شعبه بيموت في الخيران و ( عمك ) ماشي يهجج في إيران ؟؟

بالغت يا عمك ..

و بغض النظر عن فضيحة ( إعادة ) الطائرة الرئاسية ( المستأجرة ) و أسبابها ..

و بكل بساطة ..

زول ما ( ستر ) جنايز في ( بيت أهلو ) .. جاري هاجي عشان يحضر ليهو حفلة ( تنصيب ) في بلاد برة ..

النصيبة التجيب كسافتك ..

و لو ان ( عمك ) ختف رجلو لأقرب حلة في شرق النيل ..

و وقف على الأوضاع المأساوية و الموت المجاني هناك ..

ثم خطب و وعد و رقص و فنجط ما شاء الله له ثم ( كفتهم ) بفاتحة ..

أما كان قد سكتنا معشر الشمّات ..

مالنا نحن و مال أم أيران و ملاليها ..

و أي سيرة حسنة لإيران في بلادنا ..

و أي رابط يربطنا بها أصلاً ..

و ماذا قدمت إيران لأهلنا غير الموت و الدمار ..

و الفتنة و الإقتتال ..

ما تقوم به إيران في العراق و في سوريا و لبنان ..

و البحرين و اليمن و السعودية و الإمارات و مصر ..

و حتى في بلادنا من فتن و مؤمرات و دسائس ..

هو أمر لا يجهله أي مواطن بسيط ..

و ( عمك ) عارف كلو حاجة .. و الله عارف ..

لكن ( عامل رايح ) ..

و عايز يلعب بولتيكا نظام ( غمدت لبدت ) ..

عايز يعمل حريف ( و ركاب سرجين ) ..

عمك ( دقس ) ..

سلام يا مولانا

كل سنه وانت طيب

Quote: مالنا نحن و مال أم أيران و ملاليها .. و أي سيرة حسنة لإيران في بلادنا .. و أي رابط يربطنا بها أصلاً .. و ماذا قدمت إيران لأهلنا غير الموت و الدمار .. و الفتنة و الإقتتال ..

كلام سليم يا عصام , ايران دي مافى اي حاجه بتربطنا بيها

لكن الاهبل دا دايما براهن على حمار ميت

واذا كان فاكر ايران معتبراهو بني ادم

يكون دقس مرتين

غايتو البتجيهو لي لاهاي بتوديهو



كت اوت :

واحد سعودي صاحبنا قرِن كنت بتكلم معاهو قبيل

والله قال نفس كلامك , قال لي الزول دقس

والجاي شيتاً كُتُر

انت ياخوي قلبت متين؟

انتو عصام دهب دا ما ياهو الكان بيبكى و مخاخيتو جارية عشان المؤتمر الوطنى و للا زولا تانى؟

أصبئت يا عصام دهب أم رجعت الى الحق بعد أن زالت عنك الغشــاوة؟ ان كان ذلك ما حصل فهنيئا لك , فالحق أحق أن يتبع

Quote: و لو ان ( عمك ) ختف رجلو لأقرب حلة في شرق النيل .. و وقف على الأوضاع المأساوية و الموت المجاني هناك .. ثم خطب و وعد و رقص و فنجط ما شاء الله له ثم ( كفتهم ) بفاتحة .. أما كان قد سكتنا معشر الشمّات

لو كان إسمه ع مسماه لفعل ما ذكرته يا سعادة المستشار بدلا من اللهث خلف بوم الروافض الشيعة ......

المملكة العربية السعودية وبقية دول الخليج لهم أياد بيضاء

على السودان على مر العصور فتحوا الباب على مصراعيه للعمالة

ولم يبخلوا بالمساعدات حين ألمت بنا كوارث المجاعة والفيضانات

ولكن الإنقاذ إعتادت على عض تلك الأيادى منذ موقفهم الغريب أثناء

حرب الخليج الثانية التى ساندوا فيها صدام حسين وتركوا الحبل

على الغارب ليونس محمود يكيل الشتائم يمنة ويسرى للملوك والأُمراء

وما زالوا يسيرون على نفس النهج بذلك الحلف المريب والغريب مع طهران .

وما فعلته المملكة العربية السعودية قرصة ودن حتى يرعوى البشير عن غيه

ونتمنى أن يستفيد البشير من الدرس ويضع مصلحة الوطن والمواطن نصب عينيه

فيحاول أن يجنب البلد المزيد من المحن والإحن فيعترف بفشل حكومته ويعمل

على تشكيل حكومة قومية من تكنوقراط مشهود لهم بالكفاءة والنزاهة حتى

يضعوا خارطة طريق للخروج بالوطن من عنق الزجاجة .

لك التحية الأخ عصام دهب

كل سنة وإنت طيب يا عصام
وكلامك عين العقل لو كان في مستشارين أو عمك عندو عقل
مش كان أحسن ليه يجي السعودية في العشرة الأواخر دي
يسوي ليه عمرة ويسأل ربه يخفف عن شعب السودان
والسعودية ما بتقصر معاه تب
لكن نقول شنو؟
المزعلني إنه إعلامنا يبرر لهكذا عمايل

سلام و أحترام يا جمال خضر ..

Quote: ما فعلته المملكة العربية السعودية قرصة ودن حتى يرعوى البشير عن غيه ونتمنى أن يستفيد البشير من الدرس ويضع مصلحة الوطن والمواطن نصب عينيه فيحاول أن يجنب البلد المزيد من المحن والإحن فيعترف بفشل حكومته ويعمل على تشكيل حكومة قومية من تكنوقراط مشهود لهم بالكفاءة والنزاهة حتى يضعوا خارطة طريق للخروج بالوطن من عنق الزجاجة

و رغم الأسباب المعلنة لمنع الطائرة الرئاسية المستأجرة إلا أنني أتفق معك تماماً يا جمال و لعله يعي الدرس جيداً و يعيد النظر في ساسات حكومته الرعناء ..

سلام يا أحمدونا و عساك طيب ..

Quote: لو كان إسمه ع مسماه لفعل ما ذكرته يا سعادة المستشار بدلا من اللهث خلف بوم الروافض الشيعة ......

و لكن أين ( عُمرنا ) من عمر ـ رضي الله عنه و أرضاه ـ سيد الأسم ..

بُعد السما ..

سلام يا أسامة صديق ..

Quote: انتو عصام دهب دا ما ياهو الكان بيبكى و مخاخيتو جارية عشان المؤتمر الوطنى و للا زولا تانى؟ أصبئت يا عصام دهب أم رجعت الى الحق بعد أن زالت عنك الغشــاوة؟ ان كان ذلك ما حصل فهنيئا لك , فالحق أحق أن يتبع

لكنما ( عقدتني ) و شمت فيني خلق الله ..
و خليتني زي عايز أشرد من البوست دة عدييل كدة ؟؟
أعاين ليهو و ( أبكي ) .. و أمشي و ما أجئ راجع ذاتوو ..
انتا مالك زول شفت و فقري كدة ياخي ؟؟
ما فاضل ليك إلا تجيب لي صورتي ـ أبو مخاخيت جارية ـ عشان تعمل لي نفسيات ؟؟
و تخليني أشوف البوست دة عشرة عشرة ..
و العيد ذاتووو يبقى لي زي يوم السبت زمان ..
لآمن أقووول الروب ..
أقوم أمشي أكتب ليك في الماسنجر الداخلي ..
لقد حطمت قلبي و أنتشت كبريائي يا أخا المنبر ..
هوّن عليّ .. فأنا لا أقوى ..
ـ













طلب لو سمحت ..


المرة الجاية تعال لابس ( أصفر ) الله لا يهينك ..

سلام يا يوسف و أريتك طيب ..

Quote: انت ياخوي قلبت متين؟

و إنتا كنت غايب وين ؟؟
عشان يا ( خوي ) أنا ما قاعد أسوي حاجة بالدس ..
واضح زي الشمس ..
يوم أن عارضت هذا النظام كانت معارضتي على رؤوس الأشهاد ..
وعارضته بكل الوسائل التي يمكنك تخيلها ..
و يوم أن انضممت للمؤتمر الوطني كان ذلك وفق قناعة ذاتية و لمبررات أعلنتها أيضاً ..
و حينما أقتربت أكثر من المؤتمر الوطني و تبين لي إن إستمراري فيه يتصادم مع قناعاتي ..
خرجت منه و أعلنت ذلك أيضاً و لم أخشى شيئا ..
بإختصار يا يوسف أنا مالك لقراري ..
و قراري تحدده قناعاتي ..
و أنا مسئول عن أي موقف أتخذه ..
و لست مسيراً في إنتمائي ..
على كيفي .. و وفق قناعاتي .. و بس ..

سلام يا خضر و عساك طيب ..

Quote: ايران دي مافى اي حاجه بتربطنا بيها

المشكلة إنو سياستنا الخارجية تدار بأسلوب رزق اليوم باليوم ..
و اللجوء لإيران و التقرب إليها في ظل هذه الظروف أو في ظل أي ظرف آخر هو نتاج لتفكير أرعن ..
إيران لن تدعمنا محبة في شعبنا بقدر ما هي تسعى لوضع أسفين في علاقتنا المتميزة بغيرنا ..
لكم من يقنع الديك ؟؟

[red]

Quote: لم يتم إخطار مركز المراقبة الجوية بالسعودية من قبل المراقبة الجوية بمطار الخرطوم بإقلاع الطائرة من مطار الخرطوم، أو بموعد دخولها للأجواء السعودية، كما هو معمول به دولياً

Quote: بعد أن عادت الطائرة متجهة إلى مطار الخرطوم أفصح حينها قائد الطائرة أن على متنها فخامة رئيس الجمهورية السودانية".

Quote: لم تتقدم حكومة السودان بطلب رسمي للحصول على تصريح دبلوماسي للطائرة التي ستقل فخامة الرئيس، سواء عن طريق سفارة السعودية في الخرطوم أو سفارة السودان بالرياض،

Quote: الإجراءات المعمول بها دولياً من ضرورة طلب التصريح قبل (48) ساعة من موعد إقلاع الرحلة للرحلات الدبلوماسية غير المجدولة عند عبور أجواء الدول في خط سير الطائرة".

Quote: تتطلب أنظمة الطيران المدني بالسعودية، وكذا أنظمة الطيران المدني الدولي، حصول الطائرات على تصاريح للعبور في أجوائها وتصاريح هبوط في مطاراتها

Quote: عدم الالتزام بذلك مخالفة لتلك الأنظمة،

Quote: الطائرة التي تم استخدامها تملك تصريحاً مؤقتاً بالهبوط في مطارات السعودية الدولية للاستخدام الشخصي فقط لمالكها،

Quote: الطائرة المستخدمة مسـجلة خارج السعودية، وهي للاستخدام الخاص، ولا تجيز الأنظمة في الدولة التي سـجلت الطائرة بها أو بالسعودية استخدامها لأغراض تجارية".

بعد هذا التوضيح ( المهني ) من هيئة الطيران المدني السعودي و الذي كشف السبهللية التي تدار بها المراسم الرئاسية أعتقد أنه كان أهون على فخامة الرئيس أن يستعين بكومسنجية من موقف شندي لترتيب أمر هجاته الخارجية بدلاً من الإستعانة بإدارة المراسم التي أثبتت أنها قاعدة في السهلة ..

Quote: انتو عصام دهب دا ما ياهو الكان بيبكى و مخاخيتو جارية عشان المؤتمر الوطنى و للا زولا تانى؟ أصبئت يا عصام دهب أم رجعت الى الحق بعد أن زالت عنك الغشــاوة؟ ان كان ذلك ما حصل فهنيئا لك , فالحق أحق أن يتبع

نعم هو نفسه يا اخى الكريم و قد تاب و استغفر لذنبه
و التائب من الذنب كمن لا ذنب له

انت زعلت وللا شــنو يا عصام؟ يا اخى لو زعلت معليش

Quote: انت ياخوي قلبت متين؟

الله يكفينا شر القلب والاكل الكعب

Quote: انتو عصام دهب دا ما ياهو الكان بيبكى و مخاخيتو جارية عشان المؤتمر الوطنى و للا زولا تانى؟

ياهو ذاتووو يا أسامة ..

ـ

اللي بعدو ..

اكيد يا مولانا الناس ديل بحبوك

واتصدمو ذي كتيرين

انحنا اتصدمنا فى وكتنا واديناك الفيها النصيب

لانو باختصار انت مابتشبه الناس ديل

وهسي مافى زول عندو عندك حاجه

لا سرقتا ولا كتلتا

وذي ما قلت انت دخلتا بقناعات محدده

ولما قربت من شوال الفحم مرقتا

فيل فري يا حبيب

ومتعنا بحكاويك الطاعمه

ظبت شيشتك و وفرفش الجمجمّه

ان شاء الله شغالتكم قاعده لحدي هسي

Quote: اللي بعدو ..

اها ان شاء الله القلبه الجايه على وين

باقى لى اتا ما مضمون

Quote: لكنما ( عقدتني ) و شمت فيني خلق الله .. و خليتني زي عايز أشرد من البوست دة عدييل كدة ؟؟ أعاين ليهو و ( أبكي ) .. و أمشي و ما أجئ راجع ذاتوو .. انتا مالك زول شفت و فقري كدة ياخي ؟؟ ما فاضل ليك إلا تجيب لي صورتي ـ أبو مخاخيت جارية ـ عشان تعمل لي نفسيات ؟؟ و تخليني أشوف البوست دة عشرة عشرة .. و العيد ذاتووو يبقى لي زي يوم السبت زمان .. لآمن أقووول الروب .. أقوم أمشي أكتب ليك في الماسنجر الداخلي .. لقد حطمت قلبي و أنتشت كبريائي يا أخا المنبر .. هوّن عليّ .. فأنا لا أقوى ..

جلدك تخين يا عصام
ولا يفوقك في هذا المنبر نفاقا اي شخص!!!
الم توصف قريبك بالجنون عندما رمي البشير بالجزمة؟
يا عصام انت كوز شئت ام ابيت فكن معهم يا هذا فالطيور علي اشكالها بردلب