ما تشوفوا اللخمة دي ساهي تشكيل الحروف ساااااهل موية بس

بوست كتبتو زمان لكن لعممان الفائدة اعيدو هنا
أتَارِيهُو تَشْكِيل الحُرُوف سَاهِل كَدِي وأنا ما جايِب خَبَر

أها ما ساهلة عليك الله
ياخي انا قايل الحاجات دي كلها لخمة ساهي
تصدقوا ركوب الحمير بالقلبة امكن اكون اصعب من صناعة الطيارة لكن الخواجات ديل لاخمننا ساهي
أي زول قرأ فيزياء كان الله ادا منو ممكن اسوي لمبة تجستون
غايتو انا من سنة رابعة كنت مستني اشوف فيثاغورس القال وجدتها وجدتها داك
لحدي اسع ولا لاقاني
في الثانوي العام سألت استاذ منها قال لي دي قراية ساهي

يا ايها الاعضاء برفعكم لهذا البوست تزيلون الامية التشكيلية للحروف ازالة جد في ناس ما جايبين خبر
واذا دعا داعي الفداء سارفعنه بنفسي كسح كسح ان شاء الله بحكاية ملاح بت علوبة الفركتو وابتو

بتعرفوا حمارة اللمحمدية الغرقت مع البقر ؟

يا زول ماتشوف ركوب حميرك،طييع الدحيشات،صريم الغنيمات،سكيك الجريوات،لعب الرمة والتيوة والبلي بالدقاشات ,
اسع عليك ابوك الشيخ ودالبوش،كيف لنا ان نردم هذه الهوة،اقسم بالله العظيم ،انا هسع دي مارق من سمنار،اية كلمة قيلت فيه،ليس لها ايما مدلول في كل وعي وثقافتي،ود البوش لقد كانت لنا قيمة واحدة كان من الممكن ان تصنع لنا دربا للغد،الصدق والمصداقية،وحين ضربنا هذه شتتناها،ما عدنا نفرق بين نظريات القرعي او فيثاقورس.
ودالبوش حدثنا كيف نعيد تشكيل هويتنا،وخلينا من تشكيل حروف العربية،فنحن قد راح لنا الدرب حتي قبل مياه السيول بزمن بعيد.

عليكم الله شوفو الزول الزهجان من غرق حلتم دا اتقول انا ام رويق والقبلي شايل
واتو وكت ما عندكم مجاري للسيول تكوركو مالكن اغثنا اغثنا غدقا غدقا ما تسكتو ساكت وتحمدوا ربكم علي الرشيشات القدركم
وقت ما بتحملو ام رويق البتفك سدركم
ولبعدين حلتكم دي اصلا متعودة على الغرق عشان ضاقت ساردين الخواجات والبن الحبشي دايرين ليكم كدة من بني كوز ؟ عشم الكـلـب في موية اللبريق
.
.
حدثني انت اولا عن مملكة سنار ودولة الفونج قبل ان احدثك انا عن كيف دخل العرب السودان وفي الاخر قالوا لينا دي ريحتكم ول فسيتو ؟
وبعدها سوف احدثك كيف يتم تطييع الدحيش المكادي
.
.
عبدالعزيز عثمان يا صديقي
تحياتي

Quote: غايتو انا من سنة رابعة كنت مستني اشوف فيثاغورس القال وجدتها وجدتها داك

يا ود البوش القال وجدتها وجدتها دا أرشيميدس أو أرخميدس كما ينطقها الناس. وهو يعني القانون الفيزيائي القائل:
When a body is totally or partially immersed in a fluid it experiences an up thrust equals to the fluid displaced.
ممكن بالعربي معناه: (إذا غُمِر جسم كلياً أو جزيئاً في مائع فإنه يلاقي قوة دفع إلى أعلى تساوي كمية المائع المزاح) والله أعلم.
أما فيثاغورس فنظريته هي التقول: ( The square of the hypotenuse in right triangle is equal to the sum of the squares of the other two sides)
(مربع طول الوتر في المثلت القائم الزاوية تساوي مجموع مربعي الضلعين الآخرين). والله أعلم.
تحياتي.


كبـّاشي الصـّـافي

(العوج راي والعديل راي)

شكرا جزيلا الاستاذ الفاضل كباشي الصافي لتصحيحي
رغم اني لم اهتم ايا كان اسمه لاننا اصلا لم نستفد من الدرس بل كان حشوا محشيا وعليه لاقيمة عندي للاسم ان كان ارخميدس او ليوناردو دافنشي ؟
نطريات حفظناها على ظهر القلب قتا الزاوية 45 هي مقلوب جتا الزاوية 45
وايضا كذلك الظتا وجيب التمام
والعجب العجيب مسألة السلك حقت سنة رابعة ديك والغراب النبيه والرجال العشرة البلهاء
والنتيجة صفر معاك الواحد حلولنا كلها غرقت وما قدرنا نطبق فيها نظرية ارخميدس هههههههههه
.
.
شكرا يا زول يا سمح

Quote: واتذكرت ليك لمن كنا صغار نفتح الراديو بالجنبة التانية كنا قايلين الفنانين صغاااااااار جوة الرادي يغنوا ساااااااهي ... نفس حكاية تكسر البلية عشان نشيل الوردة الجواها

Quote: والعجب العجيب مسألة السلك حقت سنة رابعة ديك والغراب النبيه والرجال العشرة البلهاء والنتيجة صفر معاك الواحد حلولنا كلها غرقت وما قدرنا نطبق فيها نظرية ارخميدس هههههههههه

الحمد لله يا ود البوش طلعت دفعة .. يعني زينا قريت في وزارة المعارف مش وزارة التلتلة والتأليم. حليل الزمن الكان زين. دستة البيض فيها 15 حبة. والسجوك بالمتر. وجوز الحمام كان فيهو 3 حمامات. طبعاً دي خطة 4-4-4 مش 6-3-3 ولا 8-3 الودن التعليم في 60 داهية.
تحياتي.


كبـّاشي الصـّـافي

(العوج راي والعديل راي)