Post: #1 Title: اول حلقة لهذا الموسم من اغاني احضرها صادفت محمود تاور Author: اساسي Date: 08-05-2013, 05:22 PM
والنصيحة اتفاجأت زي ما اتفاجأ محمود تاور نفسه
Post: #2 Title: Re: اول حلقة لهذا الموسم من اغاني احضرها صادفت محمود تاور Author: امير طمبل Date: 08-05-2013, 05:26 PM Parent: #1
إن شاء الله بس تكون عجبتك يمة الشوق بي غلب ليك يا حنينة وللبلد أغنية رائعه صراحة كلماتها تلج الي القلب
Post: #3 Title: Re: اول حلقة لهذا الموسم من اغاني احضرها صادفت محمود تاور Author: حيدر حسن ميرغني Date: 08-05-2013, 05:54 PM Parent: #2
والله يا اساسي محمود ده من اميز الفنانين المعاصرين في البلد زول راقي يتغني بأغانيه لا اغاني غيره ويبدع في صمت بعيدا من التزلف لوسائل الاعلام التي تحابي المبدعين بناء على علاقاتهم وليس على مستوى ابداعهم حضرت له جلسات في جدة منتصف التسعينات واحببته من تلك اللحظة وفوق كل ذلك محمود فنان مهذب وخلوق جدا جدا له التحية ولك مثلها لانك كتبت عنه
Post: #4 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 08:23 AM Parent: #3
تاور عيـان يا اساسي .. عيـــــــان .. عيان .. الشالو منك يرجعو يا تاور..
Post: #5 Title: Re: اول حلقة لهذا الموسم من اغاني احضرها صادفت محمود تاور Author: عزالدين عباس الفحل Date: 08-06-2013, 09:53 AM Parent: #4
Post: #6 Title: Re: اول حلقة لهذا الموسم من اغاني احضرها صادفت محمود تاور Author: haroon diyab Date: 08-06-2013, 10:33 AM Parent: #5
بس لو كان اده البت فهيمة فرصة في يمة الشوق
كان ماقصر معانا خالص
تحياتي يا سماني
Post: #7 Title: Re: اول حلقة لهذا الموسم من اغاني احضرها صادفت محمود تاور Author: عبد الحي علي موسى Date: 08-06-2013, 11:11 AM Parent: #6
Quote: والله يا اساسي محمود ده من اميز الفنانين المعاصرين في البلد زول راقي يتغني بأغانيه لا اغاني غيره ويبدع في صمت بعيدا من التزلف لوسائل الاعلام التي تحابي المبدعين بناء على علاقاتهم وليس على مستوى ابداعهم حضرت له جلسات في جدة منتصف التسعينات واحببته من تلك اللحظة وفوق كل ذلك محمود فنان مهذب وخلوق جدا جدا له التحية ولك مثلها لانك كتبت عنه
نعم حيدر.. فمحمود يغني بكُلٍيته. يمة الشوق يمة الشوق يمة الشوق يمة الشوق يمة الشوق محمود نادر. محمود صادق. محمود، حين يؤدي، يصير بعضه كله.
Post: #8 Title: Re: اول حلقة لهذا الموسم من اغاني احضرها صادفت محمود تاور Author: بله محمد الفاضل Date: 08-06-2013, 11:32 AM Parent: #7
زول كويس يا سمسم تاور دا كويس شديد عندي مشكلة قبول/غش ذاتي يا سمسم عارف الزول البغني من قلبو ببتهج بيهو جداً غض النظر عن قدرتو من عدمها وتاور دا بغني من قلب قلبو
و سلام
Post: #10 Title: Re: اول حلقة لهذا الموسم من اغاني احضرها صادفت محمود تاور Author: حمد عبد الغفار عمر Date: 08-06-2013, 11:56 AM Parent: #8
تاور وزيدان والخالدي
ديل بهارات الغناء السوداني ياخ
يا سلام
بالله عليك الله شوف الزول دا بمسك بزمام الاغنيات وبسيطر عليها كيف؟
Post: #9 Title: Re: اول حلقة لهذا الموسم من اغاني احضرها صادفت محمود تاور Author: أحمد ابن عوف Date: 08-06-2013, 11:38 AM Parent: #7
فعلا حلقة مميزة فعلا، والاستاذ محمود تاورعندي من الذين يتوقف عندهم تقلب الريموت
تحياتي للجميع
Post: #11 Title: Re: اول حلقة لهذا الموسم من اغاني احضرها صادفت محمود تاور Author: عمر الفاروق Date: 08-06-2013, 12:17 PM Parent: #9
تعرف يا قريبك ..محمود تاور ده من الناس البي سببهم الواحد نضّف أضانو في الغنا.. إمكن أكتر فنان سمعتو لااايف كده كان محمود تاور ..وده لإرتباطه بي صداقات مع الأسرة الكبيرة من الخيلان .. أييي مناسبة في البيت أييّا كان نوعها كن لازم محمود تاور يكون عندو فيها فاصل على الأقل لو ما المناسبة كلها.. تاور صوت طبيييعي وصااافي خااالي من الشوائب .. وزول أخلاااق وود نااااس كيييف ..لمممن يمحنك .. الغريبة الأمبارح ده مااا تاور .. ما عارف الناس سمعتو كيف أو إمكن انا من كترة ما سمعت تاور بقيت بعرف بتين تاور متألق وبتين تاور منهك حبتين.. صاح مقارنة بي كتير من الحلقات وكتير من البنسمع فيهو أسة بنشوف تاور في قمة التألق .. لكن والله تاور أححححلللى وأجممممل من الامبارح ده.. كدي يا أساسي قوووم كده قوقل في النت وفتش تحديييداً تسجيل الإذاعة لي أغنية لمّا شوفتك شوفت فيك كل العجبني..ركز معاي في لازم يكون تسجيل الاذاعة القديم ما أيي تسجيل تاني.. عشان تعرف يعني شنو الصوت الدافئ والرايق.. تاور بتاع اليومين ديل عندو عيب كبيير وحركة مااا عجبتني ..حركة كده ولو إنو الناس قد تفتكرا سلطنة لكن انا بشوف تاور كتتترا اللي هي إعادة اخر كلمة من المقطع بتاع الاغنية اثناء ما الموسيقى شغالة .. مثال ليها زي تحبو تحبو تحبو تحبو تحبو تحبو اللي في الاغنية الجابا تمبس دي .. تاور كتتترا شديييد ومرات كتيييرة بتشتر ليهو غناهو وبتجهجه الموسيقى معاهو وهو بقا يستخدما مع أييي أغنية وفي أيييي حتة .. زمان الكلام ده ما عندو .. أما أكبر عيوب محمود تاور في نظري ومن زمااان بقول ليهم ..تاور عندو قمصان وكرفتات كده بيعرفا براااهو .. أكتتتر فنان لسة بيلبس قميص الهزاز المزركش بالألوان الغريبة تاور .. وكرفتاتو معظمها ألوانا غريبا .. وما بتلفق مع اللبس.. تاور فنان جميييييييل صاحب صوت مرييييييح واغاني ممتعة ..الأجمل إنو في الأونة الأخيرة تاور يكتب ويلحن كل أعمله.. أحب جداً أغنية أهو دي الشمس غابت ..وييينو القمر طيب. عين العدو وصابت ..نسيتني يا حبيييب..
Post: #12 Title: Re: اول حلقة لهذا الموسم من اغاني احضرها صادفت محمود تاور Author: khaleel Date: 08-06-2013, 12:36 PM Parent: #11
https://soundcloud.com/khaleelgasem/arja-alrajeek
الاغنية دي حلوة اسمعا
بعدين لحدي هسع ما عرفنا انك مبسوط وللا زعلان من تاور
Post: #14 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 12:57 PM Parent: #11
ههه طبعا يا عمر كنت عايز اعمل ليك استدعا هنا في البوست دا علشان اقوليك تعال نقلع البوست دا من الزول دا .. ونوريهو القيمة الحقيقية للفنان محمود تاور ( ود الحلـة ) لكن بس خفتو يقوم يبكي ساي والدنيا رمضان .. للاسف لي فترة ما سمعت تاور لايف .. وانا الكنت زيك بفطر وبتغدى وبتعشى وبنوم بي تاور .. من اغاني الراحلة ليلى ما بسيبو حالك .. ياهااا .. وحكمــة يس .. ارجع تعال عود لي .. بالاضافـة لي كلام تاور الخاص جدا .. والمؤلم جدا بالنسبـة ليهو .. وانا لما قلته فوق تاور عيان .. زي ما انت عارف كنت بعني بيها شنـو .. فزول بحب ليهو انسان بي طريقـة زي دي اكيد بقدر يغنيهو بي كامل احساسو ..
Quote: تاور بتاع اليومين ديل عندو عيب كبيير وحركة مااا عجبتني ..حركة كده ولو إنو الناس قد تفتكرا سلطنة لكن انا بشوف تاور كتتترا اللي هي إعادة اخر كلمة من المقطع بتاع الاغنية اثناء ما الموسيقى شغالة .. مثال ليها زي تحبو تحبو تحبو تحبو تحبو تحبو اللي في الاغنية الجابا تمبس دي ..
بالمناسبة يا عمر الحركة دي اللزمـة الثابتـة لي تاور .. او هي بصمـة تاور .. ومن ما قام تاور كان بيعمل الحركة دي وهي فعلا سلطنـة عالية وتاور بس البقدر عليها .. اي زول غيرة بتشتر زي ما قلته .. زمان يا عمر لما فرقـة تاور كان فيها حامد موسى جاركم بالحيطــة وعبد اللطيف ( نم نم ) الله يرحمو وصلاح بتاع الترامبت .. ووليد ايقاع وحاتم بيمول البشبه معتصم دفع الله .. وصلاح بنقز بتاع الدونب .. ودي الفرقة الماسية حقت تاور .. كانو بتصلطنو معاهو ومرات بكوركو عديل كدا ويغرقو زي الدراويش .. عارف اجمل حفلة غناها تاور في حياتو على ما اعتقد .. حتى لو سالتو .. ح يقوليك .. كانت في الفسحـة يا عمر الورا العراضات الشرقية بتاعت ابو عنجـة الميدان الصغير الحسع عملو فوقو بسط الامن الشامل دا .. وطبعا على بعد خطوات من بيت ناس الراحلة ليلى المغربي .. يللا هنا كانت السلطنـة الجد بالجد .. والجو كان خريفي .. ليلى المغربي ربنا يرحمـه كانت بتقول في القصائد .. في واحدات اتغنن في وقتها وفي واحدات ما اتغنن .. وكانت ما بسيبو حالك ياها الغيرة ذاتـه .. كانت جديدة لنج يادوبك اتلحنت .. شوف كم مرة نحن اتلاقينا صدفـة ما ترد السلام ي اشواق ولهفـه .. وإلخ ..إلخ .. كانت ليلى بتقول .. وحكمة يس قاعدة .. وتاور بيتسلطن ويغني وكان اولاد الحلة طالعين معاهو في المسرح بتسلطنو معاهو وانا وقتها كنت يادوبك بتعلم في الحــب.. زمن القميص الكم القصير بتديهو كفـة نظام جنصصه وكدا
Post: #31 Title: Re: اول حلقة لهذا الموسم من اغاني احضرها صادفت محمود تاور Author: ELSADIG ALI HASSAN Date: 08-06-2013, 09:40 PM Parent: #11
إعادة اخر كلمة من المقطع بتاع الاغنية اثناء ما الموسيقى شغالة ..
I agree with you. nice voice if he performed the way he used to several years ago. I like him
Post: #13 Title: Re: اول حلقة لهذا الموسم من اغاني احضرها صادفت محمود تاور Author: كمال سالم Date: 08-06-2013, 12:38 PM Parent: #9
حلقه كانت مميزه للغايه وأكثر ما ميزها أن الصوت فى الأستديو كان فى غاية الظبط مقارنه مع الحلقات السابقه , زائدا الفرقه الموسيقيه أمس كانت فى منتهى التجلى والإنسجام مما جعل محمود يحلق بأحاسيسه ويتدفق فحلقنا معه وتدفقنا كما المطر فى الخرطوم هذه الأيام . يا سلام عليك يا تاور يأخ .
Post: #15 Title: Re: اول حلقة لهذا الموسم من اغاني احضرها صادفت محمود تاور Author: أحمد الابوابي Date: 08-06-2013, 01:05 PM Parent: #13
سلام على صاحب البوست و ضيوفه الأكارم .. . أنا من المعجبين جداً بالفنان بحق محمود تاور .. و مما استوقفني في هذا الخيط ، كلام الفاروق :
Quote: كدي يا أساسي قوووم كده قوقل في النت وفتش تحديييداً تسجيل الإذاعة لي أغنية لمّا شوفتك شوفت فيك كل العجبني..ركز معاي في لازم يكون تسجيل الاذاعة القديم ما أيي تسجيل تاني.. عشان تعرف يعني شنو الصوت الدافئ والرايق..
بالفعل يا عمر هذه إحدى درر الغناء السوداني المكنونة المصونة .. من يسمعها مرة - و شرطاً يكون بيعرف يسمع - يتوق لسماعها مرات، و مرات .. و لكن بس ( تسجيل الإذاعة ) .. لأنو ما أظن تاور غنى الغنية دي قبلو ، و الا ممكن يغنيها بعدو بما هو أكمل ، و أجمل .. و يقيناً لن يستطيع ( مخلوق ) أن يفعل .. هذه ليست أغنيه .. هي شيء أكبر، و أعظم ، و أفخم ..
يا ريت نلقى رابط ليها ، عشان الما سمعا يسمعا .. و البيعرفا يجد فرصه لسماعها مجدداً ..
نسأل الله لتاور العافيه ، و الحياة التي لا تؤوفها آفه .. رجل مريح ، و لا تطالعك منه ( نفس ) ، بل لطافه متناهية ، و بسمه ، و جسد يتوحّد تماماً مع نبرات الصوت الرائع .. يكاد حين يغني لا يحس بما و من حوله ، و إن إعطاهم إحساساً كاملاً بحضور عظيم ، و محبة ، بلا حدود ..
مشكورين يا شباب ، و عيدكم سعيد ..
Post: #16 Title: Re: اول حلقة لهذا الموسم من اغاني احضرها صادفت محمود تاور Author: عمر الفاروق Date: 08-06-2013, 01:42 PM Parent: #15
والله يا تمبس نقلعو قلعة لمممن يحتار في كنكوجو .. وزي ما قال طلحة هو كمان أساسي شن نفرو في محمود تاور وغناهو ؟؟ :) طبعاً يا تمبس مداخلتك دي لمن يقروهو الخرطومية ح يضايقو ويقولوا ليك ناس أمدرمان قاموا لي حركاتم ..طبعاً داير تووورم ليك خرطومي قوم أحكي عن ذكرياتك المكانية والزمانية لي أمدرمان ..طواااالي الجماعة بتقفل معاااهم :):):) ده إحساس مااا بيعرفوهو إلا ناااسو .. وما تتخييل اسة النقلة النقلتني ليها بي وصيف الجهة الشرقية ده .. ياخ طوااالي جا في بالي لمن الكورة تطلع كورنر بي الجهة الجنوبية الشرقية وأخوك كان لفتاوي فكانت الحتة المفضلة ليي.. بالله أتاريهو ورا الحتة دي إنت حتتيتو ؟؟ :):) بعدين دحين بيت ناس بريش ما في الحتة دي؟
Quote: زمان يا عمر لما فرقـة تاور كان فيها حامد موسى
يا سلااااااام ... حامد الخليفة موسى.. والخليفة موسى لمن لا يعرفونه من اوائل قادة التحكيم في كورة القدم ..والغريبة أولادو كلللهم ما طلعوا ناس كورة بل طلعوا ناس موسيقى سااااي... عارف أسرة الخليفة موسى دي مفروض أسرة يتم التوثيق ليها يا تمبس... أسرة معطووونة بالفن وناس حلوييين ومريحييين جدا جدا..حالياً رجاء بت الخليفة موسى هي الوريث الشرعي لي القامة الفنية دي واخر عهدي بيها محاضرة في كلية الموسيقى والدراما وعازفة لآلة الكلارينيت وإمكن ده بسبب معايشتها للراحل أميقو وهو يتعايش مع هذا الزقاق الضييق بين بيتنا وبيت ناس الخليفة موسى.. حامد موسى ده حكااااية .. ولا أخفيك سراً لو قلت إنو واحد من أعظم عازفي البيز في السودان والدول المجاورة لكن الغربة اللعينة طفشتو ..حامد كان زول فنان جدا جدا جدا.. عارف يا تمبس وانا شاهد عيان أبصو وبالعشرين إنو حامد موسى كان سبب رئيسي لي نقلة فنية كبيرة لي إتنين من الفنانين الكباااار حالياً الأول عبد الرحمن عبد الله .. والتاني محمود تاور.. ديل حامد عمل ليهم ومعاهم شغل عجيييب وأفكار موسيقية رهيييبة كانت نقلة في طريقة غناهم.. في تسجيل في التلفزيون لي عبد الرحمن عبد الله حلقة كاملة قدم فيها درره بي طريقة كانت نقلة ..أها شوف حامد موسى ده كان بيعمل فيها شنو ذلك الفتى الأسمراني النحيييل.. غايتو يا تمبس ما عارف لكن كللل أهالي الموردة والعباسية وحي الضباط وأبوكدوك وبانت ..كان عندهم غرام خااااص مع أغنية طييري يا قمرييية ..وركّي فوق الزنكي..إتصنتي القضية .. لمن تاور كان بيغنيها الكوراااريييك تضرب في الخيمة والناس تهييييج .. ويا سلااام على ثنائية تاور والمرحومة ليلى المغربي... مالك علينا يا تمبس يااااخ .. يااااه عليهو من زمن..
Post: #17 Title: Re: اول حلقة لهذا الموسم من اغاني احضرها صادفت محمود تاور Author: Balla Musa Date: 08-06-2013, 02:02 PM Parent: #16
ياناس غض النظر عن جهبذة تاور الغنائية لكن مافى زول حدثو وقال ليهو البرنامج دا عشان الناس تغنى أغانيك بطريقتهم؟
مافى زول قال ليهو المرة دى استمع لأغانيك من ناس تانين..؟
Post: #18 Title: Re: اول حلقة لهذا الموسم من اغاني احضرها صادفت محمود تاور Author: حمد عبد الغفار عمر Date: 08-06-2013, 02:12 PM Parent: #17
Quote: مافى زول قال ليهو المرة دى استمع لأغانيك من ناس تانين..؟
رمضان كريم يا دكتور
يمكن الفنانين ديل اعتذروا قالوا ما بنقدر نغني غناء تاور دا؟
Post: #19 Title: Re: اول حلقة لهذا الموسم من اغاني احضرها صادفت محمود تاور Author: عمر الفاروق Date: 08-06-2013, 02:25 PM Parent: #18
أها يا صاحب كدي شوفا ياها دي التسجيلة البتقصدا؟؟ لأنو دي أجمل وأمتع التسجيلات اللي كنت أحب أسمعا دوماً في برامج الاذاعة إما نص النهارية والناس رايقة وقت القيلولة وإما في مخترات الاغاني الليلية في هدوء وسكون الليل.. وشكراً لي زميل الليندي الراجل الفنان ..ما عارف بدونكم إنتو وناس جمال كان سوينا شنو ..
Post: #20 Title: Re: اول حلقة لهذا الموسم من اغاني احضرها صادفت محمود تاور Author: حيدر حسن ميرغني Date: 08-06-2013, 03:03 PM Parent: #19
ياسلام ياعمرنا على الاغنية الهادئة والحلوة دي بالجد اضانك سنينة وذائقتك لا يختلف حولها جهابذة التطريب بالله خليك من ناس قريعتي راحت وانداح بس في المزازيك
- سؤال هل تاور اول من ادخل الدونم ام الدونب ماعارف في الموسيقى الحديثة؟ واحد قاعد حداي قال كده
Post: #22 Title: Re: اول حلقة لهذا الموسم من اغاني احضرها صادفت محمود تاور Author: Ahmed musa Date: 08-06-2013, 03:36 PM Parent: #20
Quote: تاور بتاع اليومين ديل عندو عيب كبيير وحركة مااا عجبتني ..حركة كده ولو إنو الناس قد تفتكرا سلطنة لكن انا بشوف تاور كتتترا اللي هي إعادة اخر كلمة من المقطع بتاع الاغنية اثناء ما الموسيقى شغالة .. مثال ليها زي تحبو تحبو تحبو تحبو تحبو تحبو اللي في الاغنية الجابا تمبس دي ..
بالعكس ياخ ..... دي أجمل حاجة عنده بتمرق من جوووووووووووة انا لمن اسمعها بحب مرتي وبت الجيران وزميلتي الزمان في الجامعة وصوفيا لورين (ماعارف ليه بالذات صوفيا دي) بجد محمود تاور من أجمل الفنانين بذكرني بزيدان وانا زيدان فناني المفضل دوماً امس اتفاجأت بانه من اولاد العباسية وبقى حتى يشبه زيدان في الشكل .... بجد بغني زيه .... من حنايا الروح ياخ .... أساسي : الميكرفون عندك
Post: #21 Title: Re: اول حلقة لهذا الموسم من اغاني احضرها صادفت محمود تاور Author: أحمد الابوابي Date: 08-06-2013, 03:34 PM Parent: #19
مشكور يا فاروق ياخ .. بالضبط .. دا هو التسجيل .. و هي زي ما عارف - و مذكور في التسجيل برضو- من ألحان محمد آدم المنصوري .. ذلك الهرم الموسيقي الرفيع .. و كلمات : الـعـابـد عثمان جـعـفـر. . تعرف أنا الغنيه دي ارتبطت عندي بالبرنامج الإذاعي - الصباحي - بإذاعة كسلا ( الشمس تشرق من هنا ) .. و كان مدير الإذاعة وقتها الأستاذ ابراهيم البزعي ، و إلى ذلك كان المعد للبرنامج ، و المشرف عليه .. كان ذلك فيما بين 1990 ، و 1994 على ما أذكر .. ما زلت أحمل للبزعي ديناً ، و تقديراً كبيرين ، إذ كان البرنامج باقة من المنوعات التي تجعل الوجدان ، يصحو منتعشاً ، مقبلاً على الحياة ، رغم تكاسل الجسد .. و لا زلت أذكر أكثر الأغنيات ترداداً ، و منها هذه الأغنية الرائعة ، و أغنية المبدع أحمد ربشه ( بدري من عمرك ) .. باقة تشهد بجمال ذائقة معد البرنامج - و من ضمنها أيها ( الزهور بسمت لينا ) ، للجابري ، و ( ذاك الصباح أهو لاح ) .. و أنا حتى الآن ، كلما أذكر هذا البرنامج أشعر بنسمة من الفأل ، و نفحة من البشر تسري في كياني .. فللبذعي الشكر ، و لأسرة إذاعو كسلا ، في ذلك الوقت ، و كل وقت ..
مشكور أنت أيضاً أيها الصديق .. و محفوظ تاور المحمود في العالمين .. محبتي
Post: #23 Title: Re: اول حلقة لهذا الموسم من اغاني احضرها صادفت محمود تاور Author: كمال سالم Date: 08-06-2013, 04:39 PM Parent: #21
Quote: . أساسي : الميكرفون عندك
مكرفون شنو يا أحمد ,, والله أنا خايف أساسى يجى يسلمنا كل واحد سقنجتو فى يدو . لأنو ومن عنوان البوست شكلو بيندب فى حظو الخلاهو أول حلقه فى الموسم يحضرها ويطلع فيها محمود تاور .
غايتو يا أساسى لو كلامى طلع صاح لازمك تشوف أخصائى أذن وحنجره يمكن الأذن الوسطى تكون ما شغاله كويس .
Post: #24 Title: Re: اول حلقة لهذا الموسم من اغاني احضرها صادفت محمود تاور Author: محمد جبره Date: 08-06-2013, 04:50 PM Parent: #23
لحدي هسه ما عرفنا اساسي عايز يقول شنو !!!!!
الاستهداف واضح جدا كامل التضامن مع اساسي
Post: #25 Title: Re: اول حلقة لهذا الموسم من اغاني احضرها صادفت محمود تاور Author: اساسي Date: 08-06-2013, 05:11 PM Parent: #24
جهجهتكم صاح ؟
الحقيقة الدهشة كانت في بهجة المغنيين بتاعين اغاني واغاني وحبهم البذلوه لي تاور بكل احتفاء وهم بيستمعوا لي تاور تحسهم دايرين يسمعوهو وهو بغني بي طريقته الخاصة واضح انه طريقته دي اسراهم لو دايرين تشوفوا الكلام دا ارجعوا للحلقة ولاحظوا للفنانين اثناء ما تاور بغني زمان نص التزعينات سالني واحد عن احسن فنان سوداني قلت ليهو احسن فنان ما بعرف لكن في السودان في محمودين يمتلكوا اجمل اصوات سودانية احدهم الحوت والتاني تاور يتبع علي قول العربسات طلحة
Post: #26 Title: Re: اول حلقة لهذا الموسم من اغاني احضرها صادفت محمود تاور Author: علاء الدين حيموره Date: 08-06-2013, 05:33 PM Parent: #25
كتب اساسي :
Quote: المحير في الامر بل المحير جدا هوس السودانين بالغناء ورواج سوقه في رمضان في زول قال للسودانين انه التقرب الي الله وطلب مغفرته ورحمته في رمضان لا يتم الا عبر الغناء ؟
رمضان انتهى عندكم يا اساسي ؟؟
______________
تاور راجل مرهف الاحساس وذو صوت طروب جدا والاهم هو طريقته المختلفة من النمط التقليدي للغناء وبساطة الكلمات .. تاور يدخل القلوب دون استئذان ..
استلمو البوست يا تمبس وعمر ...
وكل سنة وانتو بالف خير
Post: #27 Title: Re: اول حلقة لهذا الموسم من اغاني احضرها صادفت محمود تاور Author: اساسي Date: 08-06-2013, 06:41 PM Parent: #26
تصدق يا علاء الدين شفت اسمك برة البوست قريت مداخلتك قبل ما اشوفها لاحظت في التلاتين يوم ديل حلقة واحدة وبالصدفة كمان ما طواااالي
Post: #28 Title: Re: اول حلقة لهذا الموسم من اغاني احضرها صادفت محمود تاور Author: محمد البشرى الخضر Date: 08-06-2013, 06:52 PM Parent: #27
Quote: العربسات طلحة
Post: #29 Title: Re: اول حلقة لهذا الموسم من اغاني احضرها صادفت محمود تاور Author: ودالعباسية Date: 08-06-2013, 08:12 PM Parent: #28
يا تمبا ،،، ذكرتنا ايام لا تنسى والله ،،،
Quote: بالمناسبة يا عمر الحركة دي اللزمـة الثابتـة لي تاور .. او هي بصمـة تاور .. ومن ما قام تاور كان بيعمل الحركة دي وهي فعلا سلطنـة عالية وتاور بس البقدر عليها
وبرضو من جمل الحفلات كانت فى العباسية ،،، تاور وزيدان ،، وتأمل زي ما بقول ملاسى
اخر مره حضرته ليه حفله لايف كانت قبل 3 سنين كدا ،، فرقة مكتمله ومتسلطنين معاهو لدرجة كبيرة جدا ،،
تعرف بغنى وما حاسى انه الساعة 11 جات ،،وعايز يواصل ،،
ـــــــــــــــ
الاخ القال انه يفترض يخلى الشباب يغنو اغانية ،،، اقول ليك ما بقدرو ،،
هم قاعدين مستمتعين بالاداء والتطريب دا
Post: #35 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 10:13 PM Parent: #29
Quote: وبرضو من جمل الحفلات كانت فى العباسية ،،، تاور وزيدان ،، وتأمل زي ما بقول ملاسى اخر مره حضرته ليه حفله لايف كانت قبل 3 سنين كدا ،، فرقة مكتمله ومتسلطنين معاهو لدرجة كبيرة جدا ،، تعرف بغنى وما حاسى انه الساعة 11 جات ،،وعايز يواصل ،،
زيدان الله يرحمو وتاور في حتة واحدة ..؟ ياخ دا عبارة عن ترف .. ترف راسو عديل .. الناس دي يا ود العباسية كانو بجو يغنو ويدفعو في الكشف وتلقاهم بالنهار هم الداقين الخيمـة براهم بي عرق جبينم ..
Post: #30 Title: Re: اول حلقة لهذا الموسم من اغاني احضرها صادفت محمود تاور Author: علاء الدين حيموره Date: 08-06-2013, 09:02 PM Parent: #27
اساسي
Quote: لاحظت في التلاتين يوم ديل حلقة واحدة وبالصدفة كمان ما طواااالي
وجب عليك اطعام مسكين ....
Post: #34 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 10:04 PM Parent: #27
Quote: تصدق يا علاء الدين شفت اسمك برة البوست قريت مداخلتك قبل ما اشوفها لاحظت في التلاتين يوم ديل حلقة واحدة وبالصدفة كمان ما طواااالي
ومال شنـو ..؟ انت تقع لينا في الجمبـة البتريحنا وفي الاتو بتاعنا وعايزنا نمشيها ليك .. انت احكي عن حمد الريح وعن نهيرو للغناء وطيورو ورهوو وسمبرو.. وتاور دا خلينا نمتعك فيهو ... اهـا شفته مصابك سميرك دي .. لو عايز نحكيها ليك بي كم روايـة بنحكيها ليك .. وبنشرحه ليك بي شغل المسرح لما بتتغنى .. لما تشوف ( عثمان موسى ) برقض وبوصف وبتجرس قدر شنو لما تاور بغني وعثمان موسى دا بالذات من احسن الناس البعبرو حركيا رقااااص عديل لا تقول لي مايكل جاكسون لا تقول لي اي زول بعرف يرقص .. ولو كنت محظوظ كان تتلم ليك في حفلة بي تاور دكاكينيه فيها حنان بلوبلو في عز مجدها وبعض من حسان الحلـة .. بعدينك للمعلوميـة: دكاكينية دي معناته .. (فتقــة خيمة) في أول الشارع والتانية في نهاية الشارع .. وكراسي مافي زي حفلات بوب مارلي وفيروز وإلخ إلخ ..
Post: #33 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 09:51 PM Parent: #17
Quote: ياناس غض النظر عن جهبذة تاور الغنائية لكن مافى زول حدثو وقال ليهو البرنامج دا عشان الناس تغنى أغانيك بطريقتهم؟ مافى زول قال ليهو المرة دى استمع لأغانيك من ناس تانين..؟
لالا يا دكتور .. تاور دا بالذات يغني غناهو براهو .. في نصوص فيها شجــن ما بقدر يعيشـة الا هو .. وما بقدر يوصل فكرته إلا هو .. شوف الشباب ديل وتاور بغني كانو منشرحين قدر شنو ..؟
Post: #32 Title: Re: اول حلقة لهذا الموسم من اغاني احضرها صادفت محمود تاور Author: tmbis Date: 08-06-2013, 09:48 PM Parent: #16
Quote: والله يا تمبس نقلعو قلعة لمممن يحتار في كنكوجو ..
والله يا غمر صدق اللي قال .. لو ما الدنيا قبايل عيد كان نقلعو منو باقي الليل دا ..
Quote: طبعاً يا تمبس مداخلتك دي لمن يقروهو الخرطومية ح يضايقو ويقولوا ليك ناس أمدرمان قاموا لي حركاتم ..طبعاً داير تووورم ليك خرطومي قوم أحكي عن ذكرياتك المكانية والزمانية لي أمدرمان ..طواااالي الجماعة بتقفل معاااهم :):):) ده إحساس مااا بيعرفوهو إلا ناااسو .. وما تتخييل اسة النقلة النقلتني ليها بي وصيف الجهة الشرقية ده ..
.. لكن نحن ذنبنا شنو ..؟ اكن الواحد بصحى من نومو بلقى الناس البتغني الغنا السمح دا قدامو .. اضف لذلك بتكون معايش احداث الاغنية البتجرس الناس .. وبتجرس سيده زاتو .. وبتكون عارف اتكتبت في منو وعشان شنو وليه ؟ بي ذكرياته المكانية والشارع الاتولدت فيهو .. ايييييييييييييه دنيا .. .. المهم جهز حالك اذا بتريد عازمك بوست بعد العيد بيناقش الحتة بتاعت الامكنـة وميلاد القصيدة ولحنها وغناها .. ولو اضطر الأمر الناس الاتكتبت علشانم زاتووووو .. والله يا عمر في الكورنر بتاعتك دي حتيناهو حت عجيب .. وفي نفس الكورنر دي حتاهو معانا كابلي .. واتجرس جرسـة السنين ونحن اي زول بتجرس لينا في الحتات دي بنتجرس معاهو طوالي .. وما دافعين اي حاجة ..
Quote: وعازفة لآلة الكلارينيت وإمكن ده بسبب معايشتها للراحل أميقو وهو يتعايش مع هذا الزقاق الضييق بين بيتنا وبيت ناس الخليفة موسى..
.. والله يا عمر نحن لو ما سجمانين ساي .. التوثيق دا مفروض نوثقو لي كل لفـة وكل زقاق في الحلـة وكل لفــة .. الغريب في الأمر الناس دي كانت بتتعامل عادي مع مواهبـة حتى نحن كنا مفتكرين المسالة عادية ما كمان دي حاجات الناس العادية وفطرتم العجيبة .. ياخ آل موسى ديل ناس عجيبين .. وحامد موسى دا زي ما قلت احسن زول كان بضرب باص جيتار وقتها والناس ما عارفنو .. ياخ دا في حفلة الراحل وردي في اديس في الميدان الكبير عمل عمايل عجيبة وغريبة ..
Quote: غايتو يا تمبس ما عارف لكن كللل أهالي الموردة والعباسية وحي الضباط وأبوكدوك وبانت ..كان عندهم غرام خااااص مع أغنية طييري يا قمرييية ..وركّي فوق الزنكي..إتصنتي القضية ..
خد معاك كمان اغنية . اهل الفريق طيبين كيف حالكم امسيتو .. ودي تحديدا كانت مرات في الحفلة الواحدة بتتغنى مرتين اتنين .. مرة في النص ومرة بختم بيها الحفلة .. يا سلام ياخ يا سلالالالالالالالالالالالالالالالام .. هيجت اشجاني يا عمر
Post: #36 Title: Re: اول حلقة لهذا الموسم من اغاني احضرها صادفت محمود تاور Author: عمر الفاروق Date: 08-06-2013, 11:10 PM Parent: #32
Quote: مافى زول حدثو وقال ليهو البرنامج دا عشان الناس تغنى أغانيك بطريقتهم؟
يا دكتور بلة يبدو إنك ومعاك ناس تانيين ما متابعين الحصل لي تاور من الشباب ديل .. الفنان محمود تاور كان فاكي غناهو للشباب يغنوهو زي ما عايزين وطبعاً غنا تاور واحد من أحلى الأغاني الممكن تغنيها في الأعراس كلها هجيييج إضافة لي إنها أغنيات رقيقة وبسيطة في كلماتها ويا قول اللبنانيين مهضووومة كتيييير.. أها قووووم يا واحد من الفنانين الشباب صرّح في واحدة من الجرايد وقول لولاي ولولا ترديدي لأغنيات تاور ماااف زول كان سمع بي تاااور ده منو .. وانا بغني الأغاني دي أحسسسن من تاور.. أها تاااور الزول الرقيق الحساس زعععل شديد وتاااني يوم قال تاني ماااف زول من الشباب يغني غناي .. وقد كان .. أها تاور بيكون من اليوم داك قصة شباب يغنو غناهو ويجو يقولوا تاور فنان ما معروف ولولانا ما كان إتعرف!!! أها أحسن يغني براااهو وبي حقققو .. وأهو براااك شوفت الشباب في وادي وتاااور في وادي تاني ..كان يغنوها أحسن منو ما عارف!!!
