Post: #1 Title: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-27-2013, 08:25 AM Parent: #0
ما سمعنا قبل كدا ولا كنا وين ما عارف
أمس حضرت إعادة سهرة ما متأكد عن عبد الرحمن الريح أو حسن عطية أو الأثنان معا
بس غناء رائع وجمال منقطع النظير خصوصا أغنية الخرطوم دي ياخ
Post: #2 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-27-2013, 07:18 PM Parent: #1
قولوا واحد
Post: #3 Title: Re: معقول حسن عطية غنا الغناء السمح دا كلو؟ Author: dardiri satti Date: 08-28-2013, 06:22 AM Parent: #2
Quote: معقول حسن عطية غنا الغناء السمح دا كلو؟
نعم ، حسن عطية غنا الغناء السمح دا كله، ...... وأكتر.
لكن للأسف ، أكثر فنان تعرض للتشويه حسن عطية. من من هؤلاء الأرزقية استطاع أن يغني بروح حسن عطية ، وبإحساس حسن عطية؟؟ لا أحد!! من يحب حسن عطية بالفعل، لايسمع إلا لحسن عطية، يفهم حسن عطية ، ويتعلم من حسن عطية.
حسن عطية ،
عليه السلام. عليه السلام في الخالدين، في الخالدين عليه السلام..
تحياتي
Post: #4 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 08:57 AM Parent: #3
مرحب استاذ درديري ساتي
حسن عطية فنان مجيد مافي شك ويطربك حد الثمالة إذا فهمت وتتبعت ما يقدم
تصدق من أمس بفتش ليوتيوب بصوت حسن عطية وما لميت فيهو
حكاية غريبة جدا نهديك بصوت الكابلي
بس ناقصة الهمهمة البعملا حسن عطية مع مدخل الموسيقى
Post: #5 Title: Re: معقول حسن عطية غنا الغناء السمح دا كلو؟ Author: أبو ساندرا Date: 08-28-2013, 09:03 AM Parent: #4
طيب لو سمعته في : 1- حبيب عمري ومنها ( حبيب عمري إنت لي كل شيء .ز إنت نور حياتي إنت نور عيني عيني ) 2- حرمان ومنها ( طبعآ يا ملاكي ، لو يرضيك هلاكي .. انا لا أعصى أمرك )
لكنت نحت لنا هنا
Post: #6 Title: Re: معقول حسن عطية غنا الغناء السمح دا كلو؟ Author: د.محمد حسن Date: 08-28-2013, 10:11 AM Parent: #5
لانك كنت بتغني وانت برة الشبكة
Post: #7 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 11:01 AM Parent: #5
أبوساندرا النجم الصاعد بسرعة الصاروخ في عالم الغناء
Quote: طبعآ يا ملاكي ، لو يرضيك هلاكي .. انا لا أعصى أمرك
تبكي يا كبير ؟
تعرف حرمان دي وحاولت أنساك وقلبي زاد في جروحو وريني كيف الحي بودع روحو بتاعة أحمد المصطفى
النار والجاز
موت أحمر عديل
عندي خال بموت في حسن عطية دا زماااااااااان كنت بقول ليهو حسن عطية دا بنخنخ ساي ياخ ما عندو غناء
كان بقول لي النخنخة دي ياها ذاتا يا حمد البتخلي مخاخيطنا سايلات انت قابل أي زول بقدر ينخنخ في الغناء دا
Post: #8 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 11:13 AM Parent: #5
Post: #9 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 11:18 AM Parent: #8
يا دكتور محمد حسن وينك في
Quote: لانك كنت بتغني وانت برة الشبكة
ومن ما دخلنا الشبكة الغناء طار لينا
انت قايل برة الشبكة دي ساهلة
ياخ سفة ملح ساي تخليك تغني الليل كلو
خليك من الحاجات التانية
Post: #10 Title: Re: معقول حسن عطية غنا الغناء السمح دا كلو؟ Author: dardiri satti Date: 08-28-2013, 11:31 AM Parent: #9
Quote: مرحب استاذ درديري ساتي
حسن عطية فنان مجيد مافي شك ويطربك حد الثمالة إذا فهمت وتتبعت ما يقدم
تصدق من أمس بفتش ليوتيوب بصوت حسن عطية وما لميت فيهو
حكاية غريبة جدا نهديك بصوت الكابلي
بس ناقصة الهمهمة البعملا حسن عطية مع مدخل الموسيقى
الأستاذ حمد، هديتك مقبولة شكراً عليها. بس آآآآآنا في قلبي صورتك تلقاها وين غير عند أبو علي؟؟ حسن عطية دا أحسن حاجة نقدمها ليهو إنه نحنا نخليه يغني ، ونسمع بسسسسسسسسس !! لأنه بغير كدا بمرور الزمن ومع العالم ديل ، تراثه حيضيع تحت الكرعين.
وشكراً على ذوقك الرفيع، لأن حسن عطية ماكل زول بيقدر يستمتع بغناه.
تحياتي
Post: #11 Title: Re: معقول حسن عطية غنا الغناء السمح دا كلو؟ Author: بدر الدين مهدي Date: 08-28-2013, 12:20 PM Parent: #10
أمير العود أبو علي لن يجود الزمان بمثيله
Post: #12 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 07:03 PM Parent: #11
مرحب بدر الدين مهدي
Quote: أمير العود أبو علي لن يجود الزمان بمثيله
فعلا ، شموخ ورقي عجيب في أداء الأغاني
Post: #13 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-28-2013, 07:20 PM Parent: #12
مرحبتين سلمى بت الشيخ
Quote: الاخ العزيز حمد للاسف ماقاعدة افهم حرف من الفنان حسن عطية ومعظم غناهو فهمته لمن غناهو عميرى ، وبمناسبة عميرى رحمة الله عليهما يوم ان رحل عميرى جاء ليقدم كلمة عن عميرى فى برنامج اذاعى من اخراج الزميل خطاب حسن احمد ، وكل مرة كان يقول "ونميرى رحمه الله " نصحهه يا استاذ اسمه عميرى واذا به مرة اخرى يناديه نميرى ، المهم فى الامر اننى ما عرفت كلمات اغنيات حسن عطية الا لمن غناها عميرى ولاحقا عامر الجوهرى ، اها احكى ليك حاجة مرة حسن عطية دا عنده نشيد اسمه سعاد وكان مصادف يوم المراة العالمى قال ليهو استاذ صلاح الفاضل شيل الشريط واسمعه واكتب لينا كلماته فرجع ضاحكا وقال والله غلبنى انا زاتى يا صلاح ...
دي كانت مشكاتنا مع حسن عطية لكن الإحساس بالألحان الجميلة كان حافز إنو الزول يلقى طريقة يحفظ بيها الكلمات وقد كانت القعدات والفنانين الشباب في ذلك الوقت سبب لحفظ الأغنيات ومن ثم الرجوع لسماعها من الأصل حسن عطية ، طبعا العميري كان الزول بسمعو على ضمان لأنو مجيد في اختيارو وأداؤه للألحان (له الرحمة) ويخيل لي هو من أوائل الذين غنوا خداري بشكل جماهيري
ودي ليك
Post: #14 Title: Re: معقول حسن عطية غنا الغناء السمح دا كلو؟ Author: Mohamed Eltayeb Date: 08-29-2013, 01:35 AM
العزيز حمد عبد الغفار
انت راجل فنان ورياضي متميّز. لكن يبدو انه فاتتك فرصة حضور جلسة الاستماع التي اقيمت للفنان المرحوم حسن عطية بقاعة عدلان والتي اشرف عليها آنذاك منافسك في تقليد العندليب الأسمر زميلنا الغاباتي عبدالباقي أبوشوك. ترى أكنت في المرسى حينها ام في السنتر؟ او ربما متابعا للكدايس؟
Post: #15 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-29-2013, 08:07 AM Parent: #14
محمد يا طيب
وينك يا رجل بعد كم شهر حتى نشوف اسمك والأسمو سيف مصطفى داك اختفى نهائيا
Quote: انت راجل فنان ورياضي متميّز. لكن يبدو انه فاتتك فرصة حضور جلسة الاستماع التي اقيمت للفنان المرحوم حسن عطية بقاعة عدلان والتي اشرف عليها آنذاك منافسك في تقليد العندليب الأسمر زميلنا الغاباتي عبدالباقي أبوشوك. ترى أكنت في المرسى حينها ام في السنتر؟ او ربما متابعا للكدايس؟
يديك العافية يا أبو حميد غريبة أنا كنت وين ؟ ياخ أنا أي حفلة في شمبات دي كتلتها أكيد في المرسى لأنو ما قاعد أمشي السنتر كتير ولو كنت مع الكدايس أكيد كنت بكون في نص الحفلة
ذكرتنا ياخ وبمناسبة العزيز عبد الباقي أبو شوك ياخ الزول دا كابسني في زيدان دا مكابسة عجيبة ولما شفتو مصر خليتو ليهو بقيت أغني حاجات تانية طبعا هو غير زيدان تاني ما بقدر يقول أي حاجة بس في أغنية لو أحبك عمري كلو برضي شاعر ما كفاني دي عزت علي اخليها ليهو ويوم كانت في حفلة في كافتيريا بيطرة حنغني فيها سوا ولسوء حظو قدموني قبلو ، في واحدة من الجكس كوركت لي من هناك قالت لي لو أحبك ،وطبعا شهاب فتح الرحمن يعجبك طوالي خشا فيها بالأورغن وكان أجمل أداء لي لي الأغنية دي
بعد ما نزلت بقة قال لي ياخ ما عوقتني في لو أحبك دي أنا كنت قافل عليها
أظهر ياخ
Post: #16 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-29-2013, 08:44 AM Parent: #15
أماني عبد الرحمن مرحب بيك
وهاك هديتك في يدك
Post: #17 Title: Re: معقول حسن عطية غنا الغناء السمح دا كلو؟ Author: أبو ساندرا Date: 08-29-2013, 11:14 AM Parent: #16
و انت ما طلعت لخالك مالك مش الولد خال؟ لو جيت الدوحة بسمعك العجب بس استلف مخاخيت من خالك
Post: #18 Title: Re: معقول حسن عطية غنا الغناء السمح دا كلو؟ Author: ibrahim fadlalla Date: 08-29-2013, 02:38 PM Parent: #17
ما ليا غيرك حياة ....
يا سلام يا حمد على المفترع الجميل ...وهاك الغنية المدرسة ...بأداء رائع من كمال ترباس ..
بالله شوف روعة الكلمات وسمو المعاني ...والقومة لي عبد الرحمن الريح ..: مالي غيرك حياة يا أسمر يارمز الضياء انت حياتي
يا فاهم يا دارس معنى الحياء من أدبك ليك حارس من غير رياء يا باسم ياناعس يا ناعس .. يا ناعس يا ملاك يا لابس توب الحياء انت حياتي
في حسنك الملوّن كم من سحر مكوّن واحد نعاس في جفونك واحد ظهر في عيونك واحد مشرّب لونك أعجبت بيهو ونظمت فيهو روحي وأغنياتي
ماشوهوك بفصادة على الخدود السادة طبيعي خلقة ربك ما داير زيادة مع لونك الأسمر ورد الخدود محمر لابدرة لا أحمر ألوان محاسنك زي ماء الحياة
شكرا ليك يا حمد ...بالمناسبة إنت حمد أبو نضارات ، بتاع وسامة الراجل السوداني بعد الأربعين ، ول إسم على إسم ؟؟ معليش على السؤال ، صورة البروفايل ما ظاهرة عندي .. على كل تسلم يا جميل على فتح هذا الخيط البديع ، والسواقة الرايقة .
Post: #19 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-29-2013, 05:11 PM Parent: #18
Quote: و انت ما طلعت لخالك مالك مش الولد خال؟ لو جيت الدوحة بسمعك العجب بس استلف مخاخيت من خالك
أستلف مخاخيط أنا يا أوساندرا؟ أفو
ياخ أنا مع المخاخيط عندي ريالة سايلة بالجمبة لما اسمع الغناء الصاح
والدوحة في الخاطر وكان مفروض في الشهور الفاتت دي نكون فيها لكن الله ما رفع القدم
وطبعا بعد دا المدارس حتفتح وحتبدأ معاها جميع الفتوحات والتوسعات الإسلامية
الله يسترنا من المحطة الوراء كوستي !
دا من ناحية ومن ناحية اخرى
خالي البقصدو ليك دا ما المعاكم في الدوحة لأنو بتاع الدوحة دا وقور وبقطعو في حشاو ساي
لكن في واحد مرابط هناك في الخرطوم برضو وقور لكن لما يسمع حسن عطية وخصوصا بالليل كان قلبتو طول عرض ما بتلقى ليك فيهو حتة وقار تتكي عليها
Post: #20 Title: Re: معقول حسن عطية غنا الغناء السمح دا كلو؟ Author: حمد عبد الغفار عمر Date: 08-29-2013, 05:42 PM Parent: #19
مرحب إبراهيم فضل الله
ومشكور على الرابط والأغنية الرهيبة وكلماتها
ياهو أنا حمد ؟
حنواصل بس تساعدونا ياخ أبو علي وعبد الرحمن الريح ديل عملوا حاجات فوق الوصف ، النت سيئ جدا اليومين ديل
أنا الحيرني إنو معظم الحاجات دي كلمات وألحان عبد الرحمن الريح
ناس كانوا حلوين ياخ
Post: #21 Title: Re: معقول حسن عطية غنا الغناء السمح دا كلو؟ Author: الكيك Date: 08-29-2013, 07:01 PM Parent: #20
