مهزلة جديدة ياتى بها والى الخرطوم سلع وتخفيضات لا يتحملها المواطن

مهزلة جديدة ياتى بها والى الخرطوم سلع وتخفيضات لا يتحملها المواطن
وجهت الآلية العليا للمعالجات الاقتصادية والاجتماعية نداءً لكافة مواطني الولاية فى اجتماعها اليوم برئاسة د.عبدالرحمن الخضر والي الخرطوم ، دعت فيه المواطنين التوجه الى أسواق البيع المخفض التى إفتتحت بمحليات الولاية للحصول على اللحوم والبيض بأسعار المنتج .
من المؤسف ان نسمع مثل هذه التوجيهات التى تصدر من حكومة البشير هذه التوجيهات تعتبر بداية تحقيق وكشف حقائق هذه السلع التى يتكلم عنها السيد والى ولاية الخرطوم عبدالحمن الخضر .
هذه السلع من اين اتت لتكون مصدر فخر لحكومة البشير وحتي تجد لها مساحة فى الاعلام السودانى و ربطها بالاقتصاد السودانى .
هل سعر هذه السلع التى كشف عنها السيد الوالى هى تعد فى متناول ايدى عامة الشعب , اذا تكلمنا عن هذه السلع نجد ان حكومة البشير بهذه التوجيهات تقتل الشعب فى عدم توفير هذه السلع التى تعد من ابسط الأشياء التى توفرها اى حكومة من منتج البلد المحلى ياتى البشير وحكومته وتعجز فى خفض سعر هذه السلع و خاصة ان السودان يعتبر الموطن الاساسي لهذه السلع , حيث يعتبر السودان من اكبر الدول التى يمر عبر أراضيها نهر النيل و النيل الازرق وانهر اخرى , ياتى اليوم والى ولاية الخرطوم ويعرض سلع مثل اللحوم البيضاء و الحمراء و البيض بانها سلع يتم فيها تخفيض فى سعرها هذا شي محزن للغاية , اذا رجعنا لسعر هذه السلع نجدها بعد التخفيض هى لا يمكن لاى مواطن بسيط ان يتحصل عليها لاسعارها المرتفعة .
مثلا طبق البيض 18 اللف جنيه , كيلوا اللحمة 28 اللف جنيه , كيلوا الفراخ 18 اللف جنيه
هذه السلع هناك اسعار لها خارج هذه التوجيهات هل فرق السعر يدعى الشعب لكي يذهب ويشترى من هذه المعارض .
هناك سؤال من اين اتت حكومة البشير بهذه السلع انها من الدعم والزكاة التى يتحصل عليها البشير من الدول العربية مثل المملكة العربية السعودية ترسلها سنويا للسودان .
تكلم السيد الوالى عن المعالجات الاقتصادية و الاجتماعية , نحن نقول له ان هذه الخطوات او التوجيهات لا تؤثر على الاقتصاد لدى المواطنين ولا تؤثر على الاقتصاد القومى ان مثل هذه المعارض ياتى بها رجال اعمال تابعين لحكومة البشير فى استيراد هذه السلع من الخارج و تقوم حكومة البشير بإعفائها من الجمارك و حيث انها تصل للمواطن باسعار اقل بكثيرمن هذه الاسعار التى حددتها ولاية الخرطوم .
ان سياسة النصب على الشعب مستمر حتي الان و نحن فى هذا الشهر الكريم , المواد الغذائية التى تعلن عنها حكومة البشير سوف تقف عقب حلول عيد الفطر .

فعلاً مهزلة عشان توفر تلاتة جنيه في كيلو لحمة وجنيه في دجاجة وإتنين جنيه في طبق البيض تركب مواصلات بعشرة جنيه

هذه الخدمات لا يستفيد منها إلا من كانت بالقرب منه بحيث لا يكون في حاجة لمواصلات غير ذلك فهي مهزلة ودعاية انتخابية بخداع الناس

الحل يكمن في زيادة العرض في جميع الأسواق ليقل الطلب وبذلك تنخفض الأسعار

لكن التصور الذي تروج له الولاية هو تكريس للندرة وتثبيت لزيادة الطلب وتمديد لطول الصفوف من أجل السلع الضرورية

الاخ Frankly
الخوف تبقي السلع دى جاية من دول الخليج فى شكل زكاة >
لك التحية

الكيزان ديل تفاتيح ، يفكو السوق ويغلوه فجأتن كده تلقى شنو ما عارف الاختصادي بوزع في السكر بي سعر شوية اقل من السوق، تلقى ابن مذقون
المفنس يتاجر في السوق وبضاعته ظهرت من العدم، انهم اخوه في الله يغلوا السوق بي جاي وينزلوا بضاعة رخيصة معروف انها حتتباع سريع
شفت مفتحين كيف؟

الاخ Mutaz Hussien
هم تجار السوق الاسود الاسواق دى ما هى محاربة للغلا

انا بستغرب فى حكومة لايمكنها ان تردع التاجر وتلزمو بى حد معين

لكن طبعآ حكومتنا بتستفيد من عذاب التجار للناس وتجى تطرح ليك حلول

والحلول هى زاتا بتكون عاوزة تنافس بيها التاجر الانت زايغ منو وفى الآخر تلف وتجى تقع فى يد الحكومة

قطع شك التاجر والحكومة على المواطن مافى اتنين تلاتة...

خلاصة الموضوع: الحكومة بتتاجر فى المواطن من خلال مصايبو


بالله دى حالة دى.... !!!!!!!!

الاخ محمد عوض
قبل ردع التجار او اجبارهم على بيع السلع بسعر منخفض على الحكومة ان تدعم السلع و الغلا واذا رجعنا لهذه المجمعات اسعارها لا تفرق كثيرا عن سعر التجار .
لك التحية

Quote: فعلاً مهزلة عشان توفر تلاتة جنيه في كيلو لحمة وجنيه في دجاجة وإتنين جنيه في طبق البيض تركب مواصلات بعشرة جنيه

كلام صاح
الله يستر المواطن الغلبان من ظلم الحكومة و من جشع التجار
السلع بتزيد بمعدل كل مشية للدكان او السوق, لو مشيت اشتريت حاجة و نسيت حاجة تانية قلت ترجع تجيبها بتلقى سعرها زاد
و من دكان لي دكان بتلقى السعر مختلف
غايتو فوضى ما معروف حدها وين



سلامات يا محمد القاضي

Quote: مثلا طبق البيض 18 اللف جنيه , كيلوا اللحمة 28 اللف جنيه , كيلوا الفراخ 18 اللف جنيه

انا غايتو ما مشيت للاسواق دى لكن ان بقت دى الاسعار
من دربى دا وفلليي عليهم ياخى طبق البيض فى البقالات 28 جنية وكيلوا اللحمة
الضان بى 50 جنية والبقر بى 35 جنية وكيلو الفراخ بى 24 جنية ويوم الوقفه عمل 28 جنيه
هنالك فوضى فى الاسعار نعم
هنالك ارتفاع جنونى بحجة ارتفاع الدولار نعم
قبل اليوم اسحاق احمد فضل الله عمل دراسة وجد ان كيلوا اللحمة بى كل احتياطاتو فى المسلخ يكلف 18 جنية للبقر
اتخيل فرق السعر دا كولوا بمشى جبايات واتاوات ورسوم ونفايات وسماسرة وبعد داك التاجر عايز يربح
هناك سياسة تحرير اسعار دى حقيقة لا تقبل الشكوك ولا التدخلات فى تحديد سعر البيع لكن الدولة بما لها من امكانية اعفاءات ضريبية
ومنح التراخيص المجانية يمكنها خلق فرص للسوق الموازى باسعار مخفضة لقطاع واسع من المواطنين
مما يخرج المسؤلين من الحرج فى رفع اعباء المعيشة على المواطن الغلبان يعنى اهم حاجة يكون فى خيارات
الغريبه يا ود القاضى الصغير مثل هذة الكتابات التحريضية صارت لا تجدى فتيلا
لان المواطن عارف الرخيص بى رخصتو يضوقكك مغصتو
والغالى بى غلاتو يضوقكك حلاتو المهم يكون فى خيارات للمضطر غير باغى
اما اموال زكواة الدول لا تدخل لخزينة الدولة لان الزكاة لها مواعينها ودروبها
ومصارفها ياخى قليل من احترام العقول لن يضرك
اخيراً اتفق معك فى عدم قدرة المواطن من الاصل لشراء احتياجاتو الضرورية
والسوق واقف والبلد راكض وسيولة مافى والحالة صعبة وقفاها يلعن وشيها
لكن المعالجه جيرة بوقفة السر قدور والتصفيق
رمضان كريم وتصوم وتفطر على خير
:
:
:
مع التحيات لله الزاكيات

الاخ محمد حمزة
شكرا على المرور نعم المشكلة هى الضرائب و الاتاوى وعدم دعم الحكومة لهذه السلع .

الاخ حسبو
الله يستر المواطن الغلبان من ظلم الحكومة و من جشع التجار
شكرا لكم

come on

Quote: وجهت الآلية العليا للمعالجات الاقتصادية والاجتماعية

ودي منو كمان؟

إنتو الوالي ده من زمان ما قال ليكم، دي الخرطوم، ودي تكلفة معيشتها ..... الما قادر عليها يورينا عرض أكتافو. ..... كلامو واضح مش؟

Quote: اما اموال زكواة الدول لا تدخل لخزينة الدولة لان الزكاة لها مواعينها ودروبها ومصارفها ياخى قليل من احترام العقول لن يضرك

بالله هي أموال الزكاة بتمشي لي مصارفها؟
ما شفناها غير بتمشي المصارف الصحية حقت المسئولين.

يا ناس ....... أولاد بمبة قالوا: المبيشوفش من الغربال .. أعمى.

ده غربال ...... ومقدود كمان.

Quote: من دربى دا وفلليي عليهم ياخى طبق البيض فى البقالات 28 جنية وكيلوا اللحمة الضان بى 50 جنية والبقر بى 35 جنية وكيلو الفراخ بى 24 جنية ويوم الوقفه عمل 28 جنيه

الاخ محمد ابو العزائم
الاخ دكتور محمد على
بفتش فى مكتبتي لقيت هذه المقال عن والى الخرطوم قبل الفيضانات
لكم التحية