Post: #1
Title: السمن القطري مع الفول فنان بس يكون أغاثة الجديد اللي فيهو شعار قطر!#
Author: زهير عثمان حمد
Date: 08-17-2013, 02:23 PM
Parent: #0
# الفول بالسمن القطري فنان علي شرط يكون السمن سمن أغاثة الجديد دا ياخي اللي فيهو شعار دولة قطر !
أنا كنت قاعد مع صاحبي سمسار في سوق أمدرمان قريب من زقاق الصاغه مفلس وزهجان وعاطل كمان لكين والله مستحمي ونضيف ومتعطر كمان أول ما قعدت سألتو أشتريت الجرايد من الصباح ولا رد علي تاني سألتو أنت يا فقر الجرايد وين كان في حالة ضيق مني وقال بزعل في قون والصدي جرايدكم ديك الوهم ما بشتريها يقصد السياسية ما قلت شي لكين في سري قلت ( والله وهم بالجد ) المهم الساعة عشرة لا في فطور لا شاي ولاقهوة الحالة ناشفه جدا صباح اليوم دا ريقو طويل ما عايز ينشف غايتو قصة بس الصبر ولا زول جاء من رجال الاعمال أو الاخوان الوارثين أو المهاجرين اللي في الاجازة ولا حتي محسن ولا واحد من المعارف عشان يجيب الفطور وحتي ست الشاي دقت جرس من الصباح وقالت الليله الشاي والقهوة بالكاش السكر ذاتو زاد أنتو بس تشربوا تمشوا أنا أرجع البيت بشنو في خوشم هناك منتظرين أسوي أديكم العندي أرجع يا عم قدام ! ولا الاكل أنتو بس حسوا !
منتظرين الفطور المنحة لحدي الساعة الساعة بقت حداشر ونص ولا أمل جاء ود شيخ السوق حماده نزل من التوسان طولي قعد جنبنا ورسل صبي الدكان للببسي وكمان عبة برنجي
سأل زولي السمسار -فطرت يا معز
*المعز وينو الفطور دا ؟ النحس دا طبعا ( لي أنا )
جاني من الصباح وقاعد لا عندو قرش ولا تعريفه وكمان قال عايز الجرايد وطبعا عايز فطور وشاي وأخوك من المؤمنين من العشر الاوخرفي رمضان مل شفت قرش حسي كدي أنت فطرت شايفك رسلت للببسي والسجاير ياخي خلاص نمشي نشوف معاوية في سوق العدة أمكن يكون ما فطرت قوم يا عاطل السنين ياله !
مشينا للاخ معاوية راقد في عنقريب من التركية السابقة وكمان العراقي اللسبو حقو دا متأثر بالسيول والامطار المهم بعد السلام والمجاملة وكمان قعدنا في العنقريب ذاتو المهم سألو زولي بالمناسبة نحن لا جينا عايزين دين وعندنا معك شغل ما فاطرين وعايزين نفطر !
معاوية والله أنا ما منظمة طوعية لكين حق الله معكم بسوي و قعد يكورك ياولد ياتور أنت تعال أمشي جيب لك فول من ود البخيت هناك جنب الجماعة بتاعين أسبيرات العجلات وكمان تاني عايزين شنو
نحن بصوت واحد لا خلاص فول كويس أنا والسمسار !
جا الولد أول سؤال كان فول بالزيت ولا بالسمن مع الجبه و لا ساده
المهم ياخي أمشي جيب الفول وخلاص
الولد قال والله كلامي دا ما ترموا ساي
الفول بالسمن والسمن القطري مع الفول فنان بس يكون أغاثة الجديد اللي فيهو شعار قطر!
وعمك بخيت قال السعر سبعه جنيه !!!
أصبت بدهشه وخيبة أمل
* سمن قطر بقي يتبع مع الفول في سوق أمدرمان !
لكين دي ما قصة !!!!!!!!!!!
ما ألعن هذا الزمان الرمادي الذي يأكل في صاحب الحظوة والنفوذ المساكين .
/B]
|
Post: #2
Title: Re: السمن القطري مع الفول فنان بس يكون أغاثة الجديد اللي فيهو شعار قطر
Author: حسين عبد المجيد
Date: 08-17-2013, 02:34 PM
Parent: #1
| Quote: سمن قطر بقي يتبع مع الفول في سوق أمدرمان ! |
مندهش يا زهير !!
دا السودان وما جديد البتشوفو دا
|
Post: #3
Title: Re: السمن القطري مع الفول فنان بس يكون أغاثة الجديد اللي فيهو شعار قطر
Author: مهيرة
Date: 08-17-2013, 02:55 PM
Parent: #2
سلامات يازهير وعيد مبارك
والمساكين الغرقانين فى موية المطر ليهم رب كريم
عن اذنك نقلناه للفيس بوك بتوقيعك طبعا
تحياتى
|
Post: #4
Title: Re: السمن القطري مع الفول فنان بس يكون أغاثة الجديد اللي فيهو شعار قطر
Author: خضر الطيب
Date: 08-17-2013, 03:38 PM
Parent: #3
سلام يا ابو الزهور
حكي طاعم ذي الفول بالسمن القطري الاغاثي المنهوب بواسطة الكيزان
واحد من القطط السمان يؤكد ما ذكرته بعد 12 ساعه فقط من وصول الاغاثه القطريه
لاهلنا المنكوبين الذين يفترشون برك الماء الآسن ويلتحفون السماء الغاضبه
|
Post: #5
Title: Re: السمن القطري مع الفول فنان بس يكون أغاثة الجديد اللي فيهو شعار قطر
Author: وضاحة
Date: 08-17-2013, 03:45 PM
Parent: #4
يا حيف يا حيف عليهم
ياكلون فى بطونهم نااااار
|
Post: #6
Title: Re: السمن القطري مع الفول فنان بس يكون أغاثة الجديد اللي فيهو شعار قطر
Author: abubakr salih
Date: 08-17-2013, 04:12 PM
شغل رسالي شعارنا السرعة و الدقة فى العمل
لحقوه السوق ابو السريع و عمل سمعة جيدة كمان.
|
|