لناس حلوين .... وزمانم حلو زيهم ( ياسايق البوباي )

سايق البوباي

إلة كل جميل وعاش ذلك الزمن الحلو بجماله وزينته ويتحسر على عليه حنين لما يسمع ويجتر الذكرى
وأخص بهذا الاهداء
لـــيدز فيرست
منى خوجلي
عواطف ادريس ( بقول ليها حمد علي السلامة بعد العملية الاخيرة وربنا يشفيك تماما يا رب ببركة هذا الشهر الكريم )
سلمى الشيخ سلامة
اسيا ربيع
سلمى صبحي
وسمية طلحة

والجميلين
ود المرتضى
عتمان ود موسى
ود القرشي احمد
سعادة اللواء عمر حسن
يحي قباني الظريف
احمد ماهل القاص والحافظ للتراث
الزعيم ابوقصي

السايق البوباي ومحمد حسنين

وكانت أغنيات
خلدت في اعماق الذكرى
وبرنامج ( ما يطلبه المستمعون يوم الجمعة )
ووقتها من الصباح يوم الجمعة بتكون في قمة السعادة من الصباح لحدي ماينتهي برنامج ما يطلبه المستمعون ... وحقيبة الفن وعوض بابكر .. ثم دنيا دبنقا دردقي بي شيش ومحمد سليمان .. ومن ثم عالم الرياضة
ومشاهدة تلي ماتش في التلفزيون وبعدها بجي الوجع وتذكر بكرة السبت والمدرسة والواجبات المردومة وقطع شك من الصباح دقا هههههههه

اغنية الفنان محمد حسنين ( من أرض المحنة ... من قلب الجزيرة ) طلبها محمد المرتضى ويهديها لكل الاحباب بحي الموردة والزملاء في مدرسة خور ابو آدم حي جديد
الطيب وليد شيقوق يهنئ الأهل والاحباب بالدندر والبردانة ويهدي الأغنية لأحبابه القدام ( ناس السرة بت مختار وعوضية بت جاد الرب ) وكل المتكلين ومقيلين تحت ضل شدرة مصايدين من حراية البردانة
أحمد القرشي بالمملكة العربية السعودية يهدى اغنية ارض المحنة لكل الاهل ببارا والابيض وام روابة واجمل التهاني بمناسبة عيد الفطر

ولكم المستعمين الأعزاء
أغنية من أرض المحنة والفنان الجميل محمد حسنين

Quote: سايق البوباي إلي كل جميل وعاش ذلك الزمن الحلو بجماله وزينته ويتحسر على عليه حنين لما يسمع ويجتر الذكرى

خالد اخوي سلام ومعزة كبيرة
وكل عام انت والجميع بخير

Quote: برسل لي المسافر..... أشواقي الكثيرة... يا حليل الليالي الحلوات بي غرامك أيَّام بي الإشارة كنت بترد سلامك يا ما عيوني كانت تسهر من كلامك........

يا خالد أخوي الأشواق دي متل أشبوب المطر مرات تجيك فجأة...
نامن تدبسب.....و كرعيك ما يقدرن يشيلنك ....
يا خالد اني أكتر شي بهزمني وبدوخني الأشواق والشرف ..........
من شرفك عِضامي إتْلَحِّن
شَبَكْت الخمسة في الخمسة ؤبقيت مِتمحِّن
الشَّتلة الفوقها مكنات البوابير قَحِّن
داير أتوقها عيل جنحي أبَنْ ما يرحِّن


يا دكتور القرشي هل شاعريا سايق البوباي هو عبد العزيز سيد أحمد.....
شاعر "وحبابن جن" وصاحب ديوان
"إتكاءة علي التأويل"
"ترابادورك المجنون لمّا طاف حول البيت.....
ومن شرفاته قمرية الاضواء كما لاقا وكم لا قيت..
وأظن بالترابادور وهو المغني الجوال يقصد به صديقه الشاعر المجيد حقا عبد الله شابو

محبتي ودمت سمحا

برضو يا خالد أخوي ما دام جبنا يا سايق "البوباي"
برضو أني بتوهني يا "سايق الفيت" خاصة حين يغنيها "اللّحو" ولازم اسمعها براااااااااااااي
أطوي الأرض وإضرع
من أفكارنا سيرك يا الفيت أسْرَع
ميِّل علي المُشرع
لا تريع القطيع وإتجفِّل الأدرع
يا سلااااااااااام
" إضرَع مفردة رائعة وفيها زهو بالقوة والمتعة في السير---
" الخلاك تـضـــٍب مثل الكديس تتهــَـمـَّسْ
فـَجيت فغفغ الفدَغى الوضيبو إتعمّــَس
كّدى خــِف لينا أضرَع بى الضراع ومخمَّس
ترا المسا جاكا يا ضيب الخلا الليل دمَّـــسْ"
والمُشرع هو المورد إن كان آبار او دونكي وللمشرع طعم ورائحة
خاصة وعبق خاص.............
"كلمولي أبويا....
عشان نشيل الدونكي ونجيب شوية موية"
الجفيل هوالشموس، ولكنه ورد كثيرا في شعر الموروث ، مقرونا بالجمال خاصة جفيل الصيد، لأن الصيد من أجمل الحيوانات، وكثيرا ما شبهت به الحبيبة
"معزة الخلا البي السيسة شقَّن ونقَّن
ودردورهن جفل بي البادية كلُّو عنقَّن
أمَّات دقيماتَن خِلق ما إنْدقَّن
قلبن والفِن لي ديمة ما بتيقَّن"
ويا سايق الفيييييييييت............
محبتي

Quote: ا خالد أخوي الأشواق دي متل أشبوب المطر مرات تجيك فجأة... نامن تدبسب.....و كرعيك ما يقدرن يشيلنك .... يا خالد اني أكتر شي بهزمني وبدوخني الأشواق والشرف .......... من شرفك عِضامي إتْلَحِّن شَبَكْت الخمسة في الخمسة ؤبقيت مِتمحِّن الشَّتلة الفوقها مكنات البوابير قَحِّن داير أتوقها عيل جنحي أبَنْ ما يرحِّن

يا عبيد سلااام ونحن بين عيون الأغاني زمن الزمن زين
نجتر سوياً ونعزي أنفسنا في تلك الأيام الجميلة وإن نابنا منها ردحاً قليلا
الشوق والشرف
وزي ما قلت أكثر ما يهد الرجل الشوق والشرف

الشريف العفيف
مــــا بِتبن الجارات ويخون الحُرة
وماهو دغور بيوت يعقب ويحل الصُرة

تسلم يا الجميل على هذه الأبيات التي تمرمغ النفس في التراب وأن أبت وتجبرت لما فيها من حنين وشوق مكبوت وغائر
في القليب جوة .....
ومن شرفك عُضامي إتلحّن
وما يلح العظام إلا الشرف والعفة والشوق حنين لمحبوب طواه القلب بين طياته
وحيناً نعجز ونقف والمحنة ترهق الفكر ونشبك الخمسة فوق الخمسة وكت الحيرة البغلبنا دليلا

وما أجمله تعبيراً
الشتلة الفوقها البوابير قحّن
ودي شتلة جدول وشتلة الجدول تعرف باسم شدرة موية وبتكون تريانة ورويانة ومثمرة
بدور إتاوقا إلا الجناح كسير ما بطير
وهنا يحضرني بيت الحكمة لشاعر البطانة الذي قال
الشبع البعد جوع سيدو ديمة سغيّر
الريش البقوم بعد الكسر ما بطيّر

سلاااام تعظيم يا عبيد وانت تزين دوماً موضع رجلك بأحلى الكلام طيب
مودتي

اروع الكلمات والألحان شراكة بين الاستاذ الكبير محمد وردي والشاعر المعلم كجراي عليهما رحمة الله
ابوجهينة من جدة يهدي الأغنية للأهل والاصدقاء ويخص بالاهداء الخال محمد بماسبة حتان أبنه البكر ويغري كل السلام للنايس في البندر والبلد
من صديق البرنامج أحمد القرشي الأديب المنقب في الكلمة الحلوة يهدي الأغنية للصديق محمد المرتضى وكل الأصدقاء بسلطنة عُمان وكل الأهل بام روابة
الأغنية نقدمها
مافي داعي تقولي مافي

ومافي داعي كان للحصل

Quote: يا دكتور القرشي هل شاعريا سايق البوباي هو عبد العزيز سيد أحمد..... شاعر "وحبابن جن" وصاحب ديوان "إتكاءة علي التأويل" "ترابادورك المجنون لمّا طاف حول البيت..... ومن شرفاته قمرية الاضواء كما لاقا وكم لا قيت.. وأظن بالترابادور وهو المغني الجوال يقصد به صديقه الشاعر المجيد حقا عبد الله شابو

كل منانا يا عبيد
أن ينزل الدكتور من عُلاهو الفوق يمثل سليم الزوق
ويجيب على هذا السؤال لاني ماعارف شاعرها بالضبط
الدكتور القرشي بين الضروس الحقيبة زرف العرق دفاق وليتنا نلقى فرقة فيه بين هذا وذاك

مودتي يا عبيد وبتعرف تبحبت كويس وتعجبني مداخلاتك كتير يا رائع

Quote: الأبيات التي تمرمغ النفس في التراب وأن أبت وتجبرت لما فيها من حنين وشوق مكبوت وغائر في القليب جوة ..... ومن شرفك عُضامي إتلحّن وما يلح العظام إلا الشرف والعفة والشوق حنين لمحبوب طواه القلب بين طياته وحيناً نعجز ونقف والمحنة ترهق الفكر ونشبك الخمسة فوق الخمسة وكت الحيرة البغلبنا دليلا وما أجمله تعبيراً الشتلة الفوقها البوابير قحّن ودي شتلة جدول وشتلة الجدول تعرف باسم شدرة موية وبتكون تريانة ورويانة ومثمرة بدور إتاوقا إلا الجناح كسير ما بطير وهنا يحضرني بيت الحكمة لشاعر البطانة الذي قال الشبع البعد جوع سيدو ديمة سغيّر الريش البقوم بعد الكسر ما بطيّر

سلااااااااام خالد ومحبة صادقة

مربوعة "عضامي إتلحَّن "دي حفظتها قديما شاعرها مجهول لكن أظنها أجمل ما قيل عن الشرف والحنين.....


والشدر الكُبار بقي شوفنا ليهو طشاش
قولي لي دحين وين ماش
فارقت الطريق إتيامن الرّماش
يا سايق الفييييييييييييييت
*الشدر اي الشجر والكثير من اهل الريف ينطقونها الشِّدر، وهي مثل اللّدر او اللّيدر او التمساح ومما احزنني قبل يومين ان الأخ عصام الترابي وهو من محبي التراث ، وفي لقاء بقناة أم درمان قال: اللّيدر هو الجمل الهائج وهذا خطأ كبيرجدا، لماذا إذا أشكلت علينا مفردة نكابر ونشرحها خطأ........
ما لينا..........!
ومن سرعة الفيت اصبحوا يروا الشجر طشاش اي لم تكتمل روئيته ودائما حين تسرع السيارة او اي... نري الشجر يجري وراءنا ...
إنظروا لشاعر الدوبيت الكباشي يصف سرعة بعيره وهو متجه نحو فرقان المحبوبة
"يومو الينوي لي الزول التملِّي مراقبو
قعد بجاري عقَّاد الصنقَّر عاقبو"
تملِّي اي دائما وعقَّاد مجموعة من الشجيرات المتباعدة والصنقّر هو العتمور او الدلج
دحين مفردة قديمة وتعني الآن او هسَّاع –اسّاع ، إتايمن من الميمنة او السير يمينا نقول إتيامنت القافلة مدينة الكُفرة وعكسها إتياسرت
شقَّا حشا الطريق وإتيامن الحلاّل
زفنُّو الكلاب ما نالن إلا علال
فاضلات ثواني قلال
بينك والغروب داك مُشرع الشلاّل

يا سايق الفييييييييييييت
أقيفوا هني يا بخات الحال في مفردة " شقَّا حشا الطريق" لو قال شقّا وسط الطريق بتكون ما فيها شاعرية .....
الزول حشاهو محروق ..ومتلهف لرؤية ست روحو.....
العلال هو القماح او كما يقول اخونا حنفي...
"صيدها لقيتو بي سافلة الكريبة صباح
سلمت من طلقتي وشبَّع كلابي قماح"
واحيانا تعني العجاج او اوالسراب او الخراب ايضا..............
اها قبل الغروب يظهر مورد او مُشرع الشلاّل ولا أدري سر الشعراء مع الغروب..........
أنظر يا صديق شوف يد القدرة
شوف حسن البداوة الما لمس بدرة
الكاتلين الصفار ام نُضرة الخضرة
"حسن الحضارة مجلوب بتطرية وفي البداوة حسن غير مجلوب


محبتي ياخالد وأحيانا المجادعة من علي البعد مع الجميلين من أمثالكم
تخفّف عنا كثيرا عدم فهم المحيطين بنا .... الناس الحناياهن....يابسة كو كو................

Quote: سلااااااااام خالد ومحبة صادقة مربوعة "عضامي إتلحَّن "دي حفظتها قديما شاعرها مجهول لكن أظنها أجمل ما قيل عن الشرف والحنين.....

حق والحق يقال أجمل ما قرأـ في حق الشرف والشوق
وقال الشاعر العفيف المترفع من دنئة قلب وشقف للمحبوبة رغم الحب الذي يحمله
الشاعر ابوفراس الحمداني
لاتملك الحسناء قلبي قلبي كُله
وإن شملتها رقة وشبابُ
أجري ولا أعطي الهوى حق مقودي
أهفو ولا خفّى عليَّ صوابُ
أنا عندي رأي ان الشوق للمحبوبة حيناً يحط من عفة وشرف الرجل وكتمانه واجب والموت كتماناً حيناً بفيد
لا جزع رغم الأشواق تتهافت أمواج بحور تتدفق
وهذا راي ورغم هذا نجزع ونحن قولا والقول مابفيد مادام الحبيب ساهي ولاهي وما بعبرك ولا يرمي لك بال

Quote: والشدر الكُبار بقي شوفنا ليهو طشاش قولي لي دحين وين ماش فارقت الطريق إتيامن الرّماش يا سايق الفييييييييييييييت *الشدر اي الشجر والكثير من اهل الريف ينطقونها الشِّدر، وهي مثل اللّدر او اللّيدر او التمساح ومما احزنني قبل يومين ان الأخ عصام الترابي وهو من محبي التراث ، وفي لقاء بقناة أم درمان قال: اللّيدر هو الجمل الهائج وهذا خطأ كبيرجدا، لماذا إذا أشكلت علينا مفردة نكابر ونشرحها خطأ........

الشدر والشديرات وشديرة الطندب الفي محل الخلا وبتلالي ( ضربها الرخيف ورويت بعد محل )
الطشاش زي ما قال الهدندوي ( عمو د التلفون من مية نشوفو واحد .. والعُشر نشوفو جرجير .. واطا مرة نشوف ومرة ما نشوف .. واللوري دا لوما إنقلب في سواكن كان بحر المالح ما يحوشا )
والطشاش في بلد العمي شوف
دحين : وهي كلمة حلوة وتعجبني في لغتنا العامية الموروثة ( وتعني دا الحين )
إتيامن اي خلي الرماش على يمينك
وإتيمم : اي أتجه إلى .......
وفي عاميتنا فصاحة يا عبيد ومن هنا عشقتها ومازلت أبحث واغوص فيها
نعم اللدر هو التسماح
كلمات اخيت علي ود نمر تمدحه وكان ايامها طفل
وتقول

ضربو دنقرم جونا العيال مارقين
بسأل عن علي الأسد البقود تسعين
هو اللدر العلي ضهرو الخبوب والطين
ما بيأكل الضعيف وما بسولب المسكين
إلا في سهمة الأسد ابــ قبضن هين

اللدر هو التمساح : والدليل قالت علي ضهرو الخبوب والطين ومن اين جاء الخبوب والطين للجمل يا عصام الترابي

Quote: ما لينا..........! ومن سرعة الفيت اصبحوا يروا الشجر طشاش اي لم تكتمل روئيته ودائما حين تسرع السيارة او اي... نري الشجر يجري وراءنا ... إنظروا لشاعر الدوبيت الكباشي يصف سرعة بعيره وهو متجه نحو فرقان المحبوبة "يومو الينوي لي الزول التملِّي مراقبو قعد بجاري عقَّاد الصنقَّر عاقبو" تملِّي اي دائما وعقَّاد مجموعة من الشجيرات المتباعدة والصنقّر هو العتمور او الدلج دحين مفردة قديمة وتعني الآن او هسَّاع –اسّاع ، إتايمن من الميمنة او السير يمينا نقول إتيامنت القافلة مدينة الكُفرة وعكسها إتياسرت

اي بالحيل يا العبيد
وما اجمل القول
الزول التملي مراقبو
راقب اي لم يفت لحظة من خاطره وهو تعبير دقيق يعني به ان المحبوب كان ملازم الفؤاد ديمة وما فارق العين لحظة وهو يراقبه ويلحظا

Quote: شقَّا حشا الطريق وإتيامن الحلاّل زفنُّو الكلاب ما نالن إلا علال فاضلات ثواني قلال بينك والغروب داك مُشرع الشلاّل

وزي ما قُت الحشاء وهو الأحشاء الداخلية وهي تقع في وسط جسم الإنسان لو أخدناها من فوق لي تحت
ولو اخدناها وشقينا المخلوق نصفين برضو نجدها في الوسط وبنشقها نصفين
وحشا الطريق وهذا حسب تفسيري لها والله أعلم
الطريق مجري وفي الوسط يكون كوم من تراب تزيحه عجلات الشاحنات
وقلت الشاحنات لانه قبل تعبيد ورصف الطرق كانت تشق عباب طرق السودان والوعرة السيارات الكبيرة فقط وقلما تجد سيارة صغيرة تستخدم في الشفريات الطويلة
وعندما سافرو بالفيات وهي سيارة صغيرة صالون كان لابد ان يقسم مجرى الطريق حتى لا يوحل ويغطس في التراب وهنا تظهر مهارة السائق
انه وضع عجلين على الطريق والعجلين الاخريين في خارج الطريق
وقد يكون حشا الطريق هو الطريق نفسه فتعمق وقال حشاه وشق الحشا يوجع
زفة الكـــ لاب للسيارات زمان كان شئ نراه كلما شقت سيارة الحلة والكــ لاب تزف وتكرد اي شئ غريب سواء كان مخلوق او سيارة واو غيرها ما دام غريب لها بتكرده وتزفه لمسافات طويلة حتى يغادر الحي
وهو منظر كان معهود نراه في القرى حيث كانت تقل السيارة فيها
وما نلان إلا علال
نعم هنا كما قلت يقصد بالعلال العجاج اي عجاج الفيت وهي تمخر عباب الأرض والرمل
والرمل مع العجلات يحرك الغبار

يا عبيد
بوصيك
قبل تبدا
سيرك وداك طريقك
سايق الرفدة
حي المراد وميل بي ربوع عبدا
يا سايق الفيات

واليوم برنامج ما يطلبه المستمعون مقفول
بس لعبيد
يهدي الأغنية لكل اهل بادية الكبابيش في الفرقان من جم

عج بي وأُخد سندة
وبي الدرب التحت
تجاه ربوع هُندا

وهذا التسجيل الإذاعي القديم يا عبيد

ود المنسي يا رائع كل عام وإنت بخير

تحياتي وتقديري يا حبيب

Quote: ود المنسي يا رائع كل عام وإنت بخير تحياتي وتقديري يا حبيب

العزيز الحبيب أمير محمد ادريس
وين يا راجل مختفي
كنت نشيط قبل العضوية مالك ركلست

رمضان كريم وكل سنة وانت طيب يا طيب

تحياتي ومودتي

صباح الجمعة كنا نتمنى أن لا ينهي ويظل ما قبل الساعة العاشرة وقت تناول وجبة الإفطار ( الفطــــــــــور يا عثمان موسى )
وانت راقد تسمع لبرنامج ما يطلبه المستمعون
تحمل لك نسمة هابة رائحة فسيخ يطبخ لوجبة الفطور يوم الجمعة
وطبعاً الفسيخ دائما بكون بملحقاته
الدكوا .. البصل الأبيض وما أحلى الفسيخ بكسرة حارة من الطانجي يرمو ويدوك وانت تمخر وتمعط ( وفي رواية أخرى تلهط )
وفجاءة يأتيك من صوت المذياع صوت المطرب الجميل
محمد سيدأحمد ( ودمدني )
كلمات الشاعر محمد الطيب عربي
يا ربي ماتحرم بيت من الأطفال

شوفو الحلوين ..
الحلوين بهجة الآمال
الصِغار يملو البيت نضار وجمال
ضحكة رنانة ... بسمة ريانة
يا بي ماتحرم بيت من الأطفال
يا ربي ماتحرم بيت من الأطفال

شوفو الحلوين الحلوين
في الصباح والأم
زفتم ليها وهيِّ تتبسم
في إنتظار الشاي صمت إتكلم
منظرم يمسح يمسح ....
من نفوسنا الهم .......

شوفو الحلوين الحلوين
إتلمو حول الأب .....
هوَّ يتبسم .. من صميم القلب
شالو مصروفم في ضجيج وصخب
منظرم يغسل .. يغسل من نفوسنا الغُل

شوفو الحلوين .. الحلوين
في الطريق رايحين .....
لي مدارسهم .... في إشتياق وحنين
زينة الدُنيا مُهجة الوالدين ....
منظرم يفرح ... يفرح
كل قلب حزين .....

Quote: وهذا التسجيل الإذاعي القديم يا عبيد

شكرا يا خالد علي هذه العيدية الرائعة .........
لكنها كسرت في أخوك ضلعته اللايسارة.......

Quote: عج بي وأُخد سندة وبي الدرب التحت تجاه ربوع هُندا

أُخذ سندة يعني يا خالد أخدلو مقيلة....
شوف شيخ الدوبيت وصاحب الحنجرة الذهبية
بخيت ود عبد المولي الكباشي قال شنو:-
"أخدلو مقيلة في الضّقَّال
ؤبرَّد ونشَّ قام عاني السَّحي الما قال
الكمَّل سنابُو وتميح سِراهو تِقال
سيد سهماً مدعَّج وكاحل الأمقال

محبتي

Quote: ها قبل الغروب يظهر مورد او مُشرع الشلاّل ولا أدري سر الشعراء مع الغروب.......... أنظر يا صديق شوف يد القدرة شوف حسن البداوة الما لمس بدرة الكاتلين الصفار ام نُضرة الخضرة "حسن الحضارة مجلوب بتطرية وفي البداوة حسن غير مجلوب

بقول المثل يا عبيد
السمح ...
سمح لو قام من النوم .....
والشين شين ....
لو دلكو كُل يوم

وجمال البداوة شئ عجيب في غرامنا ونحبه جمال لم يعرف الكريمات وزينة البلاء الزائلة لو صبت مطر
يتشخبت الوشي ويبقى زي طربيزة بتاع الفول الفاتح في شارع الصحافة زلط ( مجلبطا ) هههههههههههه
وتخلعك لو شفتها الصباح تتمغّى ودايرا تقوم ( تقول بسم الله يا كافي تكفي )
جمال البداوة جمال طبيعي خلقة الله ما مستورد من فرنسا ( ميك آب وسفن أب )
دي الرضعة الطيبة من أمها ماهو وجبة جاهزة
دي القدو ليها العنقريب في شان يكبر الكفل من صغرها
ولما كِبرت خلفو الرقدة ان ترقد علي بطنا القد القديم يسمح للنهدين ان يسرحا
دي الدهنوها بدهناً غني بمواد تطوّل الشعر ومسحت وِجيها بي بباقي الدهينة تنوّر زي رتينة يا عبيد
وشوف حُسن البداوة الما لمس بُدرة
وكيف لا يدعو العبادي اصدقائه أن يروا ويمتعو النظر بذلك الجمال خلقة الرب في عُلاه ويد قدرته في تحسين ذاك الجمال الخلاب والإبداع فيه
والخلق مهما كان مدعاة للتأمل في قدرة الخالق الواحد الأحد

وكانت ألوانهنَّ
تلكما اللونين
الصفار
والخدرة الباردة ( لونزينب )
الكاتلين الصفار أم نضرة الخضرا

تسلم يا عبيد وفي البداوة كل أصيل ( اورجنال ) هههههههههه
مودتي ومناي ان تواصل في السرد الباهي هذا

Quote: شكرا يا خالد علي هذه العيدية الرائعة ......... لكنها كسرت في أخوك ضلعته اللايسارة....... Quote: عج بي وأُخد سندة وبي الدرب التحت تجاه ربوع هُندا أُخذ سندة يعني يا خالد أخدلو مقيلة.... شوف شيخ الدوبيت وصاحب الحنجرة الذهبية بخيت ود عبد المولي الكباشي قال شنو:- "أخدلو مقيلة في الضّقَّال ؤبرَّد ونشَّ قام عاني السَّحي الما قال الكمَّل سنابُو وتميح سِراهو تِقال سيد سهماً مدعَّج وكاحل الأمقال

ربنا يجعل كل أيامك عيد وأعياد يا جميل الروح
لو تابعت الأغنية من الأول
تجد المراد كان زيارة ديار المحبوبة هُندا
وقد قيل الكثير في هذه الأغنية ( وزي ماقالوا الشاعر يقول وكل واحد يغني على ليلاه ويا ليلى ليك جنَّ معشوقك آوه وآنا والعابد برضو بغني على ليله )
والأرجح وهذا حسب رأي أنا والله أعلم
أن الشاعر وصحبه رؤوا ( هُندا وصويحباتها في النهر في رحلة الذهاب لسنجة )
ونظم بعدها الشاعر العبادي القصيدة حامل معه كل منظر رأهو في ذاك اليوم لكن ( وضع هُندا كأنها المحبوبة وهو قاصد ديارها ومن هنا بدأ الوصف يجاري شعراء المسدار لكنه مسدار مختصر )
ولم يصحب فيه ( الجمل بل كانت المطية سيارة فيات صنع أيطالي )

عج بي
وفي رواية يقال أكشح ( اي امشي بالسيارة بسرعة )
عج بي وأخد سندة
السندة : هي وقفة لفترة قصير ( نعم قد تكون عند أهل البادية هي مقيلوراحة في سفر )
لكن عند أهل الحضر والبندر هي وقفة قصيرة في سفر
ولذا سميت محطات القطار محطة ربك مثلا ومحطة مدني ومحطة الأبيض
وسميت سندة قوز المطرق .. سندة الجبلين جهة كوستي
لان القطار لا يقف في السندة كثير كوقوفه في المحطة
السندة مافيها ( تابلت ... هو جهاز تنظيم سير القطارات كما في المحطات الكبيرة )
السندات وجدت لكي تكون موقع لوجست في وقت الحاجة ( ترميم القضيب .. تزيد القطار في وقت الحاجة بنفط ونحوه من صيانة لو دعى الأمر )
وتكون السندة عادة بين المحطات التي بينها مسافات طويلة
مثال لما تقوم من محطة ودبانقا وهي وحتى تصل المحطة البعدها وهي شندي المسافة سيراً بالقطار تحتاج لـــ 45 دقيقة حتى محطة شندي لذا كانت سندة قوز المطرق بينهما وهي حوالي 20 دقيقة بالقطار من شندي

وعج بي وأخد سندة
وبي الدرب التحت
وجرت عادة أهل السودان أن يسمو ( الاتجاهات )
سافل وصعيد ( الصعيد جنوب البلد من الخرتوم وانت ماشي )
( والسافل شمال من الخرتوم وانت ماشي لي وادي حلفا )
وتحت وفوق
تحت ( قرب النيل وروافده وفرعه )
فوق كلما بعدنا من النيل
الدرب التحت اي بمحازاة النيل وفرعه ( ابيضاً بحر ابيض او أزرق عاتي )

وأخدو مقيلة في الضفال
وبعدها النجعة
يا غرق يا جا حازما وقطع شك بحزموها الصقور ولاد الصي
والمراد والدار المقصود فراقن ناساً حنان بالحيل وفي القوب ليهم مكانة

لكمَّل سنابُو وتميح سِراهو تِقال
سيد سهماً مدعَّج وكاحل الأمقال

القولهم ( الخلا ولا الرفيق الفسل )
عود من تاني وأنعشنا يا عبيد يا جميل

ومن الأغاني التي أنتشرت وشاعت إنتشار اللهب في الهشيم
أغنية ( قام إتعزز الليمون .. عشان بالغنا في ريد ) وأجهل شاعر هذه الأغنية
لكن سمعت واللع أعلم في صحة هذه المعلومة
أن هذه الأغنية لحنها الفنان الكبير ( محمد وردي )
ونسجت حولها قصة ( والله أعلم بصحتها )
أن الفنان وردي لما اراد ان تجاز هذه الأغنية كان على موعد مع لجنة النصوص الألحان في الإذاعة
وكان في اللجنة الشاعر الجميل العبادي
فطلب العبادي من وردي أن يقرأ نص الأغنية ( القصيدة )
وبدأ الأستاذ وردي وقال
قام إتعزز الليمون عشان بالغنا في ريدو
فقال له العبادي : قف هذا النص من بدايته لا يجاز

فقال له وردي : يا أستاذ العبادي أنتظر حتى أكمل لك النص
فرد العبادي وهم كانوا جلوس في حوش الإذاعة ( يا أستاذ وردي لو جمل وتاوق بالحيطة دي بنقول ليك أمشي وشوف البتاوق دا شنو ؟؟؟ ماهو الجواب ظاهر من عنوانو )

تغنى بهذه الأغنية القاصي والداني وسارت بها الركبان .. وكانت أنيس أصحاب الدن
وذكرها الأديب اللواء عمر الحاج موسى في خطابه البليغ الذي ألقاه في حضرة الرئيس السابق جعفر النميري عليهما رحمة الله أجمعين
( ويجبك سيدي الرئيس شعبك ..لانك غنيت معهم قام إتعزز الليمون )

وقام إتعزز الليمون
عشان بالغنا في ريدو

إنت جميل
والجابك ليَّ ملاك وجميل

وكان أيامها الحب ندي صادق
والتعبير عن المحبة على سنة الرسول عليه الصلاة والسلام
( تهادوا تحابوا )
وكانت الهدية تعبر تعبير عميق من الطرفين
كانت الفتاة تهدي
منديل ( مشغول ) ومشغول دي مابعرفوها إلا ناس عثمان موسى وبقية العقد الناس الحلوين وزمانم حلو
الهدية أيضاً كانت ( طاقية حمراء مشغولة بيدالحبيبة

وفي المنديل كانت الحبيبة تكتب وتطرز الحرفين الأوائل من اسمها واسم الحبيب ( الما بتقدر تجيب اسمو .. عشان الهوى والحب ما يقسمة )

Quote: إنت جميل والجابك ليَّ ملاك وجميل

اليوم ناس قناة النيل الأزرق والفنان الرائع مصطفي السُّني غنا فراحية الشابي..................
عذبة أنت كالألحان.............


وعشان يا خالد إنت ذاتك جميل هاك دي هدية عيد من أخونا حسن دياب تذكرتها عندما صدح
السنّي بعذبة أنت........

"أجمل من صباح العيد
وحلات الدنيا كانت شفت العلامتو فصيد
حقُّو الناس تريد ناساً بعزُّو الرّيد
وزي زولاً صغيروني وبشابه الصّيد"

عيدكم جميعا مبارك وكل عام والمحبة صادقة........
واني ماشي وارد الخور داير أستنشق لي رويحة موية خرييييييييف

Quote: أجمل من صباح العيد وحلات الدنيا كانت شفت العلامتو فصيد حقُّو الناس تريد ناساً بعزُّو الرّيد وزي زولاً صغيروني وبشابه الصّيد" عيدكم جميعا مبارك وكل عام والمحبة صادقة........ واني ماشي وارد الخور داير أستنشق لي رويحة موية خرييييييييف

حلات العيد وصباح العيد
هناك ذكريات إنطبعت منذ نعومة الأظافر عن العيد وصباح العيد وليلة ما قبل العيد
والإستعداد
لما يطلعوا كل كراسي الجلوس في الصالون وتنفض من غبار سفاية شندي التي لا تقف السنة إلا يومين تعقب مطرتين الخريف
والغريب حتى مطرت شندي تسبقها غبرة تقوم في المشارق تقول القيامة دايرا تقوم

ههههههههههه
حكى لي ذات مرة الفنان الجميل ( محمد جبارة وكما يحلو للشوايقة تسميته ود جبارة )
قال في واحد حلفاوي عسكري ودو جوبا وكانت له اول مرة يمشي الجنوب
اول يوم له في جوبا طلع يتمشى في السوق ( وكانت هزة قوية من جبل الرجاف إهتزت لها كل الأرض في جوبا )
وقف الحلفاوي متمحن ولم يدري ماذا حصل .. وبعدها وقفت الرجفة واستقر الوضع
في تلك اللحظة رن جرس التلفون الموبايل ... رفع التلفون وكان التحدث أخوه من الخرتوم حبَّ أن يطمئن عليه
اخوه يسأل : كيف الحال يا محمدصالح في جوبا
رد محمد صالح : اسكت قبل دقيقة كانت في محاولة قيام قيامة لكن فشلت ههههههههههه
وجانا العيدوأنت بعيد
بخيت وسعيد يعود العيد

وجا للناس بيهو فرحو العيد
وأنا عيدي جاني نكد
لقاني وحيد عايش
علي زول ما مرق عَيّد

وجاني العيد في الغربة يا عبيد
كنت قبل سويعات قلال في زيارة الأخت عواطف أدريس عضو البورد
شفاه الله عملت العميلة الثانية في العمود الفقري
نسأل الله أن يواليها بالشفاء العاجل يا رب

ومعيادة لكن الأخوة والأخوات عيد يعود عليكم وانتم في أتم الصحة والعافية
ومجتمعين العيد القادم بين أهلكم والأحباب وحلات العيد بين الأهل والأحباب

وكل سنة وانتم طيبين وخير وعافية درت

وهذا الأغنية إهداء للرائعة ماجدة خوجلي ولكل الأحباب اللذين يمرون على هذا البوست

ولي الناس الحلوين
ابوجهينة
فيسل هليل
تيسير المبارك
وكل الحلوين
ولحين ميسرة

Quote: غنية ( قام إتعزز الليمون .. عشان بالغنا في ريد ) وأجهل شاعر هذه الأغنية

شاعر الاغنية هو الاستاذ / أزهري عبدالرحمن ابشام
قالها في بت طالبة من كترانج اسمها بثينة وشافها في الحصاحيصا واتكسر فيها
بالمناسبة انا شفتها الليمون دي شخصيا لكن بعد ماكبرت
شفتها في الحصاحيصا شوف ساهي قالوا لي دي الليمون
وطبعا الاغنية دي سبب شهرتها عمر الحاج موسى حيث ذكرها في خطابه الشهير
بأن خاطب النميري وقال له احبوك لانك مدحت معهم الحجيج قطع وغنيت معهم قام اتعزز الليمون
.
.
يا سلام يا ود المنسي بوست اريح الاعصاب
فشكرا لك لهذه المتعة
وكل عام وانت بخير
تحياتي

قالو قطعة سكر قلنا احلى وانضر
نجم الدين الفاضل

(وحقيبة الفن وعوض بابكر)


يا خالد العيد مبارك علينا وعليك.. قبل كل شئ ، عبيد الطيب مشاها ليك كيف ؟
عوض بابكر دا من المحدثين.. الحيبة بدأت بصلاح أحمد محمد صالح ثم شمو المبارك إبراهيم فعوض السر ثم عوض بابكر..
بالطبع لم نستمع لها من صلاح أو شمو .. لكن لا أنسى المبارك إبراهيم لأن برنامجه كان من أكثر البرامج التي أتحاشاها لأنها
تعلن لي أن الجمعه انتصف وأنا ما حليت الواجب المدرسي..

عموما، أحمد القرشي كومبيوترو باظ ( شاشتو حرقت) .. جاييكم باكر..

بعدين السايق الفيات دي لي عودة لها .. (Fabbrica Italiana Automobili Torino (F.I.A.T.

عموما يا المامنسي ، طالما عبيد الطيب معاك فأنت في رفقة آمنة..

عيدك مبارك يا ود المنسي
سلامات
و الله يعرسلك يا ود العم كان من مويس
كان المتمة و كان من المكنية .
دخلت البوست سندة بس . أها سندتي بقت مبيت وبي مقيلو .
وبعد المبيت تاني صديت علي البوباي .
يا سلام عليك يازول يا فنان .
..
شاشة كمبيوتر ود القرشي يا خالد بتكون حرقت من حزنها علي بادي .
ربنا يرحمو
وربنا يبارك فيك

Quote: شاعر الاغنية هو الاستاذ / أزهري عبدالرحمن ابشام قالها في بت طالبة من كترانج اسمها بثينة وشافها في الحصاحيصا واتكسر فيها بالمناسبة انا شفتها الليمون دي شخصيا لكن بعد ماكبرت شفتها في الحصاحيصا شوف ساهي قالوا لي دي الليمون وطبعا الاغنية دي سبب شهرتها عمر الحاج موسى حيث ذكرها في خطابه الشهير بأن خاطب النميري وقال له احبوك لانك مدحت معهم الحجيج قطع وغنيت معهم قام اتعزز الليمون .

ود لبوش
مشكور كتير علي المعلومة يا سيدي ربنا يخليك
وكل سنة وانت طيب يا سيدي وعيد مبارك عليك
وربنا يعيده عليكم بالخير واليمن والبركات

نعم الأغنية كانت حلاوتها في خفة دم مفردتها القريبة من عامة الشعب
تعرف الشعب السوداني شعب ذواق للكلمة
والمفردة تهمهكثير عند السماع
ومفردة قام اتعزز الليمون نعم بسيطة ومهذبة كثير ولا يمكن ادراجها في التصنيف مع الأغاني الهابطة اليومين دول
ناس مرت الراجل وراجل المراة هههههههه
لك الشكر ودالبوش

Quote: (وحقيبة الفن وعوض بابكر) يا خالد العيد مبارك علينا وعليك.. قبل كل شئ ، عبيد الطيب مشاها ليك كيف ؟ عوض بابكر دا من المحدثين.. الحيبة بدأت بصلاح أحمد محمد صالح ثم شمو المبارك إبراهيم فعوض السر ثم عوض بابكر.. بالطبع لم نستمع لها من صلاح أو شمو .. لكن لا أنسى المبارك إبراهيم لأن برنامجه كان من أكثر البرامج التي أتحاشاها لأنها تعلن لي أن الجمعه انتصف وأنا ما حليت الواجب المدرسي.. عموما، أحمد القرشي كومبيوترو باظ ( شاشتو حرقت) .. جاييكم باكر.. بعدين السايق الفيات دي لي عودة لها .. (Fabbrica Italiana Automobili Torino (F.I.A.T. عموما يا المامنسي ، طالما عبيد الطيب معاك فأنت في رفقة آمنة..

ههههههههههههه
اولاً حمد الله علي السلامة وسلامة الدرب الجابك
عوض بابكر ( هذا عهدنا يا قرشي لما سمعنا الحقيبة )
احتمال هولاء كانوا ونحن لم نلتفت بعد للكلمة السمحة
لكن قرأت وأنا في نعومة اظافري للشاعر العبادي .. وخليل فرح ... وابوصلاح وغيرهم من
وقرأت لشعراء العصر الجاهلي وانا في المتوسطة كنت احب الأدب والشعر منذ الطفولة وكان السبب هو أهتمام الوالدة عليها رحمة الله
بالشعر كثير وكانت تستلف الكتب من خالي وتقرأ ونقرأ معها وبعدين ترجعها لخالي الاستاذ الجمري بادي صاحب اكبر مكتبة بين الأهل

لكن سمعنا الحقيبة وكنت لا احضر برنامج حقبة الفن إلا ما ندر
احب شعر الحقيبة كتير يا محمد لكن والله عمري ما حبيت الحقيبة كما غناها فناني الحقيبة احببتها من بادي محمد الطيب
ما كنت احب اسمعها إلا من بادي
بعرف يقعد الكلمة والحروف

سمعنا بي سلمى سلامة زمان اللابتوب بتاعها باظ كشحت في لبن القرشي عمل شنو خربو ؟

تحياتي يا مرتضى يا جميل وما تغيب

Quote: عيدك مبارك يا ود المنسي سلامات و الله يعرسلك يا ود العم كان من مويس كان المتمة و كان من المكنية . دخلت البوست سندة بس . أها سندتي بقت مبيت وبي مقيلو . وبعد المبيت تاني صديت علي البوباي . يا سلام عليك يازول يا فنان . .. شاشة كمبيوتر ود القرشي يا خالد بتكون حرقت من حزنها علي بادي . ربنا يرحمو وربنا يبارك فيك

عثمان جنى موسى
كل سنة وانت طيب
امييييييييين وربنا يسمع من فمك لكن غير الجنسية ( خلاص نحن خربنا وخرب مزاجنا لسودانية )
العرس سمح وقالوا سمحة المهلة انت قايل المهلة دي منو ما العرس يا عثمان
وان شاءالله جيت بالدرب التحت واخدتا السندة
ود القرشي قالوا الشاشة ضربت ولحق سلمى بت الشيخ سلامة البقت تدخل من الفيس بوك دا حيرتني
هل رفدها بكري ؟؟؟
هل مخاصمة بكري ؟؟؟
ولا قام اتعزز الليمون عشانبالغنا في ريدو ؟؟؟؟؟
ما تغيب يا جميل
حسن ابن عمي بسلم عليك كتير جنبي الان

Quote: Salma Salama · الأكثر تعليقا · Cedar Crest College الصديق الجميل النبيل خالد السمح كل عام وانت بخير ، عندى احساس انه محمد حسنين فنان تمت خيانته وتم اقصاؤه هو مجموعة كبيرة من الفنانين لكنه على وجه الدقة مظلوم ربما لهذا غنى "ظلموك ياعبن " رحمة الله على كل فنان جميل لم يجد حظه من الانتشار والوفاء اللازم ، محمد حسنين ، عبد المنعم حسيب ، احمد فرح رمضان حسن ، الخير عبد الرحمن والقائمة تطول ، لك المحبة ولك الاخاء ابدا

من الفيس بوك
الرائعة بت الشيخ سلااامة سلمى
كل سنة وأنت طيبة والعيد مبارك عليك واعاده الله علينا وعليكم بالخير واليمن البركات

فعلاً يا سلمى هناك الكثير من الفنانين لم يجدوا المساحة الكافية من الشهرة لكن أغنياتهم باقية ماتوا فقراء
وامتلئت جيوب الأخرين
لكن يا سلمى أطمئنك ان كل صاحب ذوق سليم وأذن بتعرف تسمع يسمع لهولاء
تسرني طلتك كتير يا سلمى ولاتغيبي وعشان كدي نهديك اغنية سوف اختارها لك تناسب مزاجك الجميل يا جميلة
تحياتي ومودتي يا رائعة

بصوت الرائع الجميل محمد حسنين
الأهداء لكل من
سلمى الشيخ سلامة
ود البوش
عِتمان ودموسى

نهدي اغنية صلاح محمد عيسى
لكل اناساً اصبحت قصتهم وحبهم الذي عاشوا له (حكاية )

اهدي هذه الأغنية
لكل من

سمية الحسن طلحة
سلمى صبحي
تيسير المبارك

اغنية انا بهواك

لحين ميسرة

وعيد سعيد ومبارك

مهداه
للحبيب عبدالعزيز الفاضلابي
والعزيزة سكينة كمبال ( ست البنات )

يا خالد
سلامات
وأنشاءالله الامور كلها تمام
عليك شيخ العمراب تبلغ عزيزنا حسن السلام .
وتقولو أنشاء الله السنة دي نتقابل تب في دبي .

Quote: يا خالد سلامات وأنشاءالله الامور كلها تمام عليك شيخ العمراب تبلغ عزيزنا حسن السلام . وتقولو أنشاء الله السنة دي نتقابل تب في دبي .

يبلغ يا ود ناس سعران
وبمناسبة أهلنا العمراب جنيات الشيخ حامد ابــ عصا

نهديك من أرض كبوشية السمحة بلد ومنبع الطرب والفن (وود الفكي شاهد )

من بعد الله
راجينك خلق بتحّروا
ياك ضرع اليتامى
الما غرز يوم درو

يوم الجمعة والراديو برامج اذاعة أم درمان
كان السرور البهجة تغمرنا لوقت عالم الرياضة وبعدها تنطلق فينا النارية
لاستقبال يوم السبت اليوم الدراسي بكل تفاصيله
ان تفيق في اول يوم دراسي وانت تحسب متى الخميس الجاي ؟

جلدة من صباح الرحمان

اليوم الطويل وسبعة حصص
وأول حصة رياضيات وأنا بكرهها وبكره استاذها
( دا طبعاً يا مرتضى في الثانوية العامة
مدرسة عبد الله الحسن شندي

عيد مبارك علي خالد والضيوف


هنا يتجلي محمد حسنين


http://mfi.re/listen/mlszepr22l9a3y5/ya_alrsai.mp3

علها تنال الرضا

تسلم يا خليل
وكل سنة وانت طيب وعيدكم مبارك وربنا يعيده عليكم بالخير واليمن والبركات والهناء

محمد حسنين زي ماقالت سلمى لم يجد الشهرة التي كان مفروض ان يجدها في ساحة الطرب

وخليك قريب وماتغيب يا رائع

Quote: بكرى ما وقفنى واقفة بايدى وشديدى يا الغالى يسلمك الله

سلمى من الفيس بوك
كان موقفك ارفعي يدك النشوفها
هههههههههههههه
بكري خسران لو وقفك
هو انت مين قدك يا سلوم قلم وفهم وبنطلون جينز وقميص طويل

تحياتي ومودتي الما قربت تنضب

ل

Quote: استاذ/عوض بابكر نوارة من نوارت الوطن .. يبحث ليمتع نفسة اولا ... بمتعته يتمتع الكل..يقهر المستحيل من اجل لحن جميل فى ركن قصى من هذا العالم.. عوض يذكرنى بالباحث العلامة الراحل الطيب محمد الطيب الاثنين من نفس الطينة ..عشاق صوفيين لما احبو واخلصوا له حفظك الله يا عوض وعشمنا فيك كتير...والرحمة للباحث الطيب محمد الطيب

من الفيس بوك عثمان السجان
والله قربت أقراها السجمان على وزن سجيمان عضو المنبر
أسف عثمان أصلو ثقافتي في الحروف صينية

يرحم الله الباحث والقاص وجامع التراث الطيب محمد الطيب
كنت أحبه كثير هذا الرجل وكيف بعرف يسل الحديث سلا من صدور البشر رجالاً كانوا أو نساء
هسي سلمى تجينا بجندرة وتقول مفروض نقوا
نساءً ورجالا
طيب يا سلمى ولا تزعلي نساءً ورجالا
عوض بابكر ما أسلفت رجل باحث وعندما تسمع له تحس الحديث طالع بنشوة من داخله لكي يملكك المعلومة وتلك الإبتسامة تعلو وجهه
ربنا يحفظه ويعطيه الصحة والعافية

تحية ومودة عثمان السجان

سلمى سلاااامة الـمـــــــــا مطرودة تتاوق من الفيس بوك

Quote: عوض بابكر دا من المحدثين.. الحيبة بدأت بصلاح أحمد محمد صالح ثم شمو المبارك إبراهيم فعوض السر ثم عوض بابكر.. السر محمد عوض وليس عوض السر يا شيخ العرب ، عوض بابكر نعم من المحدثين لكنه مرجع من مراجع الاغنية المعروفة بالحقيبة ، شهدته يسافر الى كينيا وعلى حسابه لان واحد من المهتمين بالحقبية اخبره انه عنده مجموعة اسطوانات سلمها له كاملة ، عوض بابكر يحتفظ بطربوش الفنان خليل فرح لغاية الان فى متحف اجترحه بنفسه فى بيته ، والى كل ذلك يحتفظ باول كمان كان يملكه العازف بدر التهامى ، عوض بابكر احد كنوزنا المعرفية ومراجعنا التى لايعلى عليها فى امر الحقيبة ، رغم صغر سنه قياسا بمن سبقوه لكن الامر يتجاوز مجرد تقديم برنامج الى حياة كاملة لعوض بابكر ، وهو بالمناسبة عازف كمان وعود لا يعلى عليه رغم انه خريج قسم التمثيلو الاخراج فى معهد الموسيقى والمسرح عام 1982، عوض بابكر سجل لكل من عاش فى الفترة التى بدا فيها علمه كمقدم برنامج الحقيبة وسعى اليه م...مشاهدة المزيد

يا سلمى محدث لكنه مبدع
لا قدحاً في اللذين سبقوه لتقديم برنامج حقيبة الفن
لكن الأبداع يشدك وما ذكرت حقيبة الفن في عهدنا هذا وإلأا طفر سطح العقل صورة عوض بابكر ببسمته الحليمة وحركة أصابعه
إستعانة لتوضيح معاني جميلة في كلمات الحقيبة أو سرد قصة
نعم نهل عوض من معين الكثرين من رواد حب فن الحقيبة وأبدع
والأمثلة كثير سبق البروفسر ود القرشي الكثرين في تقديم برنامج المدائح النبوية لكنه عندما تولى تقديمه أبدع وأجاد وجذب المشاهدين
للتأمل في كلمات شعر المديح العميقة
الأبداع لا يحده زمان ماضي بعيد وقريب
أنا عندما ذكرت برنامج حقيبة الفن لاني ادمنت الاستماع له عندما قدمه ( عوض بابكر )
كنت أقرأ شعر الحقيبة واستمتع به شعرا لا احبه عندما يتغنى به فناني الحقيبة القدامة لكن كنت اسمع الأغنية عندما يتغنى بها بادي محمد الطيب أو الفنان أحمد الفرجوني
مزاجي كدا يا سلمى اسوي شنو ما حبيت الحقيبة غنا إلا منهما كما احببتها عندما تغنى بها فناني الغنا الحديث بالموسيقى

سلمى الله يعطيك العافية
هههههههههه
بالمناسبة العافية عند ناس المغرب ( مراكو تعني النار ) لكن نقول لك ربنا يجافي جسمك من النار ويعطيك العافية بالفصحى وعاميتنا السودانية

وقلَّ في صباح الجمعة ( برنامج ما يطلبه المستمعون ) أن يغيب صوت الثنائي الجميل السني الضوي وإبراهيم أبو دية
يغردان بصوتهما الذي احبه كل الشعب السوداني
حكمة الله الشعب السوداني بعض الفنانين بالإجماع
مثلاً تجد الشخص يحب يسمع عثمان حسين لكنه يستمع للثنائي ورمضان زايد وصالح الضي وإبراهيم حسين وغيرهما من اتفقوا على حبهم

معايا معايا بالدرب الطويل

وثنائي العاصمة
يا مرتضى كان ثالثهم الحويج عشان ماتحرش عبيد فيني

Quote: لكن كنت اسمع الأغنية عندما يتغنى بها بادي محمد الطيب

سلاااااام ومعزة كبيرة ليك يا المنسي ولي مخاليق مولانا الجميلين.......
يا خالد أخوي جيتني في شليلي الرّاح.....
بادي محمد الطيب...............
صاحب الخندريس وزول ناس بُشري الحافي....
قادر الله........
بادي دي اني كنت بدخلبُو خلوة وجدان....
بعد الليل ما يجن......
بشيل الكاسيت ومعاهو براد الشاهي........
وعلبة البرنجية الدَّرعة....
وبفرش تايتي في قيف الخور، وشال الدِّفرة ملفحة درويش ونوار السِّعات يتكاسع فيهو موج الخور ويخلط معاهو أنفاس القيصوم والصيليان .....
أها اول شي بشُِب النار وبتنتن براد الشّاي وبتِش لي تبستن درعة
وبشويشي بشلع بتير الكاسيت و بتّاوق درويشي بادي... ..
وتتفجر ينابيع صوته المعتَّق مع وشوشت النسايم للأغصان........
بادي يا ناس بغنِّي بي وجدانو. وروحو ... ....
عشان كدي سلكو واصل.....و غناهو بدخل في الحنايا.... وفي المِشاش.......

(تسلمي يا سلمى على هذا المرور الجميل ... غايتو لو بكري وقفك هو الخسران ونحن)


* سلمي بت الشيخ سلامة دي يا بكري عندنا كيف نجمة "السواقة" عند اهل البادية
الناس تنتظر طلوعها وبذوغها بي فارق الصبر لأنها بشارة خير وفال فرح...........
طلوعها يعني نجاح الخريف او الموسم ونجاح الدّرت.......
وبداية أفراح أهل الريف والبادية " المتلها عندنا بكنوها وبسموها وبقولولها
أُم نفل....أو أم شوايل...........
وبتلقوها بي الدفوف وزغرودات الحسان وشُبّال العذاري.............
وبدخلوها البيوت من الباب الواسع بي المباخر وشقيق الصندل ومعمول الدواسر
ما بخلوها تتاوق متاوقة................
محبتي ودمتم سمحين نافلة

Quote: أو الفنان أحمد الفرجوني......

أما الفرجوني.......
دي زول عندو مزامير الجن، ما بصَّاقع ، وفي رأيي الزول دي شاعرضخم ،وجرتو براها، والناس عرفت الفرجوني الفنّان الرائع، لكن أظن الفرجوني شاعر الدوبيت ايضا رائع جدا ، شوفو هني يا بخات الحال ، في مسدار "بنات أمريكا"...............
شُفـْتَ بَنـَاتْ شُقـُرْ مِتـْل الارايِل شوْفـْهِن

متـْنـَاهِن رَقـِيقْ تـُبَّـرْ مساكِن دوفـْهِن

الْ خَلاَّنِي صَايَحْتْ بـ معاني حْروفـْهن

فيهِن فِطْرة اخْلاصْ الحَنَان لـ َولُوفـْهِن
----------------------------------

لحَّنِّي ويِبِسْتْ مِن اللَّحَم بالمَرَّة

وادَّنـِّي الفـَواق ما قـَطـَّعَنْ لِي الدَّرة

فيهِن شُقـْرة الرِّيلْ الْ جَفل وانـترَّ

وفيهِن تـَبْرَة ال خَامْسَةْ حِجُولهِن غُرَّة
-------------------------------

زُوزَا بِرْتـَعَن صَـيْ الخَـلا المِتـْعَفـِّي

جِيتـْهِن ياعُـمَرْ وانا عُمْرِي نـَاوي يْـقـَـفـِّي

فوْقِــي بِحَمْحِمَن والحُر حَقِـيقـْتـُو يْوفـِّي

يِمْسِـك دربَـهِـن لامِن مَنـَاسْمُو تـْحَـفـِّي
--------------------------------------
وكمان شوف هني في المجادعة دي........

زار الشاعر حنفي حاج الطيب، المشاعر المقدسة ،لأداء مناسك الحج، وبعد عودته، ارسل لأصدقاءه ،رسالة ،معلنا توبته ،وإعلانه ترك مطايا الشَّيوم، حيث اناخ بعيره ، ولكنه حفرعميقا ، في شوارد الدوبيت، حيث ختمها بهذه الدُّرة:-
بعد التوبة والحج والتضرُّع ؤ ذُلَّك
معقول تاني قلبك لي الصّبابة يِدُلَّك
ؤكان فتَقَن براعِم في جناين فُلَّك
بِتتكرَّف عبيرهن والله تزكم كُلَّك
-----------------------------

ليرد الرائع الشاعردكتورجمعه البرّي:-
بعد الحجة والتوبة البِتحجم غِلَّك
إبليس تاني بِتجوجح بعيد ما بِطُلَّك
الزول القبيل عزفك صبابات كُلَّك
بخاف نظراتو والوهج المواقع ضُلَّك
--------------------------------------------
ويرد الشاعر الجميل العمدة حمد محمد حامد
طِيوفاً في الخيال بعد الهِجوع بِطُلَّك
خايف إودّرِن توبتك ؤ إعيدن ضِلَّك
يا حنفي العزيز طاعم الكلام مابِحِلَّك
في نيران صبابتك اخيرلك أنْجض كُلَّك
-------------------------------
ويرد عبيد الطيب( ودالمقدم) :-
إن طيف سلمي زارك في منامك ؤطَلَّك
عَرْجَن ؤ شاشا بي لَهَجاً دِقاق عَسَّلَّك
والعجب كان فَرَّ إيدو ؤبي الحدق عجَّلَّك
بِتنْجَض كيفنا والله الرَّجعة أخير أسْهَلَّك
---------------------------------------------
ويأتي الرد من الفنان الإنسان الشاعر الرائع احمد البنا (الفرجوني)
بِقول لي قلبي مالك بمشي زايد غِلَّك
ؤدون خلق الله صبرك ماهو ناوي يِطلَّك
عبير زهر المشاتل زاورك في مِحلَّك
شقيت بي شوقو وإتمنيتو حرمك ؤحِلَّك
ثم أردفها الجميل الفرجوني بأخري ماكنة
جميلا عند وداعك دمعو بِتبهلّك
صبرك عندو يا أب قلبا رهيف بتهلّك
رماك في نار جهنّم مارِتا إتمهلّك
مواعيدو ومواقيت حجّك إشتبهلَّك
الفرجوني دي زول ما بصّاقع تب الله يداوم عليهو الصحة وراحة البال

ل

Quote: طيب مصطفي كده حااف ؟...تعودنا أن نكتب اسمه مصحوباً باللقب الذي حازه بجدارة ..المرة الجاية تكتبي الإسم و اللقب _الطيب مصطفي ( ولا مؤآخذة ). نحن نحترم هذا الرجل لأن لولاه لما أدركنا أن الإنسان يمكن أن يموت و يتعفن و يصرح في نفس الوقت .

اخي محسن النقيب
مشكور على المرور
ألأكيد سقط اللقب سهواً وعذراً على ما سقط سهواً وجلَّ من لا يسهو
ولك وللأستاذ طيب مصطفى العذر
حتى الرضاء

نرجوا المعذرة

يا عبيد الهجيرة قهنوبة السواد
تشوي الوجوه جيت داخل هسي
برجع ليك بي رواقة وبعدها هجسة مرور موج بحر ابيض
في يناير

ولك المودة والشكر ودايماً عامر

Quote: (تسلمي يا سلمى على هذا المرور الجميل ... غايتو لو بكري وقفك هو الخسران ونحن) * سلمي بت الشيخ سلامة دي يا بكري عندنا كيف نجمة "السواقة" عند اهل البادية الناس تنتظر طلوعها وبذوغها بي فارق الصبر لأنها بشارة خير وفال فرح........... طلوعها يعني نجاح الخريف او الموسم ونجاح الدّرت....... وبداية أفراح أهل الريف والبادية " المتلها عندنا بكنوها وبسموها وبقولولها أُم نفل....أو أم شوايل........... وبتلقوها بي الدفوف وزغرودات الحسان وشُبّال العذاري............. وبدخلوها البيوت من الباب الواسع بي المباخر وشقيق الصندل ومعمول الدواسر ما بخلوها تتاوق متاوقة................ محبتي ودمتم سمحين نافلة

ههههههههههههههههههه
مابقدر عليها بكري يا ود المقدم
بكري حِقيرتو فوقنا نحن القلمنا فاكي ويابس
سلمى واقفة بي إيدا وشديدا
لكن السبب شنو ؟ علمو عند كريمو
زمان لما وقفت مدة ... كنا عارفين السبب ( حليب إندفق في اللابتوب )
وبرضو دفقتو بي إيدا وشديدا
لكن الدور دا ما عارفين ايدا وشديدا
وصدقت سلموم ام نفل وام شوايل
ودمت سمح زيما انت يا عبيد

لحين ميسرة

يديك العافيه ود المنسي


حقيقي ابداع ما بعدو ابداع

Quote: ديك العافيه ود المنسي حقيقي ابداع ما بعدو ابداع

اخي عباس
لك التحية طيبة سلاااااااام يا راقي
اسعدني مرورك الجميل
وكل سنة وانت طيب وعيكم مبارك

وخليك جنبنا نسعد والله

مودتي وتحياتي

ومن برامج يوم الجمعة
المدائح النبوية
وكان لم يحين موعد المدائح النبوية
يتحول الراديو لتربيزة صغيرة ( طقطاقة ) قرب سرير الوالدة عليها رحمة الله
وكانت تحسن السماع لما قيل مدحاً في الرسول الكريم عليه الصلاة والسلام

وما أجمل كلمات المديح لو دققنا فيها وتأملنا معاني مفرداتها فيها كلام حلو وجميل وبليغ شديد

وتحضرني قصيدة أحببتها كثير منذ صغري
وكان يعجبني فيها وصف الجمل الذي اختاره الشاعر ليحج به وكيف وصفه بهذه الدقة
وبما أن أخونا ( عبــــيــــد ود المقدم له باع طويل في ألبل والشعر الذي قيل فيها )
نحن ان نسبح معه عكس التيار ليزيد جمال الوصف في هذا الجمل أوصاف قيلت في جمالٍ أخر

ويبين لنا ماهي محاسن الصفات التي ذكرت وماذا تعني
مثل أ، يكون الجمل النضيف ذنبه لا يزيد من شبرين ( هذا مثال فقط لكن احب ان يتبحر ود المقدم ويجيب لنا ماقيل في ذاك الوصف شعرا )
والله الموفق
وكل مناي ان يستجيب ود المقدم ويقع كلامي هذا في عينه وهو ما بقصر تب

يا حي يا مجيب
ندعوك ألفين جمل
:::
:::
ميتين لي أحبابنا
الجنبي والبعيد
وميتين لي الفقرا
البقرو في المسيد
وجملي البدورو
ما اظنو إتوجد
أبيض في لونّو
علي الدبلان يزيد
أفطس قدومو
قلماً مبري بي الليد ( اي باليد )
ورهاف أنافو
لابشوفو بي تأكيد
سمحات عيونو
ختمن دق ود تبد
شارفات أُذنيهو
مكلوفاً يا الرشيد
وزمامو الفضة
أربع تاواق ويزيد ( اي 4 وقيات مقياس وزن من الرطل )
خناقو الشولق
غشيم دهب العبيد
رسنو حريراً
بارد في مسك الإيد
إن قلتا رقبتو
جروقن لي الهويد
ومكوكب زورو
والفدعة العند الإيد
ضامر حشاهو
ماهو البدين عريض
إن قلتا ذنبو
فوق الشبريم مابزيد
مرخي عرقوبو
شوتال مدقوق جديد
سمحات سيقانو
كاليد الفي الحديد
ومدور خفّو
في ا########ا مو عريض
شارف سنامو
قبة سيدي العبيد
طبعو المؤدب
لا عُاصي عريض
كدي جيبو ونوخو
يا العرض ويا العبيد
سو فوقو سرجاً
مكسي مغشي جديد
إن قُت مجولاً
كالفصلة الفي العِقيد
وافرش لي الفروة
يا تويلي يا مرعيد
قام تبَّ بينا
يضرب ويمفي الليد
إن جاكا ماشي
في عفرة الصعيد
يا اخوي اقرالو ( اي أقرأ له ما تيسر من قرآن وما يحصنه من عين الحسود )
من كونك ماك جديد
خنق لي الطارة
طالب الرسول السيد
وريس السفينة
قال أهلاً مُداح السيد
وبلاش ادخلو
إن شاء توافو العيد
ودخلنا فيها
كدي قلنا يا مجيد
في سروة واحدة
وصلت بي قدرة السيد
في جدة خروجنا
مافينا من مريض
وحلقنا شعورنا
ورجمنا خصم السيد
طال لينا المنار
أم شبكاً حديد
قولنالو سلاماً
يا سيد رسالة ابــ زيد
قال أهلاً مرحب
انا قلبي ليكا بريد
إنتَّ واحبابك
الجنبي والبعيد
تسكنّوا قصوراً
شامخات بلا تحديد
يات من كان منكم
ألفين حورية نهيد

( هنا يا ود المقدم زولك جاب أخرو والنضمي الفيهو فايدة هو نفسو في الحورية ونهدها )

الحجيج قطع بصوت الفنان عبدالكريم الكابلي

لحين ميسرة

خالد أخوي
سلاااااااااااااااااام ومعزة
يا خالد كثير من المُدّاح وصفوا الجمال بوصف رائع وجميل
خاصة ود سعد وحاج العاقب وحاج الماحي وود تميم وآخرون..........


"أبيض في لونّو
علي الدبلان يزيد"
كثير من الشعراء وصفوا جمالهم بقماش الدبلان لبياضه
شوف صاحبة الجراري
"أبيض لون الطَّاقة
غريب مو ود النَّاقة
اللَّدا الخبيب فاقة
عمل لي الزَّمِل حماقة"
أو صاحب الدوبيت:-
"أبيض من قماش قبَّاني
ويا لحَّاق بقر تيقة البعيد ما بداني
أوكت اللّيل برد والسّاعة تبقي تماني
سرقة البركو عند الشّايلة الكِرب فرداني"
لحاق بقر تيقة اي يصطاد به بقر الوحش او نعاج الوحش والنّاقة التي يصطاد به بقر الوحش تسمّي النَّاعجة وهي من الإبل المهرية....
وتيقة إسم جبل شهير بمراعي الجزو.... لكنه الآن أصبح منجما للذهب
والكِرب قماش أسود تردية النّساء سابقا
أفطس قدومو
قلماً مبري بي الليد ( اي باليد
اي قدومو رقيق والبعير القدومو رقيق هو بعير اصيل
"الولد البخاف القبيلة تِلُومو
يعزل حوزو فوق تيسن رقيق قدُّومو
أمّا إنجاب رضوة البهم البنقِّر فومو
والله إتكاتحن قدح الرَّماد حرُّومو"
ورهاف أنافو
لابشوفو بي تأكيد
والبعير الذي تكون أنفه رهيفه اصيل
سمحات عيونو
ختمن دق ود تبد
وعيونه كختم الفضّة والتي صاغها الصائغ ود تبيد الشهيراو أسرة تبيدي
محبتي

خناقو الشولق
غشيم دهب العبيد
رسنو حريراً
بارد في مسك الإيد
إن قلتا رقبتو
جروقن لي الهويد
ومكوكب زورو
والفدعة العند الإيد
من الصفات المحببة في البعير أن تكون رقبته مدردمة عن الفقرة او الدوم
وان يكون زوره بعيد م" ليلك شدُّو قِدّامك ضَحوةً بارْدِي
أََرِم بَالك علي الحَدَبة الهناك مِتْعارْضِي
مِن الزّور بعيد يا البرّز إيدك شَارْدِي
ممّا تقفي وزينةً مرحّيي وارْدِي "
****************************
"يوم اللَّيلة يا البرّز نجعت نجوع
وليك مرّات تشيل منِّي الرّسن وإتدُوع
إيدك فاجّه من الزّور قُبالت الكُوع
وممّا أصبحت كيف طير النِّعام بتزُوع "
****************************
• ومن محاسن نجائب الجمال أن يكون زور البعير بعيدا من كوعة وكأنه نظر الي طرفة بن العبد حين يقول:-
"صهابية العشنون موجدة القرا بعيدة وخد الرجل موّارة اليدِ
أمرت يداها شزر وأجنحت لها عضداها في سقيف مسند
جمالية وجناء تردي كأنها سفنجة تبري لأزعر أربد"
شوف مظعن الكباشي
"أبو صُقاعة شارف عُنقو
قصير الدَّارجة أبتر ساقو افدع جنقو
خفيف الطُرق وخطّأم لي القبايل الإنقو
بحاسب نفسو طوطاح لي الرَّسن ما يخنقو"
والجنق الأفدع يدُل علي ان ظهره او خببه بارد
ضامر حشاهو
ماهو البدين عريض
والبعير الرقيق شرشوفه وضامر حشا ايضا حُر وأصيلا
إن قلتا ذنبو
فوق الشبريم مابزيد
اي ضيلو قصير والبعير ايضا وتحريك البعير لذنبه اثناء سيره تدل علي نجابته
"مقدور سروة لي أم أهلاً بقولنا حساسة
بِتُر فوق ضيلو قرن آمنة الوضيبها إتواسة"

مرخي عرقوبو
شوتال مدقوق جديد

سمحات سيقانو
كاليد الفي الحديد
ومدور خفّو
وعرقوبه مرخي اي هاكع وكأنه خوسة او حربه او سيفا أي حاد
اي عصب العرقوب حادا وهذا كناية علي أنه غُزلاني
"هاكع من ورا وقدَّام طوال سيقانو
قطَّاع العتامير الكبار قيزانو
الكُلّيق بلا قِعاد العرب شِن هانُو
سيد مِحانك المتل البروق سنَّانُو"
في ا########ا مو عريض
شارف سنامو
قبة سيدي العبيد
طبعو المؤدب
لا عُاصي عريض
شارف سنابو اي ذروة سنابه عالية وهذا يدل علي إعتناء صاحبه به وكأنه قُبّة الشيخ العبيد "ودريا" وهو أيضا جمل ذلول لم يكن عاصيا "عريض" من عُرضي وأهل البادية يقولون للبعير الشموس البعير العرضي اي نكّاس

يا العرض ويا العبيد
سو فوقو سرجاً
مكسي مغشي جديد
إن قُت مجولاً
كالفصلة الفي العِقيد
وافرش لي الفروة
يا تويلي يا مرعيد
نادي لأصحابه أو حيرانه لشديد بعيره وشد السَّرج
وأهل البادية الشرقية يطلقون علي السّرج "الباصور"
وأهل بوادي الغرب عامة والكبابيش خاصة يطلقون عليه الكُور وجمعها أكوار
وهي مفردة فُصحي، وأيضا أكوار جمع كار وهي القطيع من الإبل أو بقر الوحش ثم يفرش علي الفراء أو الفروة وهي نوعين
تويلي وهو الفاخر منها
"كم فرّش تويلي وكم ركبت عجلان"
أو فراء المرعيد وعندنا يسمي المِرعز هي فاخرجدا
"مولد ناس غبيش الدقُّو سيطاني
أدرج لي سنابو وبيضتو وضحاني
وسرجي بي بديدو وناجر بُطحاني
وفوقو المِرعز المِن إسمو موضاني"
قام تبَّ بينا
يضرب ويمفي الليد
إن جاكا ماشي
في عفرة الصعيد
قام تب بينا اي نهض بنا
يضرب ويمغي اللَّيد من يمغِّي اي يطرح واللّيد اي اليد ويقصد بها
رجليه الأمامية وهنا تشبيه لسرعة البعير
ويا لروعة إحدي البدويّات حين تصف امثاله من نجائب الجمال ومن غنا الجراري ايضا :-
"يا الأُماتك رزَّن
ويا الدوماتك نزَّن
وكت النِّجوم غزَّن
إيديك من سدرك فزَّن"
سدرك أي صدرك
الشاعر الرائع البارودي له شعر يشبه قول البدوية عندما وصف ناقته:-
تقلب ايديا متسابقاتٍ الي الغاياتِ كالنِّيل المواضِ
مددتُ زمامها والصُّبح بادِ فما كفكفتها والليل غاضِ
فما بلغت مغيب الشَّمس حتي أضافت آتيا منه بماضِ
هتكت بها ستور الليل حتي خرجت من السواد والبياض
ما أروعك أيُّها الجنرال ،لكن مقطوعةالطَّاري بي "فاشرها" منك حين قالت:-
"إيديك من سدْرك فزَّن"

محبتي ودمتم سمحين

Quote: خالد أخوي سلاااااااااااااااااام ومعزة يا خالد كثير من المُدّاح وصفوا الجمال بوصف رائع وجميل خاصة ود سعد وحاج العاقب وحاج الماحي وود تميم وآخرون..........

ربي يخدر ضراعك يا عبيد أبو ضراع
أصبر لي رووووق برجعلك بي روقة وفاقة

تسلم يا الحبيب

أ

Quote: أبيض في لونّو علي الدبلان يزيد" كثير من الشعراء وصفوا جمالهم بقماش الدبلان لبياضه

أبيض في لون
علي الدبلان يزيد

وما أحلى قماش الدبلان ناصع البياض وحكمة الله عادت من جديد موضة الدبلان
ويا عبيد كانت الأقمشة درجات
تبدأ من تحت
الدمورية
والدبلان
التترن
الترلين
السكروتا
والأفخم كان الدمور لانه عمل ونسيج يد بوعناية خاصة في نسجه وقد امتاز النقادة وبالذات في منطقة شندي بنسيج الدمور الفراد ( الفردة للغطاء والشالات )
فعلاً الدبلان في نصاع قد لا يوجد في قماش اخر عندما يغسل بالذات

Quote: شوف صاحبة الجراري "أبيض لون الطَّاقة غريب مو ود النَّاقة اللَّدا الخبيب فاقة عمل لي الزَّمِل حماقة" أو صاحب الدوبيت:- "أبيض من قماش قبَّاني ويا لحَّاق بقر تيقة البعيد ما بداني أوكت اللّيل برد والسّاعة تبقي تماني سرقة البركو عند الشّايلة الكِرب فرداني" لحاق بقر تيقة اي يصطاد به بقر الوحش او نعاج الوحش والنّاقة التي يصطاد به بقر الوحش تسمّي النَّاعجة وهي من الإبل المهرية.... وتيقة إسم جبل شهير بمراعي الجزو.... لكنه الآن أصبح منجما للذهب والكِرب قماش أسود تردية النّساء سابقا

كلام يخلي الزول يرجف
الكرب
والله ياعبيد تهيج متراكمات في الذاكرة

الكرب
وقال المغني
الكِرب السادة
جابتني ليكا إرادا
خلت قلوبنا ندادة
وا شوقي ليك

وقال أخر

توب الكِرب زاهي
ما بلفو في الشاهي
والوالدة ما تلاهّي

وقد كانت عادة النساء عندما تذهب للدكان لشراء اغراض قد يكون فيها سكر او شاي حب
بتصرو في طرف توبها
هذا لو كان توباً بالي زراق او بنغالي
لكن لو كان توب كِرب ما بتلف فيهو الشاهي
هههههههههه
دا العزيز للمناسبات
ومن التياب قديماً
الكرب
الزراق
البنغالي
والقمر بوبا
وقال فيها الشاعر

بوبا عليك تقيل
القمر بوبا عليك تقيل
والقمر بوبا هو نوع من الثياب قديماً وقال بوبا عليك تقيل كناية يوضح لنا فيها ان المحبوبة كانت صغيرة
حتى ان جسمها يتقل عليه التوب وكلن حراسا ( اهلها لبسوها لي )

ومن التياب خط الاستوا ( الاستواء )
وورد ذكر اسم هذا التوب في أغنية قديمة اطربنا بها حديثاً الفنان عبد الكريم الكابلي

الموز روى
قايم سوا
فاطري إنضوى
يا ناس جسمي
بالنار إنشوى

قطعولّو خط الاستوا
وكانت التياب تمتر ايامها
قطعولّو جلابية اي اشتروا لي جلابية ( خمسة امتار قطعة ليخيطها )

ومن التياب سوط الموسيقى
ههههههههههه
وهناك ياعبيد في توب وقد يكون اي واحد مما ذكرت يعرف باسم توب المسوح
وهو التوب التي تفرشه المرأة بعد ان تمسح جسمها
وعادةً يكون قد بلّى هذا التوب واصبح قديم وبالي

ومن الإاني التي كنا نستمتع بها في برنامج ما يطلبه المستمعون
أغنية جدي الريل اوبو كزيمة

ابراهيم موسى ابا

عيني عليك باردة

وقلبي كان شفتي .. حراية القايلة

ثنائي النغم
زينب وخديجة

أنا مـــــــا إتغيرت
ولا إتنكرت ليك

بس كتمت غرامي في جوة الضلوع
لما شفتك لآهي ومابترحم دموع
ما بتحس بالبريدة والحب والخشوع



برضي ما تغيرت ما خليت هواك
وما فتر تقديري مهما إزداد جفاك
بس براكا الجافي والظالم براك


عمر جعفر
انا ما تغيرتَّ
ولا إتنكرت ليك

الفنان عبدالعزيز محمد داؤود

يا زاهيــــــــــة

قلبي الشلتي جيبي
يا لآهيـــــــــــــة
عبثك بي لو سبتي

وفي عيونك الدلال ظاهر سكران
أما ثغرك بان لي عينيا أجنان
أنا أنا واقف
في خيال طيفك هيمان
أشكي وأبكي للزمان مِنك حبي


خطواتك وقعت ألحان
كتجاوب قلبي زاد خفقان
أنا أنا حاير
في الدُجى وحدي سهران
بتبتل .. وخشوع بعبد ربي

إلى صديقي الجميل
وزميل منبري
إبراهيم فضل الله
لك يا جميل
ومهما وصفتك ومهما اقول
ما بقدر اقول
غير انك زوووووول جميل

نسمات البرد تنفح من خلاء البريقو ديلي ( وكما كان يحلو لنا تسميتها الكلاكلة ) هابة على أمشير
ودخل السيقط والله معاكم مع برد الثلاجة الكوسوفية
ونهدي الأغنية للعزيز عمر النور واولاده حعفر وامنة ( وكما يحلو لعندليب تسميتها أمينــ ه ههههه ) والصغير الشقي وامه
الأغنية مهداة للحاج نبراس ( حاجي درويش ) واخواته
ولعاطف واولاده
يا حليلكم يا ناس كوسوفا انا كان لي مراد ابقى طير واجيكم الحين

أصلو زمان قالوا التور إن وقع
بتكتر سكاكينو
لكن بنرجع ونقول
الصقر إن وقع كتر البتابت عيـــــــب

لكن خليهم يفرحوا الشمات
وخلاص أفرحو يا شمات
حبيبي
الليلة سافر وفات