شايف مهاجرين غانا ونيجيريا في أمريكا وأقعين تجارة البالة

سوق أبن ود ستين ألف ربحان
وضمنان مرابحو كمان مية المية . تجارة البالة أكتشاف لبناني أنتشر في شمال وجنوب أمريكا
وبعدها أتمدد في كل مكان .
في المجال ده من الأخوان السودانين في نيويورك شغال زول وأحد وهو صديق عزيز ما داير أجيب أسمو والحمد لله عاملو قرشين حلوات .
بس شايف اليومين ديل أخوانا النيجيرين والغانين وأقعين دقش ضفاري .


( تجارة البالة هي تجارة الملابس المستعملة )

قبل رمضان بي يومين قابلت الصديق عبدالله 6 PLAN ود أسمو من سنة 1996
قابلتو في شارع ال 23 مانهاتن وهو ضاحك وآخر سعادة .
سألتو شنو يازول جليت سوق السبت ولا شنو ؟
قال : في تجارة الملابس المستعملة دي القلبة التالتة .
وقالها وهو ضاحك نفس الضحكة البتشبه ضحكة المرحوم أحمد سعيد .
قال : التالتة دي عملت ربح صافي 37 ألف دولار . وحالتو بس كونتنر وأحد كبير .
هسع أنا مستعجل عشان الكونتنر الداير أشيلو ده يحصل عيد الضحية في غانا .

يا عتمان رمضان كريم
الشغلة دي دهب عدييييل بس ما بتنفع معانا لانها ممنوعة في السدان ...
و عندنا هنا ماسكنها اللبنانيين و السوريين ..
وكتن لقيت درب للتصريف في اي دولة افريقية ادينا خبر
ما تلهط براك لانو البياكل براه بيخنق

عزيزنا ود الدوش
سلامات
ورمضان كريم
لا لا في السودان الحبيب ولا ممنوعة ولا حاجة .
بس الناس ما جايبين خبر . والناس الناقشين اللعب ومن سنة 1978 شغالين فيها
عملوا منها لواري و عمارات . .
وعندها في الجمارك قانون رسمي للدخول بعد مرور مندوب من وزارة الصحة بكون أصلو موجود في الجمارك .
عشان يعمل الافراج للبضاعة المستعملة .
وكل مستعمل بي سعرو .
يعني المستعمل البجي من أمريكا سعرو يختلف . علي كل حال تجارة البالة شغالة كويس

الكونتنر الكبير صادر نيويورك البكلفك 7 ألف دولار
في غانا ممكن يدقش ال 30 ألف دولار
...
2 كوتنر في 7 تساوي 14 ألف . وده شامل كلو
لو بعتها في 30 تساوي 60 بعد خصم الشحن والجمارك وحق البضاعة بتعمل ليك 46 ألف دولار .
يعني 3 سفريات في السنة زيك وزي الجراح الشغال في السعودية .

تجارة البالة أرباح مضمونة
أرباح بهلة .
قروش ساكت كدي في السهلة
والداير يعرف الدروب ما حنقصر تب معاو .

احيي روحك وحبك للتعاون ,
وتحية لكل فكرة خلاقة ..

موفق وللامام ..


_ جراح ما شغال في السعودية :) _

______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

الأخ عثمان موسى

شكراً على أفكارك النيرة في مجالات الهجرة والعمل والبزنس ..

وتسلم يديك وأنت تكتب هذه الكلمات الجميلة عن تجارة البالة:

Quote: تجارة البالة أرباح مضمونة أرباح بهلة . قروش ساكت كدي في السهلة

لكن يا أخي تجارة البالة ليست سهلة هكذا ..

والأرباح ليست مضمونة هكذا ..

علينا أن نكون واقعيين ولا نبالغ أكثر من اللازم..

أنا عملت دراسة جدوى في هذه التجارة ..

وجمعت معلومات كثيرة حول هذه التجارة ..

نعم يمكنك أن تجني أرباح طائلة من هذه التجارة .. ولكن هنالك أيضاً مخاطر كثيرة ..

نصيحتي لكل من يفكر في الدخول في هذه التجارة ألا يدخل إلا بالإشتراك مع تاجر ثقة له خبرة سنوات في هذا المجال ..

سلام جميعا

شباب نصحتي خلو الخبز لخبازينو، و التجارة دي ليها ناسها و ليبعد منها الموظفين
و ناس المواهي ما بقدروا عليها و بتجيب ليهم وجع قلب ساكت

قبل عدة سنوات اصدرت الحكومة السودانية اعقاءات على استيراد اللواري
آلاف الناس اشتروا لواري مستعملة و شحنوها السودان، الحصل انهار سعر
ترحيل الطن من بورتسودان للخرطوم، و تبخرت احلام الكثيرين

عشرات الناس ممن اعرفهم اشتروا هذه اللواري بسلفيات و إلى الآن بسددوا
في الارباح،

التجارة عندها ناسها، و دول افريقيا دي ما سايبه، و ناسه خطرين شديد

لو ما عندك شريك موثوق به لا تغامروا ساكت

سلام جميعا



التجارة عندها ناسها، و دول افريقيا دي ما سايبه، و ناسه خطرين شديد

لو ما عندك شريك موثوق به لا تغامروا ساكت
نصيحتي لكل من يفكر في الدخول في هذه التجارة ألا يدخل إلا بالإشتراك مع تاجر ثقة له خبرة

ألف شكر أخ علي
علي المرور الكريم و المشاركة الجميلة
تحياتي

عزيزنا د / شهاب
سلامات
ورمضان كريم
سبحان الله . كل بلد يا شهاب عندها سر
كوالالمبور هي مكمن الاسرار ومكمن المال والتجارة .
ولو بتعرف دروب كوالالمبور كويس يازول
أنت ما محتاج تجي السعودية .
ولا محتاج لي كمامات جراحة ولا مشارط ولا قومة ولا قعدة .

سلام أخي عثمان ورمضان كريم بعيدا من موضوع البوست أحيي فيك حب الخير للآخرين هي شيمة قل أن تجدها في هذا الزمن وفي المجتمع المهاجر وهذا أن دل علي شئ يدل علي نبلك وصفا معدنك وفقك الله ووفق كل من يريد الخير لأهله .

عزيزنا أمجد
سلامات
وألف شكر علي المتابعة والمشاركة الجميلة

عزيزنا حاتم
سلامات
وألف شكر علي متابعة تجارة البالة .

عزيزنا محمود الدقم
سلامات
طبعن أنت لي هسع قاعد في حبيبتنا لندن .. حليل لندن كرش الفيل
. لندن يا محمود مدينة شبعانة و مسكينة وممكن تعمل فيها فلوس وتعمل فيها الدايرو
لا ربري لا رصاص لا شلاليت .
لو محتاج يا محمود لعنوان أي شركة في لندن ولا مانشستر وفي أي مجال بس قول عوووووك .
وكان برضو لقيت الشركة ومحتاج أي DISCOUNT ما عليك .
ولو داير تجرب تجارة البالة من لندن .
يا أخوي تركب البلو تنزل في فنشلي سنتر بعد الاستيشن تاخد يمين أول يافطة تقابلك دي شركة تجميع بتاعت يهودي
أسمو بنجامين . شوف البحصل شنو .
بس لندن ما مية في المية في تجارة البالة أهلنا الانجليز شوية صعبين في جدع الشيء القديم .
بس أي سلع تانية حبابك ألف .

أخونا عبدالله زول غانا
تخصص ملابس مستعملة فقط وشغال علي خفيف الا أصحابنا النيجيرين الشواطين ديل بتاعين كلو
ورأس المال عندهم كبير لدرجة الخوف .
يعني وأحد منهم دخل في بيعة بتاعت 60 BOAT
60 يخت مستعمل وعمل ليهم صيانة تمام يعني يتشاف زي الجديد ال LIGHTS و ال CARPET و صيانة عامة .
يعني دي حيضرب فيها ضربة العمر .
الناس ديل ما كان عندهم كتير و من 13 سنة كلهم كانو فارشين جمبنا في سوق السبت .

نيويورك
وشيكاغو
وجدة
ودبي
وأبوظبي
ديل أسهل مدن تقدر تجمع فيهن الملابس المستعملة الجيدة .
30 في المية من الشباب والشابات في نيويورك بجدعوا هدوم السنة الفاتت .
وطبعن أي ماركة شكلها يختلف عن شكل السنة القبلها
عشان كدي ما في زول عايز يوري أصحابو أنو هو لابس حاجات السنة الفاتت .
ده السبب البكتر الملابس المستعملة في المدن الامريكية الكبيرة وبتكون بي حالة جيدة وده المطلوب في السوق .
نفس الشيء في دبي
بس في دبي ما عشان قصة ماركة قديمة . في دبي القصة قصة شبع .
وده برضو سبب لوجود البضاعة .

في السعودية برضو النيجيرين وناس غرب افريقيا بالاضافة للصومالين ماسكين السوق بتاع المستعمل
من اشهر اسماء هذه التجارة لو كنت اذكر جيدا في السودان
سوق القانص
دنقر شيل
المرحوم قدرك


سوق القانص دا كان في نواحي السوق الشعبي بالاضافة للملابس المستعملة فيهو قسم معتبر جدا للبضائع المسروقة بخلاف الملابس واسمه الدارج سوق الحرامية الي ان تم استبدالها بسوق القانص

سلامات يا أساسي

في نيويورك يا أساسي في أسرة سورية يهودية كبيرة جدا أسمها أسرة العجان
العجانيين ديل هم الكامشين نفس ( القمامة ) في الولايات الخمسين يعني مافي منديل وأحد قديم في البلد أتباع
الا و هم عندهم خبر .
أي وأحد من الأسرة دي عندو موبايل 36 شنكل وساكي الدلاقين .
الشغل في مجال جراحة الدلاقين يا أساسي في هادي البلاد دهب أحمر .
تخيل كم كونتنر في السنة بيطلع من ولاية زي ولاية كلفورنيا ؟

لذيذ ومضحك جدا الحديث عن مشاكل تصريف البضاعة مع النيجيري عمورو
عمورو زول نشيط وملحلح وعايز يقلب سريع بس بشتكي من قصة أنو أهلو التجار النيجيرين صعبين في الدفع .
وده السبب الخلاهو يحول الشغل لجنوب أمريكا .
قال : السفرية بتاعت غواتيمالا في 3 أسابيع عملو مية ألف دولار ربح من 3 كونتنر صغير وحالتو جدع البضاعة جدعة .
يعني لو صبر شوية كان جابت مية وعشرين .
وقال هو هسع بحاول يكبر في رأس المال عشان يدخل في شراكة مع زول سوداني كندي وقال : السوداني ده كاتل الدجاجة .

نرحب ونشكر كل المشاركين
عبر الفيس بوك

وتجارة البالة ممكن تكون في أي سلعة مستعملة
الاسبوع الفات كان في في نيوجرسي :بر دلالة سجاد مستعمل RUGS . في أمريكا
أشتراهو زول وأحد بي 8 مليون دولار .

وتعال شوف النيجيري التاني عمك شيخو سانجو
شيخو يوم الليلة مليونير ومن فد دقة .
والسبب اللساتك المستعملة .
وهاك قصة عمك شيخو سانجو

الحبيب عثمان مو سى

اولا أحييك على بذل النصيحة والنصيحة البتطلع الزول من الفقر للغنى مباشرة

وعرفنا فيك هذه الخصلة منذ بدايات مشاركاتك في هذا المنبر

احييك تاني وتالت

عزيزنا أحمد محمد عباس
سلامات
ورمضان كريم
ياخ ألف شكر علي المتابعة
وأنشاءالله الوأحد يقدر يجمعلو شوية معلومات تفيد الناس .
البلد دي فيها رحمة كثيرة يا أستاذ أحمد .
جبال جبال من الحاجات المستعملة الممكن تفيد العالمين .
تحياتي