الزميلة نجلاء ابشرتتعرض للسرقةبشارع الغابةوهي داخل سيارتهاوامام الناس!

تعرضت الزميلة نجلاء ابشر للسرقة بشارع الغابةوهي داخل سيارتهاوامام الناس وذلك بتاريخ 05 من يوليو 2013م ..
وحسب روايتها :
اثناء تحركها وهي تقود سيارتها باتجاه عملها بالخرطوم ،تم ايقاف الحركة من قبل شرطي المرور في التقاطع للسكة الحديد بشارع الغابة لافساح المجال للسيارات في احد الشوارع المتقاطعة للمرور ..
فتفاجأت بركوب احد الشباب من الباب الخلفي لسيارتها والجلوس حيث بدأت تصرخ ، ولااحد يستجيب، والفرجة حال الجميع من حولها ،ليركب اخر بالمقعد الامامي ويسلبها مقتنياتها ،ومن ثم الهروب باتجاه المنطقة الخالية .
فاصيبت بهلع كبير وفقدت مستلزماتها وما تملك من شنطة وموبايل ..
وللاسف لم يستطع رجل شرطة المرور اللحاق بهم رغم الجري ورائهم بعد هروبهم ..
وايضاً للاسف لم تقم نجلاء بفتح بلاغ لدي الشرطة .
نسأل الله ان يعوضها الخير ..
ومن هنا نناشد السيد وزير الداخلية للاهتمام بمتابعة مثل هذه الظواهر الاجرامية الخطرة

حموده

رمضان كريم عليك صيام مقبول وذنب مغفور


ربنا يعوضها خير.

لييييييه تخلى ابواب السيارة غير مؤمنة دا خطأ نتمنى ألا تقع فيهو مرة أخرى
أُؤيدها فى عدم فتح البلاغ لانو ما ممكن تصاب بالغبن من تعقيد الاجراءات الشرطية على الغبن العليك
ربنا يخلف عليها بافضل وابرك دا درس مكلف واتمنى برضو ما تركب معاها زول ما بتعرفوا عن تجربة
:
:
:
اتخيل واحد سرقوا منو كل ما يملك من مال وجا يفتح بلاغ بعد ما عمل العريضه وفتح البلاغ
وعملوا معاهو التحرى قال ليهم اهاااا اجيكم متين الشرطى بنص ابتسامه قال ليهو تجينا لى شنووو
فى زول اتسرقت منو قروش اتلقت فى الوقت الفيهو ما موقف يخلوا من اكثر من رجل مباحث
وهم عارفين بالبسرق القروش والمحافظ منو والبسرق الشنط منو والبقلع منو والبكسر منووو
رمضان كريم وتصوموا وتفطروا على خير
مع التحيات لله الزاكيات

تكررت كتير في شارع الغابة ..

ليلا ونهارا ..

والهرب لداخل الغابة والسارق على يقين أنه لن يجرؤ أحد على مطاردته ..!

Quote: امام الناس

المروة انتهت

الف سلامة للزميلة نجلاء وربنا يعوضها ..
والله القصة ما مروة ولا حاجة يا صالح لانو البلد بقت فيها حاجات تحير يعني تمشي تتدخل تدخل نفسك في حتة ما تعرف تمرق منها .. والله العظيم قبل يومين وانا طالع الصباح من البيت في واحد بتاع حافلة صدم ليهو واحد سايق موتر ورماهو في نص الزلط وبكل اسف لم يتوقف وهرب مسرعا وتجمع الناس وتم اخذ المصاب خارج الزلط وتسجيته على التراب ورفض معظم سائقي العربات اخذه الى المستشفى وللاسف كنت ممن رفضو حيث اوقفني شباب عند مروري بقرب مكان الحادث واشرت لهم ارفعوه سريعا الا ان صديقي الذي كان بجانبي قال لي لا ,, الا تذكر ما حدث لطارق عندها اتخارجت فورا بمجرد ذكر طارق الذي تبرع بنقل مصاب في حادث الى المستشفى قبل شهرين وحتى الان لم يتمكن من اثبات انه لم يكن طرفا في الحادث .. والحمد لله ان المصاب لم يمت مما يترك له بصيص امل في ابراء ساحته .

Quote: اتخيل واحد سرقوا منو كل ما يملك من مال وجا يفتح بلاغ بعد ما عمل العريضه وفتح البلاغ وعملوا معاهو التحرى قال ليهم اهاااا اجيكم متين الشرطى بنص ابتسامه قال ليهو تجينا لى شنووو فى زول اتسرقت منو قروش اتلقت فى الوقت الفيهو ما موقف يخلوا من اكثر من رجل مباحث وهم عارفين بالبسرق القروش والمحافظ منو والبسرق الشنط منو والبقلع منو والبكسر منووو رمضان كريم وتصوموا وتفطروا على خير مع التحيات لله الزاكيات

أيها الأخ الكريم :
نعم رمضان كريم ولكن كيف تفطر أنت وتصوم على خير
وأنت ترمى الأبرياء من رجال المباحث بالمعرفة مع التستر
على السارقين والنهابين فى نهارات رمضان زوراً وبهتاناً !!؟
هذه الفتاة المنهوبة لم يتبق لها سوى عرض أموالها ومقتنياتها
على الرصيف ومن ثم تصيح على المجرمين أن هبوا وهلموا
واسرقوا ... ثم شئ آخر أين دور رصفائك ( الناس ) الذين
استنجدت بهم وخذلوها !؟ اذا كان المواطن العادى يلتحف السلبية القاتلة
ويفتقر الى المروءة والنخوة فمن أين للشرطى بها ... عليك أن تتذكر
بأن الشرطى نفسه هو مواطن سودانى قبل أن يكون شرطياً .. والأهم من ذلك
عليك أن تتذكر بأن هذا الشهر هو شهر رمضان ورمضان يأتى مرة واحدة فى العام
أما الشرطى فهو معك كل العام فلم العجلة والسبق فى الاساءة والتحقير !؟ .. كل المواساة
للفتاة المسروق مالها والجاتها فى مالها سامحتها أليس كذلك ؟

Quote: أيها الأخ الكريم : نعم رمضان كريم ولكن كيف تفطر أنت وتصوم على خير وأنت ترمى الأبرياء من رجال المباحث بالمعرفة مع التستر على السارقين والنهابين فى نهارات رمضان زوراً وبهتاناً !!؟ هذه الفتاة المنهوبة لم يتبق لها سوى عرض أموالها ومقتنياتها على الرصيف ومن ثم تصيح على المجرمين أن هبوا وهلموا واسرقوا ... ثم شئ آخر أين دور رصفائك ( الناس ) الذين استنجدت بهم وخذلوها !؟ اذا كان المواطن العادى يلتحف السلبية القاتلة ويفتقر الى المروءة والنخوة فمن أين للشرطى بها ... عليك أن تتذكر بأن الشرطى نفسه هو مواطن سودانى قبل أن يكون شرطياً .. والأهم من ذلك عليك أن تتذكر بأن هذا الشهر هو شهر رمضان ورمضان يأتى مرة واحدة فى العام أما الشرطى فهو معك كل العام فلم العجلة والسبق فى الاساءة والتحقير !؟ .. كل المواساة للفتاة المسروق مالها والجاتها فى مالها سامحتها أليس كذلك ؟

عباس فوراوي ،مبارك عليك الشهر ..
قبل كل شيء التحية لرجال الشرطة والمباحث بالسودان ..
فهم يقومون بالسهر على راحة المواطن وامنه ..
ومافي حد بيشكك فيهم ..
بس ياريت بنتبهو ليه الناس ما بتمشي تفتح بلاغ ..ودي حقيقة؟
لازم يكون هناك توعية للجمهور،بان البلاغ عن الحوادث والسرقات في حد ذاتها لها قيمة حتى في تسجيلها الاحصاءات والمعلومات للتحرك في حلها.

[

Quote: هذه الفتاة المنهوبة لم يتبق لها سوى عرض أموالها ومقتنياتها على الرصيف ومن ثم تصيح على المجرمين أن هبوا وهلموا واسرقوا ..

ياخ عباس فوراوى للاسف لايوجد امن ولاشرطة ولامباحث فى الخرطوم قبل يومين بالزبط وفى داخل العمارة التى اسكن بها لاحظ فى داخل العمارة وليس بالخارج

تم سرقة موبايل جلاكسي نوت من يد زوجتى فى اثناء طلوعها السلم بعد زيارة جارتها بواسطة اتنين من الاطفال فى عمر 13 و14 عام وكان فى انتظارهم موتر بالخارج
وهربو بكل بساطة والله سلم زوجتى وتركت لهم الموبايل وذهبت لفتح بلاغ وعريضة وطلبو منها السيرل نمبر للجهاز واعطتهم ووعدها المتحرى بااعطاءها خطاب لمراجعة شركات الاتصال
وقال لها هذا كل مانستطيع فعلة مع العلم انى اسكن فى جار لعلى عثمان محمد طه وفى منطقة المفروض تكون مامونة مابالك بالمناطق الاخرى!!
للاسف الامن معدوووم فى الخرطوم تماما ولاوجود لشرطة ولامباحث ولايحزنون

Quote: الف سلامة للزميلة نجلاء وربنا يعوضها .. والله القصة ما مروة ولا حاجة يا صالح لانو البلد بقت فيها حاجات تحير يعني تمشي تتدخل تدخل نفسك في حتة ما تعرف تمرق منها .. والله العظيم قبل يومين وانا طالع الصباح من البيت في واحد بتاع حافلة صدم ليهو واحد سايق موتر ورماهو في نص الزلط وبكل اسف لم يتوقف وهرب مسرعا وتجمع الناس وتم اخذ المصاب خارج الزلط وتسجيته على التراب ورفض معظم سائقي العربات اخذه الى المستشفى وللاسف كنت ممن رفضو حيث اوقفني شباب عند مروري بقرب مكان الحادث واشرت لهم ارفعوه سريعا الا ان صديقي الذي كان بجانبي قال لي لا ,, الا تذكر ما حدث لطارق عندها اتخارجت فورا بمجرد ذكر طارق الذي تبرع بنقل مصاب في حادث الى المستشفى قبل شهرين وحتى الان لم يتمكن من اثبات انه لم يكن طرفا في الحادث .. والحمد لله ان المصاب لم يمت مما يترك له بصيص امل في ابراء ساحته .

معتصم محمد صالح ،مبارك عليك الشهر ..
صدقني ما عذر ..
يعني ممكن ناخذ احتياطاتنا ..
لكن تبقى الشهامة والمروة الجوانا ..
تعرف الواحد ما بيحس بقيمة المروة الا اذا حدثت حادثة مشابهة لاحد من يهمنا امره/ا ..
انا شفت واحد صدم موتر وهرب ،صدقني طاردناه انا وواحد بتاع موتر اخر لنعرف رقم سيارته والحمد لله قدرنا ارجاعه لمكان الحادث ..
وصديقي اسعف المصدوم باخذه للمستشفى ..
رغم من لوم اصدقاءنا لنا لتصرفنا هذا .
وماتنسى نحن مغتربين ..يعني اي جرجرة اجازتك ياحليلها هههههههههه

Quote: المروة انتهت

صالح عبده ،مبارك عليك رمضان..
للاسف دا الحاصل ،والكل يخاف ان يضع نفسه في مسألة .

Quote: تكررت كتير في شارع الغابة .. ليلا ونهارا .. والهرب لداخل الغابة والسارق على يقين أنه لن يجرؤ أحد على مطاردته ..!

ناذر مبارك عليك الشهر..
عشان كلامك الفوق دا..
ناشدنا السيد وزير الداخلية لوضع حد لهذه الجرائم .

Quote: لييييييه تخلى ابواب السيارة غير مؤمنة دا خطأ نتمنى ألا تقع فيهو مرة أخرى أُؤيدها فى عدم فتح البلاغ لانو ما ممكن تصاب بالغبن من تعقيد الاجراءات الشرطية على الغبن العليك ربنا يخلف عليها بافضل وابرك دا درس مكلف واتمنى برضو ما تركب معاها زول ما بتعرفوا عن تجربة : : : اتخيل واحد سرقوا منو كل ما يملك من مال وجا يفتح بلاغ بعد ما عمل العريضه وفتح البلاغ وعملوا معاهو التحرى قال ليهم اهاااا اجيكم متين الشرطى بنص ابتسامه قال ليهو تجينا لى شنووو فى زول اتسرقت منو قروش اتلقت فى الوقت الفيهو ما موقف يخلوا من اكثر من رجل مباحث وهم عارفين بالبسرق القروش والمحافظ منو والبسرق الشنط منو والبقلع منو والبكسر منووو رمضان كريم وتصوموا وتفطروا على خير مع التحيات لله الزاكيات

سلام أخي،ومن المقبولين في رمضان ..
تعرف الأخت نجلاء ذكرت انها دائماً تأمن ابواب سيارتها ..بس جل من لا ينسى ..وفي هذا اليوم نست ..
كثيرين بنفس رائك بعدم فتح بلاغ للجرجرة ..
وهذا خطأ ..
لانه معلومة الجريمة مهمة للشرطة ،حتى لو لم يتم ارجاع المقتنيات .. وفي هذا ننتظر اهل التخصص من رجالات الشرطة المعانا هنا ..
وعليه تعمل الاحصاءات ..
وتظهر الظواهر بعد كثرة البلاغات .
وصراحة سبق ان سرقت مني دراهم اماراتية وانا راجع من جهاز المغتربين بالخرطوم ،وارجعتها ليّ الشرطة في زمن وجيز ..
حيث حددو المجرمين بتلك المنطقة ..
وقديماً ايضاً سرقت في دفار بمواصلات الحاج يوسف ،وايضاً حددو السارق وارجعو المحفظة ،لكن المبلغ (ولو بسيط ههههه)يعوضني الله .

Quote: حموده رمضان كريم عليك صيام مقبول وذنب مغفور ربنا يعوضها خير.

محمد هاشم ابوزيد ،تقبل الله منا ومنك الصيام والقيام ..
آمين يارب.

وين الرقابة الإلكترونية والرادارات؟ راحت شمار في مرقة

Quote: وين الرقابة الإلكترونية والرادارات؟ راحت شمار في مرقة

ودقاسم،مبارك عليك الشهر..
اتمنى ان تفعّل اي ادوات تقلل من الجرمية ..

ربنا يخلف عليها في هذا الشهر الفضيل
دور الشرطة اكبر من ذلك وتقع في دائرته اختصاصها حماية ممتلكات المواطنين في كل الظروف والاحوال
ووضوع الاحتياطات اللازمة للحد من الجريمة بمزيد من الدراسات والاحصاءات لمواقع الجرائم

الجاتك فى مالك فديتك اختى نجلاء
طبعا اول تصرف انا بعمله لمن اركب العربيه
بأمن الابواب
لمن جننت اخويه لمن يركب معاى فى النزول
لانى سمعت كتير عن الحاصل دا
وفى مره كنت فى دخلة شارع المك نمر وعند السكه حديد واتفاجىئ باتنين بيحاولوا يفتحوا الابوب الورا اليمين والشمال
لانى كنت خاته شنطى ولابتوب بورا
ولمن لقوها مقفوله قاموا جاريين
وعندى صحبتى برضو تعرضت لسرقه والزعلها ما الاتسرق منها لكن الواقفين حواليها بيتفرجوا عليها فى العربات التانيه
ما عرفت هل فعلا عدم مروئه ولا لان المروئه بقيت توابعها كوارث وبتندم الناس انها فكرت تساعد

Quote: الجاتك فى مالك فديتك اختى نجلاء طبعا اول تصرف انا بعمله لمن اركب العربيه بأمن الابواب لمن جننت اخويه لمن يركب معاى فى النزول لانى سمعت كتير عن الحاصل دا وفى مره كنت فى دخلة شارع المك نمر وعند السكه حديد واتفاجىئ باتنين بيحاولوا يفتحوا الابوب الورا اليمين والشمال لانى كنت خاته شنطى ولابتوب بورا ولمن لقوها مقفوله قاموا جاريين وعندى صحبتى برضو تعرضت لسرقه والزعلها ما الاتسرق منها لكن الواقفين حواليها بيتفرجوا عليها فى العربات التانيه ما عرفت هل فعلا عدم مروئه ولا لان المروئه بقيت توابعها كوارث وبتندم الناس انها فكرت تساعد

رانيه محمد الشيخ،مبارك عليك الشهر..
معناته الحكايات دي منتشرة ..
اتمنى ان تنتبه ليها الشرطة باعلى مستوياتها ..
وقصة عدم اهتمام الناس والمروة وانعدامها دي مشكلة كبيرة !!

Quote: ربنا يخلف عليها في هذا الشهر الفضيل دور الشرطة اكبر من ذلك وتقع في دائرته اختصاصها حماية ممتلكات المواطنين في كل الظروف والاحوال ووضوع الاحتياطات اللازمة للحد من الجريمة بمزيد من الدراسات والاحصاءات لمواقع الجرائم

الزنجي،مبارك عليك رمضان ..
صدقت الشرطة دورها كبير ،ولديها قسم للدراسات ..
عشان كدا البلاغ ضروري جداً.

Quote: ومن هنا نناشد السيد وزير الداخلية للاهتمام بمتابعة مثل هذه الظواهر الاجرامية الخطرة

ومن هنا نناشد حمودة يشوف ليهو حل تاني







رمضان كريم ومشتاقين

Quote: أيها الأخ الكريم : نعم رمضان كريم ولكن كيف تفطر أنت وتصوم على خير وأنت ترمى الأبرياء من رجال المباحث بالمعرفة مع التستر على السارقين والنهابين فى نهارات رمضان زوراً وبهتاناً !!؟ هذه الفتاة المنهوبة لم يتبق لها سوى عرض أموالها ومقتنياتها على الرصيف ومن ثم تصيح على المجرمين أن هبوا وهلموا واسرقوا ... ثم شئ آخر أين دور رصفائك ( الناس ) الذين استنجدت بهم وخذلوها !؟ اذا كان المواطن العادى يلتحف السلبية القاتلة ويفتقر الى المروءة والنخوة فمن أين للشرطى بها ... عليك أن تتذكر بأن الشرطى نفسه هو مواطن سودانى قبل أن يكون شرطياً .. والأهم من ذلك عليك أن تتذكر بأن هذا الشهر هو شهر رمضان ورمضان يأتى مرة واحدة فى العام أما الشرطى فهو معك كل العام فلم العجلة والسبق فى الاساءة والتحقير !؟ .. كل المواساة للفتاة المسروق مالها والجاتها فى مالها سامحتها أليس كذلك ؟

جنابو عباس سلام و رمضان كريم
شكلك بتتكلم عن شرطة زمان

Quote: جنابو عباس سلام و رمضان كريم شكلك بتتكلم عن شرطة زمان

امجد الجميعابى ،مبارك عليك الشهر ولعباس فوراوي ..
ناس الشرطة فيهم الخير زمان وهسي وما مقصرين ،ونحن بنكتب للتنبيه اكثر ..
ونتمنى معالجة القصور ..
وكل مؤسسة ببلدنا نتمناها تكون احسن من الدول المتقدمة علينا.
تحياتي.

Quote: ومن هنا نناشد حمودة يشوف ليهو حل تاني رمضان كريم ومشتاقين

الريس عصام علي ،مبارك الشهر المبارك عليك..
ونحن مشتاقين لشخصك الحبيب.