عنصرية برنامج (جنة الأطفال) زمان

برنامج جنة الأطفال الهدف منه ابراز مواهب الأطفال في شتى المجالات، ومن ثم صقلها ومتابعتها حتى يطلع الطفل فيه فائدة للمجتمع، أطفال الثورات وامبدات كانت عندهم مواهب، في كرة القدم- كمبلت- البلي- فلفلت- أمات حٌفر،والله الطفل (كوكو) لمن يقول طيش لين ترس، ولا نظر يفرطق البلي الموجود بداخل( اللين) كلووووووووا، ولكن لا حياء لمن تنادي، والمنادى هنا الجد شعبان،،يحكى أن ثلاثة من ( المتشدقين) من أطفال ، أو خلينا نقول أولاد لأنهم لا يشبهون الأطفال كثيراً، في خشونة جلودهم،( وشقيقهم) وأبو( ضباح) الموجود على أرجلهم وشلاليفهم،التى لا تنفك ويكبس الشتاء الجاف داك، وطبعاً هم لا حولة لهم ولا قوة غير( المسوح) بزيت السمسم، وأحياناً بزيت باقي( اللقيمات)، حتى فنايل البرد التى يرتدونها بها (نفو)الغريبة متوارثه من الأخ الأكبر حتى لمن تصل الأخ الأصغر تكون (دابت) وأكمامها قد آكلها الدهر، بس لابد أن نشيد بشجاعتهم وبسالتهم في الخطوة الجريئة في الذهاب الى برنامج جنة الأطفال...والظهور على الشاشة ( البلورية)... بتلك البرآءة الحقيقة وغير المصطنعة، وتلك الإبتسامات التى تقطر دم عندما يضحك أو يبتسم الواحد فيهم... الدم الذى يسيل من ( الشقوق) الموجودة أعلى وأسفل( الشلاليف) من آثار الشتاء الجاف..... ولكن هيهات من إنتضافة الجد شعبان أمام هؤلاء الأولاد البرئين والبواسل في نفس الوقت....

في إعترافات أحد ضحايا التفرقة العنصرية في برنامج جنة الأطفال ، قال الجد شعبان سكانا بالصوتوقال لينا والله كان جيتو هنا تانى بقطع كورعينكم بصوت( العنج) دة.......قال لى الجد شعبان عاوز أطفال الملازمين والصافية ؟؟؟ الوقت داك الرياض والمنشية والطائف كانوا خلا بنلقط منهم ( الكدندارت) والكندندار هو بكون في شجر الحنا وفي الخلا غالباً.....

اللهم ارحم الجد شعبان .... وادخله فسيح جناته

وحتى الآن تستضيف برامج الاطفال اولاد الراحات والعز وتميل لسحنات سودانية معينة !
وتتعدى التفرقة لتعم كافة المجالات، والغريبة اي سوداني خارج السودان اي تصرف عنصري تجاهه يقابله باستنكار شديد جداً
في نفس الوقت ممكن يمارس نفس السلوك تجاه ابناء جلدته المختلفين !

اتألم كثيرا لمعاملتنا للاثيوبيين والاثيوبيات في السودا ن!
شكراً للتذكير يا المر

بالله برنامج جنة الاطفال كان في عنصرية

والجد شعبان كان عنصري ,,

Quote: والجد شعبان كان عنصري ,,

مشيت بعيد ياالعشا

Quote: والاثيوبيات

هسي الجاب الإثيوبيات هنا شنو ؟

مشيت بعيد ياالعشا
------

تحياتي المـــــر

في مرة من المرات كانت في بعض الحلقات من برنامج جنة الأطفال تبث العصر (تقريبا نهاية الثمانينات أو بداية التسعينات)
جابو ولد تبدو اصوله من دارفور اسمو على ما أذكر (خليفة) وعمره في ذلك الوقت كان حوالي 4 سنوات أو 5 سنوات
واستضافه الجد شعبان - خليفة دا ما شاء الله عليهو- كان الجد شعبان أو (العم مختار) على ما اعتقد بيديهو مسائل
مثلا يقول ليهو 3456 زائد 6721 بتساوي كم - الولد خليفة في ذلك الزمان كان بيفكر لفترة قصيرة جدا وررررررب بيقول النتيجة الصحيحة
التحية للاخ خليفة ولغيره من نجباء بلادي المشتتون في الأرض.

يا ليت البيعرف شيء عن خليفة داك يورينا الآن هو وين؟؟؟ ويا ريت يكون واصل في مسيرة التفوق والنبوغ !!!


فعلا البرنامج كان مقتصر على أولاد العاصمة المثلثة في ذلك الزمان بغض النظر عن اصولهم العرقية - يعني انتا وقربك من التلفزيون
اهلك بيودوك البرنامج وبتشارك حسب قوة شخصيتك اعتقد. وفعلا الحلقات ما كانت بتمشي الأقاليم نهائي والامر دا مستمر إلى الآن.
ونحن كنا ساكنين جنوب الخرطوم وكنا بنحلم بالظهور في جنة الأطفال - وإلى الآن ما ظهرنا :)

التحية للجد شعبان والعم مختار والرحمة لمن مات منهم - والتحية للاخ المر وضيوفه من القراء والاعضاء

Quote: هسي الجاب الإثيوبيات هنا شنو ؟

أولاد الملازمين امكن كانو بجيبوهم البرنامج الأثيويبيات ولا ما غلط؟؟

Quote: في إعترافات أحد ضحايا التفرقة العنصرية في برنامج جنة الأطفال

ونقلت رويترز عن مصادر مطلعة قولها أنه قد حدث كذا وكذا
وقال قادمون من الخرطوم انهم شاهدوا كذا وكذا
وطبقا لبعض المصادر فانه قد حدث كذا وكذا
وقال مراقبون انه.....
وحسب بعض الناشطين فانه....
وأكد شاهد عيان صحة الرواية....
وقد روت احدى السيدات انه....
وقد قال جنود منشقون انه...

Quote: فعلا البرنامج كان مقتصر على أولاد العاصمة المثلثة

هذا ما نقصد، في العاصمة الملازمين ومدينة النيل، والثورات وأمبدات نهي

Quote: ونقلت رويترز عن مصادر مطلعة قولها أنه قد حدث كذا وكذا وقال قادمون من الخرطوم انهم شاهدوا كذا وكذا وطبقا لبعض المصادر فانه قد حدث كذا وكذا وقال مراقبون انه..... وحسب بعض الناشطين فانه.... وأكد شاهد عيان صحة الرواية.... وقد روت احدى السيدات انه.... وقد قال جنود منشقون انه...

الجزيرة بالعربي

معقول لكن يا المر ؟

الأخ المر.

المشكلة ليس في برنامج جنة الأطفال أو الجد شعبان.

الدولة نفسها هي دولة عنصرية وبتمارس جميع أنواع الأضطهاد العرقي على غير" العرب" وعلى غير المسلمين.
هذا هي الدولة السودانية التي نشأت بعد الاستقلال، ومازالت مستمرة في نفس النهج.
,اي نظام حكم يأتي يكون أسواء في هذه الممارسة من النظام الذي كان من قبله.
أنظر الى جميع مؤسسات أجهزة الخدمة المدنية، فسوف ترى العجب.
الناس في السودان لم تحمل السلاح بالساهل، والجنوب لم ينفصل بالساهل.

بسم الله الرحمن الرحيم

Quote: الأخ المر. المشكلة ليس في برنامج جنة الأطفال أو الجد شعبان. الدولة نفسها هي دولة عنصرية وبتمارس جميع أنواع الأضطهاد العرقي على غير" العرب" وعلى غير المسلمين. هذا هي الدولة السودانية التي نشأت بعد الاستقلال، ومازالت مستمرة في نفس النهج. ,اي نظام حكم يأتي يكون أسواء في هذه الممارسة من النظام الذي كان من قبله. أنظر الى جميع مؤسسات أجهزة الخدمة المدنية، فسوف ترى العجب. الناس في السودان لم تحمل السلاح بالساهل، والجنوب لم ينفصل بالساهل.

بلدنا دى بى عنصريتا عا########ا وعايزنها تكون عنصرية .. عندك نص معانا
ما تفكنا ياخ وتمشى تشوف العنصرية الفى بلدك .. فلو عنصرية لفظية العنصرية
عندكم جسدية كتل عدييل وابادة اقليات ..
ده شنو القرادة ده .. قرف يقرفك ياخ


ارتيقا

كوز شركة جياد ارتيقا جيلاني.

أنت لو ماعجبك وجودي هنا من الأحسن لك أن تبحث لك عن موقع جديد تكتب فيه مع من تريد.
شايفك اليومين ديل عاوز تتنصل من الكوزنة وبقيت تنتقد النظام نقد ناعم. ده كلو ما بحلك يا كوز.
اليومين دي في دولارات جات من جوبا أجري الحق المولد(القسمة) طبعا أنت بتصلك الفتافت فقط.

بسم الله الرحمن الرحيم
القرادة / دينق

Quote: كوز شركة جياد ارتيقا جيلاني.

كوز وشيوعى كمان ( على قول بلدينا ) انت علاقتك شنو
الاخ / معارضة سودانية ؟
بالمناسبة انت الزول الاتصلت بيهو واداك المعلومات دى اداك ليها ناقصة مالو .. ارجع اتصل بيهو تانى عشان يكمل ليك بروفايلى

Quote: أنت لو ماعجبك وجودي هنا من الأحسن لك أن تبحث لك عن موقع جديد تكتب فيه مع من تريد.

فى دى والله غلبنى ارد عليك عديل والله .. فده كلام يمس البورد وصاحب البورد .. ويضعك فى خانة الامر الناهى بهذا البورد
فلا تعليق لدى عليه .

Quote: شايفك اليومين ديل عاوز تتنصل من الكوزنة وبقيت تنتقد النظام نقد ناعم. ده كلو ما بحلك يا كوز.

اعارض اوالى على كيفى .. ناعم عنيف برضو على كيفى .. يحلنى ولا ما يحلنى ده حصرى على اهل بلدى ولا ناقة لك فيه ولا جمل

Quote: اليومين دي في دولارات جات من جوبا أجري الحق المولد(القسمة) طبعا أنت بتصلك الفتافت فقط

انت قايل الناس كلها زيك ؟
خليك فى تجسسك ده وشغلك المهبب الشغالو ده وابعد عن الحديث عن الاخلاق .. فانت لست بأهلاً لذلك


ارتيقا

كنّا في طفولتنا مُغرمين جداً بالسباحة..
كانت الخيارات عندنا محدودة..
فأندية الجاليات ..زي النادي العربي و السوري و الأرمني..فقط للأعضاء..
كان الخيار إما حوض الجامعة أو حوض الثقافة ..
في يوم قررنا الذهاب لحوض الثقافة..ركبنا بص السجانة بالنص حتى الموقف قرب الجامع الكبير..
وبعد داك المشي كدّاري حتى شارع الجامعة ..حيث حوض الثقافة...
دخلنا ونحن في حالة تحنّن العدو ..عرقانين و مغبّرين ..والسفنجات لواري رملة...
والمصيبة (لافّين) المايوهات في ورق جرايد ...(لم تكن مايوهات بالمعنى المعروف)..كانت (لباسات ملوّنة)..
وجدنا مجموعة من الأولاد ..بسم الله ما شاء الله ..الحقيقة لله ما بيشبهونا بالمرة..
قبال ما نخطو خطوتين ..قام المدرّب المسئول (لم أنسى اسمه حتى اليوم ) ..نصر الدين ...قام بإيقافنا في منتصف الطريق..
_ هيي هيي ..إنتو ماشّين وين ؟
_مالك يا زول ؟..عايزين نعوم
_ممنوع.. يلاّ إتخارجوا لينا برّة..
__ممنوع ليه؟..ما أهم الأولاد ديل قاعدين يعوموا..؟
__ قلت ليكم إتخارجوا ..هسة الأولاد ديل شبهكم ؟؟ إنتو زاتكم الجابكم هنا شنو ..شوفوا ليكم حتة تانية تعوموا فيها..
__ (بكل براءة)..نمشي نعوم وين يعني ؟؟
__ أمشو عوموا في خور أبو عنجة ولاّ تحت الكبري ..أوعى أشوفكم هنا تاني ..
.......... وطلعنا و نحن مكسوري الخاطر ..
________________
مازلنا نتذكّر القصة دي حتى اليوم ..ولكن بدون أي ضغينة على (نصر الدين)..
الرحمة و المغفرة للجد شعبان ..ولك التحية أخونا المر

Quote: بسم الله الرحمن الرحيم القرادة / دينق

كوز شركة جياد الكيزانية، يكتب بسم الله الرحمن والرحيم، وتحتها مباشرة يكتب شتيمة!
هذا هي أخلاقك ككوز بتكشفك وتعريك تماما.
نعم لو ما عاجبك وجودي في هذا المنبر الباب بفوت جمل، وقشة ما بتعتر لك.
اللخو قلت لي تاريخ تسجيلك متين!!

Quote: هذا ما نقصد، في العاصمة الملازمين ومدينة النيل، والثورات وأمبدات نهي

الزمن داك امبده كان فيها كهرباء يا المر.

الحمد لله العنصرية عنصرية مكان وما مرقت من الخرطوم.

لا استبعد الرواية من اولها لآخرها ودي مؤصلة وراسخة في مفاهيم كثيرين من الناس في السودان. ولكنها هل أتت من فراق ؟



لا أظنها أتت من فراغ لمن قراء كتاب الأحاجي السودانية للراحل دكتور عبد الله الطيب ،.

بسم الله الرحمن الرحيم
القرادة / دينق

Quote: كوز شركة جياد الكيزانية، يكتب بسم الله الرحمن والرحيم، وتحتها مباشرة يكتب شتيمة! هذا هي أخلاقك ككوز بتكشفك وتعريك تماما.

دى ما تشيمة يا دينق عشان ما تتسول بيها العطف والشفقة كحالك دايماً
دى صفة ياخ .. القرادة من صفاتها انها لما تتلصق فى شئ تانى ما بفكها منو الا الموت
شفت بهتنى انا والكيزان قدر شنو ..

Quote: نعم لو ما عاجبك وجودي في هذا المنبر الباب بفوت جمل، وقشة ما بتعتر لك.

المرة دى تعليق صغيرونى .. حدد لينا صلاحياتك فى البورد ده .. عشان نشوف الباب المقاسنا وما نغلط
وبرضو التعليق يحول للبورداب وصاحب الحوش

Quote: اللخو قلت لي تاريخ تسجيلك متين!!

اللخو تاريخ تسجيلو الاول بهذا البورد 2003م (.. فيها جوائز ولا شنو ..) نسيتنى بالسرعة دى يا ما عندك عشرة
وارشيف 2003م قاعد .. امشى ليهو اصلك جنك بحيت
اها ما رديت فى خصوص الزول الاتصلت بيهو بخصوص معلوماتى .. فى زمتك هسى دى شغلة تشتغلا ؟

اعتذر للاخ / المر
وارجو ان تقبل عذرى


ارتيقا

Quote: دى ما تشيمة يا دينق عشان ما تتسول بيها العطف والشفقة كحالك دايماً دى صفة ياخ .. القرادة من صفاتها انها لما تتلصق فى شئ تانى ما بفكها منو الا الموت شفت بهتنى انا والكيزان قدر شنو ..

كوز شركة جياد. التسول بتعمل فيهو أنت، وحايم بصورتك في البورد.
وهنا أنطبقت عليك قصة و صفة جدادة الخلا.

Quote: المرة دى تعليق صغيرونى .. حدد لينا صلاحياتك فى البورد ده .. عشان نشوف الباب المقاسنا وما نغلط وبرضو التعليق يحول للبورداب وصاحب الحوش

أنا قلت لك لو ما عاجبك وجودي فحط أنقرع طير من البورد.
داير شرح أكتر من كده يا كوز؟

Quote: اللخو تاريخ تسجيلو الاول بهذا البورد 2003م (.. فيها جوائز ولا شنو ..) نسيتنى بالسرعة دى يا ما عندك عشرة وارشيف 2003م قاعد .. امشى ليهو اصلك جنك بحيت اها ما رديت فى خصوص الزول الاتصلت بيهو بخصوص معلوماتى .. فى زمتك هسى دى شغلة تشتغلا ؟

لأنك زول نكرة علشان كده مافي زول جاب خبرك لمن مشيت وهسع لمن رجعت. وإنشالله تمشي تاني وبلا عودة. وجودك وعدمو واحد؟
أنت هسع عارف أن شغال شنو، ولا أنت بتردد في القولات الفارغة مثل البغباء الغبي تماما؟
كوز قمئ مثلك يجب أن يستحي.

بسم الله الرحمن الرحيم
القرادة / دينق

الشباب ما يتضايق .. خلى صدرك واسع


بالمناسبة :
شغلك ما بهمنى من قريب ولا بعيد ان شاء الله تكون جون برنان حتى .
دى شغلتك انت مطاردة الناس وشغالين وين وهيموسيكشوال ولا مستقيمين
امنجية ولا كيزان ولا كيزان شيوعيين.. ما ممكن نضايقك فى شغلتك ياخ


ارتيقا

كوز شركة جياد.

نفس أسلوب الكيزان . يعتذر لصاحب البوست ثم يواصل في تخريب البوست.
وبرضو تقول ما كوز!!
قلمك بيفضحك وأنت لا تدري.

بسم الله الرحمن الرحيم
القرادة / دينق
ما قلت ليك كوز وشيوعى كمان .. تانى فى شنو
اتجاوز الحتة دى وامشى لى قدام ..

بعدين نسيت اقول ليك قبيل
مادام انا نكرة وما بسوى شى اتلحتنى مالك
من جيت راجع البورد .. واتجاوزت الامر
بأنك تسأل مصادرك عنى وعن شغلى
بالله انا نكرة لى الدرجة دى ...


ارتيقا

اخونا المر


تحية طيبة ..

يا اخى العنصرية ما كانت قحة للدرجة دى فى زمنا ..

كنا كل اسبوع بنشوف الاستاذ سليمان زين العابدين وهو بيعمل بروفات لفتيات شمبات بنشيد جديد ..

واذكر قصة الفيل من تلكم الايام ..

كان زمن سمح خلاص ...

Quote: هذا ما نقصد، في العاصمة الملازمين ومدينة النيل، والثورات وأمبدات نهي

اعتقد الوضع كان بيتطلب حرفية وابداع ولا بدا من مشاركة منظمة وكده ...

واعقد عافية يا مهمش من زمان ..-




--



الاخ ارتيقا ..

ارفع رجلك من الابنص مش كده ..

المنبر ده عام وكل واحد حر فيما يرى ..

Quote: معقول لكن يا المر ؟

صدق يا وضاح، ذى ما حكيت ليك؟؟ كانت لحظات ما احلاه

المر عنصرية بتاعت فنلتك ات طردوك عشان شين بس
خلى عنصرية وجاى تقشر بينا..
اول مره اشوف لى عنصرية شينية،،،

Quote: المشكلة ليس في برنامج جنة الأطفال أو الجد شعبان.

deng myfriend

نحنا حدنا جنة الأطفال غايتو؟

Quote: قلت ليكم إتخارجوا ..هسة الأولاد ديل شبهكم ؟

اها اسى يا محمد محمود فى داعى للكلام دة؟؟؟ وانتو عاوزين تدخلوا حميركم مع حمير الكتبة؟؟

التلفزيون الزمن داك حدودو العاصمة المثلثة فقط ان لم يكن اقل
الارسال بدأ تحديدا عام 62
والارسال او البث عبر الاقمار الصناعية بدا عام 1991
وفي تلك الحقبة من الارسال الضعيف والتجريبي الناس ما كان عندها تلفزيونات اصلا
شوية التلفزيونات الموجودة كانت هدية من الحكومة الالمانية لحكومة عبود
الجد شعبان كان اعظم المقدمين لبرنامج الاطفال
فاذكروه بخير او اسكتو

Quote: الزمن داك امبده كان فيها كهرباء يا المر.

متروسة واجد

Quote: المر عنصرية بتاعت فنلتك ات طردوك عشان شين بس خلى عنصرية وجاى تقشر بينا.. اول مره اشوف لى عنصرية شينية،،،

ود الموج انت أكيد ناس ركن الأطفال، بتاع الإذاعة

Quote: لا استبعد الرواية من اولها لآخرها ودي مؤصلة وراسخة في مفاهيم كثيرين من الناس في السودان

غايتو انا مفاهيمى ود عز وود فقر بس ليس إلا

Quote: ارتيقا

العنصري دينق

يا اخ خفف علينا شوية كده عارفين عندك بترول وممكن نجيكم استقدام

راعوا ظروفنا والحالة الصعبة العايشين فيها

سبحانك يا حكيم

Quote: التلفزيون الزمن داك حدودو العاصمة المثلثة فقط ان لم يكن اقل الارسال بدأ تحديدا عام 62 والارسال او البث عبر الاقمار الصناعية بدا عام 1991 وفي تلك الحقبة من الارسال الضعيف والتجريبي الناس ما كان عندها تلفزيونات اصلا شوية التلفزيونات الموجودة كانت هدية من الحكومة الالمانية لحكومة عبود الجد شعبان كان اعظم المقدمين لبرنامج الاطفال فاذكروه بخير او اسكتو

خالد العبيد.

إذا كان المشرفين على برنامج جنة الأطفال جادين في عكس التنوع العرقي والثقافي للسودان، لكانو أستعانو بأطفال من الخرطوم ترجع أصولهم الى الأقاليم المختلفة. ولكنهم لم يفعلو ذلك.
الخطاء هنا ليس خطاء الجد شعبان لوحده، بل هو خطاء الدولة نفسهاز وكل الحكومات المتعاقبة شاركة في هذه العنصرية. ونتائج ذلك ماثلة أمامنا الأن.

بسم الله الرحمن الرحيم
المر
بعتذر والله وللمرة التانية


خالص تقديرى


ارتيقا

Quote: بعتذر والله وللمرة التانية

ما بيناتنا ياااااااااااااااخ

Quote: التلفزيون الزمن داك حدودو العاصمة المثلثة فقط ان لم يكن اقل الارسال بدأ تحديدا عام 62 والارسال او البث عبر الاقمار الصناعية بدا عام 1991 وفي تلك الحقبة من الارسال الضعيف والتجريبي الناس ما كان عندها تلفزيونات اصلا شوية التلفزيونات الموجودة كانت هدية من الحكومة الالمانية لحكومة عبود

أسى علاقة دة بي داكــــــــــــــــــــــــــــــــــــــــــــــــــــــ شنو؟؟