يعني مقفول بكلمة مرور؟؟ (توجد دهشة)

طبعاً متاب...

ومن غيرها بت الــ..... دي؟؟

ستكمل عامها الخامس في 24 أكتوبر السنة دي..

حلو؟؟

قايمة ليها في حركة كدا غريبة.. وهي أنها ما بتنوم إلا (بتمثيل) إنها رضيعة ..

يعني تطالب أمها بوضعها وضع الرضاعة الطبيعية..ولكنها طبعاً لا ترضع ولا حاجة..

بس حركة كدا حميمية ومزاج غريب..

- ماما..يلا عشان أنا نعسانة..

- طيب نومي حبيبة

- لكن يا ماما "الشطُر"..

- شطر شنو يا بت؟؟ الفستان دا زاتو من فوق مقفول..

- مقفول؟؟ يعني مقفول بكلمة مرور؟؟

انتهى الحوار...

سؤال:

شفع الزمن ديل...نحن والدنهم ولا عاملين ليهم داون لود يا جماعة؟؟..

ورمضان كريم..

..

أضحك يا أساسي يااااااخ...

الدنيا دي فيها شنو يابا؟؟

كل سنة وإنت وأسرتك الكريمة وكل من تحب بألف خير...

..

.

مقفول

لحين الجاي بعده


وانت الظاهر قفلت على كده

- مقفول؟؟ يعني مقفول بكلمة مرور؟؟

-----------------------------------

هههههههههههه والله دي فايته أهلنا الطيبين


كل عام وانت بخير

أميرنا أمير محمد إدريس..

يا حليلنا يا أخوي..

نحن مقبلين على زمن ديجيتال شديد..

..

.

رمضان كريم عليك..

..

.

علم الله واااااااااااااسع وكذا رحمته يا جمال يا صديقي..

رمضان كريم عليك..

..

.

ههههههههههه مبالغة يا محمود ..

والله فعلا الأطفال عليهم لئامة وقطامة ما تديك الدرب ..!

عندي واحدة هنا يا دوب تمت أربعة سنوات لكن عليها مساخة مع ابوها وامها مبالغة .. وأمها كل مرة تعاين لي بي غيظ وتقول لي .. ما جايباهو من بعيد .. جايباهو من ابوها هههههههه

رمضان كريم ياخ!

تضحك شنو يا ود الصايم ياااااااااااخ؟؟

سجمنا يا أخوي...

الجكس دا أنا خايف يجي زمن ينكرونا حطب..

هسي على قولك ممكن نقول ليهم من أنتم..

لكن بعد شوية لو ربنا أدانا العمر...

ممكن بالراحة الواحدة تقول ليها: يا بتي أنا أبوك

فيكون الرد: سوو وااات؟؟

..

رمضان كريم عليك..

..

.

سلام يا حبيب وكل المتداخلين الحلوين ورمضانكم كريم ..

اطفال العولمة ديل الله بيرضعو القطامة من هم صغار ..
الواحد بقى يخاف يدخل ليهو في حوار مع شافع من عمر عشرة سنين وتحت ..
تلقى الواحد بيقول كلمات كبار كبار ويرميها ليك زي الدرابة ما تقدر تتلافاها هههههه ..

يا حليل ايام زمان (دي معاها مصمصة خشم ) ..

ههههههه

ربنا يحفظها من عين أمها وأبوها وكل المرور الكرام ببركة الشهر الكريم


أمل أبوعبيدة ذات الثلاث سنوات ونصف صاحبتي: إستقبلتهم ذات مساء في مطار جدة
قلت ليها يا أمولة مشتاقين ياخ::
قالت لي مافتنا براااااك وخليتنا في السودان حقكم ده.

ههههههههههه ..
ربنا يحفظها ياخ ..
الليلة أقرالا المعوذات يا محمود .. الاطفال محسودون يا حبيب ..

تحية رمضانية رحمانية...


مثلما نبحث عن الملاذات الامنة في زمن البندقية تبحث صغيرتنا في عالمها السرمدي عن دفء الملاذ...صدر حاني وغطاء من اللول لول...


لها اشراقات الحبور فهي نور وعطر منثور...

Quote: مثلما نبحث عن الملاذات الامنة في زمن البندقية تبحث صغيرتنا في عالمها السرمدي عن دفء الملاذ...صدر حاني وغطاء من اللول لول...

الأستاذ الجليل محمد الكامل عبدالحليم..

كلام جميل وعميق والله..

لكن يا استاذ الأم اللي هي الملاذ دا...يتقاطموا عليها جنس القطامة دي؟؟

أعوج ولا ما أعوج؟؟

لك فيوض من المحبة والتقدير...

وكل سنة وأنت ومن تحب بألف خير..

..

.

ربنا يحفظهم ليك يا دكتور
تعرف ولدي ذو ال 6 اعوام اتعلم كلمة المرور
وبقى يقفل آيفون امه من اخوه بباسوورد غتاتة بس
ويدي الباسوورد لأمه ويقول ليها ما تديها لأخوه
وكان داير يطبق نفس النظرية في الايباد لكن منعته!!
شفع الزمن ده يا دكنور خايفهم يشفرونا بعد شوية وا نلقى طريقة نتفكا ههههه

ربنا يحفظ لك عيالك وكل من تحب يا حبيب...

Quote: خايفهم يشفرونا بعد شوية

والله بختك لكن يا مولانا...يعني لسه ما شفروكم إنتو؟؟

نحن غايتو شبعنا تشفير...بعد كدا إلا يرجعونا إعدادات المصنع..

أو الورشة عطبرة على أفضل الاحتمالات..

الله كريم ..ورمضان مبارك عليكم..

..

.

Quote: الليلة أقرالا المعوذات يا محمود .. الاطفال محسودون يا حبيب ..

صديقي الجميل ود المشرف...

ياخ تحية رمضانية خالصة لشخصك الجميل..

وتحية الصحة والعافية للوالد الشامخ..متعه الله بالصحة ومديد العمر...آمين

أبشرك يا أخوي...زولتك دي عاملة فيها فكي تصدق؟؟

يعني عشان مرة كدا كان عندي وجع حلق..قلت ليها تعالي أعزمي لي

طوالي جات ..علمتها كيف تعزم..لدرجة التفلة ووضع الأصبع والذي منه..وأديتها عشرة ريال "بياض" وكدا..

وأنا أصلاً كنت قاعد أبلع مضاد حيوي قوي جداً أوغمانتين أظن..

أها لما بقيت كويس..طوالي اقتنعت إنها فكي..وبقت تمارس نوع من الإبتزاز اللذيذ..

يعني مثلاً تكون عايزة يفتحوا ليها آيباد ولا لابتوب ولا مصيبة...

طوالي تجي تعزم وتتفتف...التفلة بتاعة متاب النصيحة لله السوائل فيها زايدة شوية..

لكن بحبها والله...بس مرات ممكن تعزم ليك وإنت نائم فيخيل ليك إنه المطرة صبت..

غايتو يا محمد يا أخوي....ود أبنادم دا ما تخاف عليهو...

وكل سنة وإنت طيب يا حبيب..

..

.

Quote: قالت لي مافتنا براااااك وخليتنا في السودان حقكم ده.

عفيت منها بت أخوي...قطامة ذكية جداً...

كيفك يا عُبَد ياخ؟؟

رمضان كريم عليك وعلى أسرتك الصغيرة والكبيرة..

..

.

Quote: اطفال العولمة ديل الله بيرضعو القطامة من هم صغار ..

صدقت والله يا هشام يا أخوي..

الواحد فيهم بس تقول البزازة بتاعتو موصلة في المودم...

رمضان كريم عليك..

..

..

Quote: ما جايباهو من بعيد .. جايباهو من ابوها هههههههه

العزيز ناذر..

بتك أريتها يا يابا تجيب من أبوها الجمال والفن...القطامة ملحوقة..

امبارح بعد الإفطار حكيت لحامد أخوي قصة متاب دي...

قال لي بالحرف الواحد : والله صحي بت محمود تيبيكال...

غايتو... كل زول يرمي فوق التاني..

..

ورمضان كريم عليك..

..

.

محمود يا فنان
رمضان كريم عليك
معي العيال مش حا تقدر تغمض عينييييك ابدا


حفظكم الله من كل شر.

السؤال: السنه دي جده مافيها فطور ولا كيف اتحركوا يا شباب

Quote: السؤال: السنه دي جده مافيها فطور ولا كيف اتحركوا يا شباب

الأخ الحبيب محمد هاشم أبو زيد...

بالنسبة للإفطار..والله علمي علمك..غايتو حاضرين ..بس الجماعة يقولوا عوووك..

كل سنة وإنت ومن تحب بألف خير..

..

.

Quote: سؤال: شفع الزمن ديل...نحن والدنهم ولا عاملين ليهم داون لود يا جماعة؟؟..

يا فنّان
رمضان كريـم
وتصوم وتفطر علـى خيـر إنت والأُسرة

عندي مـحـمّد وردي سنتيـن ونُص
قبل كـم يوم هو صاحـي الـمغرب
ودخلنا ننوم علـى منتصف الليل كدا
فطفينا النّور بدا يغنّـي
أنا كُلّ شويّة أقول ليـهو : ( ششششششش حبيبـي أسكت ونوم )
فـي النّـهاية أنا أدقُس وأفتّـح ، فاستسلـمت ونُـمت
صـحيت بعد ساعة كدا لقيتو لسّا شغال بيغنّـي
قُلت ليـهو : ( إنت لسّأ مدوّر ؟ )
قال لـي : ( ششششششش بابا أسكت ونوم )






عيال آخر زمن

لؤي يا فنان يا جميل...

كيفك أخوي؟؟ أرجو أن تكون بخير..

Quote: قال لـي : ( ششششششش بابا أسكت ونوم )

والله وردي ريحني كيف..حولااااااااااهـ...تستاهل إنت..كيف تسكت زول فنان؟

لا لتكميم أفواه الفنانين..

أرجوك تبلغه تحياتي وإعجابي..

وكل عام وأنتم بخير..

..

.

محمود يافنان

كل سنة وانت طيب ورمضان كريم
دا unconditional love يامحمود
والله مهما اتقاطموا نشوف قطامتن أحلى مافى الكون خاصة وهم صغار.