منبر أوانطة ... عايزين بشاشا !!

علم الله، ما تداخلت مع هذا الرجل إلا قادحا فيه و فيما يكتب، لكني الان افتقده كما الوطن !!

رمضان كريم يا مان
ومعك انادي بعودة اخونا الغائب بشاشا الى المنبر

كمال بشاشا - بعيدا عن ارائه التي يتفق و يختلف فيها الناس - مدرسة لغوية متفردة و ركن أساسي لا يستقيم هذا المكان إلا بوجوده !!
مفرداته - على بساطتها - عميقة و غميسة و مؤثرة !!

الله اكرم يا حيدر، تصوم و تفطر على خير
القصة دي بدون الزول ده أبت تتباصر كلو كلو !!
بالله لو في زول عندو إتصال معاه، يربطو و يجيبو : دايرنو حي الزول ده !!

رمضان كريم يا بروف
تقبل الله تعالى صيامكم وقيامكم وطاعاتكم

وكذلك أفتقد صاحب المفردة المتفردة المميزة عثمان محمد صالح
أفتقد صاحب ( التوابيت ) الشهير
صاحب لغة متفردة
يرمي بالكلمتين لا يأبه بهما فيصيرا مثلاً إسفيرياً





_________________

الزعلك كتييييير دا منو لدرجة أن تجيب ليهو بشاشا ذات نفسو ؟؟؟

الله اكرم و تقبل الله من الجميع يا أبا أسيل
و كتر خيرك بتذكيرنا بعثمان محمد صالح، الرجل كما تقول و أكثر .
و الحقيقة إنو الغايبين كتار جدا، المنبر فاقد سوائل منذ أمد بعيد !!

Quote: الزعلك كتييييير دا منو لدرجة أن تجيب ليهو بشاشا ذات نفسو ؟؟؟

أبدا والله !!
بشاشا ذاتو كان جاء بنتداوس معاه !!
الحكاية إنو أخوك بقى لمن يستبيض المنبر، بمشي الأرشيف ... بلقى حاجات تبكي من الضحك !!
ح أجيب أمثلة لمداخلات بشاشية تحمل جينات و بصمات الملك الكوشي !!


Stay Tuned

رمضان كريم يا بروف
لكن خليكـ من بشاشا
ود أختكـ حمور وين ؟؟
فقد كبير للمنبر و الله و بدون مجاملة

الله اكرم يا أبا عبدالله و تقبل الله منا و منكم .
حمور هاجر نواحي الفيس بوك، متواجد هناك بكثرة .
واضح يا خالد إنو المنبر بقى طارد للاقلام العميقة بصورة غريبة جدا و الكلام ده مستمر ليهو زمن، متأكد جدا إنو الفيس بوك ليهو آثر لكن بالتاكيد في أسباب تانية مستغلقة على !!
بعدين ياخي حمور شنو في الصيام ده نحن هسي في رحاب الأمير الكوشي !

كيفك يا بروف
ينعاد علينا فى وطن معافى

Quote: القصة دي بدون الزول ده أبت تتباصر كلو كلو !!

لما تتباصر هنا فى أرض السودان
بتتباصر فى المنبر دا ..
فالمنبر خير إنعكاس لما يحدث على الأرض .

__________

(الأمير الكوشي هو السوداني الدوغري النضيف الذى نتمنى أن نكونه جميعا )

الله اكرم يا ستهم و تقبل الله منا جميعا ...
تأثير بشاشا يا آمنة لا ينكره إلا مكابر، أقول هذا الكلام و أنا اعارض طريقة معالجتو لكثير من الأمور.
الحاجة التانية المؤلمة في غيابو، الطريقة نفسها المشى بيها .
لو عندك إتصال معاه، أصغظو عليه عشان يرجع، الزول ده مكانو هنا ما بملاهو إلا هو !

على بوب و عبدالعزيز
شكرا للدعم و المؤازرة،
الحملة دي إن شاء الله ح تستمر لحدي ما الزول ده يرجع حتى لا يتنفس الجلابة الصعداء !!
---------
بعدين يا عزو ياخي، حمد الله على السلامة ... خبارك لهسي بتحت ؟!!

قووول مشتهيلك دواس يا بروف ساااى ما تشكر لى الراكوبه فى المطر
القضايا التى يثيرها بشاشا لو كانت تعالج بالكلام لانزل الله فيها قرآن يتلى وصار حكماً
يعاقب فاعله ويثاب تاركة ولكن هى معالجات انسانيه المولى عز وجل اثر زوالها والقضاء عليها
بالاستعفاف والتصدق والفضل والعتق والكفارة لمن اراد مع حفظ كرامة الانسان الذى كرمة الله وخلقه فى احسن تقويم
بشاشا ظل يتهم الناس ويرمى عليهم اسقاطاته النفسيه وكانه يشتهى ان يتفاخر بذلك ولكن خجول ومستحى من ذلك
فى وقت ذابت وانصهرت كل تلك الفوارق والايماءات وصارت حكى ما تحت الجلسات خشية لوم المجتمع واحياناً القانون أى تطور اكثر من هذا يتوق اليه هذا البشاشا
لتحير شخص له كل الحقوق وعليه كل الواجبات بشاشا ظل ينكأ الجروح بدواعى تحرير الاخر كارهـ نفسه وتقويم هذا لانه مستلب وهكذا دواليك والويل لك ان رمى بك
حظك العاثر تحت ارجله سيدوسك ويتفرغ لاقتيالك فله تكاتيك وصتوف من القول الجارح والمنفر والمستفز قال جلابا قال
يا بروف انت زول عميق قول ليك كلام غير دا
ورمضان كريم وكل عام وانت بالف خير
:
:
:
:
مع التحيات لله الزاكيات

رمضانك كريم يا بروف أمين..و تصوم و تفطر على خير
بالرغم إختلافي 180 درجة مع خط بشاشا
لكن برحب بر عودته و عودة كتاباته المستفزة :)

Quote: لما تتباصر هنا فى أرض السودان بتتباصر فى المنبر دا .. فالمنبر خير إنعكاس لما يحدث على الأرض .

رمضان مبارك علي الجميع
استاذ امين سلام ـ
مرحباً بعودة أخونا بشاشا
وماليهو حق في الغياب ده
أمنة دي كلامها خلاصة الخلاصة

مشتاقين يا حبة

مشتاقين يا أمير الكوشيين
أرجو أن تستجيب لندائنا

الله اكرم يا محمد حمزة و أسال الله أن يتقبل منا جميعا صالح الاعمال

Quote: قووول مشتهيلك دواس يا بروف ساااى ما تشكر لى الراكوبه فى المطر القضايا التى يثيرها بشاشا لو كانت تعالج بالكلام لانزل الله فيها قرآن يتلى وصار حكماً يعاقب فاعله ويثاب تاركة ولكن هى معالجات انسانيه المولى عز وجل اثر زوالها والقضاء عليها بالاستعفاف والتصدق والفضل والعتق والكفارة لمن اراد مع حفظ كرامة الانسان الذى كرمة الله وخلقه فى احسن تقويم بشاشا ظل يتهم الناس ويرمى عليهم اسقاطاته النفسيه وكانه يشتهى ان يتفاخر بذلك ولكن خجول ومستحى من ذلك فى وقت ذابت وانصهرت كل تلك الفوارق والايماءات وصارت حكى ما تحت الجلسات خشية لوم المجتمع واحياناً القانون أى تطور اكثر من هذا يتوق اليه هذا البشاشا لتحير شخص له كل الحقوق وعليه كل الواجبات بشاشا ظل ينكأ الجروح بدواعى تحرير الاخر كارهـ نفسه وتقويم هذا لانه مستلب وهكذا دواليك والويل لك ان رمى بك حظك العاثر تحت ارجله سيدوسك ويتفرغ لاقتيالك فله تكاتيك وصتوف من القول الجارح والمنفر والمستفز قال جلابا قال يا بروف انت زول عميق قول ليك كلام غير دا ورمضان كريم وكل عام وانت بالف خير : : : : مع التحيات لله الزاكيات

يا عزيزي، المسألة "غير" كما يقول أهل نجد !!
أول سطر كتبتو في البوست ده، إني ما تداخلت مع بشاشا إلا مختلفا معه و قادحا فيه و في رأيه، لا أذكر إننا اتفقنا في قضية أو كنا في خندق واحد - على رأيو - في أي بوست، لكن هذا لم و لن يمنعني من رؤية الجانب المشرق و كونه علم من أعلام هذا المكان، و لا من معرفة أن كثير ممن يقرأ و يكتب في هذا المكان مؤمنون بجدوى القضايا التي يتحدث عنها و طريقة طرحه لها .
هذا البوست يا عزيزي ليس لمحاكمة أراء بشاشا سلبا أو ايجابا، هذا البوست محاولة للضغط على بشاشا للعودة و الكتابة مرة اخرى، عندها يمكنك طرح رأيك فيما يقوله و كيف يقوله و ستجدنا معك من المؤازرين.

الله اكرم يا زياد و تقبل الله منا جميعا صالح الأعمال

Quote: رمضانك كريم يا بروف أمين..و تصوم و تفطر على خير بالرغم إختلافي 180 درجة مع خط بشاشا لكن برحب بر عودته و عودة كتاباته المستفزة :)

شكرا لاختصار البوست في سطرينك ديل ، كفيت و وفيت .
-----------
و عليكم السلام يا عزيز و رمضان كريم نسال الله القبول

Quote: رمضان مبارك علي الجميع استاذ امين سلام ـ مرحباً بعودة أخونا بشاشا وماليهو حق في الغياب ده أمنة دي كلامها خلاصة الخلاصة

نرجو من كمال الاستجابة لنداءاتنا ...

سئيلي الله بالاكتر يا حسبو ...
عليك الله أسال مورتا قول ليه قبل يومين أنا قلت ليه شنو في الماسنجر !!
غايتو لو الحاصل لفردتك بقى عليك مشكلة، و لو ما بقى عليك مشكلة !!

امين
المشكلة انو بكري مطنش الموضوع، وحقيقة ما تعرض له بشاشا قبل كسحته الأخيرة جعله محق تماماً في الابتعاد عن المنبر، وبشاشا احد أعمدة سودانيزاونلاين، ولا ينكر ذلك الامكابر

نعم لعودة بشاشا ولكن بشروطه هو لان ما حدث له ليس بالشيء الذي يمكن تسويته بمجرد دعوته للعودة والمنبر يفتقدك (كلام زي تقولو لي ناس مورتا ومن لف لفهم)and#128514;

دكتور ادروب و حبيبنا ناذر و
من خارج الأستديو الأخوان : عبده دبنقا و أيمن أبو عجاجة
شكرا على الدعم و المؤازرة ... و معا لعودة بشاشا

Quote: امين المشكلة انو بكري مطنش الموضوع، وحقيقة ما تعرض له بشاشا قبل كسحته الأخيرة جعله محق تماماً في الابتعاد عن المنبر، وبشاشا احد أعمدة سودانيزاونلاين، ولا ينكر ذلك الامكابر نعم لعودة بشاشا ولكن بشروطه هو لان ما حدث له ليس بالشيء الذي يمكن تسويته بمجرد دعوته للعودة والمنبر يفتقدك (كلام زي تقولو لي ناس مورتا ومن لف لفهم)and#128514;

يا صادق، زي ما أشرت سابقا، الطريقة المشى بيها بشاشا كانت مؤلمة جدا، بشاشا تعرض لهجوم شخصي طال أسرتو و الكلام ده انتقدناه و وقفنا ضدو في لحظتو رغم وقوفنا ضد بشاشا و رأيو طيلة البوست الكان مستمر لزمن طويل جدا ....
كمال لغتو عنيفة جدا لكن ما بهبش أسرتك و لا بجيب ليك سيرة أهلك، على الأقل ما متذكر ليه حاجة زي دي !!
بالنسبة لبكري و تدخلو، بكري ما قاعد يتدخل إلا بالحذف و ما بحذف إلا تتصل بيهو و تعترض على حاجة محددة...
المحل ده ما فيهو قانون و لا لوائح غير صلعة بكري قدس الله سرها ... يبقى قصة بكري و ما بكري دي أنساها عليك الله .
ما عارف عودة بشاشا بشروطو دي مقصود بيها شنو، بشاشا ذهب مغاضبا !! و الحصل ليه هنا ما كان هين، لكن يا صادق هو ما أول ولا آخر عضو يحصل ليه كده، المسأله دي بتتكرر بصورة شبه يومية و بدرجات متفاوته، يبقى حلها عايز ثورة شاملة ...جزء كبير منها اننا نمرن رقبتنا على الحوار و القدرة على تقبل الرأي الاخر مهما كان قاسيا، و جزء منها إنو تفعل اللوائح و القوانين و ده كلام أسهل منو حل مشاكل السودان ذاتو عليه من الله ما يستحق !!
لو كان عندنا حاجة نقدمها لعودة بشاشا غير المناشدة كنا عملناها ...نحن مراهنين على إنو يفهم إنو رغم الخلاف في الرأي و في أشياء أخرى، إلا اننا مثمنين مشاركتو و تاثيرها و عايزنو يرجع !!
------------
بالجمبة كده ... عايز أثمن مداخلتك و روحك العالية دي .... أعلم ما بينك و بين بشاشا ... أن تتداخل بكلامك الطيب ده عنو و عن حقو في إعتذار و العودة بشروطو... فدي لا يلقاها إلا من هم على سماحة نفسك و طيب خصالك .

قلت إنو بشاشا مدرسة لغوية متفردة و ركن أساسي لا يستقيم هذا المكان إلا بوجوده و إنو مفرداتو - على بساطتها - عميقة و غميسة و مؤثرة !!
ح أجيب نماذج لمداخلات لبشاشا فيها مفرداتو العجيبة دي، و طبعا غني عن القول إني ما موافق على ما فيها من أراء !!

أيام كاس أفريقيا، واحد من الاخوان فتح بوست مستاء من بوستات فتحها البعض متمنين هزيمة المنتخب المصري، بشاشا جاء كتب ليه :


عييييييييييييييك!

وقع ليكم كلامنا؟

اهو ده، واحد من ابرز زعامات اليسار الجلابي الممصر، في المنبر ده، يتاوه بلاخجلة لتمني بعضنا الهزيمة لمنتخب الخديوية!

قال مصر وقفت مع "استقلال" السودان، قال!

امنت بامون!

كيف ياخلق، مستعمرتنا، الغازية، مصر، الخديوية، تقف مع استقلال السودان منها؟

كيف، بس بالجلابي كده؟ زي ما جراقيس الجلابة، بفكرو بذات طريقة تفكير الجلابة، جراقيس الخديوية كذلك، يرون الوجود بعدسات لاصقة، مصرية!

انا اتفهم كلام زي ده من هيكل مثلا، ولكن، ان يصدر مثل هذا الكلام من فم جلابي، او كمان "تقدمي"، "مستنير"، مش كوز من كيزان البنا، فهذا ما يدعو لتامل، كلامو، او كلامنا، في حتة، "استغـــــلال" الزناجرة، هذا!

كلامنا، الي هذا التاريخ، السودان لم ينل استقلاله، والي هذا التاريخ، السودان يرزح تحت نير الاحتلال المصري، بما فيه الاحتلال المادي المباشر، لاراضيه، في حلايب مثلا!

اما الاستعمار الثقافي، الامبريالي، حتي لوعي "الزناجرة" فيكفي ترهات هذا المستلب، طفل انابيب الاحتلال المصري، كجلابي!

Quote: ما عندك سالفة يا بروف بالله خليه يجى بعد رمضان . لا جدال ولا رفث

يا طه ياخي ... حج هو ؟!!

ايميل عميق جدا عن الموضوع من الاخ أحمد كرار :

Quote: To: amin suliman Sent: Sunday, July 14, 2013 5:18 PM Subject: بشاشا اخونا امين السلام عليكم دائما بوستاتك تخلينى اتفاعل مع المنبر و رمضان كريم. موضوع بشاشا ده موضوع شائك تخيل ، والكلام عنو كتير ، من زمان متابع كتاباتو وبتخلعنى المفردات المميزة قدر مابخلعنى العنف اللفظى والنبز مع انو مصر انو بشاشا لايشتم ، ده من ناحية شكل الكتابة. من ناحية المضمون ، المحتوى بتاع الكتابة ماساهل وقضية صعبة وعميقة :-) ، بشاشا بتناول قضية واحدة حسب نظرو، لكن هى فى الاصل قضايا ، بتكلم عن السودان الحالى الاستلاب واسبابو ود بخليهو يرجع لكلامو عن سيادة الجنس الاسود فى فترة من الزمان وانو اصل الدين هو الحضارة الكوشية وليست الاديان الابراهيمية. انا بزعم انو فى جزء عاقل فى كلامو وجزء مجنون عديل كده ، الجزء المجنون بذكرنى بالزول بتاع دان براون فى رواية الرمز المفقود (lost symbol) الزول نسيت اسمو بس معارف القدماء والرموز القديمة سيطرت عليهو ولعبت فى راسو وخلتو مجنون رسمى.وبشاشا سيطرت على راسو امجاد حضارة كوش. الجزء العاقل: قد لا تتفق معاهو لكن فى النهاية كلام يؤخذ ويرد منه، هو كلامو عن الاستلاب فى السودان، والاستلاب المصرى هو فى رأيى حقيقة وانحيازنا للعروبة مقابل فرارنا من الافريقية واتجاهنا شمالا فى حين انو ممكن نتجه شرقا للهضبة او غربا لشاد او اى حتة ، ولى د النور حمد فى الهضبة والسهل كلام جميل عن الاغتراب عن الاصل. تانى من الكلام العاقل برضو ونتيجة للفات ، عنصرية الشماليين النيلين والاوسطين (نحنا) الاثنية تجاه القبائل غير العربية وده كلام كتير وداير تفصيل اكتر و كتابة كتيرة ما بقدر اكتبا، اثار هذه العنصرية على التهميش الاقتصادى والاجتماعى والسياسى وما جره من ويلات. نجى لى كلام الجن، التطرف فى رد كل الفضائل للحضارة الكوشية وكأنو العالم كان قاعد سااااى فى الزمن القديم ، ينسب الاسلام للكوشية ويقول عن اسلامنا الحالى اسلام القرن السابع فرزا له عن الدين القديم ، وينسب الحركات الثورية كالمهدية لحركة تاريخ كوشية وينسى ان المهدى كان مسلما اسلام القرن السابع وان خليفة المهدى كان خليفة للصديق وليس لى اوزريس، ان الاثنين كتبوا انسابا تصل لمحمد صلى عليه الله ، نبى اسلام القرن السابع ، وهو اذ يبرر بقوله ان المهدى وخليقته كانا واعيين بضرورات الزمان والناس لذا وضعوا هذا التصور ينسى ان يخبرنا كيف تيقن ان المهدى وخليفته اضمرا ثورة افريقية واظهرا ثورة اسلامية سنية رتبت الخلفاء على نهج اهل السنة؟ ومات المهدى واول حرب بعده كانت ضد الحبشة قلب افريقيا بدعوة الفتح الاسلامى من خليقة الصديق. بعض اوهامه عن بكة وقبلى لا تسعف. من كلام الجن نفى العروبة جملة عن السودان وثقافتها ووصفها بثقافة المستعمر وكأن بطانة اب سن ودوبيتها العربى وبادية كردفان واشعارهم العربية وبقارة السودان هم نزلوا بغتة على ارض السودان واستعمروه. يابروف الكلام كتير وانا مابصبر على الكتابة، معك ننادى بعودة بشاشا

شكرا يا أمين محمد سليمان
المنبر فعلا دون طعم ولا رائحة

حبيبنا زمراوي ... بشاشا عندو نكهة مختلفة... بدء من القضايا البتكلم عنها و ليس إنتهاء بمفرداته العجيبة ... وجودو مهم و ضروري في هذا المنبر الظالم أهله !!

اخوانا عادل نجيلة، سلام ياخي و رمضان كريم

Quote: أخي الفاضل البروف أمين محمد سليمان .. لك التحايا و رمضانكم أكرم بعد قراءتي لهذا البوست أتصلت على صديقي بشاشا ونوهت له على هذا البوست وأن القوم يفتقدون كتاباته هذه الأيام ولكن مع الأسف كان ردّه بأنه أوقف التعامل نهائيآ وبإختياره مع موقع سودانيزأون لاين دوت كوم وأنه بصدد أخذ حتى مكتبته كاملة من الموقع ومن ثم مسحها نهائيآ وأنه يعكف حاليا لإنشاء منبر خاص بكتاباته ومناقشتها مع الحريصين في إستجلاء الحقائق التاريخية فيما يختص بأرض السودان وحضاراته القديمة كما أنه يجزل لك الشكر في إستذكاره و إستحضار كتاباته في مثل هذه الإيام وتقبل فائق إحترامي وتقديري.

شكرا على اتصالك بكمال و تبليغو فقدنا ليه هنا، و إن كان كلامو كلام محبط و قرارو في غاية السوء !!
----------------------

Quote: احسن له اخي عادل فمنبر سودانييز اونلاين اصبح عبارة عن بالوعة كبيرة ملئة بكل قاذوارت الفاقد التربوي , ولقد هجرته كثير من الاقلام الامينة الصادقة ولقد فقد بريقة زمنا طويلا والامر بيد بكري ابوبكر لاصلاح وعودة كل الاقلام النيرة.

الأخ شوقي، المنبر فعلا في النازل مافي شك، لكن وصفك للمنبر بانو ( بالوعة كبيرة ملئة بكل قاذوارت الفاقد التربوي) وصف مجحف و مسئ !!

خبر مؤسف مغادرة بشاشا للبورد نهائيا وكمان تعتيل مكتبه معاهو
يا رفيق السلاح ده قرار يصعب هضمه
خليك بالبيت الكبير
ولو رحلت بالجد ادينا العنوان وماتبخل بيهو علينا ... وتبقى علينا قصة بتاع كريستال البلح وامام الجامع

-
على الاقل كان تتداخل لو عندك خاطر لمحبيك... زي البروف امين ده ..

والله يا حيدر بشاشا شكلو ما إشتغل بينا شغلة !!
لكن قصة إنو يشيل مكتبتو دي ما أظن تحصل، technically شكلها مستحيلة لانو البوستات بتضمن كتابة ناس تانية ما من حق زول يمسحها ... أو هكذا أظن !!