Post: #1
Title: مرقنا ... مرقنا ... مرقنا ... مرقنا ...اتمنى ان اسمعها بصوت الفنان خدر
Author: بكرى ابوبكر
Date: 09-27-2013, 05:36 AM
مرقنا مرقنا مرقنا مرقنا
لا اتراجعنا ... ولا إتفرقنا
لسانا سلاحنا ... ايدينا درقنا
وعارفين مين بالضبط سرقنا
منو الغشانا ومصا عرقنا
منو الذلانا منو الافقرنا
ونحن عزاز من الله خلقنا
ونحن الليلة عشانو مرقنا
مرقنا مرقنا مرقنا مرقنا
أطلع ياخي مع أخوانك
أقلع حقك من سجانك
ارفع صوتك واقري بيانك
صبرك وعزمك هم بمبانك
دي الحرية عشاني عشانك
كنكش فيها بي أسنانك
ياما بكينا دمعنا شرقنا
عشان ننجمي وننسي أرقنا
نحن الليلة مرقنا مرقنا
قول للزول الما بغباك
جيت للسلطة من شباكا
من ما جيتنا قلبنا أباك
فجرت غدرت حتي أباك
ما بتشبهنا منو الرباك
نحن قعدنا كتبنا ورقنا
وإتعاهدنا سفنا حرقنا
مرقنا .. مرقنا ... مرقنا
الاسلام أصل الحرية
لاهو فساد لا محسوبية
وسوق الناس بي يد ملوية
جاك شبابا صافي النية
ما بتحميك مليون دورية
عايزين عزة ولقمة هنية
وما غشوهم بالحورية
عهدك لي مزقنا خنقنا
و######ك لي بي لسانو سلقنا
ونحن الليلة عشانو مرقنا
إنتو المرض السكن أجسامنا
انتو الغول الاكل أحلامنا
أنتو عذابنا وانتو ظلامنا
انتو العار في جبين اسلامنا
خلاص أختونا وما بنستغني
وربنا من الذلة عتقنا ... نحن الليلة مرقنا مرقنا
ياما زرعتو بينا الفرقة
وكم حرمتو علينا المرقة
وكم مسجون في سجنك يشقي
وكم مظلوم مشحون بالحرقة
ما بنخاف بنبان لا طلقة
قسما عظما مهما تبقي
إنت حتمشي ونحن حنبقي
كتائبك عاجزة وما بتسحقنا
لا بترجفنا ولا بتخعلنا
ونحن الليلة عشانا مرقنا
مرقنا ... مرقنا ... مرقنا ... مرقنا
حبيب عبدالعزيز
|
Post: #2
Title: Re: مرقنا ... مرقنا ... مرقنا ... مرقنا ...اتمنى ان اسمعها بصوت الفنان خدر
Author: وليد محمد المبارك
Date: 09-27-2013, 05:48 AM
Parent: #1
يا ريت لو كورال كامل
الغناء الزي ده حق مجموعة يا بكري .. ويتقال كما الجلالات او الهتافات
قصيده حلوه
يلا يا خدر لحن .. واجمع قروب
|
Post: #3
Title: Re: مرقنا ... مرقنا ... مرقنا ... مرقنا ...اتمنى ان اسمعها بصوت الفنان خدر
Author: Hadeer Alzain
Date: 09-27-2013, 08:12 AM
Parent: #2
وكمان رجاء يا بكري سود المنبر حدادآ على أرواح شهداء سبتمبر
هذه الأرواح الزكية الطاهرة التي مضت إلى بارئها راضية مرضية من أجلنا تستحق ..
إلى جنات الخلد .. أيها الفتية الصغار ..
|
Post: #4
Title: Re: مرقنا ... مرقنا ... مرقنا ... مرقنا ...اتمنى ان اسمعها بصوت الفنان خدر
Author: بدر الدين الأمير
Date: 09-27-2013, 08:51 AM
Parent: #3
| Quote: يا ريت لو كورال كامل |
بل بالضرورة يكون كورال
تابعت بالامس من خلال اذاعة مونتكارلو الدولية تقرير يتحدث عن ثورة السودان
واعجاب المزيعات بمفردة مرقنا لكن شرحوها كمرادف لمقولة تمرد وعندى المروق
اى الخروج اوقع وامضى واكثر تحدى و هى سودانية صميمة
|
|