البلد لسه بى خيرها ولازالت تنتج عباقرة (قصة من الواقع)

ساحكى قصة شابين بكل اختصار
الاول خريج جامعات من الاقاليم الجامعات اللتى تفتقر الى الحق فى التسمية لانها فى الاساس مقامة على مدارس ثانوية المهم(مع احترامى لها)
هذا الشاب الاغيبش البسيط المتواضع جدا الاقليمى
خريج كهرباء وقد تقدم لوظائف عدة ولم يجد القبول
المهم فاختار ان يقدم لوظيفة مدخل بيانات فى احدى شركات الاتصالات
واخذوه على مضض برغم معارضة شرسة من احدالمدراء من ابناء النيل ولكن الاخ الخليجى وقف مع توظيفه(ويارتها تسمى وظيفة)راتب مقطوع عن طريق شركة توظيف وليس توظيف مباشرا
المهم اخذوه لفترة تجريبة وفى غضون تلاتة اشهر عرف كل شئ عن خبايا هذه المهنة واصبح يتفوق على اقرانه اللذين سبقوه بسنين طويلة
انا ساقنى قدرى فى مهمة الى تلكم الشركة والتقيته دعنى القى الضوء على طبيعة عمل مدخل البيانات لالاتتعدى ان يطلبو من العميل سوى بطاقة ويعبو الطلب فى الجهاز وهى وظيفية متواضعة اشبه بالسكرتارية
واذا واجهتهم صعوبات او مشكلة فى النظام يحولو المشكلة الى المسؤل وبدوره يرفها الى خبير تطوير النظم النظم
وبالتالى يحولها الى المبرمجين من اللذين صميم عملهم برمجة الحاسب
فوجدت هذا الشاب الاقليمى اثناء جلوسى بجانبه يكلم شخصا ما ف الهاتف ويشرح له تفاصيل عمله واذا بى اسئله بكل جرأة منو التكلمو ده؟؟قالى فلان فاذا بى اصعق فلان هذا هو الخبيربتاع تطوير النظم اللذى ينسق مع الحاسب الالى
فقلت له كفى لاتكمل المحاثة اعتذر له وانك سوف تعود اليه لاحقا وفعلا فقال لى مستغربا لماذا؟؟قلت له هذا الشخص من متى وانتى تعطيه هذه المعلومات؟؟قالى من سنة؟قلت له وهو لماذا لايأتى بها من نفسه قالى لى ؟مابعرف!!الزول ده مجلى او قادى عربى عددديل؟
قلت له هل تعرف راتبه كم؟وانت راتبك لايغطى نثرياته فانت بمثابة عامل مقارنة بوضعه ا(اللهم لاحسد)مستغربا طيب اسوى شنو؟قلت له
لاتعطى هذه المعلومات الا لمديرك الكبير وهو يحولها له
لانه انت تكتشف اخطاء ومعالجات خاصة بك(بموهبة وعبقرية لم يدركوها هم اهل الشأن) وانت اللذى مفترض ان تتطور ويعود ريع وفائدة هذه الانجازات لك
ولانه بكل بساطة عايش من ورا المساكين اللى زيك؟
دعونى اقسم بالله العظيم
ان ما رويته حدث امامى ولم يحكى لى ولم ينقل لى
من طرف اخر
فاقول هذا خريج كهربا من جامعة رديئة اقليمية
فمابلكم بخريجننا من الخرطوم الام اذا وجدو الرعاية ؟؟
بالجد العباقرة موجودين ورحم الامة لم ينضب بعد رغم تدهور الحالة العامة وهذا الشاب اعتقد هو دون التلاتين
يعدل ويكتشف ويوجد حلول ويساعد فى نظم تدار باشخاص مؤهلين!ويتغاضون الرواتب الخرافية
من شركات كبيرة جدا
والمصرى اللى كان رافض توظيفه بقى يخجل من شوفتو وبقى اشبه بعبقرى القسم ويحل ليهم بلاوى متلتلة
وهذا الشاب البرلوم لو وجد الرعاية المناسبة هو واقرانه ف الجامعة واكتشفت عبقريته او درس فى الغرب لكان هو من يحمل لقب خبير نظم ف السابق الجامعات اللى ف الاقاليم كنت ماخد عنها فكرة بس الله ورانى الحاجة لاغير الفكرة القائمة عنهم كليا
!!!!!!!!

يوسف

الاخ يوسف
معي شهاده الان من احد الابناء السودانيين
من احد الجامعات السويديه
بانه احرز تقدير في درجه الماجستير لايحدث الا لواحد بين كل 200 ممتحن ( مئتان ) و في متن الشهاده تشير الي انه من الافذاذ و كمان طلبوا منه امتحان ورقه واحده اخري ليعطي درجه ماجستير اخري في احد مواد الماجستير الاصل
تصدق كايس لعمل في السعوديه في اي وظيفه ان شاء الله راعي
توفي والده و هو في الصغر و تكفلت والدته برعايته و تعليمه و جا دوره لرد الجميل
و لكن لم يجد وظيفه لا في السودان و لا في السويد
وجا ساكي المعايش في السعوديه
يخمل 3 ماجستير في هندسه الكهرباء و احده من جامعه الخرطوم واثنين من السويد
بالمناسبه كان من العشره الاوائل في الشهاده السودانيه
غايتو اديناه النجيضه قلنا ليه ارجع للسويد كمل الدكتوراه
وبعد داك حلالها في السماء .
ما دعاني ان اكتب هذه المداخله شهاده الجامعه السويديه بانه من العباقره

لك الله يا بلدي

Quote: اتعطى هذه المعلومات الا لمديرك الكبير وهو يحولها له

الأخ يوسف محمود

كان تكمل جميلك وتوصل المعلومات القيمة دي عن هذا الشاب الى مدير الشركة، ولو بطريق غير مباشر، ليعرف قيمته وينصفه

Quote: تصدق كايس لعمل في السعوديه في اي وظيفه ان شاء الله راعي

الأخ الزبير بشير

اقنعو الزول ده انو يصبر.. لأنو لو قبل بأي وظيفة فسوف يظل محاصراً براتبها الى الأبد.. وتحل عليه (لعنة الراتب الأول)..
وكان هذا عنوان لمقال لي في مجلة دلة البركة قبل عقدين من الزمان أو ربما ربع قرن.. يصبر الآن لينال ما يستحقه.. خاصة أن الناس هنا يبخسون من يطلب راتب بسيط.. حتى لو كان عبقرياً كصاحبنا.. ويقدرون من يطلب راتباً خرافياً حتى لو كان كل مؤهله البدلة (الما خمج) التي يلبسها والساعة الغالية (التي يمكن أن يكون مستلفها او مستأجرها)..

العزيز
Mandingoo
تحياتى
مادام ربنا وقعو فى يدى مابخليهو يلعبو بيهو المحتالين ديل
بسكو انشاء الله لامن دربو يمرق
بس الانفلونزا دى تفكنى يومين وبجيهم ناطى
انشاء الله
تصدق نحنا نبيع كفائتنا بابخث الاثمان لماذا؟واحيانا بدون اى ثمن!؟



يوسف

الاخ الزبير
عبقرى وبشهادة من السويد!!ياسبحان الله صحى الارزاق تنقسم فى السما
!!!!
وزولى ده خبير ويشحد فى الشفع خريجين الاقاليم ويجمع فى افكارهم
مفارقة مجنونة غايتو زولك ده لو قفلا على الدكتوراه يكون ماخلا وراه حاجة
واياكم تخلوه يقبل بى اى راتب سجمان لانه دبوس مايتفك منو طول عمرو
تحياتى لك وله