رسالة قاسية مستحقة من الاستاذ عثمان شبونة لقادة الشرطة والجيش , ترى هل يستبينون النصح قبل ضحى الغد.

عثمان شبونة

نداء مباشر للبقية من أحرار الشرطة والجيش..!!
ــــــــــــــــــــــــــــــــــــــــــــــــــــــــــــــــــ
تذكرة:
ليكن الشعار: (أنا سوداني.. من كل قبيلة كياني) فالعنصرية هي موسيقى الشؤم..!!
خروج:
* الأمهات العفيفات احتملن شخب الدم الحار وصخب الأرواح التي حلّقت.. فاحتملونا..!
النص:
* حتى (شرطة السودان) لم تسلم من اللوث.. تكذب وتصف الذين رأيناهم يقتلون الأطفال والرجال والنساء بـ(المجهولين)..!! ما هذا العبط الثقيل؛ وكأن على رؤوسنا القنابير؟؟!!
* على قادة الشرطة الشرفاء أن يحفظوا كرامة هذه المؤسسة بعدم الإنزلاق في مستودع الوضاعة المأسونية.. باتت الأوهام (ديناً) لأمثال نافع والبشير والرهط (الفاجر)..! تذكروا التاريخ.. لا تفتحوا
لأولادكم فرصة أن يبصقوا عليكم.. فهذا يهيننا معكم..!!
* أي شقاء؛ وأركان البلاد الركينة تتساقط في قبضة القتلة من أتباع (التنظيم الإنقاذي البغيض)؟؟!!!
* ربما سيعرضون عليكم صور (المخربين) الذين صنعوهم وقبضوهم لغرض انكشف.. فقد كانت الغاية الجلية باسم (التخريب) هي استباحة القتل بالهمجية التي فضحتهم ، كما فضحوا من قبل في الجهات الستة...!
* صحيح.. حتى حفلة العرس لا تخلو من بعض المتفلتين.. ولكن (المخربين) الحقيقيين في السيناريو الفائت هم الأمن والمليشيات (الخاصة) التي انتزعوا منها (عصير الآدمية)..!!
* يا قادة الجيش والشرطة الشرفاء: هل انعدمت النخوة إلى هذا الحد المفزع من التآكل...؟! أليس ثمة رجل واحد رشيد منكم يخاف الله ولا يخشى أولئك الذين خسروا الدنيا والآخرة والشعب؟؟!!!
ــ كيف نحترمكم وانتم تغطون على المجرم المعروف لديكم باسم (مجهول)؟؟؟!! هل هذه هي المهنية التي تعلمتموها والشرف الذي أقسمتم عليه؟؟؟!!
* أليس من حقنا أن نحلم بأبطال من صفوفكم ينقذون الوطن من آل كوز الذين لم يكتفوا بحرب الله ورسوله؟؟!!
* يا عقلاء الشرطة الذين نعرفهم: أخرسوا ألسنتنا ببرهانكم إذا كان الشهداء من المخربين..!! كونوا رجالاً أو إذهبوا إلى الجحيم... وفي الإعتبار أن وزيركم متوعِّد (المخربين ــ الشماعة) لا يترحم على الشهداء مطلقاً ولو من باب (الخديعة)....!!!
* هل علمتم معنى (قتل النفس) أم عمتكم الدنيا بدنانيرها ورهبة سلطانها الجائر..!؟ إذا كان المال يفيد فكدسوا (رشاويكم) لعزرائيل...!!!

رسالة للدخري ود الضو
( الدخري و د الضو يعمل جنديا في الاحتياطي المركزي)

يا الضو أخوي
يا مجند
من زمن جهلك
ولي عز الشباب
يا مدجج بالدروع الواقية ...
و بالقنابل والحراب
يا مستف في الكوامر – بالأوامر
ومستني في كل شارع – وكل زاوية وكل باب
يا معكز يا مركز ..
يا معمر بالرصاص
كلامي ليك يا الضو أخوي
قولاً عديل
ما فيهو ميل
وفيهو يا ود عبدالفضيل
ليك للوطن الخلاص
..
وين هم الأعداء
الليهم اتمترست
ورفاقتك باتوا سهرانين
هل هم أخوانك الطلبة؟؟
الفي شان علوماً ترقع الحال الملتق..
مرق يا الضو إنت من الفصول ؟
هل هن البنوت؟
الوصوك أبواتك... قبيل
بالستره ليهن
والقومة ليهن
والموت دون الذل... يجيهن
والبهدلاب والمسخرة ؟
هل معقول اكون آ الضو اخوى ..
تبقى الرجالة مساككة بنوت
وهتك بيوت
واغتيال أطفال ؟
أفتح لي – آ الضو –
درب قلبك....
وأسأل لي ضميرك صاح
شوف الحرشوك على ولادك
متوهطين في العز ..
وات آ الضو حالك حال
شوفو كيف وطنك صبح وطنين...
وكيفن القسموهو فرحانين
شوفا مسخرة الرقيص بالكاكي
وشوفا ثرواتك كيفن ملوها بناكي
وإت آ الضو .. واقف تحرس الباب !
وان جوا طلاب حق
تدوس إنت على التتك
إموتوا شباب على ايديك
عشان يرقص بشير الشوم
على الفارغة
وتلمع أيادي وداد !!
تعال آ الضو – تعال نتمشى في الخرتوم
يا هم ديل رواكيبك والدنيا ممطورة
وديلااااك الطوابق – تتشابى في قصورا
إنت درت العلاج..
.حليل يا الضو اسبتالياتك
وانت درت السفر..
.كم يا الضو جنيهاتك؟؟
وان ساكت قعدت –
ما بخلوك وليداتك
دحين – آ – الضو –
أقيف دغري
ووجه سلاحك صاح
أقلو – لا تاذي أخوانك
أوامر مين بتتلقى ؟؟
أوامر من حرامية دم أطفالك؟؟
عساكر مين إحاسبوك..؟؟
حساب الله ثم الشعب أطول باع
حكومة ايه ؟؟
حكومة قهر
حكومة فقر
حكومة شوم حكومة عار
و حكام ايه ؟؟
لصوص العصر ...تجار الدين ؟؟
دمار ليك و عمار ليهم ....دة حكم الله ؟؟
قصور ليهم جحور لينا....
....دة قول الحق ؟؟
وحاة الحق و اسم الله
وحاة خوتك آلضو
مكانك فاضي بيناتنا
دحين ارفع سلاحك فوووووق
و اقيف بيناتنا يا الدخرى
دحين ارفع سلاحك فوووووق
و اقيف بيناتنا يا الدخرى
دحين ارفع سلاحك فوووووق
و اقيف بيناتنا يا الدخرى