البلاغة والبيان في غنا الدلوكة والدوبيت والشعر النبطي... تسلية وترفيه

أولا رمضان كريم على الجميع وتصومو وتفطرو على ألف خير
بصراحة لي مدة طويلة بفكر في البوست دا عارفين ليه ؟
مرات بكون بستمع لي في غنا دلوكة أو دوبيت أو شعر نبطي
أو حتى بعض الأشعار الجديدة (ماعارف اسما شنو)
مع إني ما مقتنع بالنوع دا من الشعر
لكن بلقى فيهو مرات صورة بيانية وتعابير بلاغية عجيبة ..
والله لمن أقعد أنقّز براي بس تقول (عوض حمودي) حين طربه

قبل يومين كنت بسمع في أغنية (ست البيت)
طبعا الأغنية دي عموما فيها وصف بديع وفاء عجيب للزوجة
(ست البيت) ـ ما ناس وضاحة ههههههه
وفيها وصف عجيب ، لكن في آخر القصيدة يقول الشاعر

لو كان يوم حبيب واصلي الكرم العريض يوصلي
منها قط خلاف ماحصلي بس ازعاجا لي قوم صلي
ست البيت

نجد في ماهو بالأحمر مدحا بما يشبه الذم
وتخرج من تلك العبارة معان كثير
تزيد في مدحها ..

المهم يا ريت تكون الفكرة وضحت

أها لو الفكرة وضحت كل واحد/ة عجبو بيت شعر ولا مقطع من قصيدة أو أغنية
يجيبو لينا ويشرح لينا العجبو شنو ونحنا بنحاول كمان نطلع معاهو الصور
البلاغية والبيانية الما شافا هو ..

Quote: انا ليهم بقول كلام دخلوها وصقيرا حام انا ليهم بقول كلام

كناية عن شجاعتهم وقوتهم وقتلهم لإعداهم وكثرة الجثث
مما جلب صغار الصقور تحوم في سماء القرية التي دخلوها
-------------------
إضافة :-
فهمت من تصغير الصقر ب(صقير)
ذل وهوان أعدائهم وأنهم لا يستحقون الصقور الكبيرة
التي قيل فيما قيل عنها
سأظل رغم الداء والأعداء كالنّسر فوق القمة الشماء

وما يناسب الصقير في السودان هو (الحدّية) وأعتقد أنها المقصودة في البيت

وين ناس الفن واللغة والأحاسيس المرهفة
منتظرين مشاركاتكم

للمشاركة من خارج المنبر

[email protected]

**

كل عـام وأنت بخـير يا معـتز، وشكراً على النافذة الحلوة والمفيدة في آن، وأرجـو أن أشارك معاك بحاجة مقبولة.. أولاً مثالك عن: دخلوها وصقيرا حكام.. ذكرني عـدة أمثلة مشابهة في الشعر الغنائي بالذات، مـع إنك أشرت لإستخدام التصغير للتحقير.. لكـن من نوع ذلك قول شقيقة البطل ود حبوبة في القصيدة المشهورة: ودحبوبة قام ورتّب الأنصار.. في الكتفية ديك كم شبعن صقار.. وأنا في المقابل أفتكر إستعملت (صقار) للدلالة على الكترة وبالتالي كترة القتلى من الأعـداء. بالمناسبة الأخ محسن خالد مرة أشارة للصورة المذهلة في قولها في نفس القصيدة: في وش المكن رقدوا: التقـول نايمين! فعلاً: شوف الصورة دي، صورة الشهداء وهـم يلقون ربهم فرحين بالشهادة ومطمئنين كما تحكي القصص عن شهداء كرري مثلاً.. برضـو ملاحظة محسن ذكرتني قول محجوب شريف: هادئاً كان أوان المـوت وعادياً تماما.. وتماماً كالذي يمشي بخطوٍ مطمئنٍ كي يناما الخ.. أما حكامتنا فقالت ـــ عوداً لموضوع الصقير! ــ رغـم أنها للأسف كانت تتكلم عن مشكلة قبلية بين أبناء عمومة وليس معركة مـع عدو حقيقي: أزرق دابي النبدة.. تاني أديهم هبدة.. وعشّي الطير في الكبدة..والأمثلة كثيرة..
على فكـرة: أنا جمل كلمتين في الغنا السوداني عندي هـن: وكان تعب منك حناح (في السرعـة زيد).. ودي نفسها تأكيد للجملة السابقة ليها: وتواصل الليل بالصباح، لكن أعجبتني في السرعة زيد دي.. رغـم ورود الرسايل المـع الطيور دي كتير في غنانا زي: يا طير يا ماشي لي أهلنا بسراع وصل رسايلنا: أو كما غنا (بلومنا المغـرد): يا البلوم أرجوك يوم تحلق شيل رسايل الشوق المحرق.. وفي الرجعة قال ليه: شيل رسايلاً مرسولة لي، بلطافة وأرجع تعال.. لكـن مافي زول وصّف للطير يمشي كيف وبكل هذه اللهفة إلا صلاح رحمه الله!.. أها الجملة التانية هي: أنا بيكي ماليني الكـلام.. ودي بخليها بدون شرح وفي الحقيقة كل كلمات الأغنية جميلة جدا جدا خاصة المقطع الأخير دا كلو.. ح أرجع إن شاء الله بصورة خاصة للدوبيت والدلوكة أو الحكامات..

البريدو مالو اتأخر بريدو ياناس

تورية وجناس تام

Quote: مرات بكون بستمع لي في غنا دلوكة أو دوبيت أو شعر نبطي

وطبعا فى شهر القرأن دى أنسب أيام لسماع والتمعن فى أغانى الدلوكه....
لم ولن يخيب ظنى فيك أبدا: مناصرة الإنقلابيين الظالمين لا تأتى إلا من تشوه
فكرى....