Post: #1
Title: نفير الجالية السودانية بقطر لاغاثة متضرري الامطار..
Author: عبدالكريم الامين احمد
Date: 08-06-2013, 00:29 AM
Parent: #0
تحت مظلة الجالية السودانية تم اليوم تشكيل لجنة للاستنفار والدعم ومتابعة حال واحوال اهلنا الطيبين المتضررين من اثر الامطار
وفي اجتماع مشترك ما بين المكتب التنفيذي للجالية السودانية وبعض الناشطين في المجموعات التي شمرت ايادي المثابرة والحماس من اجل انسان سوداننا الجميل في هذه المحنة
مولانا محمد المصطفي حمد رئيسا
وعضوية
عبدالجليل عبدالحليم
عمر بوب
منار حسن
امل اسماعيل
وائل محجوب
اميرة الشيخ
زين العابدين الصادق
كمال سالم
وكلنا جنود وبيادق تحت امرة هذه اللجنة يوماتي رحيل
|
Post: #2
Title: Re: نفير الجالية السودانية بقطر لاغاثة متضرري الامطار..
Author: عبدالعزيز عثمان
Date: 08-06-2013, 02:58 AM
لي الناس الطيبة بجر مسداري
لي الناس السمحة بشيل النمة وادق لي طاري
وامدح اهلي السراي
الليلة بشوفن مارقة اقداحن
بي هناك بي جاي
شايف طلاب الخير مارقين
بالخير والراي
بالساعد الاخدر
خمج الطين،شطف الفيضان
وقسم اللقمة مع الجيعان
انا فرج همي الليلة
رد شوية روح في جوفي الليلة
الغبش الشدت حيله
قامت شالت بدري الشيلة
والشيلة تقيلة
ياناس والحق الشيلة تقيلة
الناس الطيبة
الحرك فيها السيل والوجعة احساسها
نفضت جبن النفس اللوامة
ولحقت ناسها
حملت
زادها وساعد اخدر وفاسها
الناس الهزا ضميرها
المطر الساوه بيوت بي ساسها
ياحليلن لما اشدو الهمة
اواسوا الغارق في الاهات مليان بالغمة
غرقان
جيعان
عريان
سيل وضلمة
لما الليد الطيبة تقيف قدامو
في نص الليل
بالزاد ومسح الدمعة
بخف في الليل اظلامه
انا شفتا الناس الفيها محنة وخير اتنادو
كل ساعد اخدر
كل قدح ارطال سكر
زيت كركار سرير وخاطرا طيب
ياناس مفتوحه يمين ابواب الخير
اقسم حق اللقمة معاهو الغير
كل نفسا لازم تغسل زيفها تشوف الناس الصبحو همائل
ات قايل ليلة القدر نعيمها قروش وعروش
ماليلة القدر اناس احساس
بالناس العادمة الكسرة
وولدا اكوس حق الكراس
ماليلة القدر اناس
ان تمسح دمع العاني
تفرح للخلق المطحونين
تتقاسم فرح العيد وعيالن
لقمة وكسوة
وضل بيت للناس البيتها شالو السيل
واصبح طين
همال
ضعفاء
فقرا ومطحونين
صايمين
صابرين
رغم البيت الاصبح مافي
والخمارة العدمت اي عجين
الليلة ياناس شوية اتناقص حزني
ولع قبس الضي في وجوف روحي
من ضو فانوس حايم في الفرقان اتفقد في الحبان
من لمة اولاد ذي الورد اتلمو
مرقو قميصن للعريان
سواعد للغرقان
نورو بالاشراق حتات العتمة
واتنادت كل الناس الطيبة
بالزاد
بالمال
بي سمح الخاطر
نفير
ونفير ونفير
|
Post: #3
Title: Re: نفير الجالية السودانية بقطر لاغاثة متضرري الامطار..
Author: كمال سالم
Date: 08-06-2013, 01:06 PM
Parent: #2
شكرا يا كيكى ,,
المرجو من جميع أفراد الجاليه السودانيه بدولة قطر المشاركه
فى هذا النفير , فحال أهلنا فى السودان بعد الكوارث التى سببتها
الأمطار الغزيره يحتم علينا الوقوف بجانبهم .
|
Post: #4
Title: Re: نفير الجالية السودانية بقطر لاغاثة متضرري الامطار..
Author: احمد الزبير
Date: 08-06-2013, 04:20 PM
Parent: #3
نحن معكم ونشد من ازركم
المطلوب تحديد يوم للنفير
ونوع التبرعات ماليه عينيه
خيم بطاطين ملبوسات مواد غذائيه
والموقع البلم الناس
وقترح المركزالثقافي السوداني
الموقع الجديد ( مرور الريان سابقا )
وتكثيف الاعلان بالصحف القطريه والرسائل
لجميع افراد الجاليه
|
Post: #5
Title: Re: نفير الجالية السودانية بقطر لاغاثة متضرري الامطار..
Author: معاوية الزبير
Date: 08-06-2013, 11:28 PM
Parent: #4
Quote: المرجو من جميع أفراد الجاليه السودانيه بدولة قطر المشاركه
فى هذا النفير , فحال أهلنا فى السودان بعد الكوارث التى سببتها
الأمطار الغزيره يحتم علينا الوقوف بجانبهم . |
فوق يا شباب حتى تحقيق المراد
وكما كتب أحمد الزبير
| Quote: تكثيف الاعلان بالصحف القطريه والرسائل لجميع افراد الجاليه |
وما في زول ح يقصّر
|
Post: #6
Title: Re: نفير الجالية السودانية بقطر لاغاثة متضرري الامطار..
Author: كمال سالم
Date: 08-07-2013, 01:40 AM
Parent: #5
-
|
Post: #7
Title: Re: نفير الجالية السودانية بقطر لاغاثة متضرري الامطار..
Author: كمال سالم
Date: 08-07-2013, 04:58 PM
Parent: #6
=
|
|