Google Glass،،،،،،، الـحـقـونـا يـا نـاس ...

حدثني صديقي مسعود أنّ صديقه الحسن حكي إليه مستهلاً
حديثه بقوله، عارف يا مسعود،،، أنا من المِسياب، وفي
المِسياب من المِسياب التِحِت. أها عارف في اوّل إجازة لي بعد دخلت
الجامعة، قُلتَ أمشي أقضيها مع أهلي في المِسياب. ثمّ حكي هذا
الحديث الذي دار بينه ووالده:
الحسن: يابا، دايرين نجيبلنا تلفزيون.
أبو الحسن: الحسن،!!! يا ولدي التلفزيون دا شنو كمان ؟؟؟
الحسن: يا ابوي التلفزيون الوآآآآحد دا !!!.
أبو الحسن: نان ما توقعوا لي، هو شنو ؟؟؟.
الحسن: يا ابوي التلفزيون. حاجة كدي زي الصندوق، وفيها شاشة
اللت قزاز نشوف فيها الناس.
أبو الحسن: نشوف فيها الناس كيفِن يعني ؟؟؟.
الحسن: يعني يا ابوي نشوف فيها اللخبار، والغنايين ناس ود السافل.
أبو الحسن: وهُن ناس اللخبار والغنايين ديل وين ؟؟؟.
الحسن: يا ابوي في الخرتوم.
أبو الحسن: في الخرتوم !!!؟؟؟.
الحسن: أيِّ.
أبو الحسن: ونحن نشوفّن هنا في المِسياب التِحِت !!!؟؟؟.
الحسن: أيِّ.
أبو الحسن: الحسن يا ولدي، أكان كدي الجامعة دي لا تمشيها،
بتخربك علينا...

علّقت أحد حبوباتنا بعد مشاهدتها للتلفزيون لأوّل
مرّة بعد دخوله حِلتنا قائلة، يهووووون الله !!!،
عاد يا يُمّة الخواجات، بس ما فضلهُم إلا الروح...

كنت شغال وبسمع في الراديو، وفي إتنين في برنامج بيحكو
عن (حجوة) مفادها إنو في إمبراطور دكتاتوري طلب من
الناس يعدوا حبات الرز بعد كوموها كوم كبير قدُر جبال
الهملآيا، وقالوا في تعليقهم إنو اليوم ممكن بكل سهولة
يتم عدد حبات هذا الرز الذي هو متندل قدُر جبال الهملآيا.
الحديث كان عن التطور في مجال التكنولوجيا، وفيهم وآحد
قال، هسّع لو جابوا وآحد من القرن الثامن عشر وشاف
الفيس بوك، والتويتر، التاني نطّ قال ليهو، وهسّع كمان
جاي علينا الـ Google Glass !!!،؟؟؟...

Google Glass،،،،،،،،،،، الحقونا يا ناس.

أها،
أنا من سمعت كلآم الناس ديل جريت جري علي
شيخنا قوقل، وتعالوا شوفوا البِدع والهوايل:

بسسسسسسسم الله،
وحات نضري دا عمل شواطين...

هسّع الولية دي وداها البار زي العجب !!!.

يعني بالرآحة ممكن يسلمك خشم اللِندآية في إيدك،
واكان قعدت تتضهب يقولك يا اللصنج باريني
بس، وامسك خشمك عليك...