غلبتنا ثورتنا...بقينا نقابض في حق الناس!

أقسم غير حانث: ان متابعة السودانيين عموما و النشطاء و السياسيين بصورة خاصة لثورة او انقلاب او اياً كان الاسم الذي يريد ان يطلقه المصريون
على مصيبتهم دي اكبر من متابعة المصريين انفسهم لها. و في المنبر ده اتكتب كلام كتيييييير عن ما جرى و يجري في ميدان التحرير و كأنه ميدان ابوجنزير
و في الفيسبوك وصل الامر ببعض الحمقى و وضعوا صورة الفريق السيسي في بروفايلاتهم و كأنوا احنا ما عندنا سيسي و طالب بعض النشطاء المغفلين بترقية
السيسي لرتبة المشير و انا محتار هم دايرين منهم شنو يرقوه مشير يرقوه فرعون يرقوه اله who cares ....مصر ياهو مصر و المصريين ياهم المصريين
حكمهم مرسي...حكمهم السيسي...حكمهم سيدنا يوسف تاني مافي فرق و السيسي بتاعهم ده بالذات المفروض يذكرنا بعبد الناصر و السد العالي و غرق النوبة.

و قال شنو يعملوا افطار البورداب في ميدان التحرير, يعني انت خلاص افتكرت سقوط الاخوان يعني اوتوماتيك سقوط الكيزان.

اها .. وكمان بنتشاكل فيها



والفاضي .......

Quote: اها .. وكمان بنتشاكل فيها

نتشاكل في الفاضي يا وضاح و ينطبق علينا قصة القبطية الولدا ترك المسيحية و ماشي يدخل الاسلام و مات قبل الشهادتين و قالت فيه:
مسكين جرجرس رحلت لا محمد داري بيك و لا يسوع راضي عنك. اها احنا لا المصريين عارفننا و لو عرفونا ما حيتغيروا تجاهنا.

اهو كده لقينا شماعة نعلق فيها خيباتنا


وابشرك


بعد كم يوم كده

حنجيب شماعة تونس

وبعديها شماعة ليبيا

للوقت داك بتكون شماعة سوريا فتحت


ياخ نحنا محظوظين بشكل كل ما نقول نفتش لشماعة تجينا براها

وشوف الثقة بتاعتنا للعمل السياسي الثوري لازم يكون بالزمن (تربية خواجات وكده)

عشان كده طال عمرهم قالوا ثورتنا بالتايم وادوها مائة يوم لكن ما عارف مما نعد ولا مما يعدون

العد يفرق كتير طبعا


.......................................................
العزيز /Sameer Kuku تحياتي

ونحنا (واعني كل الامة السودانية الحالية دي) لا نستحق أن نكون ابناء لهذا الوطن

الاخ سمير كوكو
و المشاركين كلامكم صاح
بقينا زي المثل
نجار و باب بيتو مخلع

سمير كوكو

تحياتي

بوست في السلك

الغريبة انو المصريين لا في منابرهم ولا صحافتهم بهتموا بما يدور في السودان ..

والاغرب اننا صرنا ملكيين اكثر من الملك ..

في شنو ولي شنو ما معروف ..

Quote: الغريبة انو المصريين لا في منابرهم ولا صحافتهم بهتموا بما يدور في السودان ..

و الله يا ابوعلوة انت جبتنا في المحل الما دايرنو,,,,على كمان الله المصريين ديل ما بعرفوا حاجة عن السودان و لا دايرين يعرفوا زاتو
و اقطع دراعي من لغلوغو لو المصري العادي بعرف حاجة عننا اكثر من اسم السودان و ده لأنو في شارع في القاهرة بالاسم ده و مرات
كده بعرفوا الخرطوم,,,,, و اهو كتر خير محكمة الجنائيات الاضافت اسم البشير الى قائمة المعروفين من السودان,,,,,, و بالمقابل تعال شوف ناسنا,,,الله ينور بس!

اما بالنسبة للمثقفين منهم فمعرفتهم بالسودان و قضاياه لا يتعدى القشور,,,واحد بس كان بعرف السودان بحق و حقيقة هو الدكتور ميلاد حنا و مات.
و بالمقابل نشطاءنا و سياسينا ماسكم عقدة اسمو المصريين عشان كده عندما يقرأوا او يسمعوا كلمة حق واحدة من ناشطة كاسماء الحسيني
يعملو بيهو احتفالات لمن تفتكر انها نعوم شومسكي.

Quote: والاغرب اننا صرنا ملكيين اكثر من الملك ..

غايتو كن سمعوك السيسيين و المرسيين و البين بين من ناسنا حيبقوا ليك في الزرارة الاخيرة يا ابوعلوة لأن كلامك ده ما بقسم معاهم و بأكل معهم جمبة!

Quote: بعد كم يوم كده حنجيب شماعة تونس

حمد يا ضنايا انت نايم وين ما ياهو داك استاذ ثروت قال تونس ولَعت
و يا ريت لو اصبحت تحركات الغير شماعات نعلق فيه خيباتنا على الاقل بتكون ظاهرة و بنتعلم منو,,,,
دي بقت مشمعات بنستر بيهو عيوبنا و بعد ده كلو ما انسترنا كويس.

يا ترى هل يأتي اليوم الذي نناضل فيه بجسد علياء المهدي؟ مجرد سؤال غبي!

Quote: الاخ سمير كوكو و المشاركين كلامكم صاح بقينا زي المثل نجار و باب بيتو مخلع

احسن حاجة عملتوه يا استاذ طه جعفر انكم مشيتوا شاهدتوا اغاني و اغاني و اهو صباحي بتاعنا أحسن من صباحي بتاعهم!

العزيز سمير ....تحياتي لا اتداخل في البوستات المعنيه وتثير فيني الشفقه علي متابعيها .... الكم الهائل من الهزيمه و المصائب التي نعاني منها و فيها لا تجد رواجا من اهل سودانيز او الفيس ...او العاديه في ما يجري في دارفور او النيل الازرق او كردفان او الشرق الذي يعاني الفاقه والعطش... يا جماعه الخير العدو المصري يحتل ارض سودانيه والله سودانيه ميه ميه الا تستثير فيكم النخوه السودانيه ....لتحترق مصر بمن فيها وفي اضعاف مصر خير لنا علي الاقل نرجع حلايب,,,,, بالمناسبه الاخ ياسر طيفور كتب بوست رائع بعنوان "مصر بتاعت الساعه كم"........و سجلنا موقفنا هناك و كذلك هنا اخي سمير وتاني.....لتحترق مصر بمن فيها

ياجماعة ده حال البورد وحال شعبه
كل واحد يكتب البعجبو
يجيبوا ليكم مواضيع من وين
كل زول قدر قدرتو
زي ما كل فولة ليها كيالا
بتلقى من يقرأ بوستات الثورة المصرية

-
رمضانك كريم ياسمير

غايتو يا حيدرنا ذكرتني بقصة العنصري سيئ الذكر الطيب مصطفى لمن كان مدير التلفزيون و لمن جماعتوا حاولو اغتيال مبارك و فشلوا
انقطعت العلاقات الثقافية بينهم و المصريين فقرروا عدم شراء المسلسلات المصرية و انتاج دراما محلية للفضائية السودانية,,, هو اصلاً مافي
ميزانية للحاجات دي لأن الكمرات كلها بقت بتاع ساحات الفداء فقام طلع بموضوع هل يجوز ان تظهر المرأة سافرة في الاعمال الدرامية؟
فحك رأسو و لف و دور عشان يلقى فتوى بهذا الخصوص ما لقى فقام تاني مشى للمصريين عشان الفتوى و استشار الشيخين طنطاوي
و القرضاوي و في النهاية قنع من الموضوع و رجع لشراء المسلسلات المصرية و زي ما قلت ح يجيب لينا مواضيع من وين يعني
عشان يملأ بيهو تلفزيونه الكلو أغاني و أغاني ده غير يمشي للمصريين و طبعا ده كلام العاجزيين.

المهم انا كلامي موجه فقط للمعارضين و النشطاء و المناضليين ضد النظام و لا دخل لي فيما يكتبه الاخرون.

وليد يا نايل كيفنك:

جميل ان يتابع السوداني عن قرب ما يحدث في مصر او تونس او حتى ايران ليتعلم من تلك الشعوب كيف انهم عبروا عن استيائهم ورفضهم لتسلط وعنجهية حكوماتهم,,,
و أن يسعى جاهداً أن يتعلم بعض الدروس مما يحدث حوله سواء علي المستوى الفردي أو الجماعي و ان يستخلص منها الدروس و العبر خاصة التضحيات الجسام
التي يقدمها تلك الشعوب في سبيل مبتغاهم. و ان يدون تلك الاحداث و يتخذ موقفا من كل هذه الاشياء فهو رائع و كلنا فعلنا ذلك و هذا امر طبيعي. لكن الغير طبيعي
ان يتبنى الواحد منًا لا شعورياً و هو في الاساس ناشط او سياسي تلك الحراك و كأنه ملكه و يدافع و ينتقد باستماتة و شراسة لايام و اسابيع و شهور و لا يعرفه أحد
من اصحاب الشأن و لا يريد ان يعرفه من الاساس و كما قلت انهم يثيرون الشفقة.

أخي سمير

تحياتي واحترامي ،

نحتاج أولاً أن نثور على أنفسنا: علاقاتنا ونظرتنا إلى أنفسنا وإلى الأخر، طريقة تعاطينا مع مواطنيننا ومع جيراننا ومع حقوقنا وواجباتنا وأرزاقنا وأعمالنا وبيئتنا ومجتمعنا وكل شيء فينا وحولنا وفهمنا للدين والدنيا

دون ذلك

فليبشروا بطول سلامة

Quote: نحتاج أولاً أن نثور على أنفسنا: علاقاتنا ونظرتنا إلى أنفسنا وإلى الأخر، طريقة تعاطينا مع مواطنيننا ومع جيراننا ومع حقوقنا وواجباتنا وأرزاقنا وأعمالنا وبيئتنا ومجتمعنا وكل شيء فينا وحولنا وفهمنا للدين والدنيا

الاخ هاني كل سنة و انت طيب و ابصم على كلامك ده بالعشرة.

انظروا فقط كيف عامل المصريون الرئيس محمد نجيب رحمة الله عليه فقد سجنوه ثلاثين سنة و تم اهانته و أحتقاره و ظل منسيا
و كأنه اي انسان و ليس الرئيس الاول للجمهورية المصرية و الكثير من المصريين اليوم يعتبرون عبد الناصر هو الرئيس الاول
و لا يعرفون محمد نجيب,,,, كل هذا بسبب انه نصف سوداني حيث ان أمه سودانية و اتولد و نشأة و تعلم في السودان.

تقول شنو يا سمير يا خوي اهلنا بقولو "الفايق يهمز امو" ..
عبر التاريخ دائما ما كانت المصائب تأتينا من الشمال حيث "الشقيقة " مصر وبعد ان نلنا استقلالنا "بي سجمو ورمادو ده" لم تضع "الشقيقة " مصر في فمها حذاءً وطفقت تدبر الانقلابات وتقوض ديمقراطيتنا الوليدة وتتحالف مع انظمة ديكتاتورية ظلامية ، لم يكفها اغراق حلفا ولا افراغ مجتمعات كاملة من سكانها أبان فترة سيئة الذكر جريمة العصر "تجارة الرقيق" ولم يشبعوا من مياهنا التي تفيض عليهم سنويا دون مقابل فقاموا باحتلال جزء من اراضينا في حلايب ..
ورغم كل هذا .......... فنحن شعب مصاب بعقدة ستوكهولم ..

رمضان كريم سمير .. بالمناسبة انت اضافة حقيقية للمنبر دائما اتابعك ..

Quote: ورغم كل هذا .......... فنحن شعب مصاب بعقدة ستوكهولم .. رمضان كريم سمير .. بالمناسبة انت اضافة حقيقية للمنبر دائما اتابعك ..

رمضان كريم و كل سنة و انت طيب استاذ عبدالله ادريس و شكرا لكونك تعتبرني اضافة معاكم في المنبر!

كما قلت ربما نحن مصابين بمتلازمة استوكهولم و يبدو اننا برضو بنعاني من عقدة اوديب بسبب تعلقنا بام الدنيا مصر و كراهيتنا لابو الدنيا اسرائيل
لقب ام الدنيا جاءت لمصر من هاجر زوج ابراهيم عليهم السلام و هاجر مصرية و سيدنا ابراهيم هو ابو بني اسرائيل!

سمير كوكو

تحياتى ،،،

Quote: و قال شنو يعملوا افطار البورداب في ميدان التحرير, يعني انت خلاص افتكرت سقوط الاخوان يعني اوتوماتيك سقوط الكيزان.

تعرف يا سمير عندنا ناس هنا ب تأثرو بقضايا مصر أكثر من تأثرهم بقضايا جماهير شعبنا فى دارفور والنيل الأزرق

وجبال النوبه ، تجدهم يتعاطفون معهم بشكل يجعلك تصاب بالإحباط وطائرات الانتونوف ترمى على أجساد الابرياء

قنابلها القاتلة كأنها تحدث خارج السودان حيث لا تجد من يواسيهم ويقدم لهم الدعم المعنوى !!


------------------------

إنت يا سمير ما سمعت بالمثل البقول:

غلبتا حماتا ..دقت مرت الجيران؟؟


هههههههههههههههههههههههه

Quote: إنت يا سمير ما سمعت بالمثل البقول: غلبتا حماتا ..دقت مرت الجيران؟؟

سمعت بالمثل ده يا ود ابوي منصور,,,,المثل الما سمعت بيهو هو البقول "غلبو تربية عيالو مشى اتبنى عيال المايقوما"