت
الموت علينا حق
والربنا بيريده بنرضى بيه
لكن الموت حااااااااااااااااااااااااااااااااااااااار
وخصوصا لمن يبقى فى العظم الجوا
وما نلقى حيطه نتكل عليها فى الجاى

الشى الانسان بيكتشفه فى ظروف زى دى
المعدن الحقيقى للبشر
والناس الفعلا بتعاملك وبتراعى ليك والناس البتجاملك على حسب الظروف
الشخص البيهمس ليك ولو بكلمه طيبه اخير من شخص بيضحك معاك فى افراحك
والشخص البيسندك صمتا فى حزنك اخير من الشخص البيتسامر معاك فى الفاضى
فعلا كل شى فى حياتنا بيعلمنا حاجات برغم قسوتها لكن معرفتها مكسب

امس من الامسات الزمان
المنام كان حافل بالاحلام الغريبه
بدايتا بالحلقة التم تسجيلها فى بيتنا عن رابطتنا الخيريه مع قناة ساهور شات والتى لمن تعرض ابدا
:)))))
ومع انطفاء الجفون واشتعال الكانون
رأيت نفسى اقبع وسط ناس البيت امام التلفاز
ولا اتذكر ما الذى كُنا نشاهده
ولكن انقطاعه تسبب فى حالة استعجاب لدينا
لنفاجىء بظهور حلقة التسجيل فى التلفاز
منها نططت عيونى وتلبت من الكرسى ابحلق فى الشاشه
غير مصدقه
فالقمر نايلسات وليس عربسات
وهم قالوا قناتهم بتبث على العربسات فقط
معقول يكونوا قرروا يبثونا على كل الاقمار
ومع المنظر الاول رأيت المذيع وبت النيل(رفيقتى المستضافه معاى فى البرنامج) لوحديهم بينضموا ويضحكوا
قولت يا ربى دا كان متين
وانا مشيت كنت وين فى اللحظه دى
وبعد ثوانى جيه المنظر الثانى لأفجع بشكلى
لمن غمض عيوناتى من شدة ما ألمتنى
كر عليه
دا شنو
مالى عامله كده
بس شبه مدمنين البانقو
العيون واقعه
والجبين منبعج
والهالات لنخره
وب انا
ناس النت حيقولوا فينى شنو حثى
يا شمااااااااااااااااااااتت عدوينى فينى
ومع المنظر الثالث
وكان الخاتمه
جابونى قابضه فى رقبة بت النيل ومبتسمه ابتسامه بلهاء ولابسه لى تونك من النوع الخانق فى الحلقوم والوانه زى شجرة الكريسمس
وهى تكورك,.,.
دا المونتااااااااااااااااااااااااااااااااااج عمل فينا كده
اصلوووووووووووووووووووا ما نخليهم
يصبروا لىىىىىىىىىىىىىىىىىىىىىىىىينا
وماااااااااااااااااااااااااااااا بنخليهم
قولت ليها.,.,
لكن كيفين حسى بعد ما اتعرض
ياها العرساااااااااااااان الطفشت
وياها العنووووووووووووووسه البقيت
ومنها بديت المشاهد تتشوشو والاصوات تبعد لتأتى لحظه فارغه فى تجويفى استعداد للحلم التالى
:)))

لمن مشيت امس الرياضه كالعاده
وكنت واصله متاخره ولحقت بداية التمرين بفوارق دقايق
حييت البنات وهم بيتريضوا بطريقه جماعيه وطوالى انحشرت
لمحتها من بعيد
وحسيتها ماياها الكل مره بشوفها
فيها شى عجيب وحزن بيدفق منها عديل
بديت ادقق فى ملامحها وتعمدت اسلم عليها لمن جيه بريك فى تمرينيين سريع
عيونها كانت دبلانه بطريقه مؤلمه
افتكرتها مريضه
قولت ليها انتى كويسه
اومأت براسها بطريقه يائسه شديد مع ابتسامه ميته عدييييييييييييييييل
ما ريحتنى الحكايه
لمن مشينا نجيب الاثقال سئلت المدربه صحبتنا مالها نهائى اليوم ما براها
قالت لى اى الحاله قامت عليها
قولت ليها حالة شنو
قالت لى راجلها اتوفى بعد 3 شهور من عرسهم
ومنها كانت جات قريب واضطرينا نغير الموضوع
لكن كنت خلاص الوجع عصرنى شديد من الفكره
كيف افارق زوجى قبال حتى اشبع منو وفى احلى ايام حياتنا
كتير بنحس ان وجعنا مافى وجع بيوازيه
لكن لو تأملنا اوجاع غيرنا بنحس ان وجعنا ارحم بكتير
بنحسها اوجاع حقيقه وليها اسباب قويه
وجع يستحق الدمع والبكاء والصراخ والانهيار
لمن بتستتفه عديل احزانك فى شاكوش وعلاقات فاشله وناس كضابه ساى
وجع الحب والفراق وجع نبيل وصادق ومشتعل
فى بريك تانى قالت لى مدربتنا وهى صحبتى شديد
انهم مشوا شهر العسل وقعدوا فيه قريب شهرين وشويه
وبعد رجوعهم ب70 يوم
مشى يلعب مع صحابه كوره ورجع بألم فى صدره
لمن لحقوا الحوادث فى مستشفى خاصه وليسه بيعملوا له تحاليل كان فارق الحياه
شهر تسعه الجاى بيكمل سنتين
برغم اليشوف الحزن المتربع فى عيونها بيقول اتوفى حسى دى
سنتين الا وما خففت ألمها
اظنها زادته اضعاف مع كل يوم فراق وذكرى
غلبنى اسوى شنو
ومسخت عليه الرياضه والحياه بألمها
ونحنا مارقين وواقفين تحت عايزين نركب العربات
كانت واقفه قدامى
اتمنيت احضنها بصمت بدون اقول شى
لكن قولت حتقول عليه مجنونه
عاينت ليها وقولت ليها عليك الله فكيها حبه هى براها قاضمه معاى
ضحكت لى بيأس وقالت لى حاضر
ومشيت
وانا بفكر وبفكر وبفكر وبفكر
كان كنت فى مكانها كان سويت شنو
كر عليه كان جنيت
وقال بشكى حالى وانا حالى احسن من حال غيرى
اللهم اسئلك ان تزيل الحزن من قلوب عبادك المتألمين
اللهم خفف وجع فراق الاحبه والراحليين
اللهم اتوسل إليك ارحمنا والطف بعبادك جميعا كان تائبيين كان تائهيين كان غافليين
اللهم ارجعنا جميعا لدربك واغفر لنا ذنوبنا يا كريم

ارى فى حياتى الكثير
وارى فى حياة الاخرين الاكثر
نركب جميعا نفس المركب
ونتنازع اى الدروب نسلك
سمائنا واحده,,, ومصريين ان نمتلكها بمفردنا
خطانا على الارض الخصبه نسعى لنحصدها بقوه بلا رأفه
لو جمعنا مافى حياتنا سويا
لرسمنا لوحه العمر بأذهى الالوان
لكن حين نجد ان منا من يصر على احتكار الاركان
يصعب على غيرنا ايجاد مساحه فى المكان


حياتنا ملك لنا والدنيا ملك للجميع
وربنا واحد ونحنا له عبيد
خلق الدنيا لنحياها بنعيم
وجاء الشيطان ليذيقنا الجحيم

افيقوا
وافيقى يا نفسى
لم يعد لدنيا الكثير
اقتربت النهايه ومازلنا نبحث عن البدايه
لا تنتظروا الخلاص واسعوا للاخلاص
لا تتوقعوا الحب وتخذلوا من أحب
لا تقفوا فى الانتظار وابتعدوا عن الاسوار
حياتنا نعمه لا تهدروها
وبعضنا لبعضنا مدد لا تمزقوه

الابنه الرائعه رانيه
لك مني الف الف مليون سلام و تحيه

مسكت البوست و قلت يا مسهل

من الاول لي النهايه ، ربنا ستر و كادت ان تفوتني صلاة العصر بتوقيت الرياض السعودية

في امان الله و ربنا يحفظك و يتولاك بما تولي به عباده الصالحين

بكره مشوف الجديد شنو

عندي قصه حدثت لي بمناسبه خالتو حا اقصها بكره لانو المكاتب قفلت عندنا في الرياض الن الساعه 5 و 5 مساءا
عمك
الزبير الختمي

عمو الزبير الظهر قرب يجى وما ظهرت عشان تحكى الحتوته
انا رجياااااااااااااااااااااااااااااك

الحكايه و ما فيها
وكان ذلك سنه 1997 و العبد لله دابو في عمر 36 سنه
عملت زياره للوالده ربنا يحفظها
جات الوالده السعوديه
الوالده تزوجت تقريبا في عمر 15 سنه و العبد لله الولد البكر
يعني في ذلك الوقت تقريبا عمرها في بدايه الخمسينات
المهم
من باب بر الوالدين
قلت اعمليها فحص طبي شامل كامل
مشينا مستشفي كبير في مدينه الخبر تابع لارامكو
امي كانت لابسه لبس حاجات ثوب و خمار كبير و سبحه في اليد اليمين
اخوكم لابس بدله و بنطلون و كمان كرفته
هنالك طبيب استشاري كبير سوداني
قال لي عشان امك تتبسط جدا
نخليها في المستشفي 6 ساعات في غرفه خاصه مع الخصم طبعا
في اثناء ما بعمل في الاجراءات الخاصه بالتأمين
امي زاغت ين ما عارف
فتشك فتشك
اقسام القلب الجراحه التنويم الطوارئ
لا حس لا خبر
من علي البعد كان هنالك واحد هندي ( صديق )
يرصد الموقف عن كسب
بعد ما فترت من المشي و الجيه
و احتار بي الدليل
اسمع ليك الهندي ( صديق )
بنادي فيني
يا صديق انت يا صديق انت اسمع ( مدام ) في البوفيه اشرب قهوه
سمعت كلمه ( مدام )
اتقول بندق او طلقه خفست بطني او قلبي
من اليوم داك و انا في عمر 36 سنه مسكتني ام هللله هلللله في العمر
بالله زول ماشي مع امه يقولو ليهو مدامك مشت بي جاي ،،،، تقول شنو
و منها سعيت لي جلابيه و عمه عشان الخروج و الطلوع مع المدام ما ما .

بالمناسبه هذا الموقف ما طلع من راسي حتي هذه اللحظه

غايتو عقده العمر الله لا دخلها في حبيب

الزبير الختمي

:))))))))))))))))))))))))))))
ما قصر معاك بتاتا
ودى تعتبر مدحه فى حق ماما انها شباب فما تتحسس
:)))))))))))))))))))))))))))))

الموقف العصيب يا رانية فقدان انسان تحبه للابد, من غير رجعة .. لعالم اخر .. يخليك مع الشوق و الحسرة و الالم ...

تفقد انسان وهو يهبك السعادة و يضحي من أجلك ... تفقد انسان جميل في أجمل لحظات ممكن تجمع اتنين ... في اسعد أيامكم و انت مفتكرين لسه القادم احلى و أجمل ..

دي و بإختصار الموقف العصيب المريت بيه يوم 23/12/2012 ... فقدان اعز و احب الناس الى القلب بعد الوالدين .. فقدان زوجتي و هي تمنحني السعادة و تحقيقي امنيتي ...

الموقف العصيب الاخر ردة فعل ابنائي عبدالرحمن و ثامر (7 و 5 سنين) لمن اخبرتهم ان والدتهم لن ترجع و هي ان شاء الله في الجنة .. و بتلقاية عبدالرحمن المعهودة و ببراءة طفل سال ... Forever? ... و اتبعها بحزن و عربية لا يتقنها "خلاص دفنتوها" ... فما كان من ثامر الا ان ضرب اخيه و رد عليه بعصبية "قال ليك هي في الجنة" "يعني ما ماتت" ... "صح ابوي" ... فما كان مني الا ان اتمالك نفسي و ارد بجواب يرضي الطرفين ...

اسال الله ان يرحمها و يتغمدها بواسع رحمته و ان يرحم جميع موتى المسلمين و يرحمنا اذا صرنا الى ما صاروا اليه

اخى Alfarwq
اسئل الله سبحانه وتعالى لها الرحمه ولك ولابنائك واحبائها الصبر
فعلا مافى اصعب من كده
ومشكلة الوجع دا ان كل يوم بيعدى عليه بيزيد ما بيقل
العبء عليك بقى مزدوج الله يقدرك عليه ويعينك
ويخليك ليهم وتشوفهم احسن الناس
ويعوضك خير
الموت علينا حق والحزن علينا حق والشوق علينا حق
يديك العافيه على مشاركتك لينا فى حزنك النبيل يا روعه

انا بحب الشمام شدددددددددددددددددددددددديد
بطريقه مخيفه
يعنى اول ما يجى موسم الشمام
بكون خلاص بديت اهلوس بيه
واتخيله كيف كيف
و لمن اشتريه سريع ادفسه فى تلاجه
وابرك جنبها بصينه وسكين منتظراها تبرد
عشان امرقها واقوم بذبحها طرنشاااااااااااااااااااااااااااااااااااات
ومع اول قططططططططططططططمه
بيغلبنى الوصف لهذا الشعوووووور
خصوصا لو طلعت معسله
لان فى منهم ماسخ لكن بصر اكله مغصه فى مراراتها
اها قوم ايه بقى
من ايام بسيطه فاتت
كالعاده راجعه من الرياضه بطاريتى على الرمق الاخير
وقولت اعدى اشترى شمام من زولى المعتاد
ووقفت قدامه كالعاده اتشاكل
ليه بتمانيه
واخر مره طعمهم ما كان حلو شددددددددددددددددددددددديد
وخليها بخمسه
ولمن افشل فى المجابده بشيلها بسبعه
وقولت له يبقى اختار 4 سمحين
ومنها اتذكرت ان شنطتى الفيها القروش فى الظهريه
لان الجنبى الشنطه حقت الرياضه
قومت بلا اى مقدمات وكتعوديه
تاكدت من اغلاق الشبابيك جيدا واصلا المكيف حق العربيه كان شغال وهى مدوره
وكلكته على زر ظهرية
وفتحت الباااااااااااااااااااااااااااااااااااااب
وجيت متلبه بكل ثقه
وطااااااااااااااااااااااااااااااااخ رزعته
مشيت الظهريه فتحها مرقت الشنطه وطااااااااااااااااااااااااااااااااااااااااااخ رزعتها
جيت افتح الباب عشان اركب
ما اتفتح
حاولت تانى بشده ما اتفتح
سجمى
حاولت الابواب التانيه ما اتفتحت
بديت اتحسس شبابيك العربيه احتمال اكون ما عملت العمليه الغبيه دى
لقيتهم كلهم مقفوللللللللللللللللللللللللين بمتانه
وبجوا عاينت لموبيلاتى المجدعه فى الكرسى بعيون منططه
وبحاول استوعب ان فعلا العملته دا حصل
وانى قفلت العربيه وهى مدوره وامنت ابوابها وشبابيها
وانا واااااااااااااااااااااقف برررررررررررررررررررره
برررررررررررررررررره
انا فى الشارع فعلا بره
ياهو دا الزلط والحافلات والغبار وبتاع الشمام
الشمااااااااااااااااااااااااااااااااام
كله من الشمااااااااااااااااااااااااااااااااااااااام
اتصل طيب بمنو
وفى منو قريب يقدر يصلنى بعد يجيب مفتاح الاسبير من البيت
وهو اصلا وين التليفون الاتصل بيييييييييييييييييييه
ولا انا حافظه نمرة منووووووووووووووو اصلا

ههههههههههههههه
كيف حليتي المشكلة؟
طبعاً بتكوني أخدتي تاكسي رايح جاي للبيبت!
وبدل الجنيه اللي وفرتيه في المساومة دفعتِ ليك عشرة جنيه تاكسي!

أولا السلام عليكم يا رانية،
......
ضغطت على زر الصفحة التانية، فإذا بي منهمك في المتابعة،
ومن انفعال لانفعال!

Quote: وفى فرق كبير بين الحزن والألم بعتقد انى بتألم لمن بتسبب بنفسى فى الجرح لانى سمحت لانسان يجرحنى لكن الحزن بيكون على احداث قدريه ربنا قسمها لينا ولجهلنا بخيرها بنحزن لفشلنا فيها او لحدوثها

ووقفت عند هذا المشهد كثيرا:

Quote: ونحنا مارقين وواقفين تحت عايزين نركب العربات كانت واقفه قدامى اتمنيت احضنها بصمت بدون اقول شى لكن قولت حتقول عليه مجنونه عاينت ليها وقولت ليها عليك الله فكيها حبه هى براها قاضمه معاى ضحكت لى بيأس وقالت لى حاضر

بالتأكيد هي شعرت بشعورك!

والمشهد المثير للشجون اللي برّنا بيه الأخ الفاروق:

Quote: الموقف العصيب الاخر ردة فعل ابنائي عبدالرحمن و ثامر (7 و 5 سنين) لمن اخبرتهم ان والدتهم لن ترجع و هي ان شاء الله في الجنة .. و بتلقائية عبدالرحمن المعهودة و ببراءة طفل سال ... Forever? ... و اتبعها بحزن و عربية لا يتقنها "خلاص دفنتوها" ... فما كان من ثامر الا ان ضرب اخيه و رد عليه بعصبية "قال ليك هي في الجنة" "يعني ما ماتت" ... "صح ابوي" ... فما كان مني الا ان اتمالك نفسي و ارد بجواب يرضي الطرفين ...

شكراً لك رانية!




تعديل لإضافة كلمة (هي)!

تصدق يا صلاح
بتاع الركشه اديته 10 قرب ينزل يضاربنى
اديته فوقها 4 شالها وهو ندمان على المشوار
حالته البيت يعنى ما بعيد شديد اخدنا 5 دقايق روحه و5 رجعه و5 بفتش على المفتاح
اصلا ما لقيت حل غير الركشه الجات ماره قدامى
وصيت بتاع الشمام على العربيه وقولت له بجى سريع
لمن رجعت قربت احرد الشمام بالزعله
لكن نقول شنو
اهو الحصل حصل والحمدلله
:(((((((((
تسلم يا روعه على المشاركه الوجدانيه للمواقف
الشكر ليك
يديك العافيه

امس من الامسات كان يومى فيه جمممممممممممممممممممممممممممممممممميل
خصوصا انى لى اسبوع بجهز نفوستى لهذا اليوم
ونفضت الغبار من الشنطايه وطلعت العده من الكرتونه
وبقيت اتخيل ككككككككككككككككككككيف حيكون الاحساس
بعد سنوات طويله مرت على هذا الاحساس
واشتياقى الخرافى له
كنت متمنيه اغمض عوينتى وافتحها القى الاحد جيه خلاص
والساعه اربعه العصر دقيت
ومرقت شايله خلجاتى ومتجهه للحدث المشهوووووووووووووووووووووووود
من غير العاده الساعه اربعه الا بديت اقفل حاجاتى
لملمت الورق واللابتوب والعده
وجرى مشيت لاخويه قولت له انا مااااااااااااااااااااااااااااااااااااااااشيه اها عربيتك اتصلحت ولا راجعين معاى اوصلكم عشان امشى مشوارى
( وقلبى كان بيدق لانهم لو مرقوا معاى بيأخرونى من حدثى المنشوووووووووود)
لان الصباح عربيتهم ما كانت معاهم
وقالوا لى حنمرق معاكى
وهم فعلا مرقوا لكن ما معاى
هم مرقوا فينى
احتلوا العربيه وسابوا لى سم وااااااااااااااااااحد اتكرفس فيه
اخوانى ما شاء الله يحفظهم الله عربيتى ماااااااااااااااااااااااااااااا بتريحهم
ولو زول ركب معاى فيها بكون راكبه قاطعه نفس
اها لمن الاتنين ركبوا معاى
كان حالتها بتحنن
المخم ربنا ستر وعربيته طلعت اتصلحت وجايبنها له
طوالى قولت له انا ماااااااااااااااااااااااااااااااااااااااشه ؟؟؟؟؟؟؟؟؟؟؟؟؟؟؟؟؟؟؟؟؟؟؟
اصلا ما صدقت انى لقيت مكان فى امدرمان قريب من البيت وامى وافقت انى امشى
فشنووووووووووووووووووووووووو شاااااااااااااو
ما اديته فرقه زاظو يسئلنى ولا حتى يتنفس
شتت بسرعه الكترابه من قدامه
وانا مارقه وعلى اللفه لباب الخروج من اتجاه المكتب
لقيتها منبطحه فى واطه واول ما لمحتنى قامت تنونو لىىىىىىىى وتملحس فى عيوناتها لمن كسرت لى قلبى
وقفت وقولت ليها يعنى دا وقته يا بسبس
مش شيفانى مستتتتتتتتتتتتتعجله
لكن قليبى الرهيف ما هان عليه امشى واطنشها
وجرىىىىىىىىىىى رجعت المكتب
وفتحت الباب وقولت لواد الشغال ادينى سريع فنجان الشاى الصغير
وتوشك هجمت على ثلاجة اخويه الفى مكتبه
البدس فيها اللبن
وهو طبعا سمع صوت الكديسه بتنونو
قام قال لى كرهتينا الكدايس ياخى
فى البيت وفى الشغل
قولت له معلللللللللللللللللللللللللللليث ولفحت اللبن وجرى دفقت ليها فى فنجان وختيته ليها تحت الشجره وكملت مسيرتى المستعجله

مريت على مكتب صحبتى الاتفقت معاها نمشى سوا
والكانت هى سبب زاطوووووووووووووو فى انى اعرف المكان دا
ولقيت المكتب قافل
قلبى قام دقه دقه كده مااااااااااااااااياها
قولت لنفسى يا بت تماسكى بتكون مشيت كده ولا كده
قعدت فى اقرب كرسى وبديت افتش على موبايل من موبايلاتى الخمسه فيه رصيد
ويدى بديت تتراجف
غايتو السعاده والشوق بيخلى الزول يتكبكب ويفقد اعصابه
انا بقيت حاسه برويحتى قاعده على الهبشه
وحتمرق من السعاده فى اى لحظه
فعلا الناس البتجيها سكته قلبيه من الفرح ما كضبوا
شعوررررررررررررررررررررر فظيع
,.,.
لمن رديت عليه قالت لى انا سايقه ومرقت مشوار امدرمان
نتلقى فى الحته الفلانيه
عرفاها
قولت ليها كان ما عرفاها عرفاااااااااااااااااها دا كلام
وطوالى فرتلب من الكرسى
وعتلت الخشروميت شنطه الشيلاها
واتجهت لعربيه
فتحت الظهريه
جدعت فيها الحاجات
وركبت العربيه وعشقت على اربعه طوالىىىىىىىىىىىى
حسيت بالمشوار بعيد وهو حالتو ما بياخد ربه ساعه
لكن الشلهده كعبه وما بنصح بيها زول
,.,.
على دخلت الكبرى سمعت السرينه
وبقيت بحاول اعرف هى وراى ولا قدامى ولا جنبى ولا حتقع فوقى
بديت تقرب لمن حسيت انى حلقاهم معاى فى العربيه قاعدين
وبعد ثانيه بديت العربيه القدامى يادابها تزح بالجنب
منها زحيت عربيتى وجى مارى فى الاول بتاع الموتر
ووراه العربيه التانيه وكان ماشيه بطيىء
كان راكب فيها ورا زول كبير حلبى
عاينت له والغريبه عاين لى
قومت واصلة اعاين له وهو يعاين لى
فجعتا سئلت روحى لو قومت بادرت باى حركه حيقوم يعتقلونى
فرضا مديت لسانى
غمزت له
ابتسمت
شوحت
تانى نفضت راسى المخرفه دى وقولت انا ما فاضيه حثى للاعتقال زاطووووووووووووووووووو
وبديت اشوف فى اكثر الطرق اختصارا للوصول
البيلمحنى فى الشارع بسرعتى يقول اكيد فى زوله بتولد فى العربيه وملحقها المستشفى
الغريبه لمن المسافه بديت تقرب بدى قلبى يرجف
وانفاسى بديت تتباطىء فى الشهيق وزفير
وكإن الزمن بقى ماشى بطيىء
ولمن وقفت العربيه قدام المبنى المنشووووووووووود
كرعينى حسيتهم اتجمدوا وبقوا تقااااااااااااااااااااااااااااااااااااااااااااااااااال
قولت لنفسى يا بت
ياها اللحظه
لا تراجع ولا استسلام
ودا البراكى قررتى تجيه يبقى مافى مفر
فتحت الباب وشلت الشنطايه المجهزاها من اسبوع و الفيها العده الكانت فى الكرتونه

دفرت الباب وحسيت انى بدفر فى دولاب
لان يدينى حسيتهم بيرجفوا وما عرفت هم فعلا بيرجفوا ولا انا ساى بتوهم
ودخلت لقيت هول فااااااااااااااااااااااااااضى
وفى اتجاه واحد مكتب فيه ناس قاعده
قام واحد فيهم فتح الباب وقال لى اتفضلى
غايتو فى مواقف زى دى بدعى ربنا يستر الحال
لان بالجد بحس انى متمالكه اعصابى بقوة جباره
وبخاف تفلت منى فيصدر تصرف مخل بالعقل والمنطق والانسانيه
تحركت بخطى كنت بجاهد انها تكون ثابته
ولقيت لى كرسى طوالى اتفجغت فوقه
واظونى قولت ليهم السلام عليكم
غايتو خيل إليه هذا
كان ما قولتها حسى مافى فايده
عاينت لى البنيه
وهذا يدل انى لازم ابدا معاها هى الحوار
قومت قولت ليها السستم حقكم هنا كيفين
قالت لى التجارى بعشره جنينه الساعه
والاشتراك ب165 جنيه الشهر
قولت ليها انا عايزه يوم واحد فى الاسبوع بس
قالت لى ممكن تدفعى 150 جنيه وبتتخصم ليكى بايام البتجيها
يعنى مافى موشكل
قولت ليها مكككككسب يا زوله
حثى دى باخد تجارى ساعتين وبنشوف المره الجايه حنسوى شنو
قالت لى طوالى
ومنها مديت ليها القريشات
ومديت لى التذكرتتتتتتتتتتتتتتتتتتتين
قالت اديها لزوله البجوا
قولت ليها هو دخول زاطوووووووو وينو
قالت لى الباب اهو
قادر الله انا ما شايفه فى الحته كنت اى باب
لكن لمحت لى اوكر
ومنها الراجل قال لى شدى الباب شديد لانه قوى
قولت ليهم ثمح
ومشيت ووقفت قدام الباب
مسكت الاوكر بيدى
ياها اللحظه
ياها المنشوده
ياها المنتظره
ياترى حتزرع بصله لمن عيونى تجى فيه
ولا حغمر
ولا حصوت
ولا حنطط زى الخرفانه
ولا حيحصل شنو
اتوكلت على ربى وقولت زى ما تجى تجى
النفتح الباب اخير
وفتحته

كنت مغمضه عويناتى
ولمن فتحتها وعلى امل القاه
لقيت لى حيييييييييييييييييييييييطه فى سحنتى
قولت ليها بس عليكى
خربتى لى استعدادى للحظه
لكن فى نفس اللويحظه تراءت الى مسامعى اصوات اعادت لى زمن جميل
زمن الطفوله والشباب والصحه
زمن كان لا شايلين فيه هم لا بعرف حتى يعنى شنو تفكير
واخدت لى خطوتين يمين فى خطوتين شمال
ورأيته
رأأأأأأأيته
رررررررررررررررأيته
وبقيت ما مصدقه روحى
انا شايفاه صوح قدامىىىىىىىىىىىىى
انا واقفه على بعد اشبار منو عدددددددددددددديل
يادا الهنا يادا السروووووووووووووووور
ياها ريحته البتوقع الطير من السما
وياها رغوته البتوحى بأن نسبة البزاغ فيه اعلى من منسوبه الطبيعى
هو داااااااااااا
ايوه داااااااااااااااااااااااااا
ومشيت لزوله القاعده فى طاوله شبه بتاعين ناس الرصيد الفى الشارع
مديت ليها التذكرتتتتتتتتتتتتتتتتتتتتتتتتتتتتتتتين وانا صامته
ولمن عاينت يمين وشمال
وما فهمت مفروض امشى على ياتو اتجاه لتغير الخلجات
سئلتها
وين بتغيروا
قالت لى هناك عديل
منها اتجهت للعديل
وعينى مازالت معلقه عليه
وصدرى يجتذب رائحته باشتهاء قرب يطرشقه

وصلت لى حته كده
فيها 3 خنادق زى حقين حمامات الفنادق
وقفت فى المنتصف وبديت افرتك الشنطايه والخلجات
وما عرفت دا اطيره وين ودا اخته كيفين
لا شماعه لا كرسى
غايتو نحنا اى شى لازم نعمله ناقص ويشحتف الروح فى البلد دى
بس اهم شى نعمل السيراميك
واى شى تانى حريقه فيه
جاهدت ولبست العده
وجات على الخوذه الفى الراس المفروض البسها
وتجى الطامه فيها
انا بدافر احشرها يمين فى شمال
ما فخمت راسى كبرت ولا الاضطراب والتفكير والحوار الشغال دا فيه ضخمها
قووووووووم يا كافى البلا
شييييييييييييييييييييييييييطك اتشرطى
وتمرق فى يدينى الاتنين جزئين
شلت نفس عميق
وقولت بركه الجايبه لى اسبير
انا اصلا لملمت اى عددددددددددددددددددده وكل شى مزدوج لحالات الطوارىء الزى دى
انا ما عارفه حظىىىىىىىىىى
هو جديد عليه
طوالى ممسكنى مواسير وحنفيات
اها التانيه لمن مرقتها وعايزه البسها
اتخذت كل وسائل السلامه
اتعاملت معاها بكل حنيه قدرت عليها
والحمدلله استقرت فى الفاخوره بسلام
وجيت مارقه
وختيت الشنطايه فى حته ظاهره لانى ما ناقصه اجى مارقه القى روحى على باب الكريم وحاجاتى مفقوده
ومشيت على السلم
ابيت امشى من الاتجاه حق المبتدئين
عملت فيها محترفه
مشيت السلم المنو وتكون بقيت فى خبر كان
وختيت ايدى فى السلم
لقيته بتكعوج
ومسامير حقته الفى الحيطه واقفه على تفافه
قولت يالا
جات على دى يعنى
ختيت كراع فوق وكراع فيه
والاهتزاز بيزداد
لمن صوباعى لااااااااااااااااااااااااااااااااااااااااااامسها
وقولت اااااااااااااااااااااااااح
كانت بارده شديد
لكن هذا لم يردعنى ابدا
من انى اخت كراعى التانيه والحق روحى قبال السلم يجى واقع معاى فى المويه
,.,.
عليكم الله ما تكرهونى
دا حوض السباحه حق نادى المريخ
:))
ولمن بقيت جواه ومكنكشه فى الحديده البجنبه
اللى اخير منها الزول يكنكش فى حبل غسيل
لان حبل الغسيل بيكون مربوط بشكل امتن منو
بديت استعيد المبادىء الاوليه للعوم كيفين
اخر سنه ما متذكراها زاتو عومت فيها
لكن قولت اكيد بالفطره حعرف
وطاقشت يمين فى شمال
مع هبابه فوق على هبابه تحت
لمن سلكت المكنه
وانطلقت
اسم الله عليه
سممممممممممكة قرش
غواصه
جيت كاتحه فى نص الحوض مافى شى مثبتنى

الحقيقه ولا الكضب
النشاطات النسائيه الزى دى ممتعه
طبعا المدربه حقت الحوض جات لحقاننى
قالت لى خليكى فى النص عليكى الله
قولت ليها ثمح
وفعلا بقيت فى المنتصف
خيطته خياطه
ومع كل خياطه بلقى لى زوله ظريفه
لان الزول فى شيلت النفس بجر له حنك حنكين
وانتى من وين ونحنا من وين ونحنا ناس امدر بنملى العين يا عنيه

بتلقى كل الاصناف والاعمار والمهن
والروعه انى لقيت صحباتى من زمن الجامعه الزماااااااااااااااااااااااااااااااااااااااااااااا ااااااااااااااااااااااااان

تقول امس كنت معاهم من شدة ما اندمجنا من قولت تيت
وياداب فى الوقت دا وصلت صحبتى الكنت متفقه معاها
لقيتنى عايشه حياتىىىىىىىىىىىىىى كإن انا الجبتها ماهى الجابتنى

ساعه ونص كانت بالنسبه لى سنه ونص قرن ونص
لكن استمتعت ونسسسسسسسسسسسسسسسسيت همومى وحالى محيالى

انا لو حقعد ااحكى عن الساعه ونص ما بخلص فى يومين
بالجد استمتعت بمعنى الكلمه
برغم كتير بيقول المجتمع النسائى مجتمع كريه وحاقد وممل
لكن الحقيقه ان دى حقاده ساى من الرجال والاولاد
اليقولوا ليكى صحبة الولد احلى من صحبة البت
ككككككككككككضب ساى
وان الولد بيفهم البت اكتر
حنننننننننننننننننننننننننننننننك بيش
وان البنات بتغير من بعض والاسطوانه الما طاعمه دى
كلها لاغراض روجاليه فى فرتكت حنان العصبه النسائيه الممكن تبيدهم لو اتحدت
دا مخطط اسرائيلى واضح للعيان
لكن نحنا الكيشه بنسمح ليهم بتحقيق مقاصدهم المنبثقه من حوائطهم المهتكه


بدوا ينادوا لافراغ الحوض من البشريه
ومتبقى من الزمن خمس دقايق
مرقت مع صحباتى ونقنق ونقنق
الغريبه اصلوا ما جبنا سيرة الرجال
ولا الجكس
والاغرب انى نسسسسسسسسسسسسسسسسسسسيت انهم موجودين فى الدنيا دى معانا زاطوووووووو
والاشد غرابه انى كنت سعيده بدون ما احس
سعيده وهم خاليين من فكرى وحياتى
دى طفرة جيده فى محيط حياتى يجب ان ادعمها

وصحبتى تحنس فينى اجى الحصه الجايه
قولت ليها ما بقدر 3 يوم فى الاسبوع
بكش من المويه
لكن الاحد ربنا يهونها بنتلاقى تانى
ولان اصلا ايامى الباقيه بحب العب فيها ايروبكس
برضو مجتمع نسائى لذيذ
لازم النساء تبدأ فى تقوية هذه التجمعات والاستفاد منها ايجابيا
وما تحصر نفسها فى مجتمعات سلبيه تبيد فيها ذاتها وكينونتها
دى ما مجتمعات ترفيهيه للحناكيش
دى طرق صحيه بكل المقايس للمرأه تؤدى لتخفيف من ضغوط الحياه
رجعت بيتنا وفى لحظتها ما شعرت باى تتتتتتتتتتتتتعب
لكن قادر الله
نمت وصحيت
لقيت رويحتىىىىىىىىىىىىى معسمه
وكانى كنت مشدوده فى حبل غسيل طول الليل
اتنفضت وبديت استعد ليومى هذااااااااااااااا
فإنه يوم شكله حيكون ما زى كل الايام من بدايته

المعركه اليوميه مع الهدوم دى قااااااااااااااااااااااااتله
بتمنى كتير لو بقى عندنا يونيفورم عشان ارتاح من الفكره دى
وخصوصا بعد ما فنيت بناطلينى وما بقيت البسها
لاننى اتبعت سياسة الحشمه
زمان كان اسهل شى الزول يجر اى البنطلون ويشد اى قميص وخلاص
لكن حثى لم يعد سبيل لاى جرجره
عاينت يمين شمال وفوق وتحت
ولبستى لى خشروميت حاجه فى بعض
ونفضت الجذمايه وجبت الشاراب النضيف
وعاينت فى المرايا لقيت روحى تووووووويثه
الغريبه فى سؤال بيجى لزول وهو بيعاين فى المرايا فى بعض اللحظات
ما كلها
يعنى لمن يكون نظيف
وحاسى بروحوا قاشر وسكره
هم ديل مالهم
ما بيشوفوااااااااااااااااااااا
حثى سحنتى دى عيبها شنو
قادر الله سوف تضيع مع هبوب الزمن وهم الخسرانيين
,.,.,.
مطوحة شنطاياتى العشرين وجيت مارقه لماما
وكانت صاحيه
وضعت القبله الصباحيه على خدها وجريت المطبخ
لانى من امس داااااااااااااااااااسه لى صحن كارب حق اكل من اخوانى عشان ما يلموا فيه
ختيته فى كيس وردمت فوقوا باقى التبعات وجيت مارقه لقيت اخويه وش
نزل من بيتهم
وقام عاين لى وعاين لكيس
وقال لى دا شنووووووووووووووووووووووو
قولت له بعيون مفزوعه
فطورى ياخىىىىىىىىىى فى شنو ما ناكل يعنى
ومنها طوالى ودعت ماما وتلبت من الباب سريع قبال يلم فينى اخويه التانى ويقتلعوا الكيس

غايتو تعبت من الحكىىىىىىىىىىىىىىىىىىىىى
عشان كده حختصر باقى الحتوته فى الرد دا
مرقت وعاينت فى جوجو ثمح
جوجو (عربيتى بالاصح عربية الشركه عشان ما تفهمونى غلط)
يمين شمال
بجنبه بتنكه
لقيتها عال العال والحمدلله
ركبت وعدلت المرايات
لبست الجوانتيات
علقت الام بى 3 وشغلته
شديت حزام الامان
عدلت نضارة الشمس
عاينت فى المرايا نظره اخيره لرويحتى
وانطلقت
الجو جميل برغم السخانه التنشف الزول
وكله المعطيات لحظتها بدل على انه اليوم جميل حيكون او اقله عادى
وفى شارع سولارا الفى امدرمان
فجعتا اشعر بشىء من الاهتزاز
فى لويحظه الاولى قولت شكلى ليسه مدروخه من امس والمويه
لكن فى لويحظه البعديها حسيت ان الاهتزاز بقى رج
قومت وطيت صوت الكاسيت
ومنها سممممممممممممممممعت
كو كو كو كو كو
شى بديهى حنعرف الكو كو شنو
هو فى غيرها
مافى داعى اقول احساسى شنو
لانه كااااااااااااااااااااااااااااااااااااااااااااااااا اان اتفجغ بؤسا
وقفت العربيه على جنب
ونزلت لقيت العجله اليمين ورا بتشخر شخر السنين
قولت ليها نمتى يا جميل
نووووووووووم العوووووووووووووواف
اتصلت باخى الكان قبضنى متلبسه بالصحن
قولت له العجله شخرت وانا فى الشارع
قال لى اقعدى فى العربيه وارجينا
فعلا بعد ما يقل من ساعه الا جونى واخدنا الاسبير لانه هو زاتو بيشخر
ووصلنا المكتب
ختيت خلجاتى وبفتح فيها فى امان الله
قولت فرصه حرتاح من الحوامه الخارجيه حقت الشغل مع السخانه دى بما ان العربيه معطله
بفتح فى لابتوب
فتح وفجعتا بعد خمس دقايق شخر هو كمان
يمين شمال
لقيت الادابتر ضرررررررررررررررررررب
حثى عليكم الله
مفرووووووووووووووض اسوى فى رويحتى شنووووووووووووووووووووووووووووووو فى هذه اللويحظه

ما بحب موضوع الشوبينق دا من الله خلقنى
لو عايزين يعذبونى يقولوا لى ارح السوق
بكره دبى لان برنامجها كله مولات وشوبينق
فى العاده لمن بحتاج شى بحدد مكان معين بدخل فى غضون دقايق بكون لقيت العايزاه واشتريته ومرقت
لا بفحص لا بدعبس
هى نظره على تحديد مقاس
ما محتاجه حسبت برلم البيهببوا فيها النسوان
وبتغاظ شديد من حركه الوحده انها تنزل شوبينق واصلا ما عندها سحتوت
وتدخل المحل تنزله كله فى واطه وببساطه تقول لبياع بجيك مره تانيه
انا لو مكانه كان ختيتها فى الواطه هريسه
المهم فى مره اختى وصحبتها اصروا نمشى اخر يوم فى المعرض السورى الفى القاعه
وصادف انه قبال يوم وقفه العيد
من اشغالنا اتفقنا نتقابل العصر قدامه
والظريف انه كان فاضىىىىىىىىىىىىىىىىىىىىىىىىىىى
يعنى لا دفير لا خنقه لا ضوضاء
مع الدخله وياداب بنقول يا هادى قولت ليهم انا مضطره ازوغ لحمام واجى
اختى قالت لى دى عوايدك امشى سريع وتعالى
بديت اسئل وافتش
يمين فى شمال لقيته
وانا مارقه تليفونى رن وكان نمرة اختى
رديت وقولت ليها ما اتاخرت الشفقه شنو
قالت لى تعالى سريع عند البوابه
وسمعت زول جنيها بيقول ليها ما تقولى ليها شى
قلبىىىىىىىىىىى وقع فى ركبتى
قفلت الخط وجرىىىىىىىىىىىىىىىىىىىىىىىىىىىىىىىىىىىىىىى لمكان الوصفته
لاندهش واصصصصصصصصصصصقع بالحاصل
,.,.,
بريك ونواصل

تجربتى الجراحيه فى مستشفى الخرطوم ,.,.,. تراراااااااااااا

من التجارب الحابه احتفظ بيها ضمن موضوع البوست

نـــــودار وحكـــــايـــــات من هنا وهناك وبهناك :)))

لمزيد من التوثيق موضوع ذو صله بالتجارب :)

لمن وصلت الحته الاختى وصفتها لى لقيت زول واقف
لمن شافنى قال لى انتى رانيه
قولت له اينعم
قال لى اتفضلى معاى فى مكتب
لحظتها يقينت كل اليقيييييييييييين ان فى كارثه حاصله
دخلت المكتب لقيت اختى وصحبتها قاعدين فى اتجاه ووجوهم بتنطق شرار
وبالاتجاه المعاكس مدام شايله ولدها ومعاها راجلها
لمن قعدت سئلت اختى وصاحبها فى شنو
قالت لى اختى الوليه بتتهمنا اننا سرقناها
اننا شنووووووووووووووووووو
عادتها تانى سرقناها
ما عرفت اضحك ولا احمر ليها
سرقنا منو
دا كمان الناقص
منها الراجل قعد فى مكتبه وبدا يتكلم
بما فحواها انهم عايزين يفتشوا شنطنا
اختى وصحبتها رفضوا رفض بات التصرف المهين دا
كيفين يفتشوا شنطنا
قولت لراجل حسى لو فتشتوها وما لقيتوا العيزينه من حقنا نفتح فيهم بلاغ رد شرف
الراجل قال لى من حقكم
قولت له اوكى لو التزمتوا بالشى دا يبقى فتشوها
قال يبقى حنضطر نوديكم كلكم القسم
قولت له اوكى نشوف النهايه شنو
وبدا الراجل يبدا فى كتابة محضر مصغر
وبدا باسمائنا ووظائفنا
انا مدير مالى اختى سكرتيره سفير سفارة جنوب افريقيا وصاحبتها مديره فى طيران الك أل ام
الراجل عاين كده وعاين لراجل ومرته وقال ليهم انتو مصريين تواصلوا الموضوع دا
الوليه بسخافه اى
مافى غيرهم كان واقف جنبى
قولت ليها حسى انتى فى محفظتك البتتهمينا بيها كان فى كم
قال حوالى 150 جنيه
قولت له فى شنطتى 1,000 دولار
منطقيا شنو البيخلينى اعاين لـــ 150 حقتك دى
طبعا الف دولار كان ياداب وصلتنى حقت كفالة 5 اسر ايتام لسنه من شباب فى امريكا الله يديهم العافيه
عاينت لراجل البيكتب المحضر قولت له هو اتهام الناس ساى كده
قال لى فعلا اشكالكم ناس محترمه لكن نسوى شنو هى المصره تبلغ عنكم
وبدا يقول لراجلها ان المشكله حتكبر وهم الوضعهم سيىء ما نحنا
والوليه تشيل وتناطح وتصر على رايها
فى الزمن دا اختى ضربت لاخويه وكان معاه ود خالتى
جونا جاريين
ولمن دخلوا مكتب
الراجل قرب يضرب تعظيم سلام لاخويه
:)))
ربنا يحفظه طول بعرض لو نفخ ساى بيطير القدامه
بدا يسئل وبدوا يشرحوا له
وقام منها الراجل البيكتب المحضر اخد راجل المره بره ومنها نادا اخويه
وشكلهم بدوا بجروا واطى عشان الحكايه تنتهى بسلام بدون قسم
ومنها اخويه جيه قال يالا قوموا ارح نمشى
برغم اختى قربت تنط فى لغاليغ الوليه
لكن دفرتها لبره هى وصحبتها
وطول السكه ود اهلى شابكنا يا ارباب السوابق
يا حراميه
:))))))))))))))
غايتو تانى زول بالغلط يجى يقول لى نمشى المعرض السورى
قبال ما يصلنى اعتذار رسمى من المعرض تانى توبه لحبوبه ما بعتبه حتى فى الحلم

اكيد بيمر علينا مواقف غير مفهومه
ومهما حاولنا نفكر فيها ونحللها بنفشل فى فهمها واستيعابها
ما بنعرف نلوم منو ونزعل من منو
منو الغلطان ومنو المحقوق
بنحس بس بالألم
لكن هل بنفكر وبنتسائل ان ألمنا دا من حقنا نشعر بيه ولا مفروض نعالجه ونصوبه ونوعيه
ما اى شى بيزعلنا معناه اننا على صواب
المعامله البشريه بقيت صعبه شديد
ومسايرة الغير بتجرفنا لدروب غلط
لان اى زول انانى وعايز مصلحة نفسه
عالم الرجال قاتم
مرات بتمنى لو ما دخلته واكتشفته
لانى حاليا بقيت مستائه شديد منهم
بقيت ما قادره اشوف منو الصالح من الطالح فيه
وهل فعلا هم مظلومين ولا ظالمين
اكتر فئه بتحيرنى المتزوجين
واصرارهم على تعاستهم مع زوجاتهم وبحثهم عن السعاده خارج البيت مع اخرى
واريت بيكونوا عايزين الحلال
لا عايزين يسعدوا وبس
يشكوا وينقنقوا من وضعهم وان الزواج دا افشل تجربه فى حياتهم
طيب معرسينهم لحسى ليه
بنبدا نسمع اعذار غير قابله للمنطق
خوف من النسابه
خوف من الاهل
عشان مصلحة العيال
طيب لو انت بتخاف وبتراعى مصلحة العيال ما تقعد فى علبك وتستحمل قدرك بما انك ما عندك الجرأه تغيره
غايتو لو شلتوا عيونى وشوفتوا شكلكم فيه بتنتحروا عديل
وبقيت بحس انى متأهبه للافتراس لاى مخلوق منهم حتى لو بيهزر معاى
ممكن يتفاجىئ بردة فعلى القويه
حليل زمن كنت هاديه وكول
كنت دايما بقول التجارب بتقوينا وبتعلمنا
لكن الحقيقه التجارب دمرتنى داخليا
وفقدتنى الثقه فى مخلوق اسمه الرجل
وبستعجب انا كيف ممكن اعرس وابنى بيت وجواى الغضب دا كله القابل للانفجار من اتفه سبب
هل فعلا حلقى الانسان اليبرده لى ويعالجنى منو
ولا حلقى انسان يفجره ويروح ضحيته

هى ما كانت داقه الطربيزه عديل
ولا هى شاذه قدر دا
ولو حتى كانت داقه وشاذه
ما شى مباح الزول يقول لاى زول فى وشششششششششششه اى شى
فعلا الملافظ سعد
وفى فرق بين ان الانسان يكون واضح ويكون وقــــــح
من ايام قريبه شديد مشيت عرس مع اختى
وشكل اختى كانت عايزه تعمل لى شرك
وعزمت زميل ليها بيفتش على عروس
وعشان عرفانى برفض الطريقه دى ما كلمتنى
ولحد ما وصلنا وقعدنا قالت لى فى فلان جاى
قولت ليها كده يعنى
مافى مفر للزوغان
وجيه وقعد فى الكرسى الفى وشى
ومهما توقعت من توقعات انه حيبدى الحوار بشنو
كانت دى طفره
قال لى بلا مقدمات الكرش دى تنزليها
طبعا برغم انى صعقت بالجمله
لكن بكل برود قولت له وانت شنو الحشرك بكرشتى اصلا
انزلها ما انزلها
كرشتى وعجبـــانى
قام سكت وكويس انه سكت
ما كان ناولته بالصحن القدامى فى وشه
,,,
هى ناس بقيت الوقاحه فيها ميزه
ولا بقوا الــــوقــحــــيـــن متلحينى فى حياتى
ولا المشكله شنو فى ااعتقادكم
....
بلقى نساوين متزوجات كتيره مدبرسه بسبب تعليقات ازواجهم عليهم
نحنا ممكن ننتقد عشان نحسن الانسان البنحبه
لكن بدون نجرحه
ولا نسيئه
النصيحه ما معناها الاهانه
ولا الوضوح معناها البجاحه
ولا الحريه معناها الانحلال
وكرشتى كان كنت عايزه انزلها ما حنزلها
ويطير العرس والعايز يعرسه

http://www.youtube.com/watch?v=pJffF8B_Kjs



خساره انى فشلت القى انسان اهدى له الاغنيه دى
فشلت بكل المقاييس انى احقق امنيتى الوحيده فى حياتى
احتمال عشان مركزه فيها شديد وختاها ساس عمرى
لو كنت تجاهلتها كانت جات براها زى باقى الامور
الاقسى من الجرح هو اننا نتجرح فى نفس الجرح تانى وثالث ورابع وخامس
لدرجه انى بديت اقرب اتوسل لاى انسان بيقرب منى انه ما يجرحنى لانى خلاص ما مستحمله اتف ألم
اكيد تكرار الجرح يعتبر غباء والاستمرار فى امنيه حطمتنى وليسه بتحطم فينى اكبر غباء
ببساطه ممكن الانسان ينساب فى مجرى البشريه ويبقى زيهم
عايشين وما عايشين
لكن انا حابه اكون عايشه وسعيده وراضيه
هل دا عيب ولا صح
هل حكتفى اكون ام من زوج ما مقتنعه بيه لكن هو كويس
ما اظن بقدر برغم كل المحاولات المستميته انى اعملها
لكن بفضل اموت وانا بفتش وشحت ربنا فى كل صلواتى ان ينهى حياتى اذا مافى امل فى لقاء المنتظر
برغم المنتظر دا انسان طبيعى جدا
صادق ومحترم ومناسب
ديل بقوا اصعب صفات ممكن تتلقى فى زمنا دا
غايتو ما معروف الجاى يودينا وين ونرسى على شنو
لكن الاغنيه ابداع حد الألم
لمن عملت لى اعراض ذبحه عديل
اااااااااااااااااخ انا
وصلت مرحله ما توقعت اوصلها وجاهله السبب شنو
هل انا السبب ولا غيرى

مشاعر تشاور
تودع مسافر
مشاعر تموت
وتحيى مشاعر

.,.,.,
يادى يادى يادى
المشاعر
يادى يادى يادى
المشاعر
.,.,.,
اللى غرب نفسه سافر من ألام المشاعر
واللى نفسه يعيشها تانى هى هى المشاعر
واللى داره بابتسامه من عينى مره المشاعر
واللى نفسه قصاد حبيبه يبان عليه حبة مشاعر

.,.,.,

يادى يادى يادى
المشاعر
يادى يادى يادى
المشاعر
.,.,.,
اللى بيفكر يفارق بس لولا المشاعر
واللى سامح حد جارح راضى زل المشاعر
واللى ايده فى ايد حبيبه بس مش حاسس مشاعر
واللى راجع بعد لما انتهى وقت المشاعر

.,.,.,
يادى يادى يادى
المشاعر
يادى يادى يادى
المشاعر
.,.,.,
كل حاجه ناقصه حاجه وانت مش جنبى حبيبى
نفسى اعمل اى حاجه بس ترجع لى حبيبى

,.,.,
مشاعر تشاور
تودع مسافر
مشاعر تموت
وتحيى مشاعر

.,.,.,

i wish if i can stop feel this feeling coz it's killing me every moment

لا اريد ان اتذكر كيف كانت
ولم اعد اعرف كيف سوف تكون
وهل من الممكن قلبى بيها سوف ينبض ويعود
,.,.,.,
اصبحت كثيرا اهرب من ذكراها
واجد نفسى اناشدها صراخا صامتا لتفارقنى
فلم اعد انا من تريد ولم تعد هى ما اريد
اردد بكل حنق حسبى الله ونعم الوكيل
واتمنى لو استطيع ان اعفو
ليتنى استطيع ان اعفو
علها تبرد بداخلى وتستكين
,.,.,.,
يقولوا العديد اننى المخطئه
لو كان الوضوح خطىء فبلا شك انى مخطئه
لو كان الحب والصدق اثم فإنى أثمه
لو كان كونى انا جرم فإنى مجرمه
.,.,.,.

حادثتين فى السودان كانوا اكيد لكل شخص اتوجد فى نص معمعتها قصه وموقف
,.,.,
اولها وفاة جون قرنق
كنت مشيت البنك ايام كان مواعيده ثمانيه صباحا ما تسعه زى حسى
وكنت ما بسوق كان فى سائق الشركه معاى
ولمن واقفه فى الشباك اصرف شيك الدولار الامور بديت تجوط فى البنك
واعصابى اضطربت لانى ما فهمت الحصل شنو
ولفحت القريشات الناولنى ليها موظف البنك وجريت على العربيه
واتذكر ان فجئه بتاعين المرور قلبوا الشوارع فى كل اتجاه
المهم الناس تقوم جاريه وبس
مكتبنا ايامها كان جوا فندق الهوليداى فيلا
قطعنا شارع النيل برعب فظيع والناس الماسكين الرشاشات فى نص الزلط
غايتو فى لحظه دى الخلعه بتكون مخليه الزول زى الاهبل
لا بيسمع ولا بيفهم ولا بيتكلم ولا حتى بيحس
وصلت المكتب وحمدته الله لقيت اخويه قاعد فى الشركه
وكان باقى الموظفين اصلا ما وصلوا
اتحبسنا برانا فى مكتب مع الناس الاتحبست فى الفندق
وبقينا نحاول نتابع فى الاخبار من النت
ونعاين لدخاخين فى السما
ونطمن على امى كل شويه بالتليفون لانها براها فى البيت
ونبهناها تقفل الابواب سمح وما تفتح لاى مخلوق
لحد قريب العصر
وكانت الخرطوم فى حالة سكون عجيب
سكون حزين
وبديت الناس تزحف على امدرمان زحف عديل بالرجلين
شى يعصر القلب بالجد كان
الطلاب والطالبات وموظفين وموظفات
فى عربات خاصه قليله جدا كانت بتتحرك
مافى مواصلات بتاتا
اتحركنا انا واخويه بعربيته
وكانت العربات زى الماشيين برجولها برضو وسط الحشود
لمن قطعنا الكبرى ياداب حسينا الحياه رجعت لشوارع
مامفروض اى زول يتمنى الموت لاى مخلوق مهما اختلفنا معاه
ولا الدمار والخراب والشغب والحطام
معقول فجئه يبقى اللون الابيض لمجرد انه ابيض جرم يستحق الدق والقتل والاهانه
ربنا يجازى الكان السبب اصلا وخلق بين قبائلنا الكره دا
ما بتذكر الامور استقرت تانى يوم ولا لا
,.,.,
لكن الحدث التانى فعليا كان اسوء من الاول
وهو كان حق المرتزقه الدخلت امدرمان
اليوم دا اظن كان سبت
وكنت معزومه غدى فى قعدة نسائيه فى الواحه
وكنت بالعافيه اقنعت امى انها توافق لانها بترفض البرامج دى والصحبه ولا تعترف بيها بتاتا
حنست صحبتى سحر برغم انها شغاله تنزل عليه ونمشى سوا الغدى
وفعلا اتحركنا وليسه داخلين بنسلم وقبال اقعد تليفونى رنه
وفى نفس اللحظه تلفون صحبتى سحر رن
وفجئه التليفونات الباقيه بديت ترن
لمن رفعت لقيته اخويه قال لى انتى وين
استعجبت قولت ما ممكن يقولى خلاص كفاكى كده ارجعى وانا حتى المويه ما شربتها
قال لى سريع ارجعى البيت البلد معكوكه
وكان برضو اهل صحبتى قالوا ليها كده
وباقى البنات نفس الشى
ان المفروض الكل يقوم جارى
برغم صاحبة البيت قالت اقعدوا اضمن
لكن امى كانت براها فى البيت ونحنا بيتنا فى نص الجوطه كان
وامى على حسب كلام اخويه من صوت الرصاص منهاره بالبكى
وهو اتحبس فى بيت اخويه جنب الاهليه ما قادر يطلع
اول ما طلعنا الشارع انا وصحبتى ما قبل يودينا بانت شرق الا ركشه
واتفقنا يوصل صحبتى حى العمده ويودينى بعديها
لمن جينا ندخل الشوارع لحى العمده كانت مقفله عديل بالزحمه
وكان القيامه قامت
امى كل ما اتصل بيها ما افهم شى من البكى
واسمع صوت الرصاص فى التليفون
منها قولت لسحر صحبتى انتى اخوانك فى البيت قاعدين
ارح بيتنا نلحق امى
ومنها مشى صاحب الركشه بشارع المورده
وكنا الوحيدين الداخلين والعربات كلها جاريه العكس
لمن بتاع حافله بدى يكورك فى بتاع الركشه انت ماشى لموت
وفعلا لمن قربنا على المجلس الوطنى فى حاجه اترزعت لا عرفنا قنبله لا صاروخ لمن الركشه دى اطوطحت بينا فى نص الشارع
وكان ناس الكلاشينكوف فى نص الشارع واقفين فى حالة استعداد لضرب النار
بتاع الركشه الله يدى العافيه ويستره دنيا واخره قدر وضعنا وان امى فى البيت منهاره لازم نلحقها
منها دخل فى نص الزقايق اللى مافيها صريخ ابن يومين
الناس كلها ادسدست وما بيتسمع الا صوت ضرب الرصاص والكلاشينكوف
غايتو فيلم اجنبى عددددددددددددددددددددددددديل كان
لمن وصلنا باب العماره الساكنين فيها
اديت لبتاع الركشه 50 جنيه عديل لانه جازف ووصلنا ودعيت له ربنا يمرقه بالسلامه
وحاولت افتح باب العماره
لقيته متربس من جوا
سجمنا
وادق التليفونات الخطوط معلقه
كر علينا
اتحبسنا انا وصحبتى فى الشارع
ونرزع بالطوب والزلط الباب
ولا فى زول عايز يهببنا
لمن قررت اتلب بالحيطه عشان افتحه
لقيت زول من جيرانا اخيرا سمعنا وجيه فتحه لينا
جرى اخدنا السلالم ولمن وصلت البيت ودقينا الباب
امى كانت وصلت فعلا مرحله الانهيار
ومع شوفتى بديت تكورك وتبكى وتلطش فينى وتلطش فى روحها لمن وقعنا فى الواطه انا وهى وصحبتى
وبدينا نهدى فيها ونكب فيها مويه عشان تفوق من الهستيريا المسكتها
غايتو بالجد الناس البتعمل العمايل السوده دى فينا ليها يوم
نحنا ذنبنا شنو ولزمو اصلا شنو
الناس ابسط امنياتها تعيش فى امن وامان بالقليل
وياها مستحملين البلا البنتكوى بيه من البالى بالكم
اقلها يجوا على نفسهم شويه ويوفروا لينا الامان
بدل تبقى موت وخراب ديار
غايتو عيشنا يوم وليله ولا لبنان ولا فلسطين
امدرمان بقيت منعزله ومنبوذه من الخرطوم وبحرى
ربنا يرحم الماتوا فى الحادثتين ديل
ويستر على باقى عباده ويحلها من عنده بلا دمار وقتل
رحمتا بالنفوس الطيبه الماليها ذنب فى اى شى وهى البضيع اول شى

لمن كنا فى الجامعه
ونكون زهجانين ودايرين برنامج
نقوم نقرر نمرق نتفسح فى اى حته
لو حتى اتمشينا ساى فى الشارع
المهم كنا حوالى تسع بنات
حليل زمن الاحفاد
كنا فى اول سنه ثانيه او اخر سنه اوله
ما متذكره
وصادف اليوم داك اننا كلنا مفلسيين
وصميمنا نعمل برنامج
وحده صحبتنا قالت نمشى حته فى امدمان جوا
ما متذكره بالضبط
احتمال بيت صحبتنا فى حى العمده
المهم قالوا نركب دفار من قدام الجامعه
وننزل فى الشهده ولا البوسطه ما عارفه ونركب تانى
اها كلنا مرقنا الفى جيوبنا وطلعت فكات
بالحتيته حتوصلنا
ومن البنات صحباتنا وحده قالت
بشرط,.,.,.
اول ما ننزل الشهده تقوموا جارين على الموقف البهناك دا سريع
وندفس وسط الناس
علشان ابوها دكتور وعيادته فى الحته ديك ولو واقف فى البلكونه ممكن يلمحنا
فلازم اول ما ننزل نتفرق ونتلاقه فى الموقف البعيد التانى
,,,
وقفنا الدفار
ومع الدفر شويه من مجموعتنا ركبت قدام
وشويه ركبت فى الجهة التانيه
وانا وصحبتى المقربه شوفنه لينا كورنر وقعدنا فيه
وبسبب الزحمه الشديده ما بقينا شايفين بعض
ولمن جاء الكمسارى
انا وصحبتى قولنا له بهناك
وطلعوا البهناك يقولوا البهناك
والبهناك حدفوه على البهناك
انا ذاتو ما متذكره هى القروش اللميناها مع ياتو هناك
ولا كل زول معاه حته ولا شنو الحاصل
مع حوست الكمسارى بينا
كنا وصلنا الشهده
اها على حسب تحذير صحبتنا
استعدينا للانطلاق وبقوه
لان الحظ التعس خلى سواق الدفار وقف قدام العياده وش
بقى كل زوله شالت رجلينها وقالت يا فكيك
جرينا من تتليبنا للدفار
كل اثنين فى اتجاه
انا لحظته مع العمليه الانقساميه والفلسعيه دى
ان الكمسارى بيكورك
طبعا من اهم الشروط الحربيه انك ما تتلفت لوره
انا كنت سمعته كواريك الكمسارى
والشمار غلبنى ولفيت راسى
لقيته بيشوح فى اتجاهات ما معروفه
قولت الزول دا جنه ولا شنو
المهم بعد ما اتجمعنا
سالنه منو الدفع القروش
الطامه الكبرى
ان مافى اى زول فينا دفع
ويادووووووووووووووووووووووووب فهمته
الكمسارى داير يموت ليه
والله كانت نصبه غير مقصوده
ربنا يسامحنا

نمشى وتمشى معنا الحياه
نسير ونترك ورائنا وعاء
نخلف فيه كل ما لطعمه نكهة العناء
نسعى لنكسب كل هناء
ونقضى على اى وباء
نحلم ونتمنى ان نعيش فى سماء
لا يتخللها اى داء يحتاج لدواء

لكن

نظل نمشى ونمشى
ونسير ونجرى
ونقع ونبكى
ونقف ونحبى
لنعود فنمشى

نبدأ فى ان نتراجع ونحاول ان نتمعن فى معنى البقاء

وكيف ان من المحتمل اننا اخطئنا فهم الوعاء

وان فى حوزته ما يستحق البكاء

وان الجرح لم يكن كله دماء

فلقد نحت فيه معانى ليست هباء

القرار الصعب حين تجهل مصيره
وتحتار هل هو صواب ام خطىء
حين تتقاتل افكارك مع احساسك
وتشعر بتمزق يشل شعورك بالحياه
حين تخاف من الأتى
وتشتاق لاندفاع بلا توقف
كم يصبح المشى مؤلم حين نمشى بلا دروب
كم يصبح الوقوف معتم حين يحتوينا الشرود

لم أعد أكترث لخطاى
فلم تعد هى القضيه
أصبح تفكيرى منصب فى كيفية ايقاف هذا النزيف
كيف نستطيع ان نجنب فلذات اكبادنا هذا المصير
كيف نحمى ابنائنا من موت الضمير
كيف نعلمهم الحب النبيل
وان الاحترام ساس جميل
لا داعى ليعيشوا الحياه بقسوه
ويدفعوا ثمن اخطاء لم يرتكبوها
لماذا نورثهم كل هذا الضياع
ونترك لهم بحور اوجاع
رحماك يا إلهى
فنحن فى حوجه لعونك فى ازالة هذا الشقاء

بعد 18 سنه قرروا الانفصال
وبينهم من الاطفال اربعه
اكبرهم ممتحن لجامعه واصغرهم فى الاساس
اتذكر زواجهم وتعايشت افراحهم وولادة اطفالهم
لماذا بهذه البساطه نشتت حياتهم
ونمزقهم لفريقين يتنازعوا فى جسد واحد
الاطفال لا ذنب لهم بفقدانكم المشاعر والحميمه
الاطفال ما سبب فى جفاء دواخلكم وشقائكم
حين يختار كل طرف الاخر فلا يقتصر الامر عليكم
من حق اطفالنا ان يعيشوا فى اسره متماسكه تحويهم بدفئ
لماذا نحولهم لاسلحه كى يمزق كل طرف الاخر
لماذا لا نتحمل مسئولية اختيارنا وحتى لو فشلنا فى الاستمرار
لماذا لا نراعى مشاعرهم واحاسيسهم ونبتعد باقل قدر من الخسائر والاوجاع
ونتركهم ينعموا بحب الطرفين واحترام الطرفين وتقدير الطرفين
ما الحوجه فى الانتقام بزرع هذا الكره والوجع فى دواخلهم
هل فكرتوا ولو للحظه بمشاعر طفلك وانت تمزقه بينكم
تعاطف الابن الاكبر مع ابيه
وجلس فى بيت تم اخلائه من الاثاث
لان الزوجه اصرت على انه حقها واخذته
نام بجانب ابيه فى الارض
وترك امه تصحب باقى اخواته بعيدا
كيف نتجرأ لنقف امام ابنائنا ليرونا نتقاذف بالشتائم ويتطاول الامر للضرب المتبادل
ما الذى تعلموهم من هذه اللقطات والمواقف
تنحتوا فى ذكراهم ابشع المشاهد
وكيف يتقاتل اعز من لديه فى الدنيا
يتشقق الجدار بقسوه لتتسرب فيه الدموع بدواخلهم
لماذا لا تلمحوا هذا الرعب البيشق قلب اطفالكم فى هذه المواقف
كيف تدعون انكم اباء وامهات وانتو خاليين من معانى هذه المسميات

اكسير الحياه
فحين يحتوينا يصبح كالدرع
نتصدى بيه كل الاهات
وينفض عنا كل الدمعات
ما اجمله حين ننبض به
ليست فلسفه وتنظير
فعن تجربه كم احب ذاتى حين يكسونى
وبهجره تهجرنى الروح
لا اعلم هل كل البشر هكذا
ولكنى على يقين ان حياتى لا تستطيع ان تحيا بدونه
فالحب لا نستطيع تصنعه
فهو من يصنع ملامحنا ويرسم دواخلنا
كل اوجاعى منحوته بسببه
فهى رحله بحث فاقت طاقتى وامكانياتى
وبرغم كل الانكسارات مازلت ابحث
واناشد لحظه عشق صادقه تستحق كل هذا الدمار
ما اسهل ان نعيش الحياه كما يريدون
نتزوج وننجب اطفال ونحيا مسيرون
فما الفائده اذا ام اذا لم

انهكتني الجولة التي قمت بها في سوق واقف ذات مساء، فدلفتُ إلى شارع المقاهي تجاه مقهى (أهل شرق)،
لمحتها.... هوليودية بملامح لبنانيه.... إتجهتُ نحوها.... كانت تجلس وحدها على غير عادة أهل ذلك
المكان وقد أطلقت لشعرها العنان كغجريات شرق أوربا....كانت ترتدي قميصاً عقدت طرفيه الأسفلين وتركته
مفتوحاً يُظهر طرفي نهدين تمردا على سوتيانه بلون سُكري....بنطالها الجينز يقاوم ما يحتوي حتى لا يفلت
منه.... قُبالتها(تقف) شيشة ذات مبسم ذهبي وقد أمسكت أناملها مُلتقى المبسم مع الأنبوب الآتي من وعاء الماء، وأطبقت على المبسم نصفيْ كرزة.
المكان يعج بالرواد من مختلف الجنسيات....الدخان المنبعث من الصدور يرسم في الهواء حلقات وأشكال هلامية شكلت لوحات لا إطار لها.... إقتربت منها وبادرتها مُحيياً:
ـ مساء الفُل والياسمين.
ـ مساك نور حبيبي.
حبيبي؟....رعشة تخللتني....ما اعتدتُ عليها عارية هكذا دون مقدمات..اللبنانيون خُلقوا معسولي العبارة، حلوى الكلام.
ـ أجلس شيش عيني.
ـ ميرسي حبيبتي!
حبيبتي حته واحده كده؟....أصابتني العدوى في لحظة....الحميمية كيمياء لا تُقاوَم....هي كهرباء تسري
في الجسد لا ندري من أين تسربت إليه!
وضعتُ كاميرتي وأوراقي على الطاولة بالقرب من علبة مالبورو وولاعه رونسون وأنا أقول:
ـ سجاير وشيشة؟.. كتير على ها الصدر الحلو.
ـ زهج..إيش نسوي....أنا بحب السمر على فكره.
يأاااااه..إنتابني نوع من الزهو كذلك الذي ينتفش له ريش الطاِوس عندما تقترب منه طاؤوسه.
إعتدلت في جلستي وسألتها:
ـ أراك وحيدة؟
ـ طوني تأخر..مواعيدنا ع الستي.
شيئين لم أحس بهما معها، الكُلفة والزمن....حدثتها عن أيام خوالي عشتها في بيروت، إستمتعتُ فيها
بكل لحظة قضيتها هناك، والزكريات التي ما زالت تحتل مكاناً في الذاكرة وآخر في القلب،لأمكنة
جميلة وناس أجمل. حدثتني عن طفولتها ومراهقتها ولونها المفضل وحبها لسوداني كان يدرس بجامعة
بيروت.
لفتُ نظرها لفتاتين تتجهان نحونا،إحداهما تشير إليها....إستدارت بنصفها الأعلى وصاحت:
ـ هاااااي طونيييييي!
وقفزت نحوهما..وقبل أن يكتمل فاصل(التبويس) على الخدين وما بينهما، كنت قد حملتُ أشيائي وهربت،
هربتُ إلى مكاني الأثير مقهى برزان....هناك بالقرب من أم راشد بائعة المأكولات الشعبية، التي لا
يظهر منها سوى عينيها وكفيها..(دقة قديمة).
إنتبذتُ ركناً قصياً من المقهى،صفقتُ لسعود الجرسون وصحتُ طالباً كوباً من الشاي الأخضر وزجاجة ماء،
وبدأتُ أكتب حصيلة الجولة.

وين يا حبيبة مشتااااقين وينك
بوست لزيز ودموا خفيف زيك
متابعين الحكى

اقعدى عافية

Quote: [Bاقعدى عافية

ألفين سلام وضاحه

الزوله دي نايمه ، وأعصابه راااااااايقه (نوم العافية)
تاني ألفين سلام

...........................................( صَدْمـــة No )...................................................


أقبلت نحوي....تفحصتها في اقترابها..الحِنطة استعارت شيئاً من لونها الذهبي , والشاعر الذي ذهب إلى أن عيون المها بين الرصافة والجسر جلبن الهوى من مصدرٍ يعلم نصفه ويجهل الآخر ما أظنه رأى إلا عينيها, بل يذهب بي الظن إلى أنه اتّفق عليها مع من قال إن العيون التي في طرفها حورٌ قتلننا.... أما ذلك المثَّال الذي جنح به الخيال فأبدع ذلك التمثال ثم تأمله وقال: ( وجعلتُ الشعر كالشلالِ), حتماً قد استوحى إبداعه ذاك من شعرها الذي يلزم بعضه الكتف وبعضٌ يتمرد.
إقتَرَبَتْ أكثر.. سبقها عطرها إليْ كون الريح مواتية فتسلل لخياشيمي..إعترتني نشوة أعقبها خدرٌ لذيذ.... إستفِقتُ على جلوسها قُبالتي ثم وضعها حقيبتها على الطاولة التي ترقد عليها أشيائي.... داومتُ على اختلاس النظر إليها.. أخرجت مجلتين من حقيبتها الضخمة, وضعت إحداهما على الطاولة وبدأت تتصفح الأخرى.... وعلى طريقة ( ممكن اشارك) تناولتُ المجلة التي ترقد على الطاولة, فأطْلقتْ صيحة بل صرخة Nooooooooo !!!!!
إرتجفتُ.....!
سقطت المجلة من يدي....!
فغرتً فمي في بلاهه..بدأتُ أحاسب نفسي على غبائي وتصرفي البدائي بينما استغرقت هي في الضحك بطريقة هستيرية...طريقتها لفتت أنظار وانتباه كل الجالسين بمقهى برزان.... بدأتُ ابذل جهداً مضاعفاً لاستعادة توازني حتى أقنع أصحاب العيون المصوبة نحوي بأنني لم ارتكب شيئاً يقع تحت طائلة التحرش الجنسي!!! وإذ بها تفاجئني قائلة من خلال نوبة ضحكها:
ـ إزيَّك يا زول!
ـ يخرب بيتك!!!! إنتِ إنتِ إنتِ سودانيه؟؟
استغرقت مرة أخرى في الضحك.. حاولتُ مشاركتها ذلك الفاصل إلا أن شعورٌ أهبل كان يعتريني ولم أكن قد تجاوزت صدمةNO بعد, وقد ارتسمت خارطة جديدة على ملامح وجهي.....ثم بدأتُ الرجوع إلى ذاتي شيئاً فشيئا.

ساره.....تقيم في النرويج وتعمل في المجال السينمائي وقد أتت للدوحة بدعوة من مهرجان(قطر ترايبكا السينمائي)..لم تمض دقائق معدودات على صدمة (نو) تلك حتى أصبحنا وكأننا نعرف بعضنا من سنين.. تناولنا عشاءنا في مطعم(سُوي الآسيوي)أعقبته جلسة بقهوة برزان امتدت بنا حتى الساعات الأولى من صباح اليوم التالي.. أحتسينا أكواباً من الشاي بكل ألوانه وأفرغنا عدداً من زجاجات الماء, وكانت طاولتنا عامرة بفطائر أم راشد المُحلاّه بالعسل,, كان كلٌ منا يتحدث وكأنه يسابق الزمن ليُملِّك الآخر كل شيء عن حياته وذكرياته.. الطفولة والشباب وكلية كمبوني..الغربة والطيب صالح والمؤتمر الوطني وطارق المكي..وأشياء وأشخاص وأشياء...............

إنه حال السودانيين في المهجر, خاصة عندما يلتقون بغير موعد....... وبغير سابق معرفة.

____________________________________________________
نقلاً عن ( يوميات واقف في سوق واقف 2009)

اخى محمد
نورتنا بطلتك وقصصك الجميله
اتمنى المزيد منك
يديك الف عافيه


وضاحه سكره
مشتاقين بالاكتر

افتقدناك يا رانيا .... وضاحة وأنا وكثيرين
قلنا نحرك البوست عشان نخليك قريبة
عودتينا على حضورك البهي , لذا يزعجنا غيابك

كامِل الوُد

.................................., وكانت المندولة هي الثمن ..................................

مسز ألِن.... زميلتنا في العمل إنتهى إنتدابها وغادرتنا لبريطانيا بعد أن تركت طيفها في ممرات مكاتبنا, وبعد أن تركت بصماتها في مجال العمل بحكم تأهيلها وخبراتها في مجال تخطيط التدريب..
سافرنا معاً في رحلة عمل إلى سلطنة عُمان فكانت فاكِهة الرحلة لما تمتاز به من خِفة ظل وتعليقات مرِحة وذكية..غادرتنا مسز ألِن فعادت بيئة عملنا لجفافها..كانت تحب التجوال في سوق واقف.. نهاية عمل يوم الخميس من كل أسبوع أجدها تقف بباب المكتب قائلة(HI MAKKI , WE MEET AT THE (R.V ..فأفهم إن لقاءنا سيكون في نقطة المقابلة .. قهوة برزان بسوق واقف, واعتدنا على التلاقي في السادسة مساء....هي حركية تحب التجوال في السوق فمن سوق الصقور إلى سوق الطيور, ومن من سوق التوابل إلى سوق التمور, ولكنها تعطي أكبر مساحة زمنية لمحلات المصنوعات الشعبية التي تشكل جزءاً من إهتماماتها وقد اقتنت العديد منها,
كما إنها تقوم بتسجيل العديد من اللقطات بالكاميرا التي لا تفارقها.

في حفل الوداع الرسمي الذي أقيم لمسز ألن أهديتُ لها ( مندولة ).... ما رأيتم كيف انبهرت واحتفت بها وهي على المنصة!.. ما رأيتم كيف احتفلت مسز ألن بهديتي المتواضعة في نظري, وربما في نظر بعض الحاضرين!..كم رددت جنبات القاعة WOW مع مسز ألن!!

قلتُ لمسز ألِن ونحن على المنصة أقدم لها مندولتي القيِّمة في نظرها, قلتُ لها بإنجليزية بسيطة إن النساء في بلادي تشكيليات بطبعهن, يتوارثن هذه الفنون ولا يدرسنها في كليات أو معاهد.... ٍسألتني
عن إستخدامها وهي تقلبها بيديها.. أجبتها بأن الرجال في ريفنا يذهبون باكِراً لحقولهم , وبعد أن تودع المرأة أطفالها الذاهبين إلى المدارس , تعتني ببيتها البسيط وتصنع الطعام وتضعه في هذه المندولة وتلحق بزوجها في الحقل (ما زلنا على المنصة الرسمية وقد أخذنا زمناً طويلاً على حساب الإحتفال)سألتني عن نوعية الطعام الذي تصنعه المرأة ؟ قلتُ لها إن ذلك (يتوقف على أداء الرجل في الليلة السابقة)....
إنفجرت مسز ألن بالضحك وتراجعت حتى كادت تسقط من المنصة المرتفعة قليلاً عن أرضية القاعة....وضحك معها من فهم من الحاضرين.... كنت آخر من قدم لها هدية...شكرت الحاضرين (كونهم أهل الدار) وكنت الأجنبي الوحيد الذي يقدم لها هدية....قالت إن هدية (المكي) هي أجمل هدية تلقتها في حياتها...تلقت
مسز ألن في ذلك الحفل هدايا تزيد قيمتها عن خمسة آلاف دولار, أما مندولتي المتواضعة فقد اشتريتها في يونيو من هذا العام من سوق ابوجهل في الأبيض بمبلغ ثلاثين جنيهاً سودانياً لا غير.... تقدمت مسز ألن مني وقبلتني ثلاثاً على خدي الأيمن وقالت لي بأنها ستُعِد للمندولة مكاناً بارزاً في بيتها الريفي الذي اشترته حديثاً.

أُم العيال......التي تدرس (دبلوم دعوة) هذه الأيام, والتي أصبح كلامها لا يخلو من فتاوى طالبانية, حكيتُ لها عن كيف احتفت الخواجية بالمندولة, مركِزاً في حديثي (بانتِشاء) على القُبلات الثلاثة التي ظفر بها خدي الأيمن دون خدود الآخرين....وهي تلقي عليَّ نظرة حادة قلتُ لها إنه من باب (الإتكيت) كان علي أن أدير لها خدي الأيسر المظلوم لينال ما نال أخوه!!!

ردت علي وبسرعة فائِقه (كان عليك أن تغسِل وجهك ثلاثة مرات إحداهُنَّ بالتراب).


............... حساده

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(يوميات واقف في سوق واقف)2009م

الروعه محمد
غايتو انت تححححححححححححححفه بالجد
:)))))))))))))
بركه الجات بالتراب ما فنوك بالحصحاص
:))))

ذهبت إلى سوق واقف عصرأمس..ترجلتُ من سيارتي وانطلقتُ قاصداً سوق التوابل....المكان مفعم برائحة ثقيلة
على الرئتين،مزيج من روائح القرنفل والزنجبيل وحب الهال أو الهيل كما يسميه الخليجيون،أو الحبهان
كما نسميه نحن..يُضاف لذلك المزيج العطري الحاد الذي يعبق به جو المكان، روائح الزعفران والقرفة
وجوز الطيب....زنجبار والهند وكل بلاد التوابل حاضرة هنا.

زنجبار....جزيرة السحر الإفريقي والجمال الطبيعي.. جزيرة القرنفل..زنجبار التاريخ التي حكمها
السلطان سعيد بن سلطان واختارها عاصمةً لملكه بدلاً من مسقط، فأصبح يتبع إسمه لقب(سلطان عمان
وزنجبار)....تسألني عن كيف إنفصلت زنجبار عن عمان فأقول: إنه وبعد وفاة السلطان سعيد بن سلطان،
إختلف(ثويني) و (ماجد)، فاستأثر ماجد بحكم عُمان، وانفرد ثويني بزنجبار، فانهارت الإمبراطورية
التي أسسها أبوهما.... ما انقسم بلد واحد إلى بلدين إلا وكان الإنجليز ثالثهما.

كان جمشيد هو آخر من(تسلطن) على زنجبار من سلالة السلطان سعيد حتى وقت قريب، وقد قذفت به ثورةٌ
إفريقية عام 1964 إلى ضواحي لندن.... زُرِفت الدموع على العسل المسكوب في زنجبار وممباسة مثلما
زرفت على (اللبن) المسكوب في أشبيلية وغرناطة.... أخشى أن تنزف قلوبنا دماً على(الحُب) المسكوب
في جوبا وملكال و واو ومريدي ، رغم الفارق الكبير بين تلك وهذي!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
من يوميات واقِف في سوق واقف بتاريخ 12. 11. 2009 (هل كانت نبوءه مبكرة؟!)

Quote: قلتُ لمسز ألِن ونحن على المنصة أقدم لها مندولتي القيِّمة في نظرها, قلتُ لها بإنجليزية بسيطة إن النساء في بلادي تشكيليات بطبعهن, يتوارثن هذه الفنون ولا يدرسنها في كليات أو معاهد.... ٍسألتني عن إستخدامها وهي تقلبها بيديها.. أجبتها بأن الرجال في ريفنا يذهبون باكِراً لحقولهم , وبعد أن تودع المرأة أطفالها الذاهبين إلى المدارس , تعتني ببيتها البسيط وتصنع الطعام وتضعه في هذه المندولة وتلحق بزوجها في الحقل (ما زلنا على المنصة الرسمية وقد أخذنا زمناً طويلاً على حساب الإحتفال)سألتني عن نوعية الطعام الذي تصنعه المرأة ؟ قلتُ لها إن ذلك (يتوقف على أداء الرجل في الليلة السابقة).... إنفجرت مسز ألن بالضحك وتراجعت حتى كادت تسقط من المنصة المرتفعة قليلاً عن أرضية القاعة....وضحك معها من فهم من الحاضرين.... كنت آخر من قدم لها هدية...شكرت الحاضرين (كونهم أهل الدار) وكنت الأجنبي الوحيد الذي يقدم لها هدية....قالت إن هدية (المكي) هي أجمل هدية تلقتها في حياتها...تلقت مسز ألن في ذلك الحفل هدايا تزيد قيمتها عن خمسة آلاف دولار, أما مندولتي المتواضعة فقد اشتريتها في يونيو من هذا العام من سوق ابوجهل في الأبيض بمبلغ ثلاثين جنيهاً سودانياً لا غير.... تقدمت مسز ألن مني وقبلتني ثلاثاً على خدي الأيمن وقالت لي بأنها ستُعِد للمندولة مكاناً بارزاً في بيتها الريفي الذي اشترته حديثاً. أُم العيال......التي تدرس (دبلوم دعوة) هذه الأيام, والتي أصبح كلامها لا يخلو من فتاوى طالبانية, حكيتُ لها عن كيف احتفت الخواجية بالمندولة, مركِزاً في حديثي (بانتِشاء) على القُبلات الثلاثة التي ظفر بها خدي الأيمن دون خدود الآخرين....وهي تلقي عليَّ نظرة حادة قلتُ لها إنه من باب (الإتكيت) كان علي أن أدير لها خدي الأيسر المظلوم لينال ما نال أخوه!!! ردت علي وبسرعة فائِقه (كان عليك أن تغسِل وجهك ثلاثة مرات إحداهُنَّ بالتراب).

شكرا الأخت رانية
شكرا الجنرال ود المكي
وشكرا للجميع
ويا ود المكي أخوي يوميات واقف الفي سوق واقف دي رائعة.....
اها خدك الأيمن دي كان قدم أرضحال وشكوي عند المستشار شيقوق
قطع شك بدفعك غرامة...
محبتي لكم جميعا

Quote: and#208;رand#222;بركه الجات بالتراب ما فنوك بالحصحاص يعني يا رانيه الواحد (منفوخ ومنتشي) ينفِسوهو بي فتوى زي دي ! الحمدلله الما فيها (سلِخ وش) كُل الوُد

---

Post: #92 Title: Re: مواقف عصيبه ,.,., Author: محمد فضل الله المكى Date: 12-11-2013, 06:48 AM Parent: #91 Quote: [QUويا ود المكي أخوي يوميات واقف الفي سوق واقف دي رائعة..... اها خدك الأيمن دي كان قدم أرضحال وشكوي عند المستشار شيقوق الحبيب ود الطيب التحايا والأشواق لك يا خوي , ودشيقوق لابد ليهو فوق راي ! زمن طويل مختفي ! لا يكون عرَّس فوق أم مضوي ؟ .... باقي ام مضوي مجهِزه (الساطور والشوال) بشوفو يظهر ويختفي في بوستات التعازي بس , وأنا كايس (محامي يحامي ليَّه) ننتظر منك كل ماهو جميل مع بداية الربع الجديد والعام الجديد, فقد طال شوقنا لمداخلات سيادتو عمر, والذي ظل في اعتكاف بعد عودته من السودان لعله مرهق من حفلات التكريم الكثيرة التي أقيمت له وهو أهل لها لما قدم للكرة في السودان ونادي الهلال.... وكذا نحن في شوق لمداخلات المزنوح وام عروض الفاضلة منى خوجلي. التحية للماجدة رانية الشيخ