هل الاستدلال بالمثل فى الكاركاتير اعلاه صحيح ؟

كتلوك ولا جوك جوك ..... !

سلام ياسامي
ماصحيح طبعا كان ممكن يكون صحيح
لو رسم الريس وهو ماشي علي
المحكمة الجنائية لكن كدا خطاء
تسلم

ليس فيه غلط (صحيح ما صحيح كل ذول حسب قراءته للمشهد)
فهو (سعادة الرئيس)...يحدث نفسو
وبالكلام الكتير حقنا
دي ما طريقة دي....الواحد اخير يكتلوهو ... بدل البهدله دي
انا هسه بقدر علي الجري دا
...........
والفنان محمد الحلو... رسم "واقع"...حاجة حصلت
وليس حل ....يعني يمشي المحكمة ويحل روحو من الجهجهة الهو فيها
واقع يحدده الفنان ... بالسهم الي أبوجا والاخر الي الخرطوم
................
والمحكمة الجنائية لا تقتل (تسجن بس)...وفطن لذلك الفنان الحلو
ولكن ممكن ان يتمني البشير الموت مقتولا ...من أي جهه
بس ما بتجهجه كدا....أو يسلم نفسو
......


والله أعلم

الاخ عبدو مصطفي
انت ومحمد الحلو قوموا لفوا
حطمتوا اسطورة الكاركتير وابتزلتوها وسحبتوا منها الدهشة
اول مرة يصادفني رسامين كاركتير ما فاهمين يعني شنو كاركتير

عكس المعنى!

أخ اساسي
لك التحية دوما

موضوع النقاش ...الكاركتير الفوق
قول رايك فيهو.....

انا اعتقد ان استخدام المثل غير صحيح او معكوس كما قال الاخوة

لان كتلوك ولا جوك جوك يقولها الشخص المستسلم اليائس الموت عنده افضل من انتظاره ..... اما الهارب فهو متمسك بالحياة ..

الصيغة الأنسب كما ذكر الأخوة هي ..

جوك جوك ... ولا كتلوك

بعد الدعوات التي انطلقت في نيجيريا لاعتقال البشير
الريس بقى مجهجه: يا ربي ح يعتقلوني ولّا ما ح يعتقلوني؟ ح يعتقلوني ولّا ما ح يعتقلوني؟ وهكذا حسم الأمر وفكّ البيرق.
ربما يكون دا فهم الرسام، لكنه لا يستقيم مع معنى هذا المثل.
يمكن ينطبق عليه مثل تاني. نحاول نتذكرو.

رمضان كريم يا سامي

Quote: يمكن ينطبق عليه مثل تاني. نحاول نتذكرو.

الأخ معاوية الزبير رمضان كريم وتصوم وتفطر على خير. تقبل الله صيامكم وقيامكم.
هنالك مثل يقول: (البدّر بالح مار مرق). وتعني مهما استخدمت وسيلة مواصلات بطيئة كالح مار مقارنة بالحصان فسوف تخرج سالماً، على زعم أن الحصان في الزمن الغابر اسرع وسيلة مواصلات متوفرة مقارنة بالح مار.

تحياتي.



كبـّاشي الصـّـافي

(العوج راي والعديل راي)

سامي ...ازيك
لاحظت خطأ الاستدال واقترحت في داخلي ( يا روح ما بعدك روح)
ولو تركت بدون تعليق اصلا كان افضل
شكرا للتنبيه وارجو ان يعدل الاخ الحلو

ممكن جدا يا طاهر، اقصد الاقتراحين

تحياتي

ملاحظة ممتازة يا باشمهندس... لعله يقصد المثل الذي يقول:"الجري قبل الشُوف قَدلَة"!!

Quote: سلام ياسامي ماصحيح طبعا كان ممكن يكون صحيح لو رسم الريس وهو ماشي علي المحكمة الجنائية لكن كدا خطاء تسلم

الحبيب سليمان تماماً كما ذكرت ..... قدر ما غربلناهو يجيب تراب ....!

المثل كان بيكون مية المية، لو لم يكن المستهد به البشير، لانه في حالة جري واضح.. لو محمد الحلو أضاف شخصية ثانية متابعة لجري البشير، وهي التي تردد المثل .. الملاحظة في كاريكتيرات محمد الحلو في تكلُف في الرسم يطغي على الفكرة، أنا ذائقتي لهذا النوع من الفن هي تبسيط الرسم وتجويد الفكرة، والفنان حينما يتمتع بسينس أوف هيومر عالي، بكون العمل جميل..

Quote: ليس فيه غلط (صحيح ما صحيح كل ذول حسب قراءته للمشهد) فهو (سعادة الرئيس)...يحدث نفسو وبالكلام الكتير حقنا دي ما طريقة دي....الواحد اخير يكتلوهو ... بدل البهدله دي انا هسه بقدر علي الجري دا ........... والفنان محمد الحلو... رسم "واقع"...حاجة حصلت وليس حل ....يعني يمشي المحكمة ويحل روحو من الجهجهة الهو فيها واقع يحدده الفنان ... بالسهم الي أبوجا والاخر الي الخرطوم ................ والمحكمة الجنائية لا تقتل (تسجن بس)...وفطن لذلك الفنان الحلو ولكن ممكن ان يتمني البشير الموت مقتولا ...من أي جهه بس ما بتجهجه كدا....أو يسلم نفسو

الاستاذ عبدو مصطفى احترم وجهه نظرك لكن اديتنى احساس انك بتشرح لينا فى لوحه سرياليه ما كركاتير معمول لناس عاديين ....!

السمانى حمداً لله على السلامه ان شاء الله بلغت الصحه ....

Quote: عكس المعنى!

exactly يا ابو جوان وده الحيرنى , ياخى انا لمن شكيت فى فهمى .....!

سلام يا سامي ورمضان كريم
الكاريكاتير المثالي هو ما لا يحتاج للكتابة أصلاً لتكملة معناه !

Quote: انا اعتقد ان استخدام المثل غير صحيح او معكوس كما قال الاخوة لان كتلوك ولا جوك جوك يقولها الشخص المستسلم اليائس الموت عنده افضل من انتظاره ..... اما الهارب فهو متمسك بالحياة ..

فعلاً حبيبنا درديرى المثل يستدل به فى الثبات وليس الهرب

Quote: الصيغة الأنسب كما ذكر الأخوة هي .. جوك جوك ... ولا كتلوك

ههههه سالب السالب موجب قلبتو دى امكن تعدلو يا عبد الباقى اخوى ....!

Quote: بعد الدعوات التي انطلقت في نيجيريا لاعتقال البشير الريس بقى مجهجه: يا ربي ح يعتقلوني ولّا ما ح يعتقلوني؟ ح يعتقلوني ولّا ما ح يعتقلوني؟ وهكذا حسم الأمر وفكّ البيرق. ربما يكون دا فهم الرسام، لكنه لا يستقيم مع معنى هذا المثل. يمكن ينطبق عليه مثل تاني. نحاول نتذكرو. رمضان كريم يا سامي

الله اكرم وتصوم وتفطر على خير استاذنا معاويه
فى اعتقادى ان الكاريكاتيرست الناجح يجب عليه ان يجعل فكرته واضحه جليه لا لبس فيها ولا غموض حتى لا تضيع الفكره بكثره التفاسير

طالما جات مناسبة الرسام الحلو ، أنا يا أخوانا عندي سؤال محيرني
السر شنو في كتير من رسوماتو بيرسم ( الصُرة ) بارزة كدا ؟
و رمضان كريم عليكم جميعاً

كتلوك يا وطنى ....

Quote: يمكن ينطبق عليه مثل تاني. نحاول نتذكرو.

الجري بعد الشوف رجالة ...


الخواف ربى عيالو...


الجري نص الجدعنه ..

اتفق مع مُجمل ما قيل عن مفارقة المثل لحال البشير.
لو رأينا البشير رافعاً يديه في استسلام، صاعداً إلى طائرة متجهة إلى لاهاي، أو جالساً باستسلام في ظل شجرة ... لانطبق عليه المثل "كتلوك ... ولا جوك جوك".
أخونا محمد الحلو مغرم بالتفاصيل وبارع فيها أيضاً. ربما كان يحاول تعويض ضعف الفكرة أو غياب روح النكتة كما قال حبيبنا ياسر، لذلك تأتي أعماله (المنشورة هنا) أقرب للرسوم التوضيحية منها للكاريكاتور.
وليته اكتفى بالرسم، فهو يبالغ في ذكر التفاصيل بصورة تقدح في ذكاء المتلقي، وإلا فما مغزى عبارة "خوفاً من الملاحقة القضائية" التي تتصدر اللوحة؟
ولماذا هناك ـ دائماً ـ علامات استفهام وتعجب؟
ملاحظة أخيرة: في معظم أعمال محمد الحلو (المنشورة هنا) تكتسي الوجوه سحنة باردة ومحايدة تجعلها أقرب إلى المومياوات، فتأتي الوجوه بلا انفعالات أو تعابير وكأنها ـ في الأصل ـ جزء من بورتريهات (رسمية) تمّ اقحامها، بالقوة، في عمل كاريكاتوري.

Quote: سامي ...ازيك لاحظت خطأ الاستدال واقترحت في داخلي ( يا روح ما بعدك روح) ولو تركت بدون تعليق اصلا كان افضل شكرا للتنبيه وارجو ان يعدل الاخ الحلو

مقترح جميل اخونا طاهر .... تسلم

Quote: ملاحظة ممتازة يا باشمهندس... لعله يقصد المثل الذي يقول:"الجري قبل الشُوف قَدلَة"!!

شكراً بله ..... وحبابك فى حوش الوطن الكبير

Quote: الجري بعد الشوف رجالة ... الخواف ربى عيالو... الجري نص الجدعنه

يخيل لي برضو يا هندسة في أغنية بتقول
يا أخواني ولا ياخواتي ما متاكد الجري ده ما حقي حق المشنقة و المدفع اب سكلي ولا شنو كده ما عارف


الأخ سامي عبد المطلب
رمضان كريم و تصوم و تفطر علي خير و كل سنة و انت طيب

Quote: لمثل كان بيكون مية المية، لو لم يكن المستهد به البشير، لانه في حالة جري واضح.. لو محمد الحلو أضاف شخصية ثانية متابعة لجري البشير، وهي التي تردد المثل .. الملاحظة في كاريكتيرات محمد الحلو في تكلُف في الرسم يطغي على الفكرة، أنا ذائقتي لهذا النوع من الفن هي تبسيط الرسم وتجويد الفكرة، والفنان حينما يتمتع بسينس أوف هيومر عالي، بكون العمل جميل..

فعلاً يا ياسر محمد الحلو ده ممكن يكون رسام بورتريهات فى شارع النيل لكن قطع شك ما بنفع رسام كاريكاتير لانو الكاريكاتير فكره قبل ان يكون رسمه
عليك الله شوف كاركاتيرات المرحوم عز الدين عثمان ونزيه بساطه فى الخطوط وجمال بلا حدود .....

Quote: (البدّر بالح مار مرق)

ههههه يا باشمهندس كباشى ما تبالغ انت كمان ؟
ده الا يوزع كتلوج مع الرسمه لشرح المثل ....!

Quote: سلام يا سامي ورمضان كريم الكاريكاتير المثالي هو ما لا يحتاج للكتابة أصلاً لتكملة معناه !

صدقت يا ايمن بس نحنا ما بنطالب اخونا محمد بالمثالى بل بالمعقول .... وليهتم بالفكره قبل الرسمه

Quote: طالما جات مناسبة الرسام الحلو ، أنا يا أخوانا عندي سؤال محيرني السر شنو في كتير من رسوماتو بيرسم ( الصُرة ) بارزة كدا ؟ و رمضان كريم عليكم جميعاً

ههههه هههه ده جزء من ابراز التفاصيل يا كمال كويس الوقفت على الصُرة .... !

Quote: كتلوك يا وطنى ....

ربنا يصلح الحال ....

Quote: الجري بعد الشوف رجالة ... الخواف ربى عيالو... الجري نص الجدعنه ..

امثالك دى يا الامين ما بقولا زولاً جعلى شوف ليك زولاً تانى قولها ليهو ...!

Quote: اتفق مع مُجمل ما قيل عن مفارقة المثل لحال البشير. لو رأينا البشير رافعاً يديه في استسلام، صاعداً إلى طائرة متجهة إلى لاهاي، أو جالساً باستسلام في ظل شجرة ... لانطبق عليه المثل "كتلوك ... ولا جوك جوك". أخونا محمد الحلو مغرم بالتفاصيل وبارع فيها أيضاً. ربما كان يحاول تعويض ضعف الفكرة أو غياب روح النكتة كما قال حبيبنا ياسر، لذلك تأتي أعماله (المنشورة هنا) أقرب للرسوم التوضيحية منها للكاريكاتور. وليته اكتفى بالرسم، فهو يبالغ في ذكر التفاصيل بصورة تقدح في ذكاء المتلقي، وإلا فما مغزى عبارة "خوفاً من الملاحقة القضائية" التي تتصدر اللوحة؟ ولماذا هناك ـ دائماً ـ علامات استفهام وتعجب؟ ملاحظة أخيرة: في معظم أعمال محمد الحلو (المنشورة هنا) تكتسي الوجوه سحنة باردة ومحايدة تجعلها أقرب إلى المومياوات، فتأتي الوجوه بلا انفعالات أو تعابير وكأنها ـ في الأصل ـ جزء من بورتريهات (رسمية) تمّ اقحامها، بالقوة، في عمل كاريكاتوري.

يا سلام عليك يا استاذ محجوب لخصت كل البوست واديت ود الحلو روشته جاهزه نتمنى ان يعمل بما فيها حتى نرى كاركاتيرات افضل فى مقبل اعماله .....

Quote: يخيل لي برضو يا هندسة في أغنية بتقول يا أخواني ولا ياخواتي ما متاكد الجري ده ما حقي حق المشنقة و المدفع اب سكلي ولا شنو كده ما عارف الأخ سامي عبد المطلب رمضان كريم و تصوم و تفطر علي خير و كل سنة و انت طيب

ايوه يا امير الاغنيه بتقول
اخواتى البنات الجرى ده ما حقى حقى المشنقه والمدفع اب ثكلى ...
واشتهر بادائها كمال ترباس

الله اكرم وربنا يتقبل منا ومنك صالح الاعمال

Quote: امثالك دى يا الامين ما بقولا زولاً جعلى شوف ليك زولاً تانى قولها ليهو ...!

ٍٍQuit

Quote: امثالك دى يا الامين ما بقولا زولاً جعلى شوف ليك زولاً تانى قولها ليهو ...! ٍٍQuit

الله يرضى عليك يا الامين اخوى الوش الضاحك وين فى اقتباسك ده ...... كدى اقرأ المداخله دى تانى احتمال كبير اكون ما قدرت اوضح الانا قاصدو كويس .... لكن العباره تهكميه ومقصود بيها الرئيس

احترامى وتقديرى الذى تعرف ..

Quote: الله يرضى عليك يا الامين اخوى الوش الضاحك وين فى اقتباسك ده ...... كدى اقرأ المداخله دى تانى احتمال كبير اكون ما قدرت اوضح الانا قاصدو كويس .... لكن العباره تهكميه ومقصود بيها الرئيس احترامى وتقديرى الذى تعرف ..

سامي

سلام وانت اتحسسته ولا شنو؟
عارف يا سامي أي بوست يكون فيهو دا جعلي ودا شايقي ودا رزيقي ودا دينكاوي ودا ..... الخ الخ
طوالي بطلع منو ودي عارفنها عني كل الذين زاملوني في الاسافير
اديك مثال بسيط :

عندي صاحبي جعلي عوير من السيال وبيننا صداقة لأكثر من 8 سنوات
قبل كم يوم بلكته وقطعته علاقتي معاه بسبب هروب البشير من ابوجا
لمجرد اني قلت البشير جرى وحقو نسمي خط ابوجا الخرطوم بشارع البشير
طوالي قام شبكني ليك .. وووو .... وانت الجري دا قاصدنا بيهو .. ووو
وانت قاصد المك نمر .. وووو
قلت ليهو أنت عوير ولا شنو؟
ليك كم سنة بتعرفني يوم واحد اتكلمت عن قبيله بسوء؟
ولا حتى جبته سيرة قبائل في بوست لي؟

اها يا سامي حتة القبلية دي بقت حساسة والحكومة قاعدة تلعب بيها
دي كل الحكاية ...
وبعدين البشير دا لا جعلي ولا حاجة بشهادة اخيه وشهادته هو
وشهادة كثير من اخواننا الجعليين .....

فدحين خلينا في البشير الذي هرب بدون أي خلفيات قبلية ياخ

كن بخير

شكرا يا سامي. اعجبتني ملاحظتك عن المثل من اساسه. ثم انك من العشرة الأوائل الذين رحبوا بوجودي في هذا المكان الذي ما فتئت اتحسس مجلسي فيه منذ قدومي في ابريل الماضي وانا انظر الي الباب! علي ان المساهمة بالرأي مهما بدت متواضعة فهي قطرة هامة في مسيرة ينبوع المعرفة ولذا فانا هنا. برلوم لنج مثلك دفعة 2013 بالرغم من اني اكبرك بزهاء العقدين! المثل الذي اوردته انا ربما احتاج لبعض الشرح. وليعذرني من يري ان لا لزوم لشرحه لأنه واضح لهم.

"الجري قبل الشوف قدلة"!! هو تمجيد للحكمة وبعد النظر الذي يقود الشخص المذنب لعمل (الصاح) والرجوع عن الخطأ (التنازل) قبل الفاس تقع في الراس. هو ليس شماتة من فعل الجري كما يبدو من الوهلة الأولي، ولا يضرب للذي جري اصلا! وانما هو موعظة للذي يتزاكي علي الناس او يتكبر عليهم ظنا منه ان لا حاجة به للتنازل عن اي من مواقفة مهما بدا خطلها. فافضل له ان يجري قبل ان يراه الناس (يتنازل قبل المواجهة) لأن جريه مجازا (تنازله) في هذه الحالة سيكون كالقدلة. وشتان ما بين القادل المتمهل والجاري الخائف.

فالقزافي مثلا لو تنازل في اللحظة المناسبة وفتح الطريق الديمقراطي لشعبه ورفع كلتا يديه اليهم طالبا الصفح لكان مصيره مختلفا عما حدث وربما هو حيٌ يرزق الآن (حتي ولو بين القضبان). وساعتها كان سينطبق عليه المثل "الجري قبل الشوف قدلة". لأنه افلح في تدارك خطأه وطلب الصفح في الوقت المناسب. أيراد المثل هنا مع الكاريكاتير وفي ظل الأحداث الراهنة هو تذكير لفخامته أن الحكمة تقتضي التنازل الفوري والأعتراف بالخطأ وقيادة حل ناجع شامل للوطن حتي ولو ادي ذلك لحسابه وحساب من معه. اذا فعل سيكون قد تدارك حكمة المثل الأصلية وما حدث في ابوجا سنتغاضي عنه حتي لو شفنا!

Quote: ها يا سامي حتة القبلية دي بقت حساسة والحكومة قاعدة تلعب بيها دي كل الحكاية ... وبعدين البشير دا لا جعلي ولا حاجة بشهادة اخيه وشهادته هو وشهادة كثير من اخواننا الجعليين ..... فدحين خلينا في البشير الذي هرب بدون أي خلفيات قبلية ياخ

شكراً الامين اخوى على النصيحه السمحه ....

Quote: شكرا يا سامي. اعجبتني ملاحظتك عن المثل من اساسه. ثم انك من العشرة الأوائل الذين رحبوا بوجودي في هذا المكان الذي ما فتئت اتحسس مجلسي فيه منذ قدومي في ابريل الماضي وانا انظر الي الباب ! علي ان المساهمة بالرأي مهما بدت متواضعة فهي قطرة هامة في مسيرة ينبوع المعرفة ولذا فانا هنا. برلوم لنج مثلك دفعة 2013 بالرغم من اني اكبرك بزهاء العقدين! المثل الذي اوردته انا ربما احتاج لبعض الشرح. وليعذرني من يري ان لا لزوم لشرحه لأنه واضح لهم.

اها شفت يا بله اخوى جنس الكلام ده ياهو البحرمنا من اقلام عندها الكتير الممكن تقدمه , فهسع انا المثل الذكرتو ده اول مره افهمو واعتقد انو معاى كتيرين فى الحته دى ... فما تتحسس من حته برلوم دى واكتب كتابتك وانا متاكد انو بالاستمرار حتخلق لى قلمك مكان فى الحوش ده ......

...........
.......
...

نسيت ...... اقفل الباب وراك عشان ما نتحرم من قلمك ده .....

ادناه بعض مما سطرته دينا خالد فى ذات السياق ذات بوست :-

Quote: الكاريكتير فن رفيع الفكره فيهو انو يكون لماح ولا يخلو من فكاهة لكن الكاريكتير البكتبو ذى المقال دا ... دا ببقى حاجة تانيه دمها تقييل وما فيهو اى ابداع ،، فوق فيهو عنوان عشرين سطر وتحت اى زول بشرح