Post: #1
Title: هل تجوز الشماتة في رمضان؟
Author: محمد البشرى الخضر
Date: 08-06-2013, 09:00 PM
Parent: #0
ولاّ نرجيكم بيها العيد
|
Post: #2
Title: Re: هل تجوز الشماتة في رمضان؟
Author: محمد البشرى الخضر
Date: 08-06-2013, 09:02 PM
Parent: #1
زوووط دي ما عارف وضعها الشرعي كيف, لكن أظنها تجوز مع الكراهة وبتجرّح الصيام
فا شنو بنلمّها ليكم ليوم العيد إن شاء الله
|
Post: #4
Title: Re: هل تجوز الشماتة في رمضان؟
Author: محمد البشرى الخضر
Date: 08-06-2013, 09:10 PM
Parent: #3
تبرد ويييييين يا قريبك, نسخّنها ليك ونهبّها هب الجن وتدوّر كيتة زي الكيتة
لينا زمن من بسطة زي دي
لكن كلتشي النصيحة بوّظ اعصابنا بالباكوورد والله :)
|
Post: #5
Title: Re: هل تجوز الشماتة في رمضان؟
Author: عبد اللطيف بكري أحمد
Date: 08-06-2013, 09:18 PM
Parent: #4
يازول تجوز ونص
دخلت موقع كورة لقيت ليك الجماعة فايزين
والله العظيم شلت هم!! وكلعت من النت خير شر!!
بالله انضربو؟؟؟
ياما انت كريم يارب!!!
عيدك مبارك يالمبارك
|
Post: #6
Title: Re: هل تجوز الشماتة في رمضان؟
Author: abas
Date: 08-06-2013, 09:19 PM
Parent: #4
يا معلم الحار سمح من نارو
كلتشي خلاص عجز يا عمك وانت عارف الظفره دي ياخ يا ريت لو لاقو الاهلي ولا العين
|
Post: #7
Title: Re: هل تجوز الشماتة في رمضان؟
Author: عصام علي أحمد
Date: 08-07-2013, 00:29 AM
Parent: #6
شايف خالد درق فى الاستاد
غايتو ياخالد الجاتك فى مشوار المنطقة الغربية ماسامحتك
اكيد فاطر فى محطة بترول
يامحمد شماتك اجلها يومين
|
Post: #8
Title: Re: هل تجوز الشماتة في رمضان؟
Author: محمد البشرى الخضر
Date: 08-07-2013, 01:32 PM
Parent: #7
عبد اللطيف كل سنة وانت طيب
انضربوا ساي هو!! ديل اتبشتنوا عديل كدا
بوّظوا اعصابنا في الأول يشيلوا ويتقدّموا لغاية ما انبرشوا في دقيقتين هههههههه
تو خالد يكون رجع
لاحولا يا عصام دا مشوار بعيد خلاص من دبي الله يكون في عونو
قلت ناجلها يومين!! كويس زاتو
|
Post: #9
Title: Re: هل تجوز الشماتة في رمضان؟
Author: امير طمبل
Date: 08-07-2013, 01:35 PM
Parent: #8
غايتوأنا لو فيمكان جمال الوالي الدلاقين ديل حقو من المطار طوالي
أي واحد فيهم يصرفو لي طورية و يودوهم منطقة شرق النيل يصرفو
موية المطرة دي
|
Post: #10
Title: Re: هل تجوز الشماتة في رمضان؟
Author: علي محمد الفكي
Date: 08-07-2013, 01:37 PM
Parent: #8
| Quote: ولاّ نرجيكم بيها العيد |
عيدنا بقى عيدين
ناس الظفرة لا يفوتو ولا يموتو ان شاء الله
|
Post: #11
Title: Re: هل تجوز الشماتة في رمضان؟
Author: أشرف الرحال
Date: 08-07-2013, 02:07 PM
Parent: #10
ود البشرى ،،، عيد سعيد وكل عام وانت والعائلة والهلالاب في انحاء المعمورة بخير وعافية ، ونسأل الله ان يرفع البلاء والمصائب على امة الهلال
| Quote: هل تجوز الشماتة في رمضان؟ |
سؤال يحول لمجلس علماء المريخ برئاسة العارف بالله ود البشاري ومعاونيه الشيوخ / هارون دياب والثلة
منتظرين اجابة
عكســـة :- ما عندك اهداف الظفرة الاربعة فديو يا ود البشرى الله يشرك دائما بالخير خلي ناس تعيد جيب لينا الاهداف العيدية دي
مودتي
الرحـــــال
|
Post: #12
Title: Re: هل تجوز الشماتة في رمضان؟
Author: Salah Habib
Date: 08-07-2013, 02:14 PM
Parent: #11
دى اربعة محمولة جوا
كل عام وانت بخير
|
Post: #13
Title: Re: هل تجوز الشماتة في رمضان؟
Author: عمر الفاروق
Date: 08-07-2013, 02:20 PM
Parent: #11
بغض النظر عن التلاتة أقوان فالمريخ مضورب أربعة !!
أرررررببببعة ...!!!
وده الأهم في الموضوع ..
المحيير شديد جداً لمن المريخ فاز ببطولة دبي أم 90 دقيقة خووتووونا ..
لمن الهلال جا فاز ببطولة بن ياس أم 6 فرق .. قالوا دي مااا بطولة ..
لمن جو تااني ناس المريخ لعبوا في بطولة الظفرة ام 4 فرق قالوا دولية وبدوا يتأهبو للكأس المحمول جواً ..
أها بعد أخدو الأربعة فأكيد ح تطلع دورة ودية الغرض منها الإحتكاك ليس إلا..وهي في طور المباراة الإعدادية سيجني فيها الفريق ثمار لاحقاً ..
علماً بي إنو المباراة الإعدادية دي بعد كل قوون للمريخ الحضري بيسجد شكراً لله في إشارة واضحة لي إنو موعود بي دولارات في حال الفوز بالبطولة ..
الحضري ده أصصصلو ماااا بيسجد ساااي كده بي أخوي وأخوك زي سجدة أبو تريكة ..
ياخ ناس الظفرة زاااتهم إتهجموا لمن لقوا الشغلانة قلبت جاادة والناس بتفرح بي كللل قوون وتججججري تتحاااضن ..
أها لمن لقوا روحهم فازوا هم زاااتهم عاشو الدور وبقوا يتقالدو وما بعييد يكون في لعيبة بكو من ناس المريخ بعد نهاية الكورة والجهاز الفني بيحنس فيهم ..
الكلام ده كلللو خلو في بالكم في مباراة ودية بين الظفرة والمريخ ..
تخريمة :
وتظل الحقيقة ..المريخ مضروووب أررربعة ..ده الانا بعرفو ليكم ..
|
Post: #15
Title: Re: هل تجوز الشماتة في رمضان؟
Author: محمد البشرى الخضر
Date: 08-07-2013, 02:30 PM
Parent: #13
كل سنة وانت طيب يا صلاح حبيب
يا فاروق كل سنة وانت طيب
لو كان فاز المريخ كان حنضلوا لينا العيد, بعدين ودية بتاع مين شفت ليك ودية بشيلوا الكوتش لو لما يتغلب فيها !
|
Post: #14
Title: Re: هل تجوز الشماتة في رمضان؟
Author: محمد البشرى الخضر
Date: 08-07-2013, 02:27 PM
Parent: #11
طمبل, علي والرحّال
عيدكم مبارك إن شاء الله و كل سنة وانتو طيبين و شمتانين :)
خد يا رحّال الرابط دا خليل مدوّر كيتة ليها ضل بتلقى ملخّص للمباراة
Re: عصام الحضري ميل يمين وميل شمال
|
Post: #16
Title: Re: هل تجوز الشماتة في رمضان؟
Author: عمر الفاروق
Date: 08-07-2013, 02:54 PM
Parent: #14
| Quote: لو كان فاز المريخ كان حنضلوا لينا العيد, |
تعرف يا عمك ..كان معاي حميدة مدوريين بلاي إستيشن في أماانة الله وناسين قصة الكورة دي ..
أها فجأة البلاي إستيشن فصل وحوول تلفزيون والقناة كانت النيلين تقريبا..أها قووومي يا القناة جيبي لينا كورة المريخ والمريخ غالب 1 صفر وبعد ثواني جات ضربة الجزاء وبعدها المريخ جاب القون التاني ..أها بطني طمممت ومزاجي قلب ..حوولنا للبلاي إستيشن وأخوك بقا ساااارح مع الكورة ..وحميدة يشييل ويضرب فينا مستغلاً للوضع :) .. وانا والله يا ود البشرى بقيت في عالمي التاااني بتاع الادعية واللهم أهزم المريخ ..يا عمك اخوك عااادي حشر ليك دعوة يااارب المريخ ما يشيل الكأس مع دعاوي اللهم بلغنا رمضان واللهم أعتق رقابنا ورقاب والدينا من النار ..
ياخ انا خشت فيني خوفة وشلت هم مساخة العيد ..وحميييدة يشييل ويدق فيني في البلاي استيشن..
أها يا عمك أديتا ليك وزنة كده مع قرييب نهاية الكورة وحوولت القناة للتفلزيون .. الساااعة الألقاها ليك الدقيقة 94 والكورة 4-3 للظفرة ..قلت لي حميدة الجماعة إترشو لكن مااا مضمونين شكلها لعبت أشواط إضافية ممكن يدررنو ..أها قبببل ما أتم يدرنو دي أسمع ليك جييييت ويييت تييييت ..
أنقر ما علمت زي الحضري؟؟؟
أحححلى سجدة حمد وشكر لله وبعد داك دووورت ليك في حميدة بالي إستيشن بي الطريقة الصاااح ضرررب زي الضرررب ..قلت ليهو إنت قايل روحك كنت بتغلبني كورة ؟؟؟ :):)
|
|