يـا بيـت الـطـيـن

يا بيتنا الطين
يا ضلالة تقينا
الحر اللافح
شارع الحلة
يا ستار العيب الما بيبين
كنت بتضحك من المطرة
لمن تنزل من سبلوقتك
وتنزل فوق المجري تسيل
تمرق في الخور
ومن الخور تنزل في النيل
ونحن صغار نفرح بالموية الجارة حنين
من الاكلوا قروش العامل
الكان بينضف
ويحفر لينا المجرى
عشان الموية تسيل
في النيل
مين القالوا
مطرة ربنا رحمة تغشى الحاكم قبل الناس المحكومين ى
ومين القال
نحن بنحكم باسم الدين
ونضحك نحن
اصلكم انتو
طلعتو الدين
يا بيتنا الكنت زمان
مأمون وامين
كيف انهرت من اول مطرة
وكيف الناس الكانو امان
في نص الموية غرقانين
واليد الكانت دوما عالية
بقت سافلين
وتجينا اغاثة
للناس الفقدت بيتها وفقدت شكل هوية
وقبلن توصل للكادحين
يجينا الوالي
وسنو الضاحكة يقول
(اغرب حاجة لقيت الحاجة الجاتنا اغاثة
في سوق التشاشين )
ونضحك تاني
اصلنا كنا بنعرف
انو حرامية هذا الزمن الحالي
هم في الاصل تجار الدين
يا بيتنا الطين
ياروح الالفة الرحلت
في التلاتين
بنجيك
وربنا عالم قدر الريدة الجوة قلوبنا
لي بيت الطين
وبس

يا بيت الناس الممكونين

جواك الصبر
شيمة
للناس العارفة حقيقة ادين
الناس الديمة بترف ع يدها
تسال
ربها انو يزيل
الظلم اللابس توب الدين

يا بت الطين
من لقمة حلال
ما من مال الناس
الغسالين

*