Post: #1 Title: عشان تشوفى يا حكومه بتوجعى الناس كيفين Author: رانيه محمد الشيخ Date: 09-29-2013, 09:14 PM Parent: #0
منقوله من صفحه لوىء المستشار فى الفيسبوك
تعالوا هنا يا أصدقاء .. خذوا (نصيبكم من الوجع) .. فلم يوجعني نص في الآونة الأخيرة كمثل هذا النص الذي خطه الأخ "حسام حيدر" لم أستطع حبس دموعي التي سالت لوحدها .. مصعب أنت لم تمت .. أصدقائك يكتبون لك لأنك حيٌ هناك فوق السحاب .. فالناس لا تكتب للأموات .. صديقك يكتب إليك و يهذي ودموعه تنهمر هو يبكي بألم ويضحك بصوت عالٍ ويمسح دموعه في ذات الوقت كمن أصابه مسٌ من الجنون .. يمازحك مزاح الأصحاب للإصحاب .. يخاطب شعرك المبروم وسفنجتك المقلوبة وفردة شرابك (الكل واحدة من بلد) .. يغازل (سغالتك) و( بياختك).. حسام وأصدقاؤه يشتاقون إليك يا مصعب! .. رد يا (لايوق) يا (غياظ) !! هذا ماكتبه حسام حيدر :
__________ مصعب ..نهارك سعيد ..كيفك ياغالي أنت مشكلتك شنو ؟؟؟ أنا أوريك مشكلتك أنك جيت في زمن غلط .. بس أنا عايز أعرف أنت سويت شنو بالضبط ؟؟!! بس ساي كدة يعني جاك الرصاص ..؟! أنت ذاتك لايوق ياخ .. ماتقاطعني .. جنك تقاطع ...بضحكاتك دي .. ماتضحكني معاك .. طوالي لابس سفنجتك الواحدة دي ماتغيرها أبداً ياخ أحسن منك إيدي (عبدالهادي) البيلبس جزم كل واحدة لونها براه ....ههههههههههههههه .. تذكر يوم إيدي جاء لابس فردة خضراء ..وفردة صفراء وهو التوم بتاعه جو لابسين سوا ومبرمين شعرهم ..أنت صاحبهم ماعرفتهم ههههههههههههههههه .. مقلبوك لكن .. تذكر يوم حكيت لي نكتة أدروب وقعدت تضحك في أهلي ههههههههههههههههههههه ..... يامعفن ... عارفك ساخر ...أنا ذاتي مستغرب الرصاص هد حيلك هنا كيف؟؟!! بعدين الليلة النهارية زي الساعة 12 كدة جيت جنب جوته مالقيتك المهم ح أمشي وأجي راجع ..الليلة يومك علي ح أعزمك جبنة ظاااااااابطة ..طبعاً ماحصل عزمتك ..لكن الليلة أنت معزوم ..أوع تقول لي ماشي وفي شباب راجيني حركات المثقفاتية والفنانين دي ههههههههههههههه بتغيظك مش يلا أتغاظ ...... وعلي فكرة كل يوم ح أتكلم معاك لو مابزعجك .. بزعجك مش ح أزعجك طيب..
Post: #2 Title: Re: عشان تشوفى يا حكومه بتوجعى الناس كيفين Author: رانيه محمد الشيخ Date: 09-29-2013, 09:17 PM
الشهيد ولاء الدين بابكر حسن الجاك والدته ترثيه ....
يا حلال العقد هداي هوام الليل لحاق الضعيف الحملو هده الحيل فراج الكرب زاد حملي اضحي تقيل وضاق واسع الفضاء كتر الاسي والويل جود بالجود والطف الدم دفر ذي سيل جنااااااي... كت داخراه للعوجة وزمانه الشين وكت راجياه سند لي وضي للعين رضعتو السماح الزين جنا الزينين وسقيتو الحنين ولدي الشفوق وحنين وريتو الصح بي وين ووين الكضب والشين حبابو الحر جناي ما احتار وقف بين بين اختار الشعب ابوه والشرفاء والطيبين وليييييدي.... ما سويت عوج صدوك يا جنايا وما اندسيت جريت اجابنت ياعشايا وما كت يوم شليق لقوك بي عصايا ولدن زين سمح ماحجت لي وصايا سرج خيلك مشيت للشمسو ضوايا عافيالك ضناي بلقاك في الجايا حاكمنا.... الراعي الامين بعرف هموم الناس مليان بي اساهم مو اصنج عديم احساس بحكم بالعدل مي قنبلة ورصاص بعد السرقة ليش كتلة ولاد الناس ياريس البلد حاكمنا في الخرتوم ماضق فقد الضنا وجعوا البيحمي النوم ولا حرقة حشا الامات والمظلوم لو كت بشر لكت طلقتو حكما شوم ومختار الشعب فيك والحي والقيوم ...
Post: #3 Title: Re: عشان تشوفى يا حكومه بتوجعى الناس كيفين Author: usama Babiker Date: 09-29-2013, 09:25 PM Parent: #2
Post: #4 Title: Re: عشان تشوفى يا حكومه بتوجعى الناس كيفين Author: محمد أحمد الريح Date: 09-30-2013, 05:03 AM Parent: #3
إنا لله وإنا إليه راجعون
نسأل الله له الخلود فى النعيم ولوالدته الصبر الجميل....
Post: #5 Title: Re: عشان تشوفى يا حكومه بتوجعى الناس كيفين Author: نادر Date: 09-30-2013, 06:24 AM Parent: #4
تحياتي يا أخت رانيا بستأذنك في الأغنية دي على روح الشهداء عرس الفداء (كلمات د.مبارك بشير) نلتقيك اليوم ياوطني لقاء الاوفياء... قد تنادينا خفافا كخيول الويح في جوف العتامير لك يا ارض البطولات... وميراث الحضارات... نغني اليوم في عرس الفداء هاهنا... يبتسم النهر القديم لبعانخي ولتهراقا وللمهدي...لعلي عبداللطيف ولعبدالقادر الحبوبه...للقرشي للصمود العزب في كرري وللموت الفدائي العظيم نذكر الان جميع الشهداء كل من خط علي التاريخ..سطرا بالدماء نذكر الان جميع الشرفاء كل من صاح في وجه الظلم ...لا لا لا لا نحن ابناؤك...في الفرح الجميل نحن ابناؤك...في الحزن النبيل ونغني لك ياوطني..كما غني الخليل مثلما غنت مهيرة تلهم الفرسان جيلا بعد جيل ونغني لحريق المك في قلب الدخيل للجسارة حينما استشهد في مدفعه عبد الفضيل نكحل اليوم مآقينا بمرواد الصلابة وبايمان كايمان الصحابة سوف نفديك دواما..ونناديك هياما فلتعش حرا أبيا.. في مهابة.
Post: #6 Title: Re: عشان تشوفى يا حكومه بتوجعى الناس كيفين Author: ادم شحوتاي Date: 09-30-2013, 08:39 AM Parent: #5
لهم الرحمة ولنا الصبر الجميل
Post: #7 Title: Re: عشان تشوفى يا حكومه بتوجعى الناس كيفين Author: د.نجاة محمود Date: 09-30-2013, 09:29 AM Parent: #4
Quote: أنا أوريك مشكلتك أنك جيت في زمن غلط ..
بالحيل يا صديقه بالحيل زمن فيه الاسلحة في يد مجرمين
اللهم ارحمه رحمة واسعة وعوضوه بشبابه الجنة وصبر ذويه ومحبيه
Post: #8 Title: Re: عشان تشوفى يا حكومه بتوجعى الناس كيفين Author: جمال الباقر Date: 09-30-2013, 10:31 AM Parent: #7
لهم الرحمة جميعا
Post: #9 Title: Re: عشان تشوفى يا حكومه بتوجعى الناس كيفين Author: رانيه محمد الشيخ Date: 09-30-2013, 12:08 PM Parent: #8
شاكره ليكم وجودكم ولجميع شهدائنا الرحمه وحنواصل تنزيل اهاااااااااااااااااااااااااااااااااااااااات الشعب
Post: #10 Title: Re: عشان تشوفى يا حكومه بتوجعى الناس كيفين Author: رانيه محمد الشيخ Date: 09-30-2013, 01:08 PM Parent: #9
قصيدة كتبتها اخت الشهيد اسامة : -------------------------------- تبكيك المهج يا اسامة قبل العين ياسيد الشباب يا ناير الخدين ان لان الحديد قلبك يمين ما بلين خبرك فاح يا اخوي حصل بلاد الصين ##################### من اجل الوطن قدمت انت الروح ولو كان بالمراد تب ما بتسيبنا تروح يا السامي في علاك عطرك جوانا بفوح بي فقدك يمين جواي تركت جروح ##################### تبكيك الجزيرة ود مدني والحلال تبكيك المدن حتى البدو والترحال ما بنرضى العفو لا دية الاموال دايرين القصاص في القامتو شامخة جبال ##################### تبكيك الولي ويبكوكا كل الناس يازينة الشباب بتضوي زي نبراس في درب النضال ختيت يا اخوي الساس
Post: #11 Title: Re: عشان تشوفى يا حكومه بتوجعى الناس كيفين Author: عبداللطيف شريف على Date: 09-30-2013, 02:49 PM Parent: #10
