التوبة نهاية الاسبوع انجاز ما عادي !#

أتسلحت بكم هائل من السندوتشات وقلت يا ود بلا حلل وتقطيع بصل وعفن وتعب بس تأكل وتقوم تبول وبعدها تنوم كلوا محلي وقمت أمنت لنفسي العزيزة كم هائل من المشروبات عصائر وكدا، وعزز ت الامر بقزازة من المياه الشيطانية لكين بالجد كدا زكية الريحة من تصنيع أصدقاءنا الصينين إلى جانبي كم من التسالي والفول المدمس وكيلو موز، وتمركزت على أريكتتنا القديمة وبدأت في المتابعة المسائية للفضائيات أنا عندي هوس بحب البت المصرية مني الشاذلي بحبها جدا وشها صبوح يا خي لازم أشوف البرنامج حقها أها يافقر البرنامج الليله ما جبوا بدلوها كديسه سياميه من مكان ما في القطر المصري الشقيق أها انتهت ساعات العمل عمل شنو يا مانجو كدي روق وأنهيت من التزاماتاتي الاجتماعية وحانت لحظات الاستماع المسائية أمام الشاشة البلوريه حيث الترفيه والمتعة. أتوقف عند مذيعتي المفضله منتهي الرمحي قالو أتزوجت شافع أخير الكبار ما عندهم أدب ذاتو و ألله !!!
هي بدات كدا أنا أتذكرت التلج قمت قالت أشوف التلاجة عسي ولعل يكون فيها قالب تلج بقي مشوار الشهدا بالليل ما ظريف أبدا لكين التلاجة مافيها غير جبنه قديمة وبرطمنية فسيخ هدية من البت نازك قلت بتعرف تعمل فسيح رهيب منو دا اللي بياكل فسيخ الجرنابة دي ما علينا المهم قوالب التلج كلها ما في لانو دكتور خالد التعيس قال عندو قزازة ويسكي عايز تلج زول شحيح حتي التلج عايزو مجانا المهم قمت لبست هدومي وتاني ومشيت الشقي ما بسعد أبدا أشتريت التلج وجيت قاعد قدام التلفزيون زي اللي فيها بيان هام زهجت قلت يا ود أنت حسي ما قلت خلاس وعايز تزوج وأمورك تمشي تمام قوم أتعشي ودفق السم دا في الزباله ونوم وبكرة ربك كريم بالله موقف عصيب بكب في العراقي في البلاعة ودموعي جارية بيكت في الدنيا جنس بكاء زي يوم ما ماتت أمي وكمان بحرقة ومخاخيات وعبرة حكاية لكين و بعدين قلت يا ود دا في حد ذاتو أنتصار علي الكيف والجن والتعاسة لكين لسه حزين وهاك جعير وبكاء لحدي رن التلفون قلت الزول المتصل يا خي أنا عيان شوية أتصل بكرة والزول كان مسالم قال لي كفارة وقفل بسرعة
بعدها دخلت الحمام أستحميت وأغتسلت قلت عشان تكون توبه نصوحة برضو الدموع ما وقفت الليلة الله يحلني من الهم دا أنت ما مجنون القال ليك كب الشرب منو كان أصلو روحك متعلقة بيهو قدر دا أنت أتعس زول وعله العلل ما في الدنيا أبدا حمار بمواصفاتك أها شوف المعاناة الحقيقة أيوة زول أنت وهم وبس ...!
وأبليس قاعد في أضاني وهالك يا تضليل أنت مالك حسي صحتك ما كويسه الزول البخلي الشرب بيكون مرضان وكمان خليت الاصحاب والضحك والغناء يا خي بالجد أنت عايز مساعدة نفسية أمشي التجاني الماحي عند صديقك شاغل معهم باحث أجتماعي بس دا زول بتاع ونسه ح يعملني موضوع ويقعد أحكي ويزيد القصة لا لا بس كدا الصبر وخلاس بس أقعد أكل حاجة الليل لسه طويل لسه يا معفن لغة السكاري في خشمك أكمل السندوتش دا على كلمات المذيعة الرهيبة دي تمد يدك للعصير وتقوم تتنوس معهو و تبحث في خلفيتو التاريخية وتحلم بعالم خالي من الكحول برضو نفسك ما حلوة من ناحية الكحول كدي قول يازول خير
بالجد عانيت وتعبت وقلت أصلوا تاني ما أشرب لكين كنت بسمع أنو في حاجة أسمها النبيذ الاسلامي قال شيخي مدثر كدا هو مصنوع من السفن أب وعصير التفاح قلت يازول ممكن يخلق لي في المزاج والطعم أثر بعيد المدي وكمان يؤكد توبة أبوالزهراء أيوة تغيير ! أتخييلو سكرة سكرة طيري. المهم كثرة النقة تصيبك برغبة عارمة في تناول بعض المسليات والمسهلات .
وبديت أبحث عن فيلم أكشن أكمل بيهو الليلة، الطويلة دي
انتظاراً لليلة أخري و ح أقعد تايب كدا علي طول وتاني ومعي سندوتشاتي ومشروباتي وكل يوم كدا
عشان أقول أنو التوبة نهاية الاسبوع بالجد حاره خلاس
برضو نوع من السخف الموضوعي جدا.

* من مذكرات زول تايب


اسمعو دا ما أنا خقيقة كدا .*

THERE IS ALWAYS A CHANCE AND THERE IS ALWAYS A CHOICE

اما بالنسبة لبرطمان الفسيخ فبالله ما ترميه - انا جاي السودان قريب

اوعك تدقس يا ابو الزوز ...

واحد صاحبنا كان لذيذ جدا
من ما خلى البتاع ده
الناس كلها بقت تتضاير منو

كلامو بقى كتيييير ومسييييييخ

أخي أيمن
تحياتي
الفسيخ عمرو في التلاجة 14 يوم فقط هذا لوكان جيد الصناعة والطبخ المهم أنت جاي متين في فسيخ في بانت لما تأكل منو ح تغني لنعمة سكان السودان الذين ينعمون بالفسيخ وكل مطياب الاسماك
وأخيرا ياصديقي وبالعربي (أكيد في فرصة تاني وأكيد في فرصة رائعة )
الاغنية جميلة ذوق رهيب يا ود
لك كل