سفريات الأسكلة بالرياض .... ما هذا ؟؟؟؟؟؟؟

صباح يوم أمس الجمعة مشيت مع قريبي المسافر السودان للنقل الجماعي بالرياض لشحن عفشه والسفر يكون مساء السبت ، وبعد وصلنا الكاونتر ووزنا الشنط ،طلب الموظف صورة للجواز (مفروض لما يجي يقطع التذكرة ويحجز يكلموهو بذلك) المهم مشينا فتشنا محل تصوير وصورنا الجواز ... وبعدها كان الطلب الغريب العجيب ...... دايرين عشرين ريال ؟؟؟؟!!!!! سألتو العشرين ريال دي لشنو ؟؟؟؟ ولاااااااااااا قال لي انت بتقول في شنو !!!! كررتا السؤال أكتر من خمسة مرات وكل مرة عامل فيها رايح .. وكم واحد سأل برضو ما في اجابة ... بس تدفع !!!!!!!!!!! (طبعاً بدون إيصال ) هسه الزول لو داير يشتكي يشكي لمنو هنا؟؟؟؟ الظاهر محلية الإيصال انقطع فتحت فرع بالرياض ... حسبي الله ونعم الوكيل

ماتدوها ليهو الــ20 ريال قاعد تدفعوا اكتر منها في السفارة وفي المغتربين وعشان الشيشة :) ..يمكن هسع عاوز بيها عصير شعيــر او نعناع المدينة من البكاسي البتجي لافة تحت المخارج دي..


غايتو يا ناس الجزيرة أها منكم يا جلوود ( قال اها وبلّ اصبعو في طرف خشمو ثم غمسو في التراب )



ـــــــ
رضمان كريــم على الصايمين

ولدنا زمااااااااان ....أزييييييييك وكل عام وأنت بألف خير


يا ريت لو الجلدنة بتجيب حاجة كان زمااااااااااااااااان سفرنا أهلنا ...


الرحلة فيها اكنر من 200 مسافر × 20 بكم ؟؟؟؟؟؟؟؟؟؟ الأفكار الشيطانية قطعت البحر وجاتنا

Quote: واشنطن- أ ش أ: يستعل مستشفى في زيمبابوي النساء الفقيرات أثناء الولادة، بتغريمهن خمسة دولارات عن كل صرخة تصدر منهن بسبب الألم خلال عملية الوضع. ونقلت وكالة "أنباء الشرق الأوسط" عن صحيفة "واشنطن بوست" الأمريكية: أن منظمة الشفافية الدولية كشفت عن هذا الأمر "المثير للصدمة" ونشرته عبر مقياس الفساد العالمي الذي تصدره سنوياً. ووفقاً للمنظمة يفرض هذا المستشفى الموجود في زيمبابوي، إحدى أكثر الدول فقراً في العالم، الغرامة على صراخ النساء أثناء الوضع بحجة "إصدارهن لإنذار كاذب" ويبقي المستشفى على النساء اللاتي لا يستطعن دفع الغرامة حتى تتمكن أسرهن من الدفع، كما يتم أيضاً إضافة فوائد إلى الغرامة. وتتجنب الكثير من النساء بالفعل في زيمبابوي ولادة أطفالهن داخل المستشفيات لأن هذه العملية تتكلف 50 دولاراً، وهو مبلغ كبير بالنظر إلى أن متوسط الدخل السنوي للفرد في زيمبابوي يبلغ نحو 150 دولاراً.

لا لا كان كدا عفيناااااااااكم يا ناس الأسكلة

Quote: الأسكله دي حقت منو ؟؟؟

والله يا أخ الفاتح ما عندي فكرة .. لكن بقولو شراكة بين سوانيين وأمير سعودي .. والله أعلم

عمر السلمة سلامات يا الحبيب ورمضان كريم
طبعاً بلا شك الموظف غلطان حتى ولو كان على حق
لأنك من حقك تلقى عندو أوفى رد وأرقى خدمة
ما بيناتنا,,
بخصوص ال 20 ريال دى أولاً أوريك كيف بتم عملية شحن الأمتعة من وإلى
يتم إستلام الأمتعة الشخصية قبل التحرك من الرياض بيوم واحد وقبل الرحلة بيومين
يتم إستلام الأمتعه بحوش الأسكلة بجدة
يتم تحويل الأمتعه من السيارة الجاية من الرياض إلى التريلا الحتدخل الميناء
دا كلوووووو على حساب الأسكلة
نفس يوم الرحلة الساعه 8 ص يتم تسليم التريلات للميناء محملة بأمتعة الركاب
الكلام دا كلو ما بيهمك بشئ لأنو مشكلتك فى العشرين ريال
ــــــــــــ
من هنا تبدأ مرحلة العشرين ريال
شركة منصور المساعد وهى شركة تشغيل بميناء جدة
شركة منصور تقوم بمهمة إستلام الأمتعه وتنزيلها من التريلات ليتم الكشف عنها بواسطة ضباط الجمارك
بعد ذلك تقوم بتحميل الأمتعه داخل حاويات يتم تحميلها إلى داخل العبارة
تم التعاقد مع الشركة التشغيلية بدفع 50 ريال عن كل إيصال عفش
الأسكلة تتحمل 30 ريال والعميل 20 بدلاً عن زيادة تسعيرة الكيلو أو تعويضها فى التذكرة أو ما شابه
يتم توضيح قيمة ال 20 ريال فى إيصال العفش, مش زى ما قلت

Quote: (طبعاً بدون إيصال )

ـــــــــ
ملحوظة: ممكن أرفق ليك صورة من العقد بين الأسكلة وشركة التشغيل بالميناء
كما يمكن إرفاق صورة إيصال عفش من كل فرع بالمملكة موضح بها ال 20 ريال

أتمنى تكون الفكرة وضحت ليك والسلام عليكم ورحمة الله

فعلا سفريات الاسكلة تدهورت وتواجهك عقبات في جدة وسواكن
وتكتشف اشياء لم يعرفوا المسافر بها في مكاتبهم .

يا سلام عليك يا صالح كيجاب ..

الاسكلا تقدم خدمات جليلة ونافعة لشريحة عريضة من اهلنا ..

Quote: Quote: الأسكله دي حقت منو ؟؟؟ والله يا أخ الفاتح ما عندي فكرة .. لكن بقولو شراكة بين سوانيين وأمير سعودي .. والله أعلم

الشركة دي حقت المرحوم سعدالدين عشري السوداني السعودي يادارة سودانية عبدالرحمن جعفر

المشكلة في سواكن .... الله لا وراك البحصل للزول من ضيق النفس هناك

Quote: ملحوظة: ممكن أرفق ليك صورة من العقد بين الأسكلة وشركة التشغيل بالميناء كما يمكن إرفاق صورة إيصال عفش من كل فرع بالمملكة موضح بها ال 20 ريال

شكراً يا أخ صالح للتوضيح ..
ومصدقك والله ما في داعي للصورة ..

Quote: المشكلة في سواكن .... الله لا وراك البحصل للزول من ضيق النفس هناك

غايتو الواحد مشفق على الناس السافرت في رمضان دا ...ونقول ربنا يسهل عليهم التعب المنتظرهم هناك ( تعب شنو ؟؟قول :الموووووووووت) .. الله كريم


تحياتي للجميع

سلام اخونا عمر

يا خوي شالو منك عشرين ريال فتحت بوست !!

كان شالو منك عشرين الف كنت سويت ليك بوردي عديـــــل

سفريات الأسكلة ، ساهمت بفعالية عالية في نقل المسافرين من الرياض وجدة إلى محطات كثيرة في السودان على سبيل المثال وليس للحصر كسلا - خشم القربة - القضارف - مدني ووصولا للخرطوم ، وكان ذلك قبل إفتتاح الطريق الأخر الذي يمر بعطبرة وصولا للخرطوم .

وكماذكر الأخ زمراوي الشركة مملوكة للمرحوم سعدالدين عشري ( السوداني - السعودي) وعلى على ما أعتقد على رأس الهرم نجله والادارة للأخ عبد الرحمن جعفر ذلك الذي أفنى وأخلص في خدمة المسافرين مقابل أرباح هامشية ، تخيل أن تصل للخرطوم بمبلغ (550) طبعا الكلام ده قبل سنوات ويبدو حالياً الأسعار 1250 للذهاب والعودة ، لحظتها كنا نقول ماهي أرباح هذه الشركة الناقلة حيث نحسبها بقيمة ترحيل من الرياض لجدة بمبلغ 135 ريال حسب تسعيرة النقل الجماعي ، والنقل بالباخرة حوالي 250 الى 300 ريال وضف على ذلك قيمة النقل من سواكن حتى الخرطوم ، ناهيك عن خدمات الاسكان في الفنادق ونقل العفش عبر الناقلات لمدن السودان المختلفة حتى وصولا للعاصمة.

من المؤكد الاسعار إرتفعت حالياً ولكن بنسبة معقولة ، الاخفاقات التي تحدث في سواكن مرتبطة بإخفاقاتنا في شتى مناحي الحياة .

هذا والله أعلم ورمضان كريم .

Quote: سلام اخونا عمر يا خوي شالو منك عشرين ريال فتحت بوست !! كان شالو منك عشرين الف كنت سويت ليك بوردي عديـــــل

الأخ خضر رمضان كريم وكل عام وانت بخير ..
لو على العشرين حقتي ما كان فتحت بوست لكن عشرين × عشرات المسافرين ..

تحياتي

Quote: سفريات الأسكلة ، ساهمت بفعالية عالية في نقل المسافرين من الرياض وجدة إلى محطات كثيرة في السودان على سبيل المثال وليس للحصر كسلا - خشم القربة - القضارف - مدني ووصولا للخرطوم ، وكان ذلك قبل إفتتاح الطريق الأخر الذي يمر بعطبرة وصولا للخرطوم . وكماذكر الأخ زمراوي الشركة مملوكة للمرحوم سعد عشري ( السوداني - السعودي) وعلى على ما أعتقد على رأس الهرم نجله والادارة للأخ عبد الرحمن جعفر ذلك الذي أفنى وأخلص في خدمة المسافرين مقابل أرباح هامشية ، تخيل أن تصل للخرطوم بمبلغ (550) طبعا الكلام ده قبل سنوات ويبدو حالياً الأسعار 1250 للذهاب والعودة ، لحظتها كنا نقول ماهي أرباح هذه الشركة الناقلة حيث نحسبها بقيمة ترحيل من الرياض لجدة بمبلغ 135 ريال حسب تسعيرة النقل الجماعي ، والنقل بالباخرة حوالي 250 الى 300 ريال وضف على ذلك قيمة النقل من سواكن حتى الخرطوم ، ناهيك عن خدمات الاسكان في الفنادق ونقل العفش عبر الناقلات لمدن السودان المختلفة حتى وصولا للعاصمة. من المؤكد الاسعار إرتفعت حالياً ولكن بنسبة معقولة ، الاخفاقات التي تحدث في سواكن مرتبطة بإخفاقاتنا في شتى مناحي الحياة . هذا والله أعلم ورمضان كريم .

الأخ ولياب كل عام وانت بخير وتصومو وتفطرو على خير
شخصياً سافرت كتير جداً بالأسكلة وكانو قمة في الأنضباط والإلتزام .. بس عدم رد الموظف لي هو الخلاني افتح البوست دا (الظاهر من الصباح بكونو سألوهو السؤال دا اكتر من مية مرة )

الوضع في سواكن ما ليهو علاقة بالاسكلة .. وزي ما قلت دا إخفاق بلد كاااااااامل
تحياتي