للكورنجية فقط..بوست تنظير..تحليل..توقعات الدوريات الأوروبية..!!

المرضانين شديد مننا لسة متابعين كورتنا المحلية وجوطة هلال مريخ وبنكون مستمتعين بي مناكفاتها بعيداً عن الفنيات والاداء لقناعتنا بي إنو كورتنا كمستوى ما ظنيت بيجي منها ..
المغتربين بنتلاقي فيهم الناس البيكون إمتدت مرضتهم لمتابعة الدوريات المحلية في بلاد الغربة سواء كانت عربية أسيوية أفريقية أوروبية وعادي تلاقي الواحد ممكن يكون مرضان بالهلال السعودي أو النصر أو الشباب أو الإتحاد أو الأهلي في السعودية العين الوحدة في الأمارات الغرافة ال ال في قطر وهكذا....
لكن طبعاً كلنا مجمعين على متابعة الدوريات الأوروبية وبنستمتع جداً بالبث المباشر ومتابعة الكورة الأوروبية ..
إنطلقت بداية من الإسبوعين الفاتوا معظم أو كل الدوريات الأوروبية .. وأكيييد كل واحد فينا بيستهويه دوري معين بيكون هو الأمتع بالنسبة ليهو لكن برضو بيتاوق في باقي الدوريات ..
بالنسبة لي انا فالدوري الإنجليزي هو خياري رقم واحد ومستعد أحضر جميع مبارياته وانا مطمئن ومتأكد من إني حا أشاهد كورة قدم حقيقية بغض النظر عن الفريقين اللاعبين ..يعني ممكن تشوف كارديف ضد ويست بروميش وانت مستمتتتع جدا جدا جدا ..
الدوري الإسباني فيهو مشكلة إنو بيشابه الدوري السوداني في هيمنة الفريقين الريال وبرشلونة وغالباً ما تكون المشاهدة للمباراة البيكون طرفها واحد من الفريقين..
الدوري الإيطالي فيه الاسماء الكبيرة من الفرق بس للأسف لمن تجي على الميدان المستويات بتكون بتاعت فرق عادية ..اليوفي الميلان الإنتر روما نابولي لاتسيو ..
الدوري الفرنسي فيهو مباريات جميلة لكن نسبة المشاهدة والمتابعة ما منتظمة..
الدوري الألماني من الدوريات الجمييلة لكن نقله المجاني عبر قناة دبي زي أدى الناس إنطباع إنو دوري أي كلام ..
هي دعوة مفتوحة من خلال البوست ده نقعد ننظر ونتكلم ونحلل عن اداء الفرق اللي بنحبها وبنستمتع بي الاداء حقها .. وياريت أي زول يجي يكتب في كل مرة عن مباراة فريقه وتوقعاته للمباراة ومن بعدها يجي يدي الناس تحليل مصغر كده عن رؤيته الفنية وأهو منها نستمتع ومنها نشوف الفاتنا ومنها نتجادع بي تنظيراتنا كمعجبين بي الكورة ..
عن نفسي أشجع المانيو في انجلترا واستمتع بي كورة توتنغهام ...
أشجع الريال في اسبانيا ..
أشجع اليوفي في ايطاليا ..

وخلونا نبدا مع ضربة البداية وتحليل لمجريات الأسابيع الأولى عموووماً كده ..

Quote: أكيييد كل واحد فينا بيستهويه دوري معين بيكون هو الأمتع بالنسبة ليهو لكن برضو بيتاوق في باقي الدوريات

انا ما عارف الاكيييد دي جبتها من وين ؟!
عيب لي Nat-Geo Wild HD و ADVENTURE .... الخ و فتافيت !

أيمن ياخ إنت (فينا) دي ما بتشملك :) :)..
انا ثقافة ثقافة ومعلومات عامة دي ما شايلا ..
وناس أضييفي نصف معلقة من الأرز البري مع قليل من البقدونس والكروم ولتر ونصف من زيت الزعتر والشوفان قلبيها في نار هادئة ده مااا بقدر عليهو يا أخوي..

يا باشا

كل شامبيون وانت بخير ياااااخ
عن نفسي أتابع تصريحات المدربين .. ولدى حصيلة وافرة منها على مدى السنوات الماضية
وبالذات تصريحات جوارديولا .... دبلوماسية .. وأناقة .. وفهم ...

مورينهو ... لا ينكسر .. وتصريحاته مثيرة للجدل ومادة دسمة للصحافة

فينغر ... مغلوب على أمره وتصريحاته بها شيء من الخبث غير المتصنع رغم كونه صانع نجوم وليس بطولات

الدوري الألماني دوري جميل وقوي وممتع للغاية ..

أتابع بايرن ميونخ منذ نعومة أظافري حيثكان رومينغه وبرايتنروهروبش يافعين
حتى صاروا من رجال الإدارة به ...

تستهويني إدارة الألمان لكرتهم .. لاحظ ماتياس سامر في البايرن
وبيرهوف في المنتخب ..وغيرهم

الدوري الاسباني جميل ولكنه يفتقد للمنافسة الحقيقية حيث انحصرت في العملاقين
البرشا والريال... والباقي كومبارس رغم الاجتهاد ...


نلتقي ..

اكيييد إن شاء الله

تحية لأيمن صاحبي .. الذي حضر بالحلومر بتاعو في رمضان الماضي





الشغيل

Quote: تحية لأيمن صاحبي .. الذي حضر بالحلومر بتاعو في رمضان الماضي

شوف يا صاحبي - انا يوم ما افطر بلحلومر قاعد اعيد اليوم طوالي ... والحقيقة كان عندي حدس انو اليوم داك ما فيهو حلومر عشان كده جيت محتاط
اما بالنسبة ليكم ككورنجية انت وعمر الفاروق فبقول ليكم ده لهو بتاع عوام ساي

عبد العزيز ..
انت من الليلة زووولي..
مورينهو كتترا وبقت تصريحاتو مكررة ومفتعلة..
تعجبني جدا المكاجرات الكانت بين السير اليكس فريجسون و رافاييل بينيتيز..زيي شكل الحريم..ما سلمت علي في بيت ناس فلان ما بسلم عليها في بيت ناس فلانة..:)

Quote: ما بالنسبة ليكم ككورنجية انت وعمر الفاروق فبقول ليكم ده لهو بتاع عوام ساي

يا أبو الأيامن .. يا زول انا لمن اقوم لي اللهو المباح ده ما تشوفني كده لهااااي ..
طبعاً أكيد ما اللهو البعدو بتتخيل بيكون في جواري ولعب ميسر وإستسقام بالأزلام لالالا لهو يبدأ بي البلاي إستيشن وينتهي بها..
ياخ والله الجمعة الفاتت من بعد صلاة الجمعة ..فرررد قعدة ما قمنا إلا الساعة 1 صباحاً .. والغريبة كان يوم حميدة وطقطقنا ..
أها يا حبوب ..كان ليك في اللهو ده تعال ألهو معانا الجمعة الجاية دي ..بس من أسة برشلونة ما معانا لأنو ده فريق الناس البيض .. :)

اشجع البايرن ميونيخ في كل المحافل
وليفربول في الدوري الانجليزي
ورما في ايطاليا عشان خاطر غابرييل عمر باتيستوتا ومن بعده توتي
وفالنسيا في الدوري الاسباني (عشان خالي مهاجر هناك من السبعينات)
والزمالك المصري عشان انا مريخابي
والنصر السعودي من زمن ماجد عبدالله
والوحدة الامارتي لاني كنت ساكن جنبهم
والعربي في قطر عشان خاطر مبارك مصطفي

Quote: للكورنجية فقط

يا أبو عمير لي يومين ملاوز من الدخول في البوست دا بسبب العنوان ..
مما اللخو طارق اللمين قال لي قبل كدا (مستخفا) خليك في كورتك بقيت اتعقد من حكاية
كورة وكورنجي وما إلى ذلك ..
الله يخليك حاول عدل العنوان أو أعمل أية حركة كدا عشان نخش .

جنابو الحياني بي كابو ..
روما ده عامل زي فريق الموردة الأيامات دي..
كل سنة تقول الفريق السنة دي ح يعمل حاجة تجي تلقاهو راقد سلطة ..
روما وأرسنال عندهم حاجة غريبة جداً ..الدورة الأولى تلقاهم في الترتيب بين ال9 لي ال12 ..
الدورة التانية تلقاهو بقا التالت يا الرابع ..ةبي نظرية الكورة لو بس قلت منو بطل الدورة التانية بتلقاهو روما ..أرسنال..
روما لسة عايش على أمجاد توتي ..وتوتي مكنتو خفت ومرات بقا يشلت..مع إنو مرات كده بيمرق الفريق من ورطات..

طلحة يا حبوب..
النصيحة إنت كمان مفروض تخليك زي طارق اللمين ..وتمشي محل النقاطات مدوورة ..شعر غنا تمثيل عديل مدارس فنون شعبية خييم رمضانية ..كده يعني..
لكن تكنكش لي في الكورة ديأكيد لازم تخليك في كورتك..:) :)

ياخ كلم جنابو ده قول ليهو العين بتعلى على الحاجب..هي قصدي الوحدة :) :)

يا أبو عمير أنا كتا شغال عشر سنوات مع فقيد البلاد الأستاذ الصحفي عبد المجيد عبد الرازق الذي مات وهو
لا يملك حق إيجار بيتو والمثل بقول من عاشر عبد المجيد عبد الرازق عشرة أيام صار مثله .. تقول لي أمش
محل الكنجالات .. وقسما بالله الذي لا إله إلا هو والذي خقلني وسواني ما أنا عليه لو أنا بعمل كدا كتا هسع مليتي مليالدير
وعندي جريدة على الأقل ..
.....................
صاحبك جنابو دا أشتر في تشجيع الأندية يا أبو عمير .

سلام يا فردة
انا بتاع دوري انكليزي برضو بس للاسف بشجع ليفربول بذاكرة لما كان ليفر بول
الناس ديل اكتر ناس بلعبو كورة جما عية و ممتعة .
في الدوري الاسباني الريال لا غير.
في الالماني بايرن ميونخ.
الايطالي بشجع انتر ميلان.

طبعا برضك هوايتي الشمارات بتاعة المدربين الكبار و تعليقاتهم و ترصدهم لبعضهم البعض

زمااان كدا يا عمر كنت بحب جدا فريق سلتيك و السبب كان المرعب الفنان هنريك لا رسن
الزول دا صراحة انا شايفو هداف من طراز فريد اكتر من كل هدافي العالم السابقين و الحاليين.

دا بياضي و نشوف قدام

سيد بوست
سلام

عارف كنتا متمني من ناس الدوري الانقليزي يتسلفو الدعاية بتاعت روتانا سينما ديك البقولو فيها مش جتئدر تغمض عينيك حقيقتا مع الدوري الانقليزي مش حتقدر تغمض عنيك
عادي يكون في مبارة بين مانشتر يونايتد متصدر الدوري وليستر سيتي طيش الدوري والشوط الاول ينتهي للمانيو اربعة صفر وبالرغم من الفارق الكبير في النتيجة والترتيب عادي جدا منكن الميارة تنتهي اربعة اربعة.
المباريات في الدوري الانقليزي بتبدا من قبل ان تنطلق صافرة الحكم من قبل الجمهور والصحافة "التابلويتس".
وما بتقدر تجزم بنتيجة النهائية إلا مع صافرة الحكم
للمعلومية فقط الدوري الانقليزي لديه أكبر عدد من الفرق المتنوعة التي حازت بدوري ابطال اوربا وهي ليفربول والمانيو ونوتينقهام واستونفيلا وتشلسي عكس الدوريات الاخرى التي في الغالب يتوج منها بطلا للشمبيون لييق فرقين او ثلاثة فرق بالكثير يكزنزن دائما في مقدمة الترتيب والغريبة اكثر بان ليفربول وتشلسي توجوا بلقب ابطال اوربا وترتيبهم الخامس في الدوري المحلي.

Quote: وليفربول في الدوري الانجليزي ورما في ايطاليا عشان خاطر غابرييل عمر باتيستوتا ومن بعده توتي وفالنسيا في الدوري الاسباني (عشان خالي مهاجر هناك من السبعينات)

يا جنابو والله ذوقك عال العال، أخوك نفس الملامح و الشبه، إلا ما عندي خال أشجع ليه فالنسيا فبقيت مدريدي عشان عيون راؤول (أواخر التسعينات)

Quote: أها يا حبوب ..كان ليك في اللهو ده تعال ألهو معانا الجمعة الجاية دي ..بس من أسة برشلونة ما معانا لأنو ده فريق الناس البيض

والله يا عمر وارد انو اللهو معاكم يشرف الواحد - تلفونك في الخاص
اما بخصوص برشلونة فانك لم تخيب ظني ابداً في عاميتك وكرور معتقداتك !

بلا شك الدورى الأنجليزى هو الأمتع و الأكثر اثارة

أشجع الأرسنال من زمن المتعة دينس بيركامب تيرى هنرى فييرا والتورد و ... و موسم الا هزيمة .
بس ياخ فينغر فى السنين الأخيرة عذبنا ببخلو ..

فى البوندس ليغا البايرن .. وفى الكالشيو اليوفى .. فى الليغا محايد مع الكبيرين البرسا و الريال

أجمل ديربى فى العالم أرسنال - توتنهام

سلامات صاحب البوست و ضيوفه ..

نابري يا صاحب..
خليني النبشرك طيب ..
أرجع شوف وشاهد ليفربول تاني..
الليفر الأيامات دي بيلعب أجمل كورة في الدوري الإنجليزي ..
المدرب عامل شغل حلو مع الأولاد الصغار ديل والكابيتانو جيرارد نعم القائد لاميهم كوووويس..
جايبين ليهم كارثة كده إسمو إستوردج حاجة عجيبة ..شيلسي وجمهوره لي الليلة بيكونوا سافين التراب علي شطبه..
فقط وفقط قد تتعولق كورة الليفربول متى ما رجع الزول الجواااط سواريس..
ده لاعب مزعج ونكدي وبيمرق الفريق من طوره وبيجوط الكورة رغما عن إنو لاعب هداف ..
الليفر بدون سواريس حلو ..

عمار يا مكي..
يا زول إنت حارس المريخ السابق ولا شنو ؟ :):)

Quote: عادي يكون في مبارة بين مانشتر يونايتد متصدر الدوري وليستر سيتي طيش الدوري والشوط الاول ينتهي للمانيو اربعة صفر وبالرغم من الفارق الكبير في النتيجة والترتيب عادي جدا منكن الميارة تنتهي اربعة اربعة.

وده الحصل الاسبوع الفات..كارديف ضرب ليك مانشستر سيتي لمن فهم حاجة..3-2
كارديف وافد جدييد كرت كرتونة..
ياخ ده عندو رئيس نادي ماليزي تحفة :):)
أووول مرة أشوف لي رئيس نادي ينزل بعد الكورة ارضية الملعب وينطط ويصفق عشان الجماهير تحيهو :):):)
لأو ولابس فنيلة الفريق وشاكّيها مع البنطلون من فوق للقميص :):)

يا وائل ..
أسة انا عندي خالي في أندونيسيا..أها الدبارة شنو؟ شوفي لي فريق أشجعو :)

أيمن يا محمود..
النصيييحة فاجأتني بي الخفة الكتلت أم تفة ولخبطت لي حساباتي فووق تحت ..
انا إتوقعتك النوع الممكن يخش في برنامجنا بتاع اللهو ده بعد تلاتة أسابيع على أقل تقدير نظام برامجك فل وكده..
لكن يبدو إنك تعاني وتعاني جداً في رياض الخير ..شكلي بقيت ليك طوق نجاة يا أيمن ..:):):)
مرحباً بك يا مان في برامج العطلة الإسبوعية بس علييك الله لو ما بتعرف تلعب ما تجينا عشان بالجد ما عندنا وقت للونسة ونتعامل معاك كضيف ونشتري ليك عصير تروبيكانا وتقوم تفشل لينا بي البرنامج وتوترنا ساي..
بشوت ليك الهاتف النقال قريباً يا مان..

Quote: صاحبك جنابو دا أشتر في تشجيع الأندية يا أبو عمير .

ههههههههههههه
طلحة يطلق الرصاص على رجليه يااااخ انا ما مريخابي زيك

سلام عمر الفاروق والشباب



عاوز اسالك سؤال في كورة امس بين اسي ميلان و ايدنهوفن


شفت البسطونه بتاعت بواتينق

----------------------------

الريال ؟

بتشجع الريال يا عمر ؟


هذا فراق بيننا

وايم الحق هذا فراق بائن بينونة عظمى

هاتو لى النعامة يا قوم

دا اتا القلت عليك راقى وفاهم

اقول ليك شى

تصدق أنا زمان لما جيت اشتغل مع اليابانيين
قلت ليهم مرتبى تدونى ليهو بالين اليابانى يا بالدولار

بس اختو الشى اللسمو ريال ده

لى هسه ما عارفين السبب شنو

يا عباس ..
البسطونة كانت من الشعراوي لكن أبتو أمبارح ..
الولد ده كويس وبيجي منو لكن اليقري حاااقر بيهو وبيخاف من النجوم الكبار ..
عشان كده المليان عايز ليهو مدرب كبيير..


يا نابري ياخ الكابيتانو زانيتي ده نموذج للاعب المحترم الملتزم الأنيق.. الزول ده اصلو ما حصل حضرت ليهو كورة الفنيلة بي برة والشعر منكوش والوش اغبش..تحلف تقول الزول ده ماشي عرس بي محمود الله يرحمو ..:)

أبوذر ..
إت بي صحححك؟؟؟
بييي صلعتك دي وبتشجع برشلونة؟؟
برشلونة؟؟
اصصصلو زول عندو صلعة وبرشلونة ما بيتلمو..
برشلونة ده فريق الاطفال والجكس بتاع السعودية ..
اييي زول عمرو اقل من 24 بنبلعا منو يشجع برشلونة ..
لكن زول جدو يعمل فيها بوكيمون؟؟ اكيييد ما قاصد..
احمد التيجاني قال حكمة صارت بالنسبة لي قناعة ..
أييي زول 35 ريال قام مشى اشترى ليهو فنيلة ميسي وقال انا بشجع برشلونة :):):):)
أها إنت اليابانيين ديل باقي لي بي قروشهم بتكون اشتريت كونتينر :):):)
ياخ أمبارح الزنقة الاتزنقتوها دي اثبتت انكم فريق كييسو فاااضي يلعب بي رهبة الفريق المنافس فقط..
لكن أييي فريق يقووي قلبو ويشرب دييو بيفرتقكم والشمس حييية ..
الحكم يشيل ويديكم في البلينتيات ويشيل ويطرد ليكم في الناس ..
ابو ذر عد لصوابك وباب التوبة مفتوح ..فقط إغتسل ثم أعد الشهادة ثم أطعم 60 مسكين

سعوديين شنو يا عمر ياخ

أنا بحب برشلونة من ايام يوهان كرويف جاهم لاعب
وبعد بقى مدرب وتانى بقى ابوهم وولى امرهم

الزمن داك السعودية يمكن القناتين اللتنين ديلك ما عملوهن
على بالحرام الناس ما عرفو برشلونة وميلان وبايرن ميونخ الا بعد ما كتر الله خيرهم الخواجات علقو ليهم الأقمار الحايمة فى سهلة السماء الدنيا دى

انت يعنى قايل برشلونة ده كورة ولعب وفوز وهزيمة وشنو وشنو

لا لا ياخ

انا غايتو ما عارف الناس التانين
لكين برشلونة بالنسبة لى مذهب وطريقة

ياخ ده موضوع طويل

اسمع

بى تحت تحت كده فى اشاعة قالو دى ماريا فايت منكم

كان فات غايتو الترابة دى فى خشم انشيلوتى

انخل ده ياهو الفيهم والله

تانى ما فى زول تب

الباقين كلهم بى كرستيانو العوقة ده

ممكن فريق ديم سلمان يتعادل معاهم

ههههههههههه

Quote: بالنسبة لي انا فالدوري الإنجليزي هو خياري رقم واحد ومستعد أحضر جميع مبارياته وانا مطمئن ومتأكد من إني حا أشاهد كورة قدم حقيقية بغض النظر عن الفريقين اللاعبين

الكُرة الإسبانية = الكُرة تركض أكثر من اللاعبين
الكُرة الإنجليزية = اللاعبون يركضون أكثر من الكُرة




ــــــــــ
قال أحد عمالقة كُرة القدم الأوروبية (نسيت اسمه وأعتقد أنّه يا ساكي يا باجيو) أنّ سبب جمال وتفوّق الكُرة البرازيلية هو أنّ الكُرة لديهم تركض أكثر من اللاعبين
والكُرة الإسبانية شبيهة بالكُرة البرازيلية ...

ياخي يعني عاجباك برطعة توتنهام الأمس دي بدون فائدة ...
عندما شاهدتهم أمس أمام الآرسنال تفهّمت تركيز برشلونة الإسباني على ضم لاعبين بمواصفات معيّنة ..
وتكمن هذه المواصفات في الكنترول الممتاز والإمكانيات الذهنية المُمتازة والخيال الواسع

الدوري الإنجليزي = استادات جميلة وتصوير جميل وجمهور يزيد من الإثارة وندّية كبيرة بين الأندية المُتنافسة ولكن ...
من الناحية الفنّية ولمن يُريد أن يُشاهد كُرة قدم حقيقية فالدوري الإسباني أفضل