بَرْداً سَلامْ ........

بَرْداً سَلامْ ........

"ياااااااا وَطَنْ عِزَّ الشدايد ..... حِمَّيد"
(1)
ما بتَغْرَقي،
يا الزَّينةْ هوي،
يا رَاكْزَة مِنْ زمَن الْمَطَرْ نُقَّاطْ
مصوبَرْ في السَّحابْ:
(زمَنْ السَّحاب لِسَّعْ صَبي،
وبنيَّه زي عُشباً طري،
وما آنْ أوانْ .....)
زمَنْ الْمَطَرْ عشَماً بَلِيلْ،
زي خَاطْرَةْ بِتَّاور الأرِضْ،
أو فِكرةْ في بَالْ الشَّجَرْ ......
كم مِنْ مطَرْ
دقَّ وفَتَرْ
والمويه وِصْلَتْ للْكُتوف
خافتْ قُلوب النّاس عليك
يمكن خلاص تمحاكي
ما يفضِّلْ أثَرْ ......
أهو زي عوايدِك
هوبْ: بتمرقي مِنْ مكايد المويه
والسَّيل الْخَطَرْ ......
(2)
ما بتَغْرَقي،
بِغْرَقْ رُعاةْ الْغَفلة
في شِبْرِكْ ..... عشانْ عابرينْ سبيلْ
ما بجُوكي يِنْهَرُوا موجك الْهدَّام
يتارسُوا المويه، لا،
ديلْ ناسْ سَفَرْ
مارقين إذاً للرِيبة،
والتَّلَفْ الْقَبيلْ حَدَفُمْ عليك .......
ديلْ بِغْرَقُوا
وقتين يجي الطوفانْ
تَخُتِّيهُم تِحِتْ رجليك
وتطلَعي للجَبَلْ ........
(3)
داخرِكْ يقينْ
ما تخَنْقِكْ الْعَبْرَة
وتنَهْنِهِي في خَفاكْ
ورَّينا صوتك لمَّا يملاكي الصَّباح
لَيْ حَدْ جبينِكْ بالضياءْ
يغشاكي خيرك
قبلِ ما يرتَدَّ طرفك
أو يرجِّعْ ليك غُناك
هُدْهُدْ مُوَلَّهْ بالْبُشاراتْ .... والْعَدِيلْ
ما بتَغْرَقي،
ما بتَغْرَقي،
ما بتَغْرَقي ...........

عصام عيسى رجب
الخميس 8 أغسطس 2013 م

بَرْداً سَلامْ ........

"ياااااااا وَطَنْ عِزَّ الشدايد ..... حِمَّيد"


(1)
ما بتَغْرَقي،
يا الزَّينةْ هوي،
يا رَاكْزَة مِنْ زمَن الْمَطَرْ نُقَّاطْ
مصوبَرْ في السَّحابْ:
(زمَنْ السَّحاب لِسَّعْ صَبي،
وبنيَّه زي عُشباً طري،
وما آنْ أوانْ .....)
زمَنْ الْمَطَرْ عشَماً بَلِيلْ،
زي خَاطْرَةْ بِتَّاور الأرِضْ،
أو فِكرةْ في بَالْ الشَّجَرْ ......
كم مِنْ مطَرْ
دقَّ وفَتَرْ
والمويه وِصْلَتْ للْكُتوف
خافتْ قُلوب النّاس عليك
يمكن خلاص تمحاكي
ما يفضِّلْ أثَرْ ......
أهو زي عوايدِك
هوبْ: بتمرقي مِنْ مكايد المويه
والسَّيل الْخَطَرْ ......
(2)
ما بتَغْرَقي،
بِغْرَقْ رُعاةْ الْغَفلة
في شِبْرِكْ ..... عشانْ عابرينْ سبيلْ
ما بجُوكي يِنْهَرُوا موجك الْهدَّام
يتارسُوا المويه، لا،
ديلْ ناسْ سَفَرْ
مارقين إذاً للرِيبة،
والتَّلَفْ الْقَبيلْ حَدَفُمْ عليك .......
ديلْ بِغْرَقُوا
وقتين يجي الطوفانْ
تَخُتِّيهُم تِحِتْ رجليك
وتطلَعي للجَبَلْ ........
(3)
داخرِكْ يقينْ
ما تخَنْقِكْ الْعَبْرَة
وتنَهْنِهِي في خَفاكْ
ورَّينا صوتك لمَّا يملاكي الصَّباح
لَيْ حَدْ جبينِكْ بالضياءْ
يغشاكي خيرك
قبلِ ما يرتَدَّ طرفك
أو يرجِّعْ ليك غُناك
هُدْهُدْ مُوَلَّهْ بالْبُشاراتْ .... والْعَدِيلْ
ما بتَغْرَقي،
ما بتَغْرَقي،
ما بتَغْرَقي ...........

عصام عيسى رجب
الخميس 8 أغسطس 2013 م


لم أجد بيدي حيال مطرك صاحبي
إلا الألوان
فأقبلها
وتحياتي والأشواق

بَلَّة يا فاضِل،

كل عيد وأنت بألف خير وعافية ومحبَّة وجمال ........

يا خوي وييييييينك ......؟! داسِيك المطر ولَّا شنو .......؟!

بهكذا بلسم ..تطيب جروح وروح إنسان - تفيق ..
بهكذا بوارق تفج عيون رمال ضلام ..يملاها بريق
بهكذا زوارق ..تجدف رياح تحبو مرافي تنجد غريق


شكرا عصام

Quote: يغشاكي خيرك قبلِ ما يرتَدَّ طرفك أو يرجِّعْ ليك غُناك هُدْهُدْ مُوَلَّهْ بالْبُشاراتْ .... والْعَدِيلْ ما بتَغْرَقي، ما بتَغْرَقي، ما بتَغْرَقي ...........

آآآآمييييييين يا عصام ياخي...


=====

أدركت جانب من مطيرات في صقايعنا الهناك
عانيت عشان أصل الزلط..
كداري لاعند أبْ عُشر..
مشوار فتر
فتر السنين
ووصلت خرتوم السجم ليلاً معطن بالعفن
وركبت طيارتي ورجعْ بي وشي كايس لي ضرا
وإجابتي للناس البتسأل: يا ولد كيف الأهل كيف البلد؟
ترا قاعدة في طرف اللسان:
والله ياخ ...مااااا فهمت شي
ما فهمت شيْ..

============

ثم إنك - أيها الولد الجميل عصام- فنان وأنا أحبك..

..

.

شكراً جميييلاً أخي إبراهيم على مرورك الجميل، وربنا يبرِّدا على أهلنا الطيبين هناااك ...... شعب جميل، بس سبحان الله حظو ونصيو في الحُكَّام زي الطين والخمج الجاء بيهو المطر دا .......

محمود يا جمييييل،

لا أحسن تفهم ....!!!! كان غيرك أشطر يا حبيب ......

أقول ليك حاجة، عشان تفهم صااااح وبمزااااج، شيل عودك الرَّنان وأديها عدد واحد لحن كِدا فنَّاااااان ...... باقي ليك زمن ما لحَّنتَ وكِدا .....

دا يا أحباب الرابط الصوتي لـ "برداً سلام ....." في صفحتي في ساوند كلاود:

https://soundcloud.com/erajab/ma-bataghargi-20130810

https://soundcloud.com/erajab/ma-bataghargi-20130810

كِدا كيف يا محمود ......؟!

الباقي غُنااااااك ...... أو:

ورَّينا صوتك لمَّا يملاكي الصَّباح
لَيْ حَدْ جبينِكْ بالضياءْ
يغشاكي خيرك
قبلِ ما يرتَدَّ طرفك
أو يرجِّعْ ليك غُناك
هُدْهُدْ مُوَلَّهْ بالْبُشاراتْ .... والْعَدِيلْ

يا معلم...

الرابط "شغال تش"..



مية مية..

..

.

Quote: وقتين يجي الطوفانْ تَخُتِّيهُم تِحِتْ رجليك وتطلَعي للجَبَلْ ........

آميـــــــــــــــــــــــــن ،،
إنفعال و إبداع ... تعيش يا عصام ، إنت و البلد كل سنة طيبين و سالمين .