Post: #1
Title: بعض الامثال المصرية معّبر جدا
Author: احمد سيد احمد
Date: 07-17-2013, 12:52 PM
بنتكلم عن المغادرة وترك العمل والكلام دا
قمت قلت لــ اتنين مصريين زملاني:عندنا مثل في السودان بقول:
المفارق عينو قويه
قام واحد منهم قال لي نحنا المثل عندنا بقول
يا رايح كتّر من القبايح
وقمت قلت ليهو والله المفروض الزول يعاشر بالمعروف ويغادر بمثله
قام حكى لي حكايه عن واحد زميلهم هناك في مصر
كان في شغال في مكتب هندسي وخلاهو ومشى مكتب اخر
اها صاحب المكتب الجديد طلع بعرف صاحب القديم
وطوالي ضربليهو
ياخ فلان دا كان شغال معاك وجاني
رايك فيهو شنو؟
قاليهو والله رجل محترم ومافيهو كلام
طوالي الزول الجديد قبلو وبراتب محترم
اها لو هسي كان عمل قبايح مع صاحب العمل الاول......كيف كان حيكون وضعو؟
المصري التاني قال لي مثل سمح برضو حول القصه الفاتت دي
قال عندهم مثل بقول:
طول ما انا زمار وانت طبّال ليالى الانس تجمعنا
يعني مدام مجالنا واحد اكيد بنتلاقى
عشان كدا ما ت###### مع ابناء مهنتك وخاصة اصحاب العمل منهم
|
Post: #2
Title: Re: بعض الامثال المصرية معّبر جدا
Author: احمد سيد احمد
Date: 07-17-2013, 12:59 PM
Parent: #1
دكتورة مصرية ليها 25 سنة بتدرس في جامعة في السعودية وزولة ظريفة جدا مرة قلتليها انتو المصريين ليه حتى مع بعضكم ما كويسين لو كنتو بتشتغلوا في مكان واحد
قامت قالت لي نحنا عندنا مثل بيقول
انت كبير وانا كبير مين اللي بيجر الحمير
قالت انو مشكلة المصريين انو كل واحد فيهم عايز يبقى هو الكل في الكل
في مكتب هندسي كنت بشتغل فيهو في السعودية في مهندس تونسي قارب ال60 من العمر وكان لسه بشتغل شغل ميداني قام قال للمهندس المصري المدير...كفاية يا مهندس ..... خليني بقى ابقى مدير كمان شويه وحب لاخيك ما تحب لنفسك
ههههههههه المصري قاليهو
ربنا خلق البني ادم وايدو بتمشي على خشمو هو موش على خشم الناس التانين ساعة الاكل
|
Post: #3
Title: Re: بعض الامثال المصرية معّبر جدا
Author: احمد سيد احمد
Date: 07-17-2013, 01:01 PM
Parent: #2
اكل ومرعى وقلة صنعه
ودا بضربوهو للزول القاعد مرتاح وماشغال اي شي
النوايه بتسند الزير
النوايه هي حصاصة البلحه ويضرب لانو اقل حاجه بتسند مثلا مساهمتك الماديه في البيت ولو كانت تعبانه برضو بتسد خانه
|
|